“Tijing Blong God” — Distrik Asembli 1993

Ol distrik asembli blong 1992 “Ol Man Blong Karem Laet” we oli stap long teritori we branj ofis blong Nyu Kaledonia i lukaot long olgeta i halpem ol 3,193 man we oli kam long hem blong kasem save moa long jans we oli gat olsem ol man blong karem laet long wan wol we i tudak. (2 Pita 1:19) !I gud tumas blong luk ol 63 long man we oli soemaot se oli givim laef blong olgeta long God taem oli tekem baptaes mo oli kam joen long bigfala kampani blong ol man blong karem laet! Blong gat gudhan, ol man blong karem laet oli mas folem Bigfala Man Blong Tijim olgeta. Yumi gat wan mesej blong talemaot, mo long yia ya, ol distrik asembli “Tijing Blong God” bambae oli halpem yumi blong talemaot mesej ya blong tajem hat blong ol man raonabaot long yumi. (Sam 119:160; Mat. 28:20) Ol misinari long olgeta ples long wol oli stap rere blong go long asembli ya long kantri blong olgeta. ?Olsem wanem long yu mo famle blong yu, yufala i stap mekem olsem? ?Yu ting se i gud blong leftemap tingting blong ol man we oli stap stadi Baebol wetem yufala blong go wetem yufala long bigfala lafet ya blong speret?

Mekemgud plan i rere blong stap long ol fo dei blong asembli ya stat wetem singsing blong openem go kasem prea blong klosem. Taem yufala i mekem plan blong go long asembli ya, wetem fasin lav, tingbaot olgeta we oli nidim help, antap moa olgeta we oli intres long trutok i no longtaem i pas, blong olgeta oli save stap long olgeta program blong asembli ya. (Gal. 6⁠:10) Long Tasde, asembli bambae i stat long 1.30 pm mo i finis samtaem long 5.00 pm. Fraede mo Sarede, bambae oli stat long 9.20 am, mo oli finis, insaed i gat singsing mo prea, samtaem long 5.00 pm. Program blong Sande bambae i stat long 9.20 am mo asembli i finis samtaem long 4.10 pm. Ol advaes ya bambae oli halpem yufala taem yufala i stap mekemrere plan blong yufala.

Dei Mo Ples Blong Distrik Asembli: Sosaeti i plan blong gat wan asembli nomo long Nouméa long namba 2 kasem namba 5 Septemba 1993. Ples blong asembli bambae oli talem long yufala samtaem biaen. Long Vanuatu, asembli bambae i stap long namba 26 kasem namba 28 Ogis 1993 long Luganville Santo.

Ples Blong Slip: Plan i mas rere samtaem bifo blong mekem se ol man we oli no stap laef long ples we asembli bambae i stap long hem oli mas gat wan ples blong slip.—⁠Jem. 2⁠:15-17; 1 Jon 3⁠:17, 18.

I Nidim Help Blong Yu: Blong mekem se wok blong givim rum i gohedgud samting ya i dipen long help blong olgeta we oli stap lukaot wan rum. (Hib. 13⁠:17) Hemia from wanem mifala i askem long evriwan blong wok wetem ol brata blong lukaot ples blong slip we Sosaeti i ogenaesem blong mekem se yumi no fesem sam trabol taem yumi stap lukaot ol rum blong slip. Mifala i wet long taem ya we bambae yumi stap tugeta long gudfala asembli ya. Jeova bambae i blesem olgeta plan we oli stap mekemrere blong distrik asembli ya.