Reregud—Wan Impoten Rod Blong Karem Gudfala Frut Long Ol Visit
1. ?Long wanem rod wok blong ol faswan Kristin i kam bigwan moa?
1 Jisas i rerem gud ol disaepol blong hem blong oli save kam ol man blong talemaot “gud nius blong kingdom” we oli karem gudfala frut. (Mat. 4:23, NW; 9:35, NW) Jisas i trenem olgeta taem oli prij raonabaot long Palestaen nomo. Be bifo we Jisas i go long heven, hem i talemaot se wok ya blong prij we ol Kristin oli mekem bambae i kam bigwan moa, taem bambae oli go long ol man long olgeta ples long wol blong ‘pulum olgeta oli kam man blong hem.’—Mat. 28:19, 20.
2. ?Yumi mas mekem wanem blong obei long oda blong Jisas blong ‘pulum ol man oli kam disaepol?’
2 Blong mekem wok ya, i nidim blong yumi gobak visitim olgeta we oli soem intres long gud nius blong Kingdom blong God, mo tijim olgeta blong oli folem olgeta tok we Kraes i givim finis. Blong karem gudfala frut long ol visit ya, yumi mas reregud.
3. ?Olsem wanem yu save mekem rere rod blong yu gobak luk man blong haos, nating sipos hemia faswan taem we yu prij long hem?
3 Mekem Rere Wan Plan: Sam pablisa, bifo we oli lego man blong haos, oli traehad blong stanemap wan kwestin, mo oli promes se bambae oli gobak bakegen mo tokbaot ansa blong kwestin ya. Ol pablisa ya oli faenem se taem oli yusum ol save long buk ya Baebol Tijim long ol visit, hemia i givhan long olgeta blong statem wan Baebol stadi.
4. ?From wanem yumi no mas wet blong ol niufala magasin oli kamaot bifo we yumi gobak blong mekem visit?
4 Long wan manis, yumi stap kasem wan niufala magasin nomo, be hemia i no min se yumi mas wet long nekis manis blong gobak luk man blong haos mo givimaot ol niufala magasin long hem. Yumi save faenem rod blong pulum intres blong hem taem yumi tokbaot sam save we oli stap long ol magasin we hem i gat finis.
5. ?From wanem i gud blong yumi gat wan mak long tingting blong yumi taem yumi gobak blong luk wan man?
5 ?Yu Wantem Mekem Wanem?: Bifo we yu gobak luk wan man, i gud yu tekem taem blong lukluk bak long ol samting we yu bin raetem long saed blong hem, mo luk wanem mak we yu yu wantem kasem. Eksampol, maet yu wantem tokbaot wan poen long magasin we yu bin lego wetem hem long laswan visit blong yu. No yu save givim wan narafala buk no magasin we i laenap wetem samting we yu bin tokbaot long laswan visit. Sipos yu bin putum wan kwestin, bambae yu wantem tokbaot ansa blong kwestin ya. Taem yu tokbaot wan vas we i sapotem poen we yu stap tokbaot, yu mas traehad blong ridim vas ya stret long Baebol.
6. ?Wanem mak blong yumi taem yumi gobak blong luk wan man?
6 Mak Blong Yumi: Mak blong yumi, hemia blong statem wan Baebol stadi. Wan brata i gobak blong luk wan visit, nao hem i askem long man ya sipos hem i wantem stadi long Baebol, be man ya i no wantem. Brata ya i gobak wetem ol niufala magasin mo i talem long hem, se: “Taem mifala i storian long man tede, mifala i stap ansa long wan kwestin long saed blong Baebol.” Afta we man ya i talem tingting blong hem, brata ya i ridim wan vas blong Baebol mo i ridim wan haf we i save givhan long man ya, long buk ya we yumi stap yusum blong mekem ol Baebol stadi. Rod ya i lidim hem blong statem wan Baebol stadi.
7. Olsem wanem fasin blong reregud i bin halpem yu blong statem wan Baebol stadi?
7 Sipos yumi tekem taem blong reregud ol visit blong yumi, traehad blong yumi i no blong nating nomo. Glad blong yumi bambae i kam bigwan moa, mo yumi save gat janis blong halpem “olgeta we oli stret blong kasem laef blong olwe,” blong oli wokbaot long rod blong laef.—Wok 13:48, NW.