Íderagua humaña aturiahatiña lun hígiruniña hagübüri umadagu

Anhein busén habéi gürigia ha aturiahabaña tídangiñe Bíbülia wama lun gamadagua hamá luma Heowá, mosu hanúadiruniña hamadagua buidu (Sal 15:1, 4). Híderagubadün umadagu buítiña lun hadügüni le buídubei (Ari 13:20; lff arufudahani 48).

Danme le híderaguniña aturiahatiña lun hígiruniña hariban umadagu, gunfuranda humaña ladüga másiñati hénrengu lan houn hígiruniña hamadagu. Ligíati, berese humá hau lidan hawanserun. Gayaraati houdin abisidahaña murusun, hóunahan somu ariñahani houn o háwarun houn luéigiñe gágamuru. Eibu lawanserun aturiahati, agunbiraha humaña lun hásügürün dan hamá íbirigu. Ítara luba híchugun fe wéiritima lan hagañeirun luéi le heferidirubei (Mr 10:29, 30). Gúndaabadün danme le harihin haganwounduña lan lumutuniña Heowá.

LÁRIGIÑE HARIHINI BIDÉU ÍDERAGUA WAMAÑA ATURIAHATIÑA LUN HÍGIRUNIÑA HAGÜBÜRI UMADAGU, ÓUNABA HUMÉI ÁLÜGÜDAHANI BURÍ LE:

• Kátaña san hariban umadagu? (1 Ko 15:33).

• Ka tasaminarubei Nírisin luagu ida liña lan hásügürüni Gefentiña lidan isebáhari?

• Ida liña tíderagunu Neta, Nírisin asansiraaña tumadagu?