Wan Spesel Kingdom Nyus Blong Evriwan

¹ !Long Epril 24, yumi stat blong seremaot spesel Kingdom Nyus we i wekemap intres blong ol man we oli stap tingting dip long evri ples! Mesej blong hem i stret long taem blong yumi, be tu hem i impoten tumas. Ol pablisa long evri kongregesen oli soem se oli sapotem mesej ya wetem fulhat blong olgeta, taem oli wantem seremaot long plante taosen man. ?Yu yu stap traehad blong joen fulwan long wok ya?

² Wan saplae blong ol Kingdom Nyus i go long ol kongregesen wanwan, minim se evri pablisa i save kasem samwe 50 traket mo evri paenia i save kasem 250. ?Yu yu seremaot hamas traket finis? Sipos yu no mekem plante wok olsem yu bin wantem blong mekem, ?yu stap tingting long sam rod blong mekem moa, bifo we spesel wok ya i finis long Mei 14? ?Olsem wanem sipos yu mekem wok blong haftaem paenia? ?Maet yu save joen long ol spesel miting blong prij long wik, olsem ol miting blong prij long sapa?

³ Ol elda oli stap jekemgud plan blong kavremap ol teritori. ?Evri haos long teritori i bin gat jans blong kasem Kingdom Nyus ya? Sipos yumi wok wetem fulhat blong yumi, yumi save finisim fulwan teritori blong yumi.

⁴ Maet yu bin kasem moa glad long wok ya, from we plante pablisa oli bin joen long hem, olsem ol nyufala pablisa mo ol yangfala. Yumi hop se fasin glad ya bambae i stap, mo bambae i leftemap tingting blong olgeta evriwan blong visitim bakegen ol man we oli glad blong kasem wan traket. Yumi bin kasem advaes blong raetem ol stret save long ol pepa blong prij, long saed blong ol man we oli soem intres. Lashaf blong Mei i wan gudfala taem blong visitim ol man ya bakegen, wetem tingting blong statem plante nyufala Baebol stadi.

⁵ ?Yumi save talem wanem taem yumi gobak long olgeta? Maet yu faenem i gud blong talem se: “Maet yu rimemba smol traket ya we mi bin livim wetem yu i no longtaem i pas. Mi hop se yu bin gat jans blong ridim mo blong tingting long hem. Naoia, ol man long ples blong yumi oli stap storeyan plante long mesej blong hem, from we hem i tokbaot ol impoten kwestin we olgeta man oli fesem.” Yu save tokbaot sam long ol poen long seken pej, we oli blong pulum tingting blong ol man. Nao yu save askem se: “?Yu ting se yumi mas mekem wanem blong meksua se yumi rere long samting we bambae i kamaot long fyuja?” Wet blong man i ansa. Nao tokbaot sam narafala poen long pej 2 kasem 4 blong Kingdom Nyus. Mo askem man blong mekem wan Baebol stadi, no askem hem blong karem wan long ol buk we yumi seremaot long manis ya.

⁶ Sipos yu bin kasem wok long teritori blong wan narafala kongregesen, yu mas sua blong givim ol nem blong ol man we yu faenem se oli intres, i go long lokol kongregesen. Olsem nao, ol pablisa long kongregesen ya oli save mekem ol visit long ol man ya. Long sem fasin, sipos wan narafala pablisa i givim sam visit long yu, yu mas sua blong gobak kwik long olgeta.

⁷ Spesel wok blong seremaot Kingdom Nyus ya i bin mekem fulap glad i kamaot, mo i pusum yumi evriwan blong traehad moa long wok blong talemaot Kingdom. Yumi save sua se wok ya bambae i karem nambawan frut, mo mekem ol man long evri ples oli save moa long hae nem blong Jeova mo stampa tingting blong hem. (Aes. 12:​4, 5) Moa wok yumi save mekem, moa glad bambae yumi kasem.​—⁠Sam 126:⁠3.