¿Ütz komä nqchʼö chkë ri tyox?

Ri nuʼij le Biblia

Le Biblia ma nukʼüt ta chë kʼo chë nqchʼö chkë ri tyox. Röj xa xuʼ rkʼë Dios kʼo chë nqchʼö wä y nqaʼän riʼ pa rubʼiʼ Jesús. «Rïx ke reʼ rubʼanik kixchʼö rkʼë Dios —xuʼij Jesús chkë rutzeqelbʼëy—: Qatataʼ ri yït kʼo chlaʼ chkaj, xtchʼajchʼobʼëx ta kʼa abʼiʼ» (Mateo 6:9, Biblia de América [BA]). Jesús majun bʼëy xuʼij ta chë kʼo chë nqchʼö che rä jun tyox, nqchʼö rkʼë jun ángel o rkʼë xa bʼa achkë chik jun winäq ri ma yë ta Dios.

Jesús chqä xuʼij ya reʼ: «Rïn yïn ri bʼey, ri kantzij chqä ri kʼaslemal. Majun ta jun nkowin napon rkʼë ri Ntataʼ we ma wmä ta rïn» (Juan 14:6, BA). Xa xuʼ Jesús nkowin nqʼaxan qatzij rkʼë Dios (Hebreos 7:25).

¿Ütz komä nqchʼö rkʼë Dios, ye kʼa nqchʼö chqä chkë ri tyox?

Chpan jun chkë ri Diez Mandamientos, Dios xuʼij: «Rïn, ri Ajaw ri a-Dios, yïn jun Dios ri nwajoʼ chë xa xuʼ rïn nyaʼöx nqʼij» (Éxodo 20:5, BA). ¿Achkë ntel chë tzij chë Dios xa xuʼ ryä nrajoʼ nyaʼöx ruqʼij? Jun nota chpan ri Biblia de América nuʼij reʼ chrij re versículo reʼ: «Xa xuʼ ryä ri kantzij Dios, majun ta jun tyox [...] ri xtkanaj qa pa rukʼexel». Dios nrajoʼ chë xa xuʼ ryä nyaʼöx ruqʼij y, we nnatäj chqë, ri nqchʼö rkʼë Dios ya riʼ jun rubʼanik nqayaʼ ruqʼij ryä (Isaías 48:11).

We nqchʼö rkʼë xa bʼa achkë chik na jun ri ma yë ta Dios, achiʼel jun ángel o jun tyox, ryä kan poqän xtnaʼ ran. Ri wuj Apocalipsis (Revelación) nuʼij chë taq ri apóstol Juan xxkeʼ qa chwäch jun ángel rchë nuyaʼ ruqʼij, ri ángel riʼ xuʼij reʼ che rä: «Ma taʼän riʼ, rma rïn chqä xa yïn jun rusamajel Dios achiʼel rït chqä awachʼalal, ri yaʼon qa ri samaj pa kiqʼaʼ rchë yetzjon chrij Jesús. Xa xuʼ Dios kʼo chë nayaʼ ruqʼij» (Apocalipsis 19:10, BA).