?Faswan Taem We Yu Prij Long Man, Yu Yu Soem Olsem Wanem Blong Mekem Baebol Stadi?
Taem yu askem blong stadi Baebol wetem man, samfala oli talem se oli no wantem mo sam narafala oli talem se long jos blong olgeta oli stadi Baebol. Oli no kasem save yet se Baebol stadi we bambae yumi mekem wetem olgeta i defren olgeta long Baebol stadi we oli mekem wetem ol narafala skul. Mo se Baebol stadi ya i save halpem olgeta blong lanem plante samting mo mekem olgeta oli harem gud. Taswe, long faswan taem we yu prij long man, i gud yu tekem smol taem blong soem olsem wanem yumi stap mekem Baebol stadi, i bitim we yu askem blong stadi Baebol wetem man. Traem tingbaot: I nogud yu talem se yu wan gudfala man blong kuk mo yu talem se bambae yu jes kambak afta blong givim kakae long hem. !I gud se long taem ya nomo yu givim kakae long hem blong hem i save testem! Traem luk olsem wanem Kingdom Wok Blong Yumi blong Jenuware 2006 long pej 6, i save givhan long yu blong mekem olsem:
“?Yu ting se wan dei ol tok ya oli save kamtru?” [Ridim Aesea 33:24, mo letem man i ansa.] Mi gat wan buk we mi wantem soem long yu we i tokbaot samting ya.” Yu save givim buk ya Baebol tijim long man blong haos, mo tokbaot haf 22 long pej 36. Ridim kwestin we i stap daon long pej ya, mo askem long man ya blong traem faenem ansa taem yu stap ridim haf ya. Taem yu ridim haf ya finis, askem kwestin ya bakegen long man blong haos, mo lesin long ansa blong hem. Ridim wan narafala vas bakegen wetem hem. I gud blong stanemap wan kwestin we yu save ansa long hem taem bambae yu kambak, mo yu mas mekem plan blong kambak luk hem. !Yes, taem yu mekem olsem, yu statem wan Baebol stadi finis!