Qtyoxin rma ye kʼo qachʼalal achiʼaʼ qkʼë ri ye «achiʼel ta jun spanïk»

1. ¿Achkë jojun spanïk ryaʼon Jesús chqë?

MAJUN ta chik jun winäq nspan o yertoʼ nkʼaj chik achiʼel nuʼän Jesús. Taq ryä xjeʼ chwäch Rwachʼlew, xeruʼän milagros rchë xertoʼ ye kʼïy winäq (Luc. 9:12-17). Chqä xyaʼ jun nüm spanïk chqë taq xyaʼ rkʼaslemal pa kamïk qmä röj (Juan 15:13). Y kan xa xuʼ xkʼasöx pä chkikojöl ri kamnaqiʼ kʼa komä, ryä najin na nspan chqä najin na nqrtoʼ pä. Achiʼel xuʼij qa chkë rtzeqelbʼëy, ryä rbʼin che rä Jehová chë tksaj ri loqʼoläj rchqʼaʼ rchë nqrtjoj chqä rchë nukʼuqbʼaʼ qakʼuʼx (Juan 14:16, 17, nota; 16:13). Chqä, Jesús nuksaj qamoloj rchë nukʼüt chqawäch achkë rbʼanik yeqatjoj ri winäq chwäch jontir Rwachʼlew (Mat. 28:18-20).

2. ¿Achkë jojun achiʼaʼ ye «achiʼel ta jun spanïk» yeryaʼon qa Jesús? (Efesios 4:7, 8).

² Ye kʼa ma xa xuʼ ta ri spanïk riʼ ryaʼon Jesús chqë. Ri apóstol Pablo xuʼij chë, taq Jesús xbʼä chkaj, ryä xeryaʼ qa jojun achiʼaʼ ri «achiʼel ta jun spanïk xeryaʼ qa» (taskʼij rwäch Efesios 4:7, 8). Pablo xuʼij chë Jesús xeryaʼ qa ri achiʼaʼ riʼ rchë jalajöj rbʼanik nkitoʼ ri congregación (Efes. 1:22, 23; 4:11-13). Pa qaqʼij komä, jojun chkë ri «spanïk» riʼ ya riʼ ri qachʼalal achiʼaʼ ri yetoʼö kichë ri ukʼwäy taq bʼey (siervos ministeriales), ri ukʼwäy taq bʼey pa congregación chqä ri ukʼwäy taq bʼey rchë circuito.a Kantzij na wä chë ryeʼ xa kʼo qa mak chkij chqä kʼo akuchï yesach wä (Sant. 3:2). Ye kʼa Jesús yerksaj re achiʼaʼ reʼ rchë nqrtoʼ pä röj.

3. Taʼij achkë rbʼanik nqkowin nqtoʼon kikʼë qachʼalal achiʼaʼ ri ye achiʼel ta jun spanïk yeryaʼon qa Jesús.

³ Jesús xeryaʼ re achiʼaʼ reʼ, ri ye «achiʼel ta jun spanïk», rchë nkikʼuqbʼaʼ kikʼuʼx qachʼalal pa congregación (Efes. 4:12). Ye kʼa röj nqkowin yeqatoʼ ryeʼ rchë yekowin nkiʼän ri samaj riʼ ri kan kowan rqʼij. ¿Achkë rbʼanik nqaʼän riʼ? Tqaquʼ na peʼ rij ya reʼ. Tqabʼanaʼ che rä chë jun molaj qachʼalal najin nkiʼän jun Salón del Reino. Jojun chkë ryeʼ kan yetoʼon chubʼanik ri jay riʼ, ye kʼa nkʼaj chik yetoʼon chubʼanik rkïl wäy, yekikʼamaʼ chqä yekijachaʼ qachʼalal pa chʼichʼ o nkiyaʼ nkʼaj chik toʼïk chkë. Ke riʼ chqä nqaʼän röj kikʼë qachʼalal achiʼaʼ ri yetoʼö kichë ri ukʼwäy taq bʼey, ri ukʼwäy taq bʼey pa congregación chqä ri ukʼwäy taq bʼey rchë circuito. Röj nqkowin yeqatoʼ ryeʼ rkʼë ri nqaʼij chkë chqä rkʼë ri yeqaʼän. Tqatzʼetaʼ achkë utzil nqïl rma ri samaj nkiʼän re achiʼaʼ reʼ y achkë rbʼanik nqkowin nqatyoxij chkë ryeʼ chqä che rä Jesús jontir ri nkiʼän qmä röj.

RI YETOʼÖ KICHË RI UKʼWÄY TAQ BʼEY NKIYAʼ «KITOʼIK NKʼAJ CHIK»

4. ¿Achkë jojun samaj xkiʼän ri xetoʼö kichë ri ukʼwäy taq bʼey pa naʼäy siglo?

⁴ Pa naʼäy siglo, ye kʼo jojun achiʼaʼ xekitoʼ ri ukʼwäy taq bʼey (1 Tim. 3:8). Chkij ryeʼ xtzjon wä Pablo taq xuʼij ya reʼ chpan 1 Corintios 12:28: «Ri yeyaʼö kitoʼik nkʼaj chik». Ryeʼ xekitoʼ ri ukʼwäy taq bʼey chubʼanik jojun samaj, rchë ke riʼ ri ukʼwäy taq bʼey njeʼ tiempo chkiwäch rchë nkikʼüt rchʼaʼäl Dios chkiwäch ri cristianos chqä rchë yekichajij. Rkʼë jbʼaʼ yë wä ri achiʼaʼ riʼ yebʼanö copiar ri Loqʼoläj taq Wuj o nkibʼeloqʼoʼ wä jontir ri nkʼatzin rchë yebʼan ri copias riʼ.

5. Pa qaqʼij komä, ¿achkë jojun samaj nkiʼän qachʼalal achiʼaʼ ri yetoʼö kichë ri ukʼwäy taq bʼey?

⁵ Pa qaqʼij komä, ¿achkë jojun samaj nkiʼän qachʼalal achiʼaʼ ri yetoʼö kichë ri ukʼwäy taq bʼey? (1 Ped. 4:10). Rkʼë jbʼaʼ ri qachʼalal riʼ nkitzʼët ri cuentas rchë ri congregación, nkitzʼët qaterritorios, nkikʼutuj äl qapublicaciones chqä nkijäch chkë qachʼalal, ye kʼo chrij audio y video, ye acomodadores o yetoʼon rchë nchʼajchʼobʼëx o nchojmïx xa bʼa achkë jun pa Salón del Reino. Jontir re samaj reʼ nkʼatzin yebʼan rchë nqkowin nqamöl qiʼ pa qaSalón chqä rchë nqatamaj achkë rbʼanik nqatzjoj le Biblia pa qaterritorio (1 Cor. 14:40). Jojun chkë qachʼalal reʼ nyaʼöx kasignaciones chpan qamoloj Qakʼaslemal chqä Qasamaj röj ri Cristianos o yeksäx rchë nkiyaʼ jun tzijonem ri qʼij sábado o domingo. Kʼo mul yeksäx jojun chkë ryeʼ rchë nkitoʼ jun qachʼalal ri rkʼwan bʼey chpan jun grupo pa congregación. Y kʼo mul, ri ukʼwäy taq bʼey nkikʼwaj jun chkë qachʼalal riʼ taq yekibʼechʼaʼej qachʼalal rchë nkikʼuqbʼaʼ kikʼuʼx.

6. ¿Achkë rma kan kowan nqatyoxij kisamaj qachʼalal achiʼaʼ ri yetoʼö kichë ri ukʼwäy taq bʼey?

⁶ ¿Achkë rma nqatyoxij kisamaj qachʼalal achiʼaʼ ri yetoʼö kichë ri ukʼwäy taq bʼey? Tqatzʼetaʼ achkë kibʼin jojun qachʼalal. Ya Beatrís,b jun qachʼalal aj Bolivia, nuʼij: «Matyox chkë qachʼalal riʼ, rïn yikowin yitzʼuyeʼ chqä nyaʼ nxkïn che rä jontir ri nbʼix pa qamoloj. Rma ri samaj nkiʼän, rïn yikowin yibʼixan, nyaʼ ncomentarios, yenkʼoxaj ri tzijonem yeyaʼöx chqä yikowin ntzʼët ri videos chqä ri achbʼäl yekʼut pa qamoloj. Ryeʼ yojkichajij taq yoj kʼo pa qaSalón chqä yekitoʼ qachʼalal ri nkiʼän conectar kiʼ pa videollamada rchë nkitzʼët qamoloj. Taq nkʼis ri moloj, ryeʼ yetoʼon rchë nchʼajchʼobʼëx ri Salón del Reino, yetoʼon rkʼë ri cuentas chqä nkitzʼët we kʼa kʼo na qapublicaciones. ¡Rïn kan kowan yityoxin chkë rma ri samaj nkiʼän!». Ya Lesly, jun qachʼalal aj Colombia ri kʼlan rkʼë jun ukʼwäy bʼey, nuʼij: «Ryeʼ kowan nkitoʼ wachjil. Xa ta ryeʼ ma ta yetoʼon chubʼanik jojun samaj, ri wachjil kʼo ta más rsamaj. Rma riʼ kan kowan yityoxin chkë rma nkiyaʼ kan chrij kisamaj chqä rma nkajoʼ yetoʼon». Kantzij na wä chë röj chqä kan nqatyoxij kisamaj qachʼalal achiʼaʼ ri yetoʼö kichë ri ukʼwäy taq bʼey (1 Tim. 3:13).

7. ¿Achkë rbʼanik nqakʼüt chë nqatyoxij kisamaj ri yetoʼö kichë ri ukʼwäy taq bʼey? (Tatzʼetaʼ chqä ri achbʼäl).

⁷ Rkʼë jbʼaʼ röj nqatyoxij ri samaj nkiʼän qachʼalal achiʼaʼ ri yetoʼö kichë ri ukʼwäy taq bʼey, ye kʼa le Biblia nuʼij ya reʼ chqë: «Tikʼutuʼ chë yixtyoxin» (Col. 3:15). Tqatzʼetaʼ achkë rbʼanik nuʼän riʼ David, jun ukʼwäy bʼey aj Finlandia. Ryä nuʼij: «Rïn ntäq äl jun tarjeta o jun mensaje che rä jun chkë qachʼalal riʼ, nyaʼ äl jun texto chpan chqä nbʼij äl che rä achkë rbʼanik xkʼuqbʼaʼ nkʼuʼx o achkë rma ntyoxij ri samaj xuʼän». Pascual chqä ya Jania, ri ye kʼo Nueva Caledonia, yechʼö rkʼë Jehová pa kiwiʼ re qachʼalal reʼ. Ryeʼ nkiʼij: «Chpan re qʼij reʼ ri ye qʼaxnäq pä, qatyoxin pä che rä Jehová rma ye kʼo qachʼalal reʼ pa qacongregación. Chqä qabʼin che rä chë kertoʼ pä». Kantzij na wä chë Jehová kan nqrkʼoxaj taq nqaʼij ya riʼ che rä, y taq nqaʼän riʼ, jontir pa congregación nqïl utzil (2 Cor. 1:11).

RI UKʼWÄY TAQ BʼEY PA CONGREGACIÓN «KAN KʼÏY SAMAJ NKIʼÄN»

8. ¿Achkë rma Pablo xuʼij chë ri ukʼwäy taq bʼey pa naʼäy siglo kan kʼïy samaj xkiʼän? (1 Tesalonicenses 5:12, 13).

⁸ Pa naʼäy siglo, ri ukʼwäy taq bʼey kan kʼïy samaj xkiʼän (taskʼij rwäch 1 Tesalonicenses 5:12, 13; 1 Tim. 5:17). Ryeʼ xekʼwan bʼey chkiwäch ri congregaciones, nkitzʼët wä achkë rbʼanik nbʼan chkë ri moloj chqä nkimöl wä kiʼ taq kʼo jun nkajoʼ nkiʼän pa congregación. Chqä, rchë xekichajij qachʼalal pa taq congregaciones, xkʼatzin xekiqʼïl jojun cristianos, ye kʼa kan ütz kinaʼoj xkiʼän kikʼë taq xkiʼän riʼ (1 Tes. 2:11, 12; 2 Tim. 4:2). Y, ma xa xuʼ ta riʼ, ryeʼ chqä xkʼatzin xkikanuj rbʼanik rchë ma xchaʼ ta chiʼ kachbʼilanïk rkʼë Jehová chqä rchë xekichajij kifamilia (1 Tim. 3:2, 4; Tito 1:6-9).

9. ¿Achkë jojun samaj nkiʼän ri ukʼwäy taq bʼey pa qaqʼij komä?

⁹ Pa qaqʼij komä, ri ukʼwäy taq bʼey kan kʼïy chqä kisamaj kʼo. Jun chkë ri samaj riʼ ya riʼ nkitzjoj Rchʼaʼäl Dios chkë ri winäq (2 Tim. 4:5). Ryeʼ yeʼel chutzjoxik le Biblia, nkitzʼët achkë rbʼanik nqasmajij qaterritorio chqä yojkitjoj rchë kan ütz rbʼanik nqatzjoj le Biblia chkë ri winäq. Chqä, ri ukʼwäy taq bʼey nkiqʼät tzij pa qawiʼ pa congregación, y taq nkiʼän riʼ, kan ütz kinaʼoj nkiʼän qkʼë chqä nkipoqonaj qawäch. Taq jun qachʼalal nuʼän jun nüm mak, ryeʼ nkikanuj rbʼanik rchë nkitoʼ qachʼalal riʼ rchë jnan chik jmul nuʼän rwäch rkʼë Jehová. Ye kʼa nkitzʼët na chqä achkë nkʼatzin nkiʼän rchë chʼajchʼöj njeʼ ri congregación (1 Cor. 5:12, 13; Gál. 6:1). Jun chik samaj nkiʼän ri ukʼwäy taq bʼey ya riʼ yojkichajij jontir ri yoj kʼo pa congregación (1 Ped. 5:1-3). Ryeʼ kan ütz nkitjoj kiʼ rchë yekiyaʼ tzijonem chqawäch, nkitäj kiqʼij rchë nkitamaj kiwäch jontir qachʼalal pa congregación chqä yekibʼechʼaʼej qachʼalal rchë nkikʼuqbʼaʼ kikʼuʼx. Chqä, jojun chkë ryeʼ yetoʼon taq yebʼan Salones del Reino o taq yechojmïx xa bʼa achkë jun chpan, yetoʼon rchë ntzʼet achkë nkʼatzin yebʼan pa moloj rchë oxiʼ qʼij, ye kʼo chpan ri Comités de Enlace con los Hospitales, yetoʼon chpan ri grupos ri yekibʼechʼaʼej qachʼalal ri ye kʼo pa taq hospitales o yekiʼän nkʼaj chik samaj. ¡Kantzij na wä chë ryeʼ kan kʼïy samaj nkiʼän qmä röj!

10. ¿Achkë rma kowan yeqajoʼ ri ukʼwäy taq bʼey?

¹⁰ Jehová xuʼij chë ri ukʼwäy taq bʼey kan ütz xkekichajij qachʼalal chqä chë ri qachʼalal majun achoq chwäch xtkixiʼij ta kiʼ (Jer. 23:4). Ya riʼ xnaʼ jun qachʼalal aj Finlandia, ri Yojana rbʼiʼ, taq rteʼ xyawäj chwäch. Ryä nuʼij: «Rïn kan kwest nuʼän chi nwäch ntzjoj chkë nkʼaj chik achkë nnaʼ. Ye kʼa, kʼo jun ukʼwäy bʼey, ri ma kan ta ntaman wä rwäch, xjäm rwäch rchë xirkʼoxaj, xchʼö rkʼë Dios pa nwiʼ chqä xuʼij chwä chë Jehová kowan yirajoʼ. Ma kan ta nnatäj chik chwä achkë xuʼij ryä chwä, ye kʼa nnatäj chwä chë kan jaʼäl xinnaʼ taq xitzjon rkʼë. Rïn nbʼij chë Jehová xtäq ri qachʼalal riʼ wkʼë rchë xirtoʼ taq más xkʼatzin chwä». ¿Y rït? ¿Achkë rbʼanik yatkitoʼon ri ukʼwäy taq bʼey ri ye kʼo pan acongregación?

11. ¿Achkë rbʼanik nqakʼüt chkiwäch ri ukʼwäy taq bʼey chë nqatyoxij ri samaj nkiʼän? (Tatzʼetaʼ chqä ri achbʼäl).

¹¹ Jehová nrajoʼ chë röj nqakʼüt chkiwäch ri ukʼwäy taq bʼey chë kowan yeqajoʼ «rma ri samaj nkiʼän» (1 Tes. 5:12, 13). Ya Julieta, jun qachʼalal ri kʼo chqä Finlandia, nuʼij: «Ri ukʼwäy taq bʼey kan kiʼ kikʼuʼx yekitoʼ nkʼaj chik, ye kʼa reʼ ma ntel ta chë tzij chë ryeʼ kan chaq kʼo kitiempo chqä kichqʼaʼ rchë nkiʼän riʼ o chë majun ta kʼayewal nkiqʼaxaj. Rma riʼ kʼo mul njäm nwäch rchë yitzjon rkʼë jun ukʼwäy bʼey y nbʼij che rä: ‹Xa xuʼ nwajoʼ nbʼij chawä chë kan ütz asamaj najin naʼän›». Ya Sara, jun qachʼalal aj Turquía, nuʼij: «Ri ukʼwäy taq bʼey nkʼatzin chqä yetoʼöx chqä nkʼuqbʼäx kikʼuʼx rchë ma nkiyaʼ ta qa ri samaj najin nkiʼän. Rma riʼ rïn ntzʼibʼaj jun kitarjeta y nyaʼ chkë, nspaj jun kiway o yinel kikʼë chutzjoxik le Biblia». ¿Npë pan ajolon rït jun ukʼwäy bʼey ri kowan yaturtoʼon? We ke riʼ, takanuj rbʼanik rchë nakʼüt chwäch chë yatyoxin che rä (1 Cor. 16:18).

RI UKʼWÄY TAQ BʼEY RCHË CIRCUITO NKIKʼUQBʼAʼ KIKʼUʼX QACHʼALAL

12. ¿Achkë jun chik spanïk xyaʼ Jesús chkë ri congregaciones? (1 Tesalonicenses 2:7, 8).

¹² Kʼo jun chik spanïk xyaʼ Jesús chkë ri congregaciones. Pa naʼäy siglo, ryä xuʼän chë ri ukʼwäy taq bʼey ri ye kʼo wä Jerusalén xkitäq Pablo, Bernabé chqä nkʼaj chik cristianos rchë xekibʼechʼaʼej ri congregaciones (Hech. 11:22). ¿Achkë samaj xkibʼebʼanaʼ re achiʼaʼ reʼ? Ryeʼ xkibʼebʼanaʼ ri samaj ri najin wä chik nkiʼän ri ukʼwäy taq bʼey chqä ri yetoʼö kichë: nkikʼuqbʼaʼ kikʼuʼx ri cristianos ri ye kʼo pa taq congregaciones (Hech. 15:40, 41). Re achiʼaʼ reʼ ma xkikʼewaj ta xkiʼän ri xkʼatzin rchë xekitjoj ri cristianos chqä rchë xkikʼuqbʼaʼ kikʼuʼx, tapeʼ kʼo mul kan xxiʼin rij kikʼaslemal rma xkiʼän riʼ (taskʼij rwäch 1 Tesalonicenses 2:7, 8).

13. ¿Achkë jojun samaj nkiʼän ri ukʼwäy taq bʼey rchë circuito?

¹³ Ri ukʼwäy taq bʼey rchë circuito ma yexlan ta chkichʼbʼexik ri congregaciones. Kʼo mul, ryeʼ kan nüm bʼey nkʼatzin nkiʼän rchë yeʼapon pa jun chik congregación. Ronojel semanas yekiyaʼ tzijonem, yekibʼechʼaʼej qachʼalal rchë nkikʼuqbʼaʼ kikʼuʼx chqä nkikʼwaj bʼey chpan ri moloj nkiʼän kikʼë ri precursores, kikʼë ri ukʼwäy taq bʼey chqä kikʼë jontir qachʼalal taq yeʼel chutzjoxik le Biblia. Chqä nkitjoj kiʼ chkij ri tzijonem yekiyaʼ chpan ri moloj rchë jun qʼij chqä rchë oxiʼ qʼij, y nkʼatzin nkitzʼët achkë samaj nkʼatzin yebʼan chkipan ri moloj riʼ. Chqä, yë ryeʼ yeyaʼö ri tjonïk nkikʼül ri precursores, nkitzʼët ajän (jampeʼ) nkimöl kiʼ kikʼë jontir ri precursores ri ye kʼo chpan kicircuito chqä yekiʼän nkʼaj chik samaj ri nuyaʼ ri sucursal chkë; kʼo mul jojun chkë ri samaj riʼ kan nkʼatzin yebʼan yän.

14. ¿Achkë jojun rma nqatyoxij ri samaj nkiʼän ri ukʼwäy taq bʼey rchë circuito?

¹⁴ ¿Achkë utzil nkïl ri congregaciones rma ri samaj nkiʼän ri ukʼwäy taq bʼey rchë circuito? Jun qachʼalal achï aj Turquía nuʼij: «Ronojel ri nkikʼüt qa chqawäch, nkiʼän chwä chë más nwajoʼ nkʼwaj wiʼ kikʼë qachʼalal chqä yentoʼ. Kan kʼïy ukʼwäy taq bʼey rchë circuito ntaman kiwäch, ye kʼa majun ta jun chkë ryeʼ xkʼüt ta chi nwäch chë majun ta rtiempo rchë yirkʼoxaj o chë ma nrajoʼ ta ntzjon wkʼë». Ya Yojana, ri xqatzjoj qa chpan ri peraj 10, xel chutzjoxik le Biblia rkʼë jun ukʼwäy bʼey rchë circuito, ye kʼa ri qʼij riʼ ma xekïl ta ri winäq chkachoch. Ryä nuʼij: «Tapeʼ majun ta jun winäq xqïl, majun bʼëy xtinmestaj ta ri qʼij riʼ. Chpan ri tiempo riʼ, ye kʼo wä kaʼiʼ nnmal ri xa kʼa riʼ wä jbʼaʼ kebʼä jukʼan chik tinamït, y rïn kowan wä najin ye nbʼisoj. Ri ukʼwäy bʼey rchë circuito kan ütz rnaʼoj xuʼän wkʼë chqä xirtoʼ rchë xintzʼët chë, tapeʼ komä näj qakojöl kikʼë qachʼalal chqä qamigos, chwäch ri kʼakʼakʼ Rwachʼlew xtqkowin xtqjeʼ jnan jontir». Kantzij na wä chë ri ukʼwäy taq bʼey rchë circuito kowan yejowäx kimä qachʼalal rma ri toʼïk nkiyaʼ chkë (Hech. 20:37-21:1).

15. a) ¿Achkë rbʼanik nqasmajij 3 Juan 5-8 rchë nqakʼüt chë nqtyoxin chkë ri ukʼwäy taq bʼey rchë circuito? (Tatzʼetaʼ chqä ri achbʼäl). b) ¿Achkë rma nkʼatzin ma yeqamestaj ta kixjilal ri yekʼwayon bʼey chqawäch, y achkë rbʼanik nqakʼüt chkiwäch chë nqtyoxin chkë? (Tatzʼetaʼ ri recuadro «Ma keqamestaj ta kixjilal»).

¹⁵ Ri apóstol Juan xuʼij che rä Gayo chë kan ütz kikʼulik tbʼanaʼ chkë ri cristianos ri yeʼapon rchë nkibʼechʼaʼej ri congregaciones. Chqä xuʼij ya reʼ che rä: «Tayaʼ ri xtkʼatzin chkë pa bʼey y tabʼanaʼ riʼ kan achiʼel nqä chwäch Dios» (taskʼij rwäch 3 Juan 5-8). ¿Achkë rbʼanik nqkowin röj nqaʼän ya riʼ? Nqaʼij riʼ taq nqaskʼij ri ukʼwäy bʼey rchë circuito chqachoch rchë nqayaʼ rway chqä taq nqajäm qawäch rchë nq·el chutzjoxik le Biblia chpan ri semana riʼ. Tqatzʼetaʼ achkë nuʼän ya Lesly, ri xqatzjoj qa chpan ri peraj 6, rchë nukʼüt chë nutyoxij ri samaj nkiʼän qachʼalal riʼ. Ryä nuʼij: «Rïn nbʼij che rä Jehová chë tyaʼ ri nkʼatzin chkë. Wachjil chqä rïn nqatzʼibʼaj äl cartas chkë. Chpan ri cartas riʼ, röj nqaʼij äl chkë chë kan kowan xkikʼuqbʼaʼ qakʼuʼx taq xejeʼ qkʼë». Ma tqamestaj ta chë ri ukʼwäy taq bʼey rchë circuito xa yekos chqä nkiqʼaxaj kʼayewal achiʼel röj. Kʼo mul yeyawäj, nchʼpü kikʼuʼx (yemayon) chqä yebʼison. Y Jehová nkowin yaturksaj rït rchë nuyaʼ chkë ryeʼ ri nkikʼutuj che rä. Rkʼë jbʼaʼ nuʼän riʼ taq rït nakʼuqbʼaʼ kikʼuʼx rkʼë ri naʼij chkë o taq nayaʼ jun kispanik (Prov. 12:25).

YEKʼATZIN MÁS ACHIʼAʼ RCHË YETOʼON PA CONGREGACIÓN

16. ¿Achkë ütz nkiquʼ rij ri qachʼalal achiʼaʼ? (Proverbios 3:27).

¹⁶ Chwäch jontir Rwachʼlew, yekʼatzin más achiʼaʼ rchë yetoʼon pa taq congregaciones. We rït yït qasan chik pa yaʼ, ¿ütz nuʼän chawäch yatoʼon más? (taskʼij rwäch Proverbios 3:27). ¿Najin natäj aqʼij rchë yatok jun chkë ri yetoʼö kichë ri ukʼwäy taq bʼey? We ya najin chik naʼän ri samaj riʼ, ¿ayaʼon chawäch yatok jun ukʼwäy bʼey?c ¿Kʼo jojun yakowin najäl pan akʼaslemal rchë nakʼül ri Tjonïk nyaʼöx chkë ri nkitzjoj Rqʼatbʼäl Tzij Dios? We rït xtakʼül ri tjonïk riʼ, Jesús xtkowin xkaturksaj más. Ye kʼa we nanaʼ chë ma xkakowin ta xtaʼän ri samaj ri xeqatzjoj qa, kachʼö rkʼë Jehová chrij riʼ. Taʼij che rä chë katurtoʼ pä rkʼë ri loqʼoläj rchqʼaʼ rchë ütz xtaʼän che rä xa bʼa achkë samaj xtyaʼöx chawä (Luc. 11:13; Hech. 20:28).

17. ¿Achkë nukʼüt ri samaj nkiʼän qachʼalal achiʼaʼ ri ye «achiʼel ta jun spanïk» yeryaʼon qa Jesús?

¹⁷ Ri samaj nkiʼän ri achiʼaʼ ri ye «achiʼel ta jun spanïk» yeryaʼon qa Jesús, nukʼüt chë ryä najin nukʼwaj qabʼey chpan re rkʼisbʼäl taq qʼij reʼ (Mat. 28:20). Jesús, ri Qaqʼatöy Tzij, kowan nqrajoʼ, kowan nspan, rtaman achkë nkʼatzin chqë chqä yerksan qachʼalal achiʼaʼ rchë nqrtoʼ pä. ¿Tapeʼ chë kan kowan nqtyoxin che rä rma jontir ri nuʼän ryä qmä röj? Tqakanuj kʼa rbʼanik rchë nqakʼüt chwäch chë nqtyoxin che rä. Y majun bʼëy tqamestaj ta nqtyoxin chqä che rä Jehová, rma «jontir ri jaʼäl taq spanïk» yë ryä nyaʼö pä chqë (Sant. 1:17).