An ka diya sɔrɔ seereya dafalen dili la
1 A ka di an kelen-kelen bɛɛ ye ka fɛnw kɛ minnu y’an dɔnkow ye. Marka 7:37 ka fɔ la, jama tun b’a fɔ Yesu ko la ko: “A ka ko kɛlenw bɛɛ ɲɛna.” O la sa, Yesu ka diya sɔrɔ Jehowa sago kɛli la, o tɛ balannako ye! (A’ ye Zab. 40:9 lajɛ.) An kɛtɔ ka taasi duguma hakilinaw kan, an fana na nisɔndiya sɔrɔ Yesu kanminɛli la, o min y’a fɔ k’an ka mɔgɔw waaju ani ka seereya dafalen di u ma (Kɛw. 10:42). Zanwuyekalo la, an na ɲɛ 192 gafew jira, gafe minnu bɔra ka kɔn san 1985 ɲɛ, n’u bɛ sɔrɔ mara la jɛkulu bolo, wala Ɲɛnamaya fɔ abada gafe. An bɛ se ka seereya dafalen di ni nin gafew ye cogo di?
2 Komi mɔgɔ caman bɛ hami n’u ka kɛnɛya ye, an bɛ se k’a fɔ ko:
◼ “Bana furakɛli n’a ka ɲɛtaaba bɛɛ, bana bɛ mɔgɔw tɔɔrɔ hali bi. E yɛrɛ hakilina na, o bɛ ɲɛfɔ cogo di? [An ka jaabi lamɛn.] Yesu tun y’a fɔ ko fiɲɛbanaw ni jamabanaw bɛna kɛ laban donw taamasyɛnw ye (Lu. 21:11). Nka Bibulu bɛ kuma waati dɔ ko la, waati min na bana bɛ tunun. [An ka Esayi 33:24 kalan.] An ka dalilu dɔw lajɛ minnu dilen bɛ an ma gafe in na walisa an ka da nin Bibulu kalansira in na.” An bɛ gafe min jira, an k’o hakilina dɔw ɲɛfɔ an lamɛnbaga ye, o kɔ an k’a kofɔ a ye.
3 N’an bɛ waajuli la an senfɛ jagokɛyɔrɔw kɛrɛfɛ, an bɛ se ka dɔ fo ani k’a ɲininka ko:
◼ “Fɛnw da bɛ ka yɛlɛn fo a bɛ gɛlɛya mɔgɔ ma a k’i jɔ a ka du musakaw kɔrɔ. E ɲɛ na, yali kow tɛ ten wa? [An ka jaabi lamɛn.] E ka miiri la, yali an na bololafɛntigiya ka kana lakika sɔrɔ don dɔ wa?” An ka jaabi lamɛn. O kɔ, an ka Bibulu tɛmɛsira bɛnnen dɔ kofɔ gafe jirata kɔnɔ. An ka tila k’a fɔ ko: “Kunko minnu bɛ ɲɛnamaya gɛlɛya bi kosɛbɛ, Ala bɛna u ɲɛnabɔ cogo min na a ka Masaya sababu fɛ, nin gafe in b’o ɲɛfɔ.” An ka gafe kofɔ a ye. O kɔ, ale fɛ baro diyara an ye ka se hakɛ min na, an bɛ se k’o fɔ a ye, ani k’a ɲininka ko: “Yali an bɛ se ka baro in tɔ kɛ don wɛrɛ wa?” O cogo la, laala an na a tigilamɔgɔ ka nɛgɛjuru limero wala a ka ladrɛsi sɔrɔ.
4 N’an bɛ “Ɲɛnamaya fɔ abada” gafe de jira, laala an na cogo sɔrɔ ka nin kuma kuntigɛ cogo sifilɛ hɛrɛ ko la diɲɛ kɔnɔ:
◼ “E yɛrɛ ɲɛ na, munna a ka gɛlɛn kosɛbɛ ka hɛrɛ sigi diɲɛ kɔnɔ? [An ka jaabi lamɛn, o kɔ, an ka ja jira min bɛ sɔrɔ gafe ɲɛw 20-1 na.] Nin ja in ye Bibulu kɔnɔ ko dɔ de taamasyɛn ye, o min ɲɛfɔlen don Jirali kɔnɔ. [An ka Jirali 12:7-9, 12 kalan, dakun 17nan na. O kɔ, an ka ja ɲɛkɔrɔ kuma kalan.] O la sa, Sendonbaga kerunna dugukolo kan, wa o ko in kɔmanaw dɔ la kelen kɛra hɛrɛ tununni ye ka bɔ diɲɛ na. Nin gafe in bɛ ɲininkali nafamaw caman jaabi. A na diya ne ye k’a to i bolo dɔrɔmɛ 140 bolomafara kunkɔrɔ, n’a ka di i ye k’a kalan.”—Ɲɛnamaya fɔ abada gafe jira cogo ɲuman wɛrɛw ko la, a’ ye san 1995 Setanburukalo ni Feburuyekalo ka Notre Ministère du Royaume bɔko ɲɛ laban lajɛ ka fara san 1994 Setanburukalo ta kan, ani san 1993 Setanburukalo ni san 1992 Utikalo taw.
5 Tuma min na an bɛ segin ka taa bɔ magotigiw ye, an bɛ se k’a lajɛ ka Bibulu kalan daminɛ an kɛtɔ ka kuma kuntigɛ nin cogo la:
◼ “An ka baro kun fɔlɔ la, i ye hakilina nafama dɔ fɔ. [An ka segin an kumaɲɔgɔn ka hakilina dɔ kan.] Ne miirila o la, wa ne ye min sɔrɔ ɲiniw senfɛ, ne b’a fɛ k’o jira i la. [An ni a tigilamɔgɔ ka Bibulu tɛmɛsira bɛnnen dɔ mafilɛ ɲɔgɔn fɛ.] An bɛ kalan kɛ mɔgɔw kun gansan na, kalan min ye u miliyɔn caman dɛmɛ ka Bibulu ka kalansiraw kun fɔlɔw dunya waati kunkurunnin kɔnɔ. O Bibulu sɛgɛsɛgɛli nin bɛ se k’a to i ka dannaya da Ala ka layidu kɔlibaliw timɛli kan.” Ɲininkali minnu bɛna jaabi kalan senfɛ, an ka o dɔw jira. Ni sɔn ma kɛ o la, an k’a ɲɛfɔ an lamɛnbaga ye ko, an bɛ kalan kɛrɛnkɛrɛnnen teliman kofɔ mɔgɔw ye; a tɛ tɛmɛ sanga 15 kan dɔgɔkun kɔnɔ, wa a bɛ to senna dɔgɔkun 16 kɔnɔna na. An ka Wajibiya gafenin jira ka tila k’a dayɛlɛ kalansen fɔlɔ yɔrɔ la; o kɔ, an k’an kumaɲɔgɔn ɲininka n’an bɛ se k’a daminɛ n’o ye ka kalan kɛcogo ɲɛfɔ a ye.
6 An k’an hakili to a la ka baara kɛ ni sɛbɛndenninw ye: Kuma daminɛ na, an bɛ se ka olu kɛ k’an kumaɲɔgɔn su a k’i mago don alako koɲɛw la, wala an bɛ se k’u di mɔgɔw ma ni sɔn ma kɛ gafe la tuma min na.
7 N’an b’an ka baara kɛ ka ɲɛ, an na nisɔndiya sɔrɔ a la. ‘An k’an janto an yɛrɛ la’ tuma bɛɛ ka seereya dafalen di, ani an ka diya sɔrɔ cidenyabaara ɲɛw bɛɛ kɛko ɲuman na.—1 Tim. 4:16.