Yusum Telefon Blong Talemaot Gud Nyus
1 Yumi laekem moa, taem yumi save talemaot gud nyus stret long fes blong narafala man. Be samtaem, i gat sam samting i kamaot we i mekem se yumi no save prij olsem, ale telefon nao i save kam wan gudfala rod blong prij. Ol pablisa we oli no save aot long haos blong olgeta blong smoltaem no oltaem from we oli sik no oli handikap, oli save yusum telefon blong prij. Mo tu, telefon i wan gudfala rod blong toktok wetem ol man we oli stap long ol store haos we oli lokemgud, mo ol narafala ples we yumi no gat raet blong go insaed long olgeta. I gat sam samting we oli mekem se i no isi blong prij long telefon. Be sipos yumi tingtinggud mo mekem gudfala plan fastaem, yumi save winim ol problem ya.
2 Long ol bigfala store haos, samtaem yumi save faenem nem blong ol man long wan bod we i stap jes insaed long doa, no long bokis blong ol leta, long fored blong haos. Afta, yu save luk long buk blong telefon blong faenem namba blong olgeta. Elda we i lukaot long wok blong prij i mas lidim wok ya. Olsem nao, ol teritori we yumi yusum telefon blong prij long hem oli save stap long stret oda, mo elda ya i save holem olgeta rikod blong wok ya.
3 Olsem Wanem Blong Mekemrere: Blong karem frut long wok blong prij long telefon, yumi mas gat wan voes we i kaen, mo we ol man oli glad blong lesin long hem. I nogud blong telefon i go long ol man long eli moning, let long naet, mo long taem blong kakae. I no nid blong letem telefon i singaot blong longtaem. Sipos yu harem tok we i kamaot long wan mesin taem yu traem telefon i go long wan man, yu save talem se: “Nem blong mi . . . Mi telefon i kam long yu blong tokbaot hop we Baebol i givim long saed blong fyuja. Bambae mi telefon long yu bakegen.” Maet i gud blong mekem long man ya olsem we yu mekem long wan haos we i no gat man, ale yu save telefon i go long hem long wan narafala taem.
4 Talem toktok blong yu bakegen mo bakegen bifo we yu tok long telefon, blong mekem sua se i no olsem we yu stap ridim tok blong yu nomo. Traem pulum man blong haos blong storeyan wetem yu. Olsem nao, bambae hem i harem we yu yu intres long hem. Yusum fas nem mo famle nem blong yu long fastok blong yu, blong soem se yu yu hu, mo se i no wan kampani nomo we i stap telefon i go long hem. Mo traem yusum nem blong hem tu, taem yu stap storeyan wetem hem.
5 Toktok slou mo klia. Be yu no mas stop, from we maet hem i ting se yu wantem we hem i tok, olsem we i mas ansa long wan kwestin. I moagud blong stop smol afta we yu askem wan kwestin nomo. Maet yu talem se, “Nem blong mi . . . Mi stap toktok wetem yu long telefon from we mi no save kam luk yu.” Nao yu no mas stop, be gohed olsem: “Risen from wanem mi telefon i kam long yu, i blong askem tingting blong yu long wan kwestin we ol man oli intres long hem. Yu bin tingbaot samting ya . . . ?” Yu save jenisim kwestin ya olsem, “?Tingting ya i bin kasem yu samtaem se . . . ?” mo “?Wanem tingting blong yu long . . . ?” I no gat wan ansa we i rong long ol kwestin ya, mo hemia wan isi rod blong pulum man blong haos blong storeyan wetem yu. Yu no mas yusum ol tok we i pulum man blong haos blong no wantem lesin, olsem, “Ating mi stap blokem yu long wan samting,” mo “Ating yu yu bisi tumas naoia.” Mekem olsem we i wan gudfala taem blong toktok, sipos man blong haos i no talem wan narafala samting.
6 Sipos man blong haos i askem se “?Yu blong weswan grup?” yu save talem nomo se “Mi mi wan Wetnes blong Jeova, mo mi telefon i kam long yu blong askem tingting blong yu long wan kwestin we ol man oli intres long hem. Yu bin tingbaot samtaem se . . . ?” Sipos man blong haos i askem se “?Yu faenem namba blong telefon blong mi weples?” yu save ansa se “Mi faenem namba blong yu long buk blong telefon, mo mi stap telefon i kam long yu blong askem tingting blong yu long wan kwestin we ol man oli intres long hem. ?Tingting ya i bin kasem yu samtaem se . . . ?”
7 Samfala oli karem gudfala frut taem oli talem nomo se yumi stap soem wan rod we ol man oli no pem, blong faenem ansa blong ol kwestin long saed blong Baebol. Nao yu save talem nem blong sam japta blong Save buk. Sipos no, yu save talem se, “Oli lokemgud haos we yu yu stap long hem from we i gat tumas fasin blong stil mo kilim man. Taswe mi stap yusum telefon blong toktok wetem yu, blong askem tingting blong yu long wan samting. ?From wanem i gat plante tumas fasin blong stil mo kilim man tede?”
8 Long wan bigfala haos we oli lokemgud, oli no bin karem plante frut long wok blong prij. Be taem oli yusum telefon, oli statem 14 nyufala Baebol stadi. Taswe, ol haos we yumi no gat raet blong go insaed long olgeta, oli save kam olsem teritori we i no gat man i wokem yet, mo i save karem plante frut. Sipos yumi holem wan positif tingting, mo wetem help we Jeova i stap givim, yumi save faenem se wok blong prij long telefon i wan gudfala rod blong talemaot gud nyus.—2 Tim. 4:5.