Yusu waméi páhina jw.org lun wapurichihan: “Lumadabá Heowá”

Lidan páhina jw.org, lábugiñe fánreinti le gíribei “Agumeiraguagüdüni” anihein aban seksióun gíriti “Lumadabá Heowá”, le ídanbei ladarirúa bidéu hounti irahüñü. (Lidan chumagü dariwati giñe uremu burí luma amu burí katei le gayaraati hadügüni irahüñü). Yusu wamaali san seksióun le lidan wapurichihan? Anhein gasaanigu habéi gürigia ha únbaña wíchiga aturiahani tídangiñeti Bíbülia irahüñü ñǘbürigiña, ka uagu marufudun wabalin houn? Másiñati ladügün lira lun láluahan ariñahani lidan amu seksióun lidan wani páhina lidan Internet.

Dan le lederegerubalun aban íbiri tratadu Ñunsu luáguti Larúeihan Bungiu númeru 38 tun aban würi to gasaanitu irahüñü ñǘbürigiña, aba tagumeserun aliihoun lau lóufudagun. Íbini meha giñe irahüñü hagía busentiña meha hasubudiruni ka lan tídanbei tratadu tuguya. Aba lubeiti lafuranguagüdüni íbiri houn murusunraü ka lan uagu tayanuha tratadu, arufudalei ariñahani le luáguti wani páhina lidan Internet le tanagangiñebei tratadu houn. Kei le adüga lubéi katei le lúntima busén tan gürigia tuguya tasubudirun luagu páhina le, aba larufudun íbiri aban lídangiñe lani Kalebü bidéu houn súngubei lídangiñe ligagamurun.

Ayanuhatu aban íbiri luagu páhina jw.org tun aban tupaaná lidan wadagimanu to giñe gasaaniboun irahüñü ñǘbürigiña. Ariñagatu tun tadariruba lan ariñahani huuti houn iduheñu lidan páhina le. Áluahatu gürigia tuguya úara hama tisaanigu ariñahani lidan páhina le. Lárigiñe aba tariñagun gürigia tun íbiri aba lan herederun tisaanigu eremuhei uremu “Predica la palabra”, le lídanbei seksióun “Lumadabá Heowá” (lidan chumagü) lárigiñe haganbuni.

Buídubei lun gabügürügua lan hebelurun lidoun páhina le lun hasubudiruni ka burí lan ariñahani lídanbei seksióun “Lumadabá Heowá” lun gayara lan harariragüdün burí somu bidéu, uremu o amu katei le gayaraati hadügüni irahüñü. Anhein wadüga katei le, aransetimaabadiwa lun wayusuruni páhina le lidan wapurichihan luma lun wasigirun eseriwida kei lidamun Aburemei (Adü. 20:19).