Yumi Givim Witnes, Nating Se Yumi No Toktok
1 Ol samting raonabaot long yumi we Jeova i wokem oli no toktok, be oli givim plante save long saed blong ol fasin blong hem we yumi no save luk long prapa ae blong yumi. (Sam 19:1-3; Rom 1:20) Long sem fasin, ol gudfala aksen, Kristin fasin, mo klos mo hea blong yumi we oli stret, oli givim witnes long olgeta we oli wajem yumi, nating se yumi no toktok. (1 Pita 2:12; 3:1-4) Yumi evriwan i mas wantem blong “leftemap tok blong God ya we i sevem yumi, long fes blong ol man,” tru long ol gudfala fasin blong yumi.—Taet. 2:10.
2 ?Olsem wanem ol man we oli no stret gud olgeta, oli save mekem se ol tijing blong Baebol oli kam moa naes? Oli save mekem olsem taem oli letem Baebol mo tabu spirit i lidim olgeta. (Sam 119:105; 143:10) Tok blong God “i wan samting we i laef, mo i stap wok, mo i sap we i sap i winim naef blong faet ya we i sap tu saed.” (Hib. 4:12) Hem i go dip insaed long yumi mo i mekem se yumi naf blong putum ol niufala fasin blong laef. (Kol. 3:9, 10) Tabu spirit i save mekem se yumi karem ol gudfala fasin, olsem kaen fasin, gudfala fasin, kwaet fasin, mo bos long tingting. (Gal. 5:22, 23) ?Olsem wanem? ?Yumi wanwan i letem Tok blong God mo spirit blong hem i wok long laef blong yumi?—Efes. 4:30; 1 Tes. 2:13.
3 Ol Narafala Oli Luk: Taem yumi laef folem ol rul blong Jeova mo yumi traehad blong soemaot ol gudfala fasin blong hem, ol narafala oli luk samting ya. Olsem nao, tingbaot wan man we ol fren blong hem long ples blong wok oli stap jikim hem from we hem i wan sot man. Be wan sista we i wok long sem ofis wetem man ya, i soemaot respek long hem oltaem. Samting ya i tajem hat blong man ya nao hem i askem long sista ya se from wanem hem i defren long ol narafala. Sista ya i eksplenem se hem i gat fasin respek from we hem i wokem ol rul blong Baebol long laef blong hem. Sista ya i tokbaot nambawan hop ya tu long saed blong Kingdom. Man ya i stat blong stadi Baebol mo hem i gohed gogo hem i tekem baptaes. Taem man ya i gobak long ples blong hem, ol famle blong hem oli sapraes long ol gudfala fasin blong hem, mo plante long olgeta oli wantem kasem save long trutok.
4 Nating sipos yumi stap long ples blong wok, long skul, no taem yumi joen wetem ol famle no ol man klosap long yumi, be ol gudfala fasin blong yumi, wetem wok blong prij we yumi mekem, oli save pulum ol narafala blong presem God.—Mat. 5:16.