I bɛna mun fɔ Ɛndu ye?
1 Iko i b’a dɔn cogo min na, Ɛnduw bɛ sɔrɔ jamana caman na, hali an ta kɔnɔna na. O kɔrɔ ye ko, a mɛn o mɛn, e ni Ɛndu dɔ bɛna bɛn i ka cidenyabaara senfɛ. N’o kɛra tuma min na, i na mun kɛ?
2 I hakili to nin yɔrɔw la: Tunga fɛ ciden minnu ye sanga sɔrɔ waajuli la ka ɲɛsin Ɛndu ma, olu y’a fɔ ko wajibi tɛ i ka fɛn caman dɔn Ɛndu diinɛ kan walasa i ka se ka seereya kɛ koɲuman. Tuma caman na, kumajiracogo nɔgɔman, min bɛ kɛ ni gasi sigi ye, o bɛ na ni jaabi ɲuman ye. I k’a ɲini ka kuma dutigi fɛ fɔlɔ. N’a ka jaabi ɲɛna, a bɛ ɲɔgɔya i ma ka seereya kɛ denbaya kɔnɔmɔgɔ tɔw ye. Daminɛ na, i kan’a fɔ k’i nana ni cikan ye min ka fisa n’i lamɛnbaga ka dannakow ye, walima k’i b’a fɛ ka baro kɛ Ala lakika dama kan, walima kitabu senumaw bɛɛ la kɔrɔlenba kan. Ikomi Ɛndu caman b’a miiri ko Bibulu ye tilebin yanfan kitabu ye, i bɛ se ka o siganna ban n’i y’a ɲɛfɔ ko Bibulu tɛ sinsi walifasomara kan; a t’a fɔ fana ko siya dɔ ka fisa ni dɔ wɛrɛ ye.
3 I ka baara kɛ ni minɛn bɛnnenw ye: Gafenin fila labɛnna kɛrɛnkɛrɛnnenya la ka ɲɛsin Ɛnduw ma. Pourquoi adorer Dieu en amour et en vérité?, (Mun na Ala ka kan ka bato kanuya la ani tiɲɛ na?), o bɛ sɔrɔ Gurajatikan ni Punjabikan na. Nos problèmes—Qui nous aidera à les résoudre?, (An kunkow—Jɔni bɛna an dɛmɛ k’u ɲɛnabɔ?), o bɛ sɔrɔ Ɛndukan 11 wɛrɛw la. U fila bɛɛ bɛ sɔrɔ Tubabukan na. “Voici! Je fais toutes choses nouvelles” ani Dieu se soucie-t-il vraiment de nous?, o gafeninw fana ka ɲi n’an bɛ waajuli kɛ Ɛndu diinɛ mɔgɔw ye. Wajibiya gafenin ani Dɔnniya gafe bɛ se ka kɛ ka Bibulu kalanw ɲɛminɛ fo ka ɲɛ.
4 I ka bɛn yɔrɔ ɲini: A man gɛlɛn e ni Ɛnduw ka bɛn yɔrɔ sɔrɔ. U dalen b’a la k’an bɛ waati min na sisan, juguya sera a dan na, ani ko Ala bɛna gɛlɛyaw bɔ diɲɛ na kasaaraba dɔ sababu fɛ; tiɲɛ tile bɛ tugu o la. I ɲɛ b’a la cogo min na, a ka nɔgɔn ka nin dannakow ni Bibulu kalansira dɔw bɛn ɲɔgɔn ma, i n’a fɔ laban donw, tɔɔrɔba ani diɲɛ kura nata. Ikomi ɲɛnamaya falen bɛ gɛlɛya ɲɛnabɔbaliw la Ɛndu caman ɲɛ na, baro minnu ka di u ye, olu ye denbaya ni kojugu ni gɛrɛgɛrɛ kunbɛnni kun kan barow ye, ani min bɛ kɛ ni mɔgɔ sara. Kumajiracogo nɔgɔman fila filɛ, i bɛ se ka minnu sifilɛ
5 Nin bɛ se ka diya dutigi ye:
◼ “Denbaya ka ɲɛnamaya kɛcogoya, min bɛ bi jamana caman na, o jɔrɔ bɛ mɔgɔ minnu na, ne bɛ taa bɔ olu de ye. E ka miiri la, mun bɛ se ka mɔgɔw dɛmɛ k’u ka denbayaw mara kelenya kɔnɔ? [I ka jaabi makɔnɔ.] Ɛnduw ka kitabu bɛ min fɔ denbaya ko la, mɔgɔ dɔw b’o dɔn. Nka Bibulu bɛ min fɔ o kan, u furadama ma cogoya sɔrɔ ka o kalan fila sanga ɲɔgɔn na. N b’a fɛ ne ni e ka jɛ nin hakilina na min bɛ sɔrɔ Kolosekaw 3:12-14 na.” Tɛmɛsira kalannen kɔfɛ, i ka Dɔnniya gafe ka masalakun 15 nan jira i lamɛnbaga la, k’a fɔ a ye ko: “A na diya ne ye ka waati dɔɔnin ta ka nin masalakun kalan ɲɔgɔn fɛ, ne ni e.”
6 Denmisɛn bɛ se ka nin ɲininkali jaabi:
◼ “Siga si t’a la k’i dalen bɛ Ala la. E ka miiri la, Ala kuntilenna ye mun ye ka ɲɛsin an ma?” I ka jaabi lamɛn. O kɔfɛ, i ka Jenɛse 1:28 kalan, ka tila k’a fɔ ko: “Yɔrɔ caman na, dugukolo falen don mɔgɔw la fo k’a dama tɛmɛ, gɛlɛyaw fana bɛ yen. Yali i b’a miiri ko Ala labɛnnen bɛ an dɛmɛni kama an kunkow ɲɛnabɔli la wa?” Jaabi lamɛnnen kɔfɛ, i ka sɛbɛn bɛnnen jir’a la.
7 I k’i diya ni baara nɔ ɲuman ye: Ka balimamuso dɔ to waajuli la sugu la, san 22 Ɛndu cɛbalen dɔ y’i magɛrɛ a la ka Bibulu kalan ɲini a fɛ. A y’a fɔ a ye k’a bɛ san seegin bɔ, ale tun ye baro dɔ lamɛn, baro min tɛmɛna a woloba ni an balimamuso cɛ. Bibulu bɛ jaabi ɲuman minnu di hadamadenw ka kunkow la, hali k’a sɔrɔ o tun y’a kabakoya, a woloba m’a mago don kalan na. O waati la, kamalen in tun y’a miiri k’a tun ka dɔgɔ kojugu tiɲɛ ɲinini ma, a kelen na. Sisan, a balikuyalen b’a fɛ ka dɔ fara a ka dɔnniya kan. Cɛ in ma sumaya kalan fɛ. Tile 23 dama kɔnɔ, a tilala Dɔnniya gafe kalan na. Ale ni balimamuso ye ɲɔgɔn bɛn sugu la don min na, kalo naani dɔrɔn o kɔfɛ, a y’a ɲini ka batise!
8 Balimakɛ dɔ ye kalan daminɛ ni Ɛndu cɛ dɔ ye, ale ni min bɛnna sisikurun kɔnɔ. Gɛlɛya caman tun bɛ cɛ in ka furu kɔnɔ. A tun b’i min fana. Cɛ sɔnna Seere ka taa bɔ ale ye, k’a ladɔnniya Bibulu ka laadilikanw na minnu ɲɛsinnen don denbaya ma. Bibulu ka kalansiraw diyar’a ye, kalansira minnu bɛ kuma jogo ɲuman kan. O la, a sɔnna Bibulu kalan ma. Ale n’a ka denbaya y’a daminɛ ka taa lajɛw la ɲɔgɔn fɛ. O kɔfɛ, u y’u teriw n’u somɔgɔw ladɔnniya tiɲɛ kuma na. O don ni sisan cɛ, olu la mɔgɔ wɔɔrɔ sɔnna tiɲɛ na!
9 Ala sago ye “mɔgɔw bɛɛ ka kisi ka se ka tiɲɛ dɔn.” (1 Tim. 2:4) Mɔgɔ minnu tɛ Krecɛn diinɛ na, i n’a fɔ Ɛnduw, olu sen b’o la. Ni Ɛnduw bɛ sɔrɔ i ka danyɔrɔ la, mun na i tɛ taa bɔ u ye joona, ka baara kɛ ni hakilina damadɔw ye minnu jirala nin barokun in na?