“Stap Mekem Samting Ya Blong Tingbaot Mi Bakegen”

¹ Yumi ol man, i gat fasin we yumi stap fogetem mining blong ol impoten samting, taem ol yia oli stap pas. Hemia nao wan risen blong Jisas i givim oda long ol disaepol blong hem, taem hem i stanemap “Kakae blong Masta,” i se: “Yufala i mas stap mekem samting ya blong tingbaot mi bakegen.” Kam kasem naoia, evri yia long stret dei we Jisas i ded long hem, ol Kristin oli obei long oda ya, oli gohed blong “soemaot ded blong Masta ya blong yumi, gogo bambae hem i kambak bakegen.”​—1 Kor. 11:20, 23-26.

² Kolosap nao, Jisas bambae i karem ol laswan man blong ‘smol kampani’ oli go long heven. (Luk 12:32; Jon 14:2, 3) Long yia ya, long Epril 11, smol grup blong ol tabu man ya we namba blong olgeta i stap godaon, wetem bigfala kampani blong “ol narafala sipsip” we i stap kam bigwan moa oltaem, oli gat jans bakegen blong mekem Kakae blong Masta. (Jon 10:16; Rev. 7:9, 10) Samting ya bambae i mekem fasin tangkyu blong olgeta i kam strong moa from bigfala lav we Jeova i soemaot, taem hem i sanem stret Pikinini blong hem blong sevem ol man. Bambae oli tokbaot eksampel blong Jisas, lav blong hem, strong bilif we hem i holem gogo hem i ded blong givim laef blong hem olsem wan ransom, rul blong hem naoia olsem King long Kingdom blong God we i stanap finis, wetem olgeta blesing we Kingdom ya bambae i givim long ol man. !Tru ya, hemia wan taem blong tingting dip long ol samting ya!

³ Reregud Naoia: Yumi evriwan i mas wok naoia blong mekem se Memoriol i wan taem blong bigfala glad mo tangkyu blong yumi wanwan, mo blong ol narafala we bambae oli joen wetem yumi. Yumi save mekemrere hat blong yumi, sipos yumi ridim bakegen ol vas blong Baebol long saed blong ol laswan dei blong wok blong Jisas long wol ya, mo ol samting we oli kamaot jes bifo we hem i ded. Long famle stadi blong yumi long ol wik bifo long Memoriol, maet yumi save tokbaot japta 112 kasem 116 blong buk ya Man We i Hae Moa.

⁴ ?Yu save hamas man we maet oli kam long Memoriol sipos yu traehad blong givhan long olgeta blong gat tangkyu from impoten taem ya, mo sipos yu singaot olgeta, mo mekem oli harem se oli welkam blong joen wetem yumi? Raetem wan lis naoia, mo mekem evri samting we yu save mekem blong givhan long ol man ya blong kam. Biaen, pulum olgeta blong kam oltaem long ol miting. Samting ya bambae i givhan long olgeta blong gru moa long saed blong speret.

⁵ Raonabaot long taem blong Memoriol, bambae i gat ol spesel plan blong givhan long yumi evriwan blong prij moa. Sipos yu mekem wan gudfala program, ?yu ting se yu save haftaem paenia long Epril? long Mei? Wan nambawan rod blong soem se yumi stap tingbaot mo yumi gat bigfala tangkyu from ol samting we sakrifaes blong Jisas i mekem long yumi, i blong tokbaot God blong yumi, Jeova, mo ol blesing we bambae oli kamaot aninit long Kingdom rul blong Pikinini blong hem.​—Sam 79:13; 147:1.