Wani Páhina lánina Internet: huuti lidan ministeriu
Amisuraha humá amu lun hebelurun lidoun páhina jw.org. Másiñati ñéinbaña lan gürigia ha mabusenruntiña hadimurehan wama ni lun herederun tau somu agumeiraguagüdüni. Gama lumoun, háfuga busenbaña lan háluahan ariñahani hawagu gefentiña luagu Heowá lidan páhina jw.org hábiñe. Ligíati, ánhadün ariha buídubei lan lun wadügüni, amisuraha humaña gürigia ha únbaña hapurichiha lun hebelurun lidoun wani páhina.
Yusu huméi lun híchugun óunabagülei. Danme le ladügün aban gürigia le unti hapurichiha, le busenti lasigirun afurendeira o aban hasubudiragun somu álügüdahani hun hawagu gefentiña luagu Heowá, arufuda huméi óunabagülei lun gürigia ligía lidan guánarügü ligagamurun o konputadora to lanügüboun lúmagua. Ánheinti bérusu burí tídangiñeti Bíbülia le áfuachubei ñein buítimabei haliihani tídangiñe guánarügü Bíbülia. Anhein siñá lubéi hebelurun lidoun Internet ouraméme ligía, afuranguagüda huméi lun gayarabei lan ladariruni óunabagülei lidan páhina jw.org. Hadarirubei ariñahani le lidan chumagü o lidan amu burí iñeñein. (Belú humá lidoun “Enseñanzas bíblicas/Preguntas sobre la Biblia” o lidoun “Sobre nosotros/Preguntas frecuentes”.)
Óunaha humá aban arütíkulu o aban agumeiraguagüdüni lun somu hasubudiragun. Gayarabei hóunahan luéigiñe koréu lánina Internet somu arütíkulu le harariragüdün lídangiñe páhina jw.org lidan formatu PDF o EPUB. Gayarabei giñe harariragüdün ariñahani le aganbahóuarügüti lun gürabarü humani lidan CD. Ánhadün óunaha somu agumeiraguagüdüni dayarügü luéigiñe koréu lidan Internet lun aban gürigia le mabadiseirungili, gayarabei habürüdünu lidan ubanaü le ídanbei hariñaha luagu hani ministeriu. Moun lumuti hóunahan ariñahani sin hasubudiragüdüni huguya lan óunahabalin, ni lun gíbeya lan. Moun lumuti giñe hóunahan ariñahani le harariragüdün lídangiñe amu luwuyeri páhina lánina Internet. (Belú humá lidoun “Agumeiraguagüdüni”.)
Arufuda huméi burí ñunsu le iseritimagilibei. Líderagubaña katei le gürigia ha aturiahabarun Bíbülia huma hama gürigia ha hagiribudubaña abisidaha lun híchugun fe adügǘwa lan wadagimanu le lidan sun ubóu luma lun gebegi lan úarani le waganaguabei wagía kristiánugu houn (Sal. 133:1). Hadarirubei ariñahani le lidan chumagü luma burí amu iñeñein. (Belú humá lidoun “Noticias”.)
[Iyawaü to lídanboun páhina 5]
(Lun harihinu lidan formatu le ídanbei tasalira furumiñe, ariha humóun agumeiraguagüdüni)
Houcha huméi
1 Lidan seksióun “Agumeiraguagüdüni”, anúadira humá aban agumeiraguagüdüni, hadügame klikü luagu aban lídangiñe budún le huubei lun harariragüdün agumeiraguagüdüni lidan formatu le habusenrun bürüwarügüti lan yebe o aganbahóuarügüti.
2 Danme le hadügün klikü luagu budún “MP3”, hadariruba aban lísüta lau burí arütíkulu. Lun harariragüdün aban lídangiñe, adüga humá klikü luagu liri arütíkulu, o lun haganbahani lidan Internet, adüga humá klikü luagu sínbolu.
3 Anhein busén hubéi harariragüdün agumeiraguagüdüni lidan amu iñeñein, áluaha huméi iñeñein ligía tidan lísüta lánina iñeñein.