Le gayarabei wariñaguni tuagu garüdia

Gumese wamá aturiahani tídangiñe Bíbülia furumiñeti samudi lidan bián-hati

“Hádangiñe gürigia ha úmabaña wadimureha, añahein afiñetiña Lererun lan Bungiu Bíbülia, añaheinti amu afiñetiña aban lan líburu furumiñeguarügü. Angia huguya, ka hasaminarubei?” Ígira humá lun lóunabun gürigia. Lárigiñe arufuda huméi páhina le tanagangiñebei Garüdia Atalaya to lánina 1 lidan bián-hati lun ani akutiha huméi ariñahani le lábugiñebei furumiñeti álügüdahani ani aliiha humá íbinirügü aban lídangiñe bérusu le ñeinbei. Ígira humóun garüdia lun ani ariñaga humá hagiribuduba lan lun hakutihani álügüdahani le asigirubei.

Garüdia Atalaya 1 lidan bián-hati

“Hínsiñeti hamuga houn sun gürigia lun mageindawagundigiaali lan wuribu ubouagu, adián? Gayarati funati lasuseredun katei le? [Ígira humá lun lóunabun gürigia.] Ariha huméi füramasei le wadarirubei tidan Bíbülia [aliiha huméi Sálumu 46:9]. Háfuga taweiriduba hanigi danme le híchugun fe luagu ru lan saragu lídangiñe katei le meha asuseredubei lidaaniwagu Furumiñeti Wuribu Wéiriti luma lárigiñe emenigini woun luagu málühali lan füramasei le agunfulira. Afuranguagüda tumuti garüdia to.”

¡Despertad! Bián-hati

“Wabisidahañadün murusun oura lun wadimurehan luagu aban turobuli kamaniti. Gíbetiña gürigia ekeharutiña lougua lan dan houn lun hadügüni sun le lunbei hadügüni. Ka funa san lébunabei turobuli le? Le funa san liibe lunti hadügüni gürigia odi ladügarügü liña mayusu hamani dan buidu? [Ígira humá lun lóunabun gürigia.] Gíbetiña úntiña libidiñeda luagu ru tan Bíbülia adundehani huuti libügürü ida luba lan layusurún dan buidu. Anihán aban lídangiñe [aliiha huméi Filipuna 1:10a]. Tidan garüdia to hadariruba gádürü katei le gayarabei hadügüni lun meferidirun humá dan.”