!Mi Wantem Statem Wan Baebol Stadi!
1 Plante long yumi oli talem finis ol tok ya, mo i stret blong wantem samting ya. Taem yumi mekem wok ya blong stadi Baebol wetem ol man, yumi wantem kasem mak ya blong mekem sam niufala disaepol. (Mat. 28:19, 20) Be i gat plante long yumi we long ol manis no ol yia we oli pas, oli no kasem spesel glad ya we i kamaot from fasin blong tijim wan man long trutok. Long manis Novemba, ?bambae yumi save mekem wanem long saed ya? Long manis ya, yumi seremaot Save buk. Ale i gud we yumi traehad blong yusum buk ya blong statem sam niufala Baebol stadi.
2 Jusumaot Wan No Tu Wiken: Mifala i pulum tingting blong evriwan blong mekem plan blong tekem taem long manis ya, blong traehad blong statem wan niufala Baebol stadi. Ol brata we oli lidim ol Kongregesen Buk Stadi oli save jusumaot sam wiken we ol pablisa oli save yusum speseli long wok ya. Mo biaen, oli save mekem plan blong evriwan i joen long grup ya, mo traehad tugeta blong visitim bakegen ol man.
3 Long evri miting blong wok blong prij, lukluk bakegen ol samting we yu raetemdaon long saed blong ol man we yu visitim. Ale yu mas visitim olgeta man we oli soem intres, olgeta we oli tekem sam buk no magasin, no we oli kam long miting. Long evri visit we yu mekem, yu mas gat mak ya blong statem wan Baebol stadi.
4 Soem Olsem Wanem Blong Mekem Wan Baebol Stadi: Long ol miting blong prij, i gud blong mekem wan pleplei we i rere gud, blong soem olsem wanem blong statem wan Baebol stadi long taem blong visit. Yu save talem se: “Plante man oli gat wan Baebol, be oli no kasem save se buk ya i ansa long ol impoten kwestin we yumi evriwan i askem long laef blong yumi. [Soem lis blong ol japta blong Save buk, mo ridim nem blong ol japta 3, 5, 6, 8 mo 9.] Yu save stadi long buk ya wan haoa evri wik, ale long sam manis nomo bambae yu lanem plante nambawan samting long saed blong Baebol. Sipos yu wantem jusum wan long ol japta ya, bambae mi glad blong soem long yu olsem wanem blong yusum buk ya.” Sipos man ya i no suagud blong stadi from we hem i bisi tumas, yu save eksplenem se yumi save jenisim taem blong mekem stadi ya i sot moa. Nao soem buklet ya Wanem, mo talem se long 15 no 30 menet evri wik, hem i save stadi long wan smol japta.
5 Sipos yumi evriwan i joen tugeta blong traehad blong statem sam stadi, mo sipos yumi prea long Jeova blong blesem wok blong yumi, !i sua se bambae yumi faenem sam niufala stadi! (1 Jon 5:14, 15) Sipos yu wantem wan Baebol stadi, ating hemia jans blong yu blong statem wan.