Akseptem, Mekem i Wok, Mo Haremgud Long Tok Blong God
1 Plante milyan man oli gat wan Baebol, be plante oli no akseptem hem olsem Tok blong God, bighaf blong ol man oli no stap folem ol waes advaes blong hem, mo smol nomo oli stap kasem gudfala samting from hem. Be ol man blong Jeova oli bilif fulwan se hem i Tok blong God mo hem i save givhan long olgeta long olgeta samting. (2 Tim. 3:16, 17) Taswe stampa tok blong program blong seket asembli blong sevis yia 1993 bambae i olsem: “Akseptem, Mekem i Wok, Mo Haremgud Long Tok Blong God.”
2 Bambae i gat ol tok, ol pleplei, sam ekspiryens mo sam kwestin we oli askem long sam man blong leftemap tingting blong yumi, blong mekem fasin tangkyu blong yumi long Tok blong God i kam bigwan moa, mo blong givhan long yumi blong mekem i wok fulwan long olgeta haf long laef blong yumi. Program blong Sarede aftenun bambae i tokbaot advaes mo fasin blong stretem insaed long famle, long saed blong pleplei, ol fren mo fasin blong wantem ol sas samting. Program ya bambae i soemaot se yumi mas stap defren long wol mo yumi no mas folem ol rabis fasin blong hem mo no yusum ol tok we oli no ona nating long God no doti tok. Antap moa, bambae i gat tok blong leftemap tingting blong olgeta we oli no mared be oli gat pikinini mo olgeta pikinini we oli no gat papa.
3 Mo tu, long Sarede olgeta nyuwan we oli givim laef blong olgeta finis long Jeova bambae oli gat jans blong tekem baptaes afta we oli harem wan tok we i kamaot long Baebol we i tokbaot poen ya. Olgeta we oli wantem baptaes long seket asembli ya oli mas talemaot kwiktaem long presiden elda blong kongregesen blong mekem se hem i gat inaf taem blong mekem plan blong ol elda oli save go luk ol kwestin blong baptaes wetem olgeta.
4 Program blong Sande moning bambae i soemaot sam rod long yumi olsem wanem yumi save stap defren long wol taem yumi fasgud long Tok blong God. Fasin blong klos mo hea blong yumi mo olsem wanem blong no spolem tingting blong yumi oli sam long olgeta stampa tok we bambae oli tokbaot. Long aftenun, distrik elda bambae i mekem pablik tok we nem blong hem: “?Wanem i Makem Se Baebol i Tru?” Sua se yumi wantem invaetem olgeta man we oli intres blong kam long gudfala program ya.
5 Taem mo ples blong seket asembli ya seket elda blong yufala bambae i jes talem long yufala, mo mifala i leftemap tingting blong evriwan blong stap long asembli ya blong oli akseptem, mekem i wok, mo haremgud long olgeta advaes we oli kamaot long Tok blong God.—Jem. 1:22-25.