Sügǘ burí

◼ Australia. John, aban wügüri le aturiahaali saragu, gabasihati meha ligilisirugun dan meha le ñǘraügili; gama lumoun, lau lásügürün dan “aba mafiñenhali lan luagu Bungiu”. Aban weyu, aba lígirunu aban prekursoru garüdia ¿Es la vida obra de un Creador? lun, lidan amu ókaasion ígira lumutu garüdia El origen de la vida lun. Lun busenméme lan gürigia ligía lasigirun afurendeira, ábaha lanügünu prekursoru ligía Garüdia Atalaya tuma ¡Despertad! lun sagü hati, ábatiha lafuranguagüdüni arütíkulu burí le adimurehabei luagu katei le adügǘwarügübei o luagu profesía tídangiñeti Bíbülia. Dan le larihinbei buíduhali lan lun ladügüni aba lanügünu líburu La Biblia... ¿la Palabra de Dios, o palabra del hombre? lun. Lárigiñebei laliihanu, aba lagumeserun John ariñaga luougua aban lan gürigia ligía le afiñeti siñá lan lasubudirúniwa inarüni luagu Bungiu luma luagu ibagari líteme. Lárigiñe, aba larufuduni prekursoru ligía párafu 8 le lídanbei páhina 20 tidan líburu Kátima san lun, ñéingiñeti, aba hakutihani párafu 13 darí 16 le lídanbei páhina 23 luma 24. Wéirigüda lumutu bérusu burí le ñeinbei lanigi John darí lun lariñagun: “Háfuga mosu lan níchugun ábanya chansi tun Bíbülia”.

◼ Méhiku. Ariñagati aban wügüri lun aban íbiri mafiñen lan Lererun lan Bungiu Bíbülia. Aba lariñagun íbiri ligía lun larufuduba lan fiu katei lun le achoururagüdübalin lúmagiñetu lan Bungiu Bíbülia, aba lánharun gürigia ligía, lárigiñe hadimurehan saragu wéiyaasu, aba lagumeserun katei burí le lafurendeirubei tídangiñe Lererun Bungiu achülüra tidoun lanigi. Ani hingí lumutu le tarufudahabei Bíbülia libügürü laruman ibagari lanigi. Ligía guánarügü ariñagubei: “Dan meha le wagumeserunbei aturiaha laganóun meha nun kamá tídangiñe aban líburu furumiñeguarügü lasagarúa adundehani le waliihabei, ligía meha meberesegun nubéi lau. Gama lumoun, guentó sagü waliihanu Bíbülia, dántima le tayanuhan luagu laruman ibagari aba tagumeserun nanigi adüga lun nasandiragun nungua wuriba”.

◼ Meriga. Dan meha le añaha lan aban feru maríeitiña ídeha lidan apurichihani espechaliti lidan burí uburugu wéinamuti, aba tayarafadun aban würi lídangiñetu ageiraü Taiwán luagun tarufudaagüle agumeiraguagüdüni ani afiñetu meha würi to luagu Bungiu gama lumoun, saminatu yebe aban lan líburu hountu gürigia ha aganóubaña Yuropa luma Meriga Bíbülia. Lau sun lira, hemenigitu meha luagu gayara lan tíderagunu Bíbülia adarira isuuni lun tibagari, lugundun lau sun meha gibe lan túmati sandiguatu meha tungua lau íruni ani masuuniti meha tibagari. Aba hagumeserun maríeitiña hagía íchiga aturiahani tun tau líburu Kátima san luma tau garüdia Cómo hallar paz y felicidad duraderas. Lubaragiñe haturiahani kapítulu 2 le tídanbei líburu, aba hakutihani seksióun le gíribei “Una guía para toda la humanidad” tídangiñe garüdia. Lárigiñebei haliihani furumiñeti sisi párafu le lídanbei seksióun ligía, lau tueirin tanigi aba tíchugun würi tuguya fe luagu mítaran tan Bíbülia kei amu burí líburu lídangiñetu relihión. Ani lárigiñebei haturiahani profesía tídangiñeti Bíbülia le gúnfulihalibei, aba tariñagun lau ubebeni: “Mafiñentina anhein anuhein lubéi amu líburu to ariñagubalin katei keisi lubeibei ítara kei Bíbülia!”.

◼ Japón. Aba ladimurehan aban íbiri luma aban gürigia le mafiñenbei luagu Bungiu. Gama lumoun, sigiti íbiri bisidei gürigia ligía luagu burí murusun oura lun larufuduni arütíkulu burí le gíribei “¿Casualidad o diseño?”, le tídanbei garüdia ¡Despertad! lun. Murusun murusun, aba asansireina lani gürigia ligía lisaminan, ábati lagumeserun ánhara luagu háfuga lan anihein lan aban Bungiu le adügübalin sun katei. Guentó, chouru laali luagu anihein lan Bungiu, ani líchuguña íbiri ligía aturiahani lun tau garüdia Uganu buiti lúmagiñeti Bungiu.

◼ Kanadá. Aba tíchugunu aban íbiri Garüdia Atalaya tuma ¡Despertad! tun aban würi dan le táfuriduña lubéi túbiñegiñe lun tádinun tidoun tikarün. Dan le tagiribudunbei íbiri, aba tariñagun würi tuguya tun mabusenrun tan tafurendeirun ni kata ladüga mafiñen tan luagu Bungiu. Mígirun tumuti íbiri katei ítara, aba desidírü tan tanügünu garüdia Cómo lograr una vida llena de satisfacción tun. Danya le tadarirunbarun íbiri gürigia tuguya, aba tariñagun tun luagu lau sun lan subudi taali lan luagu mafiñen tan luagu Bungiu, mabulieidun tani luagu tagüriahañanu lan tirahüñü tábuguarügü ani busén tan tíderagunu. Furumiñe, aba tarufuduni párafu 6 le lídanbei páhina 4 tun, le adimurehabei luagu ligürewein ladarirún adundehani buiti. Lárigiñe, aba tamisurahanu lun taliihani adundehani le lídanbei fánreinti 2, le adimurehabei luagu hagüriarúniwa isaanigu. Lau sun tugundan ánhatu würi tuguya tun garüdia to tíchuguboun íbiri tun.