Yusum Ol Buklet We Oli Talemaot Hop Blong Yumi Long Kingdom
1 Taem yumi luk olsem wanem ol profet tok blong Baebol oli stap kamtru, samting ya i mekem yumi glad tumas long hop blong yumi long Kingdom, mo yumi wantem talemaot hem long ol man we oli wantem lesin. (Luk 6:45; Rom 12:12) Ol buklet we bambae yumi yusum long wok blong prij long manis Julae hem i wan rod we yumi save serem hop blong yumi long Kingdom wetem ol narafala olsem we Jisas hem i talem.—Mat. 24:14.
2 Yumi gat plante naesfala buklet we oli gat plante save insaed we yumi save jusum, ?be weswan long olgeta i stret long nid blong ol man long teritori blong yumi mo we oli save pulum intres blong olgeta? Blong yusumgud ol buklet ya, fastaem yumi mas save wanem i stap insaed long olgeta. Sam tok we oli kam biaen bambae oli givhan long yumi long samting ya.
3 Gavman Ya We Bambae i Mekem Paradaes: Taem Jisas i stap long wol, Kingdom blong God hem i stampa tok blong hem taem hem i prij. Buklet ya i soemaot se Kingdom hem i wan trufala gavman mo olsem wanem bambae hem i save finisim olgeta trabol we oli stap mekem laef blong man i had tede.
4 !Yu Yu Save Harem Gud Blong Olwe Long Wol!: Hem i eksplenem from wanem God i mekem man mo olsem wanem yumi save haremgud blong olwe long wol. Ol pija mo ol smol tok we oli stap insaed long buklet ya oli blong givhan long ol yangfala mo ol man we oli no save rid gud. Yumi save yusum tu blong talemaot ol stampa tijing blong Baebol long ol man we sora blong olgeta i fas.
5 The Divine Name That Will Endure Forever: Buklet ya i stap tokbaot nem blong God olsem wanem Baebol mo histri oli soem mo i soemaot from wanem i impoten long ol Kristin blong save mo yusum nem ya long wosip blong olgeta.
6 “Look! I Am Making All Things New”: Buklet ya i soem wan pija long saed blong paradaes mo hem i bildimap fasin tangkyu long Baebol mo long Hemia we i wokem yumi. Afta we hem i tokbaot from wanem God i letem ol fasin nogud oli stap, hem i makem tri stampa tijing blong Baebol: ransom, laef bakegen, mo Kingdom. Buklet ya i gat sam kwestin tu long stampa blong ol pej, we i mekem i isi long yumi blong mekem Baebol stadi long hem.
7 Should You Believe in the Trinity?: Plante man oli save talem se oli bilif long Triniti, be oli no gat sem fasin blong kasem save long hem. Buklet ya i stap ansa long sam kwestin olsem: ?Wanem ya Triniti? ?Baebol i tijim hem? ?Jisas Kraes hem i God ya we i gat olgeta paoa mo hem i haf blong Triniti? ?Wanem ya tabu speret, mo olsem wanem hem i wok?
8 Ale taem yumi jusum finis wanem kaen buklet bambae yumi yusum long wok blong prij long ol haos wanwan mo taem yumi gat jans blong prij, i gud blong yumi luklukbak long ol haf we oli stap long las pej blong Kingdom Wok Blong Yumi. Long ples ya yumi save faenem sam smol tok we oli save givhan long yumi taem yumi seremaot ol buk blong yumi mo taem yumi mekem visit wetem tingting blong mekem intres blong man i gru mo statem wan Baebol stadi.
9 Plante taem, nating se yumi stap prij no yumi holem ol jans blong prij, wan long olgeta buklet ya hem i samting we yumi nidim blong givim wan gudfala wetnes. Be, yumi mas mekemrere fastaem, yumi mas gat plante buklet, yumi mas save wanem i stap insaed long olgeta, mo yumi mas gat fasin luksave. !Bambae Jeova i blesem yumi taem yumi wok strong long minista wok blong yumi mo plante moa man bambae oli save glad wetem yumi long hop blong Kingdom!—Wok 13:47, 48.