Yusum Gud Maekrofon

OL KRISTIN brata sista oli stap traehad bigwan mo oli spenem plante taem blong go long ol Kristin miting. Oli wantem kasem ol gudfala samting long ol miting ya, taswe ol tok i mas klia blong oli harem.

Long Isrel bifo, i no gat ol maekrofon. Bifo we ol man Isrel oli go long Promes Lan, Moses i toktok long olgeta long levelples blong Moab. I gat plante milian man oli stap. ?Wanem i givhan long olgeta evriwan blong oli harem tok blong Moses? Maet Moses i yusum fasin ya we hem i pasem toktok i go long narafala man we i stap longwe lelebet, nao man ya i talemaot bakegen long narafala man, gogo tok ya i goraon long olgeta laen blong Isrel. (Dut. 1:1; 31:1) Taem ol man Isrel oli stat blong tekem ol graon long wes saed blong Jodan Reva, Josua i singaot olgeta oli kam wanples long fored blong tufala hil ya Gerisim mo Ebal. I luk olsem se laen blong Livae i stanap long flat ples long medel blong tufala hil ya. Nao hem i talemaot ol blesing mo ol trabol we God i save givim long olgeta, mo ol man Isrel oli lesin mo agri long ol tok blong hem. (Jos. 8:33-35) Maet long taem ya oli yusum fasin ya blong pasem toktok i go long narafala longwe, gogo i goraon long olgeta laen we oli stap. Be i sua se ples ya we oli stap long hem tu i wan gudfala ples we i isi blong harem voes blong Josua.

Samwe long 1,500 yia biaen, “i gat plante man tumas oli kam” wanples blong lesin long Jisas long Lugun blong Galili. Nao Jisas i klaem long wan bot, i pul i goaot smol, i sidaon, mo i toktok long ol man we oli stap long sanbij. (Mak 4:1, 2) ?From wanem Jisas i klaem long wan bot blong toktok long ol man? From we taem man i stap long solwota we i kwaet, ol man we oli stap longwe oli save harem voes blong hem i klia we i klia.

Bifo long yia 1900, sipos wan man i wantem toktok i go long wan bigfala grup, hem i mas mekem voes blong hem i strong mo i klia. I no gat narafala rod blong ol man ya oli harem tok blong hem. Be afta long yia 1920, long ol asembli blong ol man blong Jehova, oli yusum ol laodspika mo maekrofon blong mekem voes blong olgeta i bigwan moa.

Ol Maekrofon Mo Laodspika. Ol tul ya oli gud, from we oli laodem voes blong man be oli no jenisim voes mo mekem se i no klia. Oli mekem se man we i toktok i no nid blong singaot strong. Mo tu, i no had blong ol man oli lesin mo oli kasem ol tok blong man we i yusum maekrofon. Oli save putum tingting blong olgeta fulwan long mining blong tok blong hem.

Ol Witnes blong Jehova oli traehad blong gat ol gudfala maekrofon mo laodspika long ol asembli blong olgeta. Long plante Haos Kingdom tu, oli yusum maekrofon mo laodspika blong laodem voes blong ol brata we oli stanap long stej blong givim tok, lidim miting, mo mekem riding. Long sam kongregesen, oli pasem maekrofon long ol man we oli givim ansa long ol miting tu. Sipos kongregesen we yu yu stap long hem i gat ol maekrofon, i gud yu lanem blong yusum gud olgeta.

Sam Stamba Rul. Blong yusum gud maekrofon, yu mas tingbaot se: (1) Maekrofon i mas stap samwe long 10 kasem 15 sentimeta longwe long maot blong yu. Sipos maekrofon i klosap tumas, ol tok blong yu bambae i no klia. Sipos i longwe tumas, bambae i hadwok blong ol man oli harem voes blong yu. (2) Maekrofon i mas stap stret long fored blong yu, i no long wan saed. Yu no mas muvum hed blong yu saedsaed taem yu toktok, be yu lukluk i go stret long maekrofon nomo. (3) Yu toktok wetem moa paoa i bitim taem yu storian, mo yu mekem voes blong yu i bigwan lelebet. Be i no nid blong singaot strong. I isi nomo blong maekrofon i karem voes blong yu i go long ol man we oli stap longwe long yu. (4) Sipos yu harem se yu mas kliarem trot blong yu, no yu wantem kof, no snis, yu tanem hed blong yu i gowe long maekrofon.

Taem Yu Mekem Wan Tok. Taem yu stanap long fored blong maekrofon blong mekem wan tok, wan brata bambae i muvum maekrofon blong mekem i stret long yu. Yu mas stanap stret taem hem i stap mekem olsem, mo yu lukluk i go long ol man we oli stap lesin. Yu putum Baebol mo pepa blong yu long stret ples blong hem long fored blong yu. Mo yu meksua se maekrofon i no blokem yu, blong yu no save lukluk ol pepa ya.

Taem yu stat blong toktok, yu traem lesin long voes blong yu we i stap kamaot long laodspika. ?Olsem wanem? ?Yu harem se voes i strong tumas? ?Yu harem wan narakaen noes we i kamaot wetem sam wod we yu talem? Maet yu mas sevet smol i gowe long maekrofon, ating 2.5 kasem 5 sentimeta olsem. Taem yu lukluk i godaon long pepa blong yu, yu mas lukaot gud se yu toktok yet long maekrofon. Yu mas rimemba se, taem yu toktok mo rid, maot blong yu i mas stret long fored blong maekrofon no i mas stap jes antap long hem, be i no mas stap daon long hem.

Taem Yu Mekem Riding Long Miting. I nogud yu benem hed blong yu i godaon blong ridim Baebol no buk. Yu holem buk i stap antap smol, nao yu save lukluk i go stret long ol man. Ating maekrofon i stap stret long fored blong yu. Sipos i olsem, yu save holem Baebol no buk i go long wan saed. Hemia i min se hed blong yu i mas stap long narasaed blong maekrofon, nao taem yu lukluk buk blong ridim, voes blong yu bambae i go stret long maekrofon.

Bighaf blong ol brata we oli rid long Wajtaoa Stadi, oli yusum wan maekrofon we i stanap hem wan long fored blong olgeta. Hemia i gud, from we i mekem i isi blong olgeta oli pulum win mo blong oli putum paoa long riding blong olgeta. Oli mas tingbaot se riding blong ol paragraf i wan impoten haf blong miting ya. Sipos ol man oli wantem kasem ol gudfala samting long miting ya, oli mas harem ol save we brata i ridimaot.

Taem Yu Givim Ansa Long Miting. Sipos long kongregesen, brata i stap pasem maekrofon long olgeta we oli givim ansa, yu no mas fogetem se yu nidim yet blong tok klia mo strong. Taem yu givim wan ansa, yu traem holem buk we yufala i stadi long hem, no Baebol, i stap long han blong yu. Nao bambae yu lukluk klia ol tok long buk no Baebol, taem yu stap toktok i go long maekrofon.

Long sam kongregesen, i gat wan program we ol brata oli folem blong pasem maekrofon long olgeta we oli ansa. Sipos i olsem long kongregesen blong yu, taem yu leftemap han blong yu nao brata i singaot yu blong ansa, han blong yu i mas stap antap fastaem. Olsem nao, brata we i stap pasem maekrofon i save luk weples yu stap sidaon, mo i save kam kwik blong givim maekrofon long yu. Sipos yu mas holem maekrofon long han blong yu, yu mas rere blong pusum han blong yu from. Yu mas meksua se maekrofon i stap stret long fored blong yu bifo we yu toktok. Taem yu finisim ansa blong yu, yu mas kwik blong givimbak maekrofon long brata ya.

Taem Yu Mekem Wan Pleplei. Taem yu mekem wan pleplei long miting, yu mas tingting rere blong yusum maekrofon. Sipos maekrofon i stanap hem wan, bambae tufala han blong yu i fri blong holem Baebol mo pepa blong yu. Sipos i gat wan maekrofon we yu mas holem long han blong yu, ating bambae yu fri moa blong muvmuv, be maet yu mas askem long narafala we i mekem pleplei wetem yu, blong hem i holem maekrofon taem yu toktok. Nao yu save yusum tufala han blong yu blong openem Baebol mo buk. Yutufala i mas mekem samting ya plante taem, nao hemia we i mekem pleplei wetem yu bambae i lanem gud blong holem maekrofon long stret ples we i isi blong yu yu toktok long hem. Yu mas tingbaot tu, se taem yu mekem pleplei long miting, yu no mas tanem baksaed long ol man we oli stap lesin, antap moa, sipos yu nao yu stap toktok.

Samtaem, pleplei long Miting Blong Kingdom Wok i gat plante man long hem, mo maet oli muvmuv olbaot long stej. Sipos i olsem, ating i gat moa long wan maekrofon. Brata i mas putumrere ol maekrofon ya bifo we pleplei i stat, sipos no, hem i mas givim long olgeta taem oli stap go antap long stej. Taswe, ol brata oli mas mekem gudfala plan. Taem ol brata sista oli lanem ol pleplei long Haos Kingdom, hemia nao gudfala taem blong brata i talem long olgeta olsem wanem blong yusum gud maekrofon. Sipos oli no save yusum Haos Kingdom blong lanem pleplei ya, ating oli save holem wan samting we i klosap sem mak long wan maekrofon, blong oli save lanem stret ples we maekrofon i mas stap long hem. Sipos oli yusum wan maekrofon we oli holem long han blong olgeta, oli mas putum gud afta we oli finis. Oli mas lukaot gud se oli no foldaon long wan rop blong maekrofon taem oli aot long stej.

Long ol miting, yumi tokbaot ol gudfala samting long Baebol we oli save givhan long yumi evriwan. Maekrofon i save mekem se yumi kasem ol samting ya. Taswe, i gud yumi tokbaot stret rod blong yusum maekrofon. (Hib. 10:24, 25) Sipos yu lanem blong yusum gud maekrofon, yu save mekem se ol miting oli givhan gud long yu.