Kam Ol Tija Blong Tok Blong God—Yusum Ol Buklet
1 Evri man we i givim laef blong hem long Jeova mo i stap mekem wok blong hem, i gat wan responsabiliti blong tijim Tok blong God long ol narafala. I kam klia se responsabiliti ya i samting blong tinghevi long hem, taem yumi luksave se Hemia we i gat olgeta paoa long heven mo wol, Hem nao i givim wok ya long yumi blong “mekem disaepol long ol man blong olgeta nesen, mo . . . tijim olgeta.” (Mat. 28:18-20, NW) !Taswe, blong joen long wok blong talemaot gud nyus, yumi nidim blong kam ol tija!—2 Tim. 2:2.
2 Long Ogis, yumi save yusum waes blong yumi blong tij, taem yumi seremaot ol buklet. Yumi save faenem sam gudfala tingting we oli stanap long Baebol insaed long ol buklet, mo mekemrere sam toktok we oli givhan long yumi blong statem wan storeyan.
3 Taem yumi seremaot buklet ya “?God i Rili Kea Long Yumi?” yumi save talem se:
◼ “Mifala i bin go luk plante man we oli stap kolosap long yu, mo mifala i faenem se oli wari long saed blong ol fasin blong brekem loa, kilim man i ded, mo raf fasin, we oli stap kam bigwan tumas. Long tingting blong yu, ?from wanem ol samting ya oli kam wan bigfala problem olsem? [Wet long ansa.] Yumi intres long poen ya se, Baebol i bin talemaot ol samting ya we i stap kamtru tede. [Ridim 2 Timote 3:1-3.] Yu luk we vas ya i talem se ol fasin ya bambae oli kamaot long ‘ol las dei.’ Tok ya i soemaot en blong wan samting. ?Yu ting se i tokbaot wanem samting?” Wet long ansa. Openem buklet i go long pej 22, soem pija, mo tokbaot wan no tu vas blong Baebol we oli stap long pej ya. Putum wan stret taem blong kambak bakegen blong eksplenem from wanem yumi bilif se ol blesing ya oli kolosap.
4 Maet yu wantem yusum rod ya blong storeyan taem yu seremaot buklet ya “Gavman Ya We Bambae i Mekem Paradaes”:
◼ “?Samtaem, yu bin tingbaot wan laef we i no save finis long wol ya?” [Wet long ansa.] Nao openem buklet long pej 3, ridim wan haf blong prea blong Masta, mo makem poen ya se wil blong God bambae i kamaot long wol ya. Biaen, ridim ol narafala tok long haf 1, mo soem se Kingdom nao i rod ya we God bambae i yusum blong stretem ol trabol we oli mekem laef i had tumas. Nao yu save askem man blong karem buklet ya blong 40 VT. Stanemap kwestin ya blong tokbaot nekis taem: “?Bambae Kingdom blong God i mekem wanem blong givim glad long yumi?”
5 Blong seremaot buklet ya “!Yu Yu Save Harem Gud Blong Olwe Long Paradaes Long Wol!” yu save soem ful pija we i stap long fored mo biaen, mo yu save askem se:
◼ “?Yu yu laekem blong laef long wan wol we i fulap long ol hapi man olsem? [Wet long ansa.] Baebol i talem se God i laekem tumas ol man, mo hem i wantem we oli laef blong olwe long glad fasin long wol ya.” Soem pija namba 49, mo ridim wan long ol vas blong Baebol we i stap ya. Nao soem pija namba 50, mo eksplenem wanem we yumi mas mekem sipos yumi wantem laef long Paradaes ya. Talem long man ya se bambae yu kambak mo tokbaot from wanem bilif long Jisas Kraes i impoten tumas.
6 Jeova i glad tumas taem ‘olgeta man oli save luk we yumi gohed moa, from yumi lukaotgud long ol tok we yumi stap tijim ol man long hem.’ (1 Tim. 4:15, 16) Ol buklet blong yumi oli save halpem yumi bigwan, taem yumi stap traehad blong givhan long olgeta we oli wantem tumas blong harem “gud nyus long saed blong taem ya we bambae laef i kam moagud.”—Aes. 52:7.