Tokbaot Trutok Long Ol Man Raonabaot
1 Wan long tufala loa ya we oli hae moa, hemia: “Yu mas laekem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.” (Mat. 22:39) Lav ya bambae i pusum yumi blong serem beswan samting we yumi gat wetem ol man raonabaot long yumi—hemia trutok we yumi bin faenem long Baebol. Ol Wajtaoa mo Wekap! oli talemaot klia, mesej blong trutok we i kamaot long Baebol. Taswe, taem yumi seremaot ol magasin ya long manis Mei, hemia nao wan rod blong ‘tok tru nomo long ol man raonabaot long yumi.’—Efes. 4:25.
2 Yumi save tokbaot Wekap! blong Epril-Jun. Maet yu save stat wetem kwestin ya:
◼ “?Wanem tingting blong yu, sipos yumi save trastem evri man long wol ya? [Wet long ansa.] Tede, yumi no save mekem olsem. ?Yu ting se yumi save trastem hu fulwan? [Letem man i ansa. Nao soemaot tok we i stap long en blong haf 2, pej 3, mo toktok smol long saed blong pija.] Be, i gat wan man we yumi save trastem hem. [Soem stampa tok long pej 7.] ?Yu yu agri wetem samting ya? [Wet long ansa.] Maet yu save finis promes we hem i mekem long Baebol se bambae wol ya i kam wan Paradaes. [Ridim 2 Pita 3:13.] Yumi save bilivim samting ya. I gat plante gudfala risen blong trastem God. Magasin ya i stap tokbaot ol risen ya.”
3 Taem yu stap seremaot “Wajtaoa” blong Mei 15, yu save tokbaot wan samting we i jes kamaot long nyus we i mekem ol man oli wari, nao yu save askem se:
◼ “?Yu ting se i nidim wanem blong mekem yumi harem se yumi rili stap sefgud long laef? [Wet long ansa.] Talem stret, sipos yu rili ting se yumi save trastem ol man nomo blong winim ol problem long wol. [Wet long ansa. Nao ridim Ol Sam 146:3.] Biaen, man blong raetem Sam ya i givim risen long yumi blong bilif long wan gudfala fyuja. [Ridim Ol Sam 146:5, 6.] Haf ya, ‘Trufala Seftaem, Naoia mo Blong Olwe,’ i eksplenem from wanem yumi save trastem Jeova God blong mekem wol i kam moagud.” Askem man blong haos blong karem sam magasin, mo talem long hem se bambae yu kambak blong tokbaot olsem wanem yumi save harem sefgud long laef naoia.
4 Maet yu wantem seremaot “Wajtaoa” blong Mei 1. Ale, yu save yusum fastok ya:
◼ “Plante man oli faenem se i hadwok blong obei long jyos mo long gavman, tufala wantaem. Eksampel, tingbaot samting we i hapen long Yugoslavia, i no longtaem. [Ridim haf 4 long pej 3.] Maet yumi tingbaot se, ?wanem nao stret rod blong folem sipos samting we gavman i askem i agensem loa blong God? ?Yu yu save se Jisas i bin talem sam impoten tok long bisnes ya? [Ridim Matyu 22:21.] Taem Jisas i tokbaot Sisa, hem i minim gavman we i rul long kantri. ?Olsem wanem yumi save folem tok blong Jisas?” Nao talem long man blong haos se bambae yu kambak bakegen blong ansa long kwestin ya, mo askem hem blong mekem sabskripsen.
5 Sipos yu wantem yusum wan storeyan we i sot nomo, yu save traem hemia:
◼ “Plante man oli ting se bighaf blong ol buk we ol man oli pem tede oli fulap tumas long ol pablisiti, seks, mo raf fasin. [Soem Wajtaoa mo Wekap!] Mifala i stap seremaot ol gudfala magasin ya we oli stanap long Baebol nomo. Oli gat fulap save insaed, mo oli tijim yumi blong wosip long God, laekem ol man raonabaot long yumi, mo mekem ol gudfala fasin. Sipos yu laekem blong ridim ol save olsem, mi sua se bambae yu glad long ol magasin ya.”
6 Sipos yumi traehad oltaem blong tokbaot trutok long ol man raonabaot long yumi, yumi save karem bigfala glad i kam long plante man.—Wok 8:4, 8.