Gobak Luk Olgeta We Oli Soem Smol Intres
1 Tede, plante long yumi oli stap long trutok from we wan pablisa i bin luk se yumi intres smol long gud nius blong Kingdom. Nao, wetem longfala tingting, hem i kambak luk yumi—ating i mekem olsem plante taem—blong mekem intres blong yumi i kam bigwan moa. Long sem fasin, yumi mas gobak luk olgeta we oli soem smol intres. Yes, fasin blong gobak luk ol man i haf blong wok blong yumi blong “pulum” ol man oli kam disaepol blong Kraes.—Mat. 28:19, 20.
2 Luksave Intres: Nating sipos wan man i no tekem magasin no buk, be fes blong hem, voes blong hem, no toktok blong hem i save soemaot se hem i intres smol long ol tok blong Kingdom. From samting ya, i gud blong gobak luk man ya. Wan brata i gobak luk wan man blong faef wik, be hem i no givim wan buk no magasin long hem. Ale, long namba sikis taem, man ya i agri blong karem wan buk, mo biaen brata ya i statem Baebol stadi wetem hem.
3 Sipos yu kasem save se man i intres smol, yu mas gobak kwiktaem, ating sam dei nomo biaen. Yu no mas givim janis long “Setan” blong i tekemaot ol sid blong trutok we i stap finis long hat blong man ya. (Mat. 13:19) Sipos yu mekem plan wetem man ya blong gobak long wan stret taem, yu mas holemtaet promes blong yu.—Mat. 5:37.
4 Taem Yu Prij Long Rod: ?Yu yu traehad blong gobak luk ol man we oli soem intres taem yu prij long olgeta long rod mo taem yu tekem janis blong prij long enikaen man? Taem yu finisim storian blong yu, yu save talem se: “Mi mi glad tumas long storian blong yumitu. ?Mi mi save faenem yu weples, blong yumitu save storian bakegen?” Sam pablisa oli givim namba blong telefon blong olgeta long ol man we oli intres, sipos oli luk se i stret blong mekem olsem. Mo oli askem long olgeta blong olgeta tu oli givim namba blong telefon blong olgeta. Sipos ol man oli luk we yu yu stap stanap long sem ples oltaem taem yu stap prij long rod, maet bambae oli glad nomo blong givim namba blong telefon blong olgeta long yu wetem adres blong olgeta. Be sipos oli no wantem talemaot olsem wanem yu save faenem olgeta bakegen, yu save gohed yet blong traem mekem intres blong olgeta i gru long nekis taem we yu mitim olgeta long rod.
5 Sipos yumi planem ol flaoa, yumi putum wota long olgeta mo lukaotgud long olgeta, nao yumi luk se oli gru gud, ale, yumi kasem bigfala glad. Long sem fasin, yumi save kasem bigfala glad taem yumi gobak luk ol man mo givhan long olgeta blong oli gru long saed blong spirit. (1 Kor. 3:6) Yu mas putum mak ya blong gobak luk olgeta we oli soem smol intres nomo.