Statem Storian Wetem Ol Traket

Stat long Jenuware 2018, long fran pej blong Kristin Wok Mo Laef Buk Blong Miting, i gat ol fastok blong prij. Yumi harem plante taem se yumi mas storian wetem ol man we yumi prij long olgeta, i bitim we yumi jes givim buk nomo. Taswe blong givhan long ol pablisa, i gat ol video blong ol fastok we oli soem olsem wanem blong yusum Baebol nomo blong storian wetem ol man. ?Be hemia i min se yumi no moa givimaot ol buk taem yumi prij long ol haos wanwan? !Nogat! Eksampol, ol traket oli wan gudfala tul blong statem storian. Yumi save yusum eniwan long ol rod ya daon, taem yumi yusum ol traket blong storian wetem ol man:

1. Askem ol kwestin long fran pej.

2. Yusum vas we i stap antap long seken pej blong soem ansa we i stap long Baebol. Sipos i gat taem, ridim mo tokbaot sam save we i stap long traket.

3. Givim traket long man blong haos, mo leftemap tingting blong hem blong i ridim ol narafala haf long prapa taem blong hem.

4. Bifo we yu aot, soem kwestin blong haf ya “Yu Traem Tingbaot” mo mekem plan blong tokbaot ansa blong Baebol nekis taem.

Taem yu gobak visitim man, yu ansarem kwestin we yu bin stanemap, mo lego wan narafala kwestin blong yu gobak ansarem. Yu save jusum wan kwestin long websaet o long buklet we i stap biaen long traket ya. Long wan narafala taem we yu luk se i stret, soem long hem buklet ya !Gud Nius We i Kamaot Long God! o wan narafala buk blong stadi we i stap long Tul Blong Tijim Man.