Program Blong Nekis Seket Asembli
?Olsem wanem blong stanap strong agensem olgeta we oli agensem trufala wosip? ?Olsem wanem yumi save stanap strong taem wol ya blong Setan i traem pulum yumi, yumi gobak long hem? Program blong seket asembli blong sevis yia 2009 bambae i ansarem ol impoten kwestin ya. Stamba tok blong asembli ya hem i se: ‘Holemstrong Ol Stret Fasin Blong Winim Ol Rabis Fasin.’ (Rom 12:21) Naoia yumi luk wanem we bambae i stap insaed long program.
Distrik elda bambae i givim ol tok olsem “Yumi Strong Blong Holem Ol Stret Fasin Blong Winim Ol Rabis Fasin,” “!Lukaot Long Fasin Ya Blong Trastem Yu Wan Bitim Mak!,” “Ol Rabis Fasin Bambae Oli Finis i No Longtaem,” mo “Mekem Bilif Blong Yumi i Strong Blong Winim Rabis Wol Ya.” Seket elda bambae i givim ol tok olsem “!Naoia i Taem Blong Stap Wekap!,” we i stanap long Rom 13:11-13, mo “No Letem Tingting Blong Yu i Foldaon Long Taem Blong Trabol,” we i stanap long Ol Proveb 24:10. Mo tu, yumi wantem tumas blong harem tok ya we bambae seket elda i mekem, we i se “Tingbaot Ol Nid Blong Seket.” Wan narafala tok bakegen we bambae i leftemap tingting, hemia “Yu Save Mekem ‘Wok Long Kongregesen’– ?Olsem Wan Paenia?” I gat tu tok we oli gat fo haf long tufala. Nem blong faswan tok i olsem: “Stanap Strong Agensem Ol Giaman Trik Blong Devel Setan.” Tok ya bambae i givhan long yumi blong luksave mo sakemaot ol trik blong Devel Setan we oli haed long teknoloji, pleplei, mo edukesen. Narafala tok we i gat fo haf i talem se “Kasem Paoa Blong Blokem Ol Rabis Fasin Blong Tede.” Tok ya bambae i soem olsem wanem blong folem advaes we i stap long Efesas 6:10-18 long laef blong yumi.
Traehad we man i mekem blong winim rabis fasin long stamba blong hem, i joengud wetem wok blong talemaot Kingdom. (Rev. 12:17) !Taswe yumi no sapraes we Setan i neva stop blong agensem ol Witnes blong Jeova! (Aes. 43:10, 12) Be Devel Setan bambae i no save win, from we yumi mekem tingting blong yumi i strong blong ‘holemstrong ol stret fasin blong winim ol rabis fasin.’ Traem mekem wan gudfala plan blong joen fulwan long program blong seket asembli.