?Yumi Tokbaot Wanem Long Ol Magasin?

Wajtaoa Okt. 1

“Plante man oli stap tingbaot sipos ol trabol raonabaot long yumi bambae i finis samtaem, hemia ol trabol olsem faet, raf fasin, stil, mo wok blong ol teroris. ?Wanem tingting blong yu? [Letem man i ansa.] Baebol i talem ol gudfala toktok mo promes we oli mekem yumi harem gud. [Ridim Ol Sam 37:10, 11.] Magasin ya i eksplenem from wanem God i no finisim yet ol trabol we i mekem man i safa.”

Wekap! Okt. 8 (Inglis/Franis)

“Tede yumi luk plante moa famle we i no gat papa i stap wetem olgeta. Baebol i soemaot se Bigman we i Wokem yumi i sore long olgeta ya. [Ridim Ol Sam 146:9.] Wekap! ya i soemaot olsem wanem ol rul blong Baebol oli save givhan long ol mama we oli stap traehad olgeta nomo blong tijim ol pikinini blong olgeta.”

Wajtaoa Okt. 15

“?Olsem wanem yu save eksplenem long ol pikinini mo ol narafala tu, from wanem i gat plante nogud samting oli stap hapen tede? [Letem man i ansa.] Baebol i ansarem kwestin ya: ?Hu i Stamba Blong Ol Nogud Fasin?’ [Ridim 1 Jon 5:19.] Wajtaoa ya bambae i givhan long yu blong save hu ya rabis man ya mo olsem wanem yumi save agensem hem.”

Wekap! Okt. 22 (Inglis/Franis)

“?Yu yu ting se ol prea blong ol lida blong skul mo ol narafala man oli save putum pis long wol? [Letem man i ansa.] Baebol i promes se bambae i gat pis long olgeta ples blong wol long fiuja. [Ridim Aesea 9:6, 7.] ?Yu yu luk we vas ya i tokbaot wan spesel rula we bambae i putum pis long wol? Wekap! ya i soemaot hu nao rula ya mo olsem wanem bambae hem i putum trufala pis long wol.”