Le gayarabei wariñaguni tuagu garüdia

Gumese wamá aturiahani tídangiñe Bíbülia furumiñeti samudi lidan sedü-hati

“Sun gürigia hínsiñeti hamuga houn lun gunda lan habagari ani migife ligía. Hínsiñeti hamuga nun nasubudiruni ka lan hisaminanbei: afiñetün san gayarabei lan líchugun siensiasi luma agaranihani ibagari magumuchaditi woun?” Lárigiñe hígirun dan lun hóunabun gürigia, arufuda huméi lagumuhóun páhina houn tidan Garüdia Atalaya to lánina 1 lidan sedü-hati ani akutiha huméi ariñahani le lábugiñebei furumiñeti álügüdahani luma íbini aban lídangiñe bérusu burí le ñeinbei. Ígira humóun garüdia houn ani ariñaga humá hagiribuduba lan lun hakutihani álügüdahani le asigirubei.

Abürüdǘni: Lunti ladügǘn demostrasión le lidan adamuridaguni lánina apurichihani le lánina 6 lidan sedü-hati.

Garüdia Atalaya 1 lidan sedü-hati

“Saragu hádangiñe gürigia ha úmabaña wayanuha gánitiña relihión. Gama lumoun, añahein amu ariñagutiña mafiñehaña lan luagu relihión. Ka hisaminanbei luagu katei le? [Ígira humá lun lóunabun gürigia.] Ariñaga lumuti Hesusu ida luba lan wasubudiruni anhein buidu lubéi aban relihión o wuriba lan [aliiha huméi Lúkasi 6:44a]. Ayanuhatu garüdia to luagu fiú lídangiñe luriban igaburi le lídanbei burí relihión ani óunaba tumuti giñe álügüdahani le: ‘Anihein san somu relihión le gayarati lafiñerúniwa luagu?’.”

¡Despertad! Sedü-hati

“Wabisidahañanu wabesinanigu lun wayanuhan luagu aban turóbuli le adiheridagüdübaliña gürigia: marichaü. Kei aubei warihei, añahein gürigia áfuridutiña éibuga úmada ageindagua lun ladügǘn katei lau irichaü. Arihúati funa san asansiruni lárigiñe amarücharuni burí ligía? [Ígira humá lun lóunabun gürigia.] Ariñaga tumuti Bíbülia woun ábanrügüñein lan árani lun turóbuli le [aliiha huméi Matéu 6:9, 10]. Tidan garüdia to hadarirubei óunabagülei lun álügüdahani le: ‘Laranseruba san turóbuli le lau amarücharuni?’.”

Uganu buiti lúmagiñeti Bungiu

“Barütiwa aban uganu buiti tídangiñeti Bíbülia houn gürigia uguñe. Gíbetiña álügüdagutiña houngua ka lan uagu lígira aban Bungiu hínsiñehabuti lun ñein lan saragu asufuriruni. Afiñetün san lun lan wasufurirun líchigawa Bungiu ligibuagu ubóu?” Ígira humá lun lóunabun gürigia ani lárigiñe heiba lidoun leksióun 5. Aliiha huméi ani akutiha humeime bián furumiñeti párafu hama ani aliiha humeime bérusu burí le lídanbei létüra róunñuti. Ígira humóun garüdia lun ani ariñaga humá hagiribuduba lan lun hakutihani libiaman álügüdahani le lídanbei létüra wuritimati.