Chūn

Chaplö nuk töng aṅ in re ök tafīösi nö ṙòkhöre, öt rēhěn nö hangö ṙô nuk chahaplö ò tö kūö kun ṙôken re. Akahalōn pöri ang Yēsū tö minë chahaplö ò nöng kūönen takô, öt rēhěn nö kô anga-aṅ nö havah nya-aṅkūöre tö u tö kun ṙòken u. Ṙamlōn ang Yēsū nö meuk nuk chahaplö ngam yāich tafīösi. Lökten ò nö havëtö yik haköptöre ngaich ngö ṙô tö cha: “Pōyen nun në chahaplö ngòh yāich tafīösi, tö minë [chahaplö më tökôlò] pò cha nö ṙa-ang in minë tö pōyen aṅ in re nö chaphöl, hö-ö pöri ngòh tafīösi pön chaplö nuk töng aṅ in re nö ṙòkhöre.” (Māk. 12:43, 44) Inmeuktö ò nö ṙatö-ellōn re nö in Yāvē tö ò min nö öt hō nö öt chumkūöṙen tö ò.—Sal. 26:3. w21.04 pěch 6 përa 17-18

Hē Yēsū misī nö ing panam öt kūönngöre ellōn anga-aṅ nö ahangköm tölöök inhānga. (Yôh. 4:35, 36) Ṙamlōn yik mahaköp nö ahangköm tölöök inhānga hē Yēsū nö ṙòngmö in cha. (Lūk. 10:1, 5-11, 17) Hē Yēsū pöri nö fëliyö, kūönngöre ellōn ngaich cha-a. (Yôh. 16:32) Unôichrit Yēsū pöri nö chōholre nö ṙa-ang im kinpaha, havan tö inlahen re hēk cha-a nö ahangköm tölöök inhānga. Uroh yik tö kunyaha elmat nö uyë-a nö sā ṙô ngam tövë-evkūö töngamuh. Hachōten yik Kristīön ang Yēsū nö ahānga ik raneh senchurī, ngaich hakôlöng ṙô ngam la-en cha tö Yāvē. 3,000 ṙôken yik kamë ngam vinôkö ik Pentikòstē. (Inl. 2:41) Höng iṙūöhöröön sanīöpö ṙôken cha-a. (Inl. 6:7) Ngö ṙô Yēsū, söl mana-angkūö ngih panam min ngam tölöök inhānga nö ahangka ing mana-aṅ sakamö.—Yôh. 14:12; Inl. 1:8. w21.05 pěch 14 përa 1-2

Köplōn öm tök ṙētak re teūngen töm kanô-en aṅmat ngam Paipöl? Öt kihngen man hē e öm hāngö u. Ngölōn më-eṅ, öthō in öt ṙòkhöre min öi ṙamlōn yěi hāngö u. Ṙamlōn hē e më-eṅ öm hang ngam tölöök inhānga. (Sal. 119:105) Ngaich ilööṙen öm vë-eny nang yip aṅ patī re, holre inrē. Kūö yòh pöri öm pingangkūö? Pön öt ṙòkhöre nö hō yip vahë-eny nang meh. Hö-ö in pingangkūö töngamuh yěn sō vē tarik nö hang ngam tölöök inhānga. Pön höng ngatī inlahen cha-a inuk sakamö Yēsū misī, pôrò cha-a nö meuk nuk pinngangkūö tī ò. Tö sā ngam, inchohlö Lāsörös. Ötkô cha-a inrē nö mahngen e. Sön yik mākūö yik Yahuti nö öt ṙatö-ellōnre tö ò nö Mesayā. Uroh nö hòṅ fëlngen ò nö anòng ngö vah Lasörös!—Yôh. 11:47, 48, 53; 12:9-11. w21.05 pěch 2 përa 1-2

Örheūheu man yihtökūö el mīting. Teungen man min tö inreuskö alaha re hēk akahakūö inrē min më-eṅ tö yip prötör sistör. Hanôl yip aṅ el ngam Maṅ man chūök meh öm teungen tö haköplö re pòrô cha-a nö harikngöre ngam ṙēti cha hēk minë tinrīken cha. Vë-nyu nang in tö ngam paipöl: ‘I tö köiny an ngam mikah.’ (Yōp 12:12) Pōyen haköplö yip inrē tö köiny nö in yip ṙālö. Yēḵ hī öi ngëichkö ngam ṙēti na Tāvit nā Yònatān nö harikngöre angū-ö, sön pöri ngam inòlö cha nö köp nö in höö. (1 Sa. 18:1) Pōyen nup kanihngen cha sön pöri cha-a nö hayööken höö nö i linökö lōn Yāvē. (1 Sa. 23:16-18) Airīnā, ngòh tö hěng tak nö el ngam kanô-en, ngö ṙô anga-aṅ: “Sā ṙēngen yöng hī hēk kanônyö hī yin më prötör sistör aṅ el ngam Maṅ. Löktö in cha tī öng Yāvē nö hateungngen nup hanākten hī.” Lōnu yip prötör sistör aṅ el ngam Maṅ nö hòṅ hayööken meh, hēk hareuskö alaha meh, yēḵ meh pöri öm vë-eny kanihngen re ngaich he e min cha-a nö hayööken meh. w21.06 pěch 10-11 përa 9-11

Kētö inchōḵ-emat yip haköptöre ang Yēsū. Hěngtak ök kūön kūö kamë hötreh re nö in ök rācha. Ik sā nö öt löhnyö nup hötreh re ngaich arělen ò pöri ök rācha. Anga-aṅ pöri ngòh kūöṅnkūö tö öt arě-ēl öp tahëng holre öp töng rahëichyěn hötreh nö in u. Ik sā ök rācha ngaich nö akahalōn ngaich chaphöt ò anga-aṅ nö el chēl. Öt hameuktö miṙēlōn ngam kūöṅnkūö nö in öp holre. Kihngen tī anga-aṅ tore hēk tö yip tahëng inrē holre. Sitih inlahen? Ngam raneh, “chaphöt ök holre anga-aṅ nö el chēl ik sā nö öl nö kēnyö nup hötreh re.” Ngam innëtö, Ik sā yip tahëng kūöṅnkūö nö meuk inlahen ò ngaich haṙivlōn cha-a. (Mët. 18:30, 31) Ngatī inlahen yip tahëng nö mihôiṅ nö haṙivlōn tö kūö nup la-en hī. Tö sā hī yěi öt aṙē-ěl öp holre, öt milēḵṙen inrē tö ò ngaich mihôiṅ min anga-aṅ nö haṙivlōn. Hēk yěn meuk inlahen hī min yip prötör sistör ngaich haṙivlōn min cha-a inrē. w21.06 pěch 22 përa 11-12

Vīlöng misī ngòh tarik pön hōtu nö asīnken ngam Tēv. Ik sā ngam Tēv pöri “nö meuk tö ötlanöökö tarik nö kiröng” inuk sakamö Nō-a, ngaich ang Yāvē nö “haṙivtīre nö vī tarik nö ikui ngam tumlat, ngaich miṙivngölōn ò angū-ö.” (Ran. 6:5, 6, 11) Höng kūö urěh në ötlanöökö töngamuh! Iṙôk ṙanamlōn ang ngam sī-ö yěn meuk inlahen yip tarik nö kēkö mine töchōich lōn ngam alaha mine tötkô nö kēkaṙen ihôi nap tötpamīhöre! (Efi. 4:18, 19) Mötlö ṙanamlōn anga-aṅ yěn ōt öp tarik ngam Tēv tö fukngö tö kūö kinëken minë töchōich la-en. Ing sā ngam inyööngö tö ngam sī-ö, ngòh tarik öre nö chumkūöken ngih panam tö mine aṅkūö e inrē. Ngaich pöri anga-aṅ nöng ‘chökhuṙen tī yěn hayöng’ nö ikui tarik. Ötlēken ngih panam inrē holre tö mine töṙeūla aṅkūö e, minë töhōtu nginëchka tö ò. (Mum. 8:9; Ran. 1:28) Ngam ṙòng e? Ngöṙô yip Saëntis töngamuh yěn öt ṙāngenre min ngòh tarik nö ötlēken në chehen ikūöng panam ngaich köṅnyu ṙôken min nup chehen töt ōt tit nö ikūöng panam w21.07 pěch 12 përa 13-14

Ōt yip tarik ngam Tēv tö ṙòmöng köp nö haṙivlōn, pòrô ngaich nö aṙēlöngö. Öt ṙātö-ellōnre cha-a tö Yāvē ngaich nö aṙēlen cha. Yēḵ meh öm ngatī mufē, ngaich hòṅ köpölōn më-eṅ tö Yāvē nö kô-en nö hameuktö ngam töt chanuhuvṙen hanangelōn re tö meh, lökten ò nö aṙēlen meh, möl min më-eṅ holtö ngam töhet elkuilōn re löklōn Yāvē. Kūö “ngam mahām Yēsū . . . nö ahetlen hī i nup tökööl hī.” (1 Yôh. 1:7) Kūö töt hanëtöre in öi ṙōlheuh vaichköreṙen hēk haṙivlōn inrē. Köpölōn pöri tö Yāvē nö hamööngöre nö aṙē-ěl nup tökööl hī yēḵ hī havöötö ellōnre. Ngö ṙô ngam kamūich Salmai ang Tāvit nö vënyö ngam töt chanuhuvṙen hanangenlōn Yāvē: “Pòn sā ngam halīöngö nö lātulöng töng panam, ngatī ṙôkö öp neūkölōn Ò nö in cha yip tö pa-ekūö tö Ò. Sā rôvat ngam chuhöt tö ngam sūng, ngatī ṙôvat tī anga-aṅ nö ṙūöngen nup tanôichngen hī tö hī.”—Sal. 103:11, 12. w21.11 pěch 5-6 përa 12-13

Ngòh Kristīön inpīhö kikōnyö nö hòṅ milēḵṙen anga-aṅ tö ngam pīhöre kikānö. (1 Pīt. 3:7) Sitih manah angu-ö tö ò nö hòṅ kēnyö ṙētak re nö in ò hòṅ chumkūöṙen inrē tö ò hēk milēḵṙen inrē. Ngaich öt yahlö mufē inrē nö in ò ngaich hēk öt kô anga-aṅ nö asinten ò nö in yip tahëng yöngnyīö. Yěn ngatī inlahen ngam pīhö kikōnyö hòṅ sitih inlahen kuilōn min ngam pīhö ò? Hěng tak öp i kanānö hī tö Rosa minë-eny nö inchōḵ elmat hī. Öt el kanô-en ön ngam pīhö ò kikōnyö ngaich örheūheu anga-aṅ nö asinten ò nö in yip tahëng ngaich nup ṙô öp pīhö ò yěn Vë-evkūö ò nö chökhuṙô ngaich lökngöre ellōn anga-aṅ. Ngö ṙô ngaich öng Rosa nö vë-enyre, “örheūheu chu-ö öich fē-ělre tö Yāvē nö milēḵṙen töich hēk hangenlōn inrē tö chu.” Örhō ön ngòh Kristīön nö ngatī inlahen pön milēḵṙen min anga-aṅ tö ngam pīhöre kikānö pön akahakūö anga-aṅ tö cha min yěn ngatī inlahen ngaich ngön min ngam innôlö tö cha tö ngam pīhö ò kikānö hēk in Yāvē inrē. Ōtre inrē öp inlahen ngam Kristīön inpīhö kikōnyö nö hòṅ hameuktö minlēḵren tö ngam pīhöre kikānö. Hòṅ kētö ṙinatö-ellōn ngam pīhöre anga-aṅ kikānö tö ò nö hangenlōn hēk milēḵṙen inrē. Ngaich hòṅ eu-an inrē anga-aṅ nö in yip tahëng. w21.07 pěch 22 përa 7-8

Haṙivlōn öm öre yěm hökken öp töhěng tak tarik, ngaich öt yanīhivö anga-aṅ? Yēḵ meh pöri öm akahakūö töp lanyngen ò nö hāṅtö yīhi, hö-ö hòng më-eṅ möl min öt kihngen hökken ò, holtö manöiyö re pöri min öm hökken ò? Vënyu nang in töm Inchōḵ-oṙô 13:11 tö hī öi hòṅ aṅhav in tö ngam manöiyö. Ngö kinuchngö ön, “Ka-eūingen nö keheūt tö veūtö yanīhi kanôlò, ṙūöhölre sanīöpötī pöri ngòh töng rahëch rahëchyen hamūl.” Haköplu ayī-ö tö hī hòṅ holtö ṙanëmen re yēḵ hī hòṅ meuk nup tö vai ṙòng minë la-enre ötkô öi veut lōn. Ngöṙô ngam Inchōḵ-oṙô 4:18 “Öp kanröönö tölöök pöri sā minlīlö peuheū, öp töyanglöre yanāngö inrē söl ip sakāmö.” In ngih miröökö ayī-ö mikahtukūö tö inlahen Yāvē nö hiṙeūt tö tī re nö vë-eny minë kuilōn re nö in hī. Mikahtukūö inrē ayī-ö tö inlahen ngòh Kristīön yěn halööktit re nöng öt hěnglöh inlahen pön hiṙeūtken re inrē. w21.08 pěch 8 përa 1, 3-4

Röhta pinyāingö ön ngih panam, pōitit pöri minë la-en hī tö hòṅ kēkaṙen. (Mët. 24:14; Lūk. 10:2; 1 Pīt. 5:2) Lōnu in öi holtö ellōn re öi kēken minë la-en. Ōt yip tö hòṅ la-entö painīör, la-evṙen nö el Pētěl, hēk i minānö inrē nö kētöre, ōtre yip prötör kamëtöre nö hamòlṙen töla-evṙen hēk la-entö la-en minröinylen inrē. (1 Tim. 3:1, 8) Ṙamölōn ang Yāvē nö meuk nup la-en hī im linökö lōn ò! (Sal. 110:3) Höng iṙūöhen pöri me-eṅ yēḵ meh haṙivölōn töre öt teūngen tö nup lōn re la-en i linökö lōn ngam Tēv, ngaich vë-ekūötēv më-eṅ keuheūtnyö ṙô ellōn re in Yāvē. (Sal. 37:5-7) Kò-òren inrē öm vë-ekūö yip prötör yip tö mihòiṅ min nö halēnö meh hēk hayööken meh inrē min im linökö lōn ngam Tēv. Yēḵ meh min hang inlēnö re, ötlöktu më-eṅ öt teung in minë chö-öny re. w21.08 pěch 20 përa 1; pěch 21 përa 4

Ök pròfět Hanna ök tafīösi tö ngaich nö 84 samyeūheu ṙēḵti, sön nö ‘öt heuhkö röön re nö chuh el ngam patī ngam Tēv.’ Lökten Yāvē nö reushen ò ngaich halöngten ò nö meuk ngam kun nyīö ang Yēsū. (Lūk. 2:36-38) Ōt yip töngamuh tököiny hol maneuk hī tövai nö inchō elmat hī. Mihôiṅ öi tölṙô cha nö vë-eny inlahen taneūngen re töm kanô-en, taneūngen cha inrē tö nup töpōyen inkôlò. Ngaich hòṅ hangihtöre ayī-ö yěn vë-eny nang hī cha-a tö u. Pōiṙāi yin vē tököiny hol maneuk hī nö imat Yāvē, el ngam söngkötön ò inrē. Pōyen maheuk yin vē tököiny hol maneuk hī tö nup inkôlò tī Yāvē. Haköplu yin nö in nuk vanāchö re. Lökten yin vē hol maneuk hī tököiny nö sā ṙēngen tö aṙū-utī nö mak. (Inch. 18:4) Mihôiṅ in kēnyö ṙētak re öi mikahtökūöre tö cha. Ngaich ngönlöre min ngam ṙinatö-ellōn hī. w21.09 pěch 3 përa 4; pěch 4 përa 7-8; pěch 5 përa 11, 13

Sā ṙô Isayā tö minë tövai inlahen cha nö sā “aṅteh yip pumnāmö tarik.” (Isa. 60:5, 16) Kūö minë heuneū-en cha hēk tövai tinrīken cha inrēlökten nö pōyen tö tö 240 pumnamö nö ahangköm tölöök inhānga, pōyen tö tö 1,000 ëlô minë līpöre, mëkesīn inrē nö katānö. Angū-ö ön ngih ṙētak hī katöllöm Pūlngö ngam Tēv hēk yěi hòṅ lā ing panam. Ngaich yin vē tarik ngam Tēv nö katöllöm Pūlngö ò. Lökten yin nö pòrô nö el katòh chööngö ngih panam hö-ö pöri cha-a nö kētöre nö inup la-en ngih panam. (Rōm. 13:1-7) Akahakūö yin töm Pūlngöm Tēv tö e nöng angū-ö tökô nö kēngö në kanihngen hī.—Yôh. 18:36, 37. w21.09 pěch 17-18 përa 13-14

Yěn ha-uknyu öp hanangenlōn meh, ngaich hòṅ haköpkö ngam nganönöre më-eṅ tö më aṅ ngam mikūönö inrē. Hòṅ kē-ěny ṙētakre öi haköp mat ngam Paipöl. Hòṅ hī ngön hēk röhta inrē öi in Yāvē. Yēḵ hī min afēkö nup haköpre aṅ mat Paipöl, yihtökūö öi el mīting, ngönlöre min ayī-ö. Kò-òren hang ṙô Chôina ngam tö ṙa-ayö töp yöngre hēk tö yik mëm re inrē. Ngö ṙô anga-aṅ: “Sā tö yihiv chū-ö tö ngam lanāmö kumchikṙen inrē, yēḵ chu vë-ekūö inlahen hē Apikēl, Estör, Yōp, Yôsef hēk Yēsū inrē. Sā tö hangëka chū-ö tö minë inlahen cha. Yīhi vanayö mufē chu-ö, kūönngöre inrē ngam miṙivlōn chu” Um ṙākôre öm vë-ekūö Yāvē yěm haṙivlōn. Tön hang ṙô meh an min ngaich hachōkūö meh inrē. Ngö ṙô anga-aṅ, “Haköpten meh chin min el öp talöökö lahök meh.” (Sal. 32:6-8) Mihôiṅ in ṙung öi kihngen öi vë-eny nup mufē elkuilōnre öi in Yāvē. Mihôiṅ pöri öi ṙatö-ellōnre tö Yāvē nö keūheutlöre mat nö meuk nup chanöökö hī. Pò ò nö tö tööḵlö tö miṙēlōn neūkölōn inrē.—Man. 34:6; Sal. 62:7. w21.09 pěch 28 përa 9-10

Ik 32 C.E., unôichrit ök Paska. Ngaich hē Pītör, Yāköp hēk Yôhan nö hol Yēsū nö chuh kui ök tömarò-òlkui rôngö, ngaich haṙī-ingre mineūkö ang Yēsū nö i kūö cha. “Sā yanāngö mat tavūöi, ök kūö Ò, sā insoho hanāṅtö nuk hilā Ò.” (Mët. 17:1-4) Ngaich yik tanīnöṙô nö hang ṙô ngam Tēv nö ngö ṙô : “Hanangenlōn Chu Ön ngòh nö Kūön Chu, in Ò Chin ṙamölōn takô. Hang ṙô Ò yin ” Yěi meuk inlahen më tö lūöi tak tanīnöṙô, nö hameuktö ngam inlahen re cha-a nö hang ṙô Yēsū. Ngaich hòṅ ngatī inlahen ayī-ö öi hòṅ sā cha öi hòṅ hang ṙô Yēsū. Pōyen ṙô in ha-öinyö Yāvē kūö ò nö halēnö hī nö löktö in Yēsū Kristu, ngam “kui ngih Māṅ”! (Efi. 5:23) Ta-a töi sā inlahen hē Pītör, Yāköp hēk Yôhan nö hang ṙô Yēsū cha-a. Yē hī min öi ngatī inlahen ngaich ṙamln min ayī-ö ing töngamuh inup yamih min inrē ṙētak. w21.12 pěch 22 përa 1; pěch 27 përa 19

Hěng tak ök Kristīön aṅ Kòrin ma-asěhkö ök pīhö ök yöngre kikōnyö. Töl ṙô yip minṙöinylen ang Pôl nö ha-uknyen ò. Pön mihôiṅ nö lökngöre yip tarik aṅ ngam māṅ töm fālen ò. Ōt pöri yip mameuk ngam tarik tö fāluṙen nöng sa töt fāluṙen tö lōn cha! (1 Kòr. 5:1, 2, 13) Unôichngöre ang Pôl nö akahalōn töm tarik halööktit re. Lökten ang Pôl nö hameuk tö neūkölōnre nö in ò. Halēn yip minṙöinylen anga-aṅ nö ngö ṙô, ‘hameūktö ngam neūkölōnre in ò ngaich aṙēlen ò’. Kuöyòh ang Pôl nö ngatī ṙô? “Hòṅ öp tö ngatī nö öt ngeūktu tö kūö miṙivlōnre.” Öt lōnu ang Pôl tö ngam tarik nö köptī töm miṙivlōnre hēk ngö lōn min töre öthō chin min inṙēluvö. (2 Kòrin 2:5-8, 11) Asīnken Yāvē yin më minṙöinylen nö hameuk tö neūkölōnre nö in yip tahëng. Ngaich yēḵ öp tarik nö fāluṙen ngaich mihôiṅ cha-a nö chökṙen ò ngach mihôiṅ inrē cha-a nö hameuktö neūkölōnre nö in ò. Ngaich yēḵ yip minṙöinylen pöri nö öt halēn öp tö fāluṙen tarik töng ṙamūöhlö alaha ò cha-a nö kēken ngam fālen. w21.10 pěch 11-12 përa 12-15

Mihôiṅ in asīntö ngam inlahen re yěi miṙivilōn öi im ṙanatngöre kuntī. Ōt nup tökūöṅnö, ōt nup tökiröng. Yěn höng ṙahëichyen öre öp ṙanatngöre meh, unôichrit tö hěng hēk nët sumkam min më-eṅ öm vaichngö töm chanökö re. Ngatī inlahen nö ōt nup ṙô hēk la-en yip hol hī tö chökhutī tö hī, yěn öt kiröng pöri anu-ö ngaich lööṙen ayī-ö aṙēlen cha. Sitih inlahen pöri yěn kiröng ngam ṙanatngöre meh? Sön öm chuh in öp Tòktör öm lë-enö re. Yēḵ meh pöri min höng örheūheu halöinyken e ngaich öt hētu min angū-ö nö lööken, hēk pöri nö kiröngnyöre. Ngatī inlahen yěn kiröng öp miṙivlōn meh tö tī öp hol meh. Ngaich yēḵ meh min höng fēken e, höng mahakihten re më-eṅ min. Lökten nö tövai ngam inlahen hī yěi hang ngam inlēnö imat ngam tövë-evkūö töngamuh. w21.12 pěch 12 përa 15

Yěn hěngtak öp minṙöinylen öre mahalēn öp prötör hēk sistör tö inlahen minë chinhenen hēk inyöötöre. Ngaich mihôiṅ anga-aṅ nö kahngen re nö hatöönö re, ‘Kô-en ang nö öt hang ngam inlēnö in ngam lökngörit ngam chööngö aṅ mat ngam Paipöl?’ Chumkūöṙen min anga-aṅ nö öt löknyö in re ṙô nö kētö inlēnö. Lökten anga-aṅ nö hatöön töre nö in öp tahëng minṙöinylen hēk in yip tö ekspirīönu prötör sistör inrē. Mihôiṅ inrē cha-a nö holṙô re nö kakkö minë inlēnö ṙô Pôl. ( 1 Tim. 2:9, 10) Hö-ö ök Pôl nö vī chööngö yik Kristīön nö i inlahen minë chinhenen nö hòṅ sitih inlahen chinhenen cha-a. Pön akahakūö anga-aṅ tö më prötör sistör nö hang minë lökngörit chööngö aṅ mat ngam Paipöl tö cha nö mihôiṅ nö chumhentö minë lōnre chehen. Höng ngamuh ṙô ò nö vë-ekūö cha, tö cha nö chumkūöṙen nö katöllö minë chinhenen re, hēk chumkūöṙen inrē nö un mumṙē-iyö ngam minë-eny Yāvē. Angū-ö ngih chumkūöṙen më minṙöinylen. Hòṅ köpöölōn ayī-ö inrē tö inlahen minā tö nët tak prötör nö köharīkngöre minë fësla cha, mihôiṅ pöri minë fësla cha nö löng. Lökten ayī-ö öi ötkô uyëken minë ṙô cha. Ötkô ayī-ö öi vënyö öp tö hòṅ inlahen ò hēk tö hö-ö. w22.02 pěch 16 përa 9-10

Pōyen nup lāinyngen hī hameuktö ngam töt chanuhuvṙen hanangenlōn re tö höö. Ngëichkö ṙô ngam līpöre inchō-oṙô nö vënyen u: “Uh man ṙā-ayö tö hinang chöngö kanô-en inrē . . . Hòṅ meh min kôtökūö tö neūkölōn tölöök ineūkö inrē i kūö ngam Tēv, tarik inrē.” “Ngòh tarik tö aheūkölōn, hakôlò re” anga-aṅ. “Ngòh famchūrit lanöökö neūkölōn inrē kôtökūö min tö nômö.” (Inch. 3:3, 4; 11:17; 21:21) Lūöi minë tövënyu nö ihih lāinyngen hī hameuktö ngam töt chanuhuvṙen hanangenlōn. Raneh, pōiṙāi min ayī-ö imat Yāvē yěi hameukten e. Innëtö, teūngen ayī-ö tö yanöölen re töngamuh. Tö sā hī teūngen tö holre. Linūöyö, teūngen min ayī-ö tö inkôlò re inup yamih ṙētak holre tö ngam nômö tö örheū-heu aṅ inrē. Lökten ta-a töi hang ṙô Yāvē öi, “Hameuktö neūkölōn re miṙēlōn re inrē kö i holre.” w21.11 pěch 8 përa 1-2

Yēḵ hī meuk ngam ṙinātö-ellōn re nö kūönngöre hē el kanihngen, ngaich ötkô ayī-ö öi haṙivlōn. Ṙētak hī angū-ö öi asīöp ṙôken ngam ṙinātö ellōnre. Vë-ekūötēv öm ikūö Yāvē, möthë takö yěm kihngen. Ṙātö-ellōn öm in Yāvē tö ò min nö löktö in yip aṅpatī hī hēk yip hol hī inrē min hayööken hī. Yēḵ meh min meūkö Yāvē nö hayööken meh la-al nup kanihngen meh töngamuh, ngaich ṙinātu-ellōn min më-eṅ tö ò nöt löktu nöt hayööken meh inup yamih ṙētak. Vë-eny nang yik haköptöre ang Yēsū tö nup kamngö chūök cha nö hòṅ asīöp ngam ṙinātö-ellōnre. (Yôh. 14:1; 16:33) Ṙātö ellōn re pöri inrē anga-aṅ tö yip tömaṙôngö min töt fehnguṙen hē öp yöng kanihngen nöng aṅ cha-a kūö nganönö ngam ṙinātö-ellōnre. (Inm. 7:9, 14) Kaheukhötre man min më-eṅ in cha. yēḵ meh löktökūö ing töngamuh öm hangön ngam ṙinātö-ellōnre!—Hep. 10:39. w21.11 pěch 25 përa 18-19

Öt maheūṅkku in tö Yāvē nö ṙānyen hī nö in minë pinngangkūö. Ṙatö-ellōnre pöri ayī-ö öi in ò pòrô min öi kapah, sön anga-aṅ nö kē-ěkūö hī tö ngam nômö tö-örhreūheu aṅ ip yamih ṙētak. Röhta yanihi öng Kōk ap panam Makōk, tö ngö manah nö pōyen min nup pumnāmö nö kilöön yip tarik ngam Tēv. Hē e min ayī-ö öi kihngen ngaich hòṅ ṙatö-ellōnre ayī-ö tö Yāvē min nö lāklö yip tarik re. Ngölōn min nup tahëng pumnāmö, tö hī min öi sā nup sīṅp töt lamakluvö. (Isi. 38:10-12) Ötṙēhěn in ayī-ö öi aṅhav eltī öi kiyung hēk ötṙēhěn öi kiyung. Ngö lōn min cha-a töre nö lööṙen tī nö ha-atngen hī. Öt akahakūö pöri cha-a tö hī öi havīlöng tö më ma-ahānga nö lamaklen hī. Ṙatö-ellōnre pöri ayī-ö öi in ngam Tēv yěn yih min yip ma-ahānga nö lāklen hī, ngaich pingangkūö min nup tahëng pumnāmö.—Inm. 19:11, 14, 15. w22.01 pěch 6 përa 12-13

Hangenlōn an Yāvē tö yip Tarik re nö ròkhöre, lökten öi öt kò ayī-ö haṙivlōn ti tö cha. Ngaich yēn ōt tö haṙivlōn tö ti hī ngaich öt kô ayī-ö ngö mufē uroh kòl nö liplö tö ngih töng rahëichyēn ṙô. Höng hòṅ vaichngen e ayī-ö ngaich arě-len ò. Pōyen nup chö-öny hi haṙivlōn. Ōt yip lömöktö in minë inruklö re nö kunnen elmat töre tö yip tahëng. Hēk yēm tufömngöre öm im kanô-en öm harunöre öm arě-ēl hol re. Pòrô öp tö yòh chö-öny hi ngaich hòṅ arě-ēlö öp holre ayī-ö. Öt kô öi inu tö ngam miṙivlōn hòṅ ilöö halöktit re pöri ayī-ö. Yēḵ hi min ngati inlahen ngaich ṙamlōn min ayī-ö hēḵ vai min inrē ngam inòlö hi tö yip prötör sistör. w21.06 pěch 21 përa 7

Akahakūö an Yēsū tö minë chanökö hī. Sā inlaha hol hī an nö ahakakūö tö minë kanihngen hī. Lökten yē hī öi kihngen, ngaich akahakūö anga-aṅ tö minë öt kumlēḵen hī. Ngaich chumkūöṙen anga-aṅ inrē tö hī nö “löngö ṙētak nö kētö inyööken hī.” (Hep. 4:15, 16) Ik sā Yēsū nö el ök panô-ò Ketsēmanī ngaich hō-en ngam inyööken anga-aṅ tö ök ma-ahānga, ngaich hòṅ ngatī inlahen ayī-ö inrē öi hō-en minë inyööken tö lamöktö in Yāvē. Rolkangen minë tī Yāvē nö inyööken hī, nö löktö in minë līpöre, vitiō, minkahten hēk më minṙöinylen hēk tö më holmaneuk hī inrē aṅ el ngam māṅ nö hayööken hī. (Lūk. 22:39-44) Kētö lanāmö an min Yāvē nö in meh. Yē hī öi vë-ekūötēv el ṙētak kanihngen, ngaich teūngen ayī-ö tö ngam “lanāmö ngam Tēv ngam chamööḵngö taṙòkhöre mikah.”—Filip. 4:6, 7. w22.01 pěch 18-19 përa 17-19

Mihôiṅ in öi ṙatö-ellōnre in minë la-en Yāvē nö ṙòkhöre nö löng. Yip töhalēnlöng pöri prötör el ngam söngkötön nö mahayōmken hī, öi kihngen lohten hameuktö ṙinatö-ellōnre öi in cha. Mihôiṅ öi ngölōn, asīnken minë inchöngten re hòng cha-a tö Yāvē hēk löklōn re ṙöng. Ngatī inlahen mufē yik mā misī. Akahalōn pöri ayī-ö tö Yāvē nö ṙātö ellōnre nö in vē mahachōḵ kūö hī. Lökten hī yēḵ hī öt ṙatö-ellōnre in cha, ngaich sitih inlahen min ayī-ö öi ṙātö-ellōnre in Yāvē? Ngam mupakö alaha ngam söngkötön Yāvē nö ing panam nö yip mahayōmken e nö yip tö-akaha mahalanṙen.” (Mët. 24:45) Ngatī inlahen ik raneh senchurī yik Yōm La-en nö ngatī ṙēngen cha-a töngamuh nö mahayōmken yip tarik ngam Tēv nö kētö inchöngten yip minröinylen Ngaich ngatī inlahen yip minröinylen nö asā minë inlēnö nö kēken minë la-en nö el ngam māṅ. Lökten nup inlēnö lamöktö el ngam söngkötön nö in yip minröinylen ngaich hāngö u cha-a. Ngaich yēḵ hī öi hāngö u ayī-ö inmeuktö hī öi ṙamölōn hēk ṙatö-ellōnre tö minë la-en Yāvē. w22.02 pěch 4 përa 7-8

Pōyen ṙanamlōn ayī-ö tö kūö hī öi Vamënyen Yāvē! Ṙamölōn inrē ayī-ö yěn hěng tak öp hayööken hī tarik, ‘ngam tö hōtu nö im nômö tö örheuheū-aṅ nö aṅ.’ (Inl. 13:48) Sā ṙanamlōn Yēsū ayī-ö ik sā yik haköptö ò nö vënyö nup inlahen re nö ahānga. (Lūk. 10:1, 17, 21) Ngö ṙô ang Pôl nö halēnö Timòtī: “Chumkūöṙen man töre, tö ṙô meh haköphöti inrē. Iṙūöhen öm in u, tön i linökö u me-eṅ min öm hěnghöre yöölen tī töre tö cha inrē, yip hamang ṙô meh.” (1 Tim. 4:16) Eltī hī ön ngam nômö yip tarik. Hòṅ chumkūöṙen inrē ayī-ö töre kūö hī öi tarik ngam Tēv. Lōnu ayī-ö töre la-evṙen tö nup töhōḵov tö ngam Tēv, hòṅ meukö inrē ayī-ö öi kamëkö kaha nup haköp re. (Filip. 1:27) Hòṅ ‘chumkūöṙen ayī-ö inrē ngëichken minë ṙô re yěi haköphöti.’ Öi sitih inlahen? Hòṅ urěh ayī-ö öi halēnöre urěhkūö hī öi chuh in ngam inhānga hěnghöre havëkökūö Yāvē inrē tö inyööken re. w21.10 pěch 24 përa 1-2

Ngòh tarik mahayutlöre tö ngam “tufömngöre tinrīken,” sā mufē Yāvē anga-aṅ nö in nup la-en re. Ngaich hameuktö minë ṙòng ngam töhet fanöinylö anga-aṅ nö in minë mufē re hēk la-enre inrē. Tö sā ò nö hangenlōn tö Yāvē hēk tö yip tarik ò inrē. (Mët. 22:36-39) Höng ṙamlōn anga-aṅ pòrô nö kihngen. (Yāk. 1:2-4) Vī ngam lanāmö inrē anga-aṅ nö in yip taṙòkhöre. (Mët. 5:9) Hameuktö neūkölōnre anga-aṅ nö in yip tahëng hēk aṅhavin inrē tö ngam manööyö. (Kòl. 3:13) Lōnu inrē anga-aṅ tö tarik nö yöölen. (Lūk. 6:35) In minë la-en ò nö meūkö ngam ṙinatö-ellōn ò nö in Yāvē. (Yāk. 2:18) Yēḵ yip tahëng nö vīlö tanānyö ò, ngaich haṙēmngen re anga-aṅ nö in cha hēk yěn ōt tamölṙô ò nö kēken minë tövaich la-en ngaich ṙapöre anga-aṅ nö in u. (1 Kòr. 9:25, 27; Tai. 3:2) Yē hī hòṅ hayutlöre tö ngam tufömngöre tinrīken, ngaich hòṅ asīöp minë tövai ayī-ö tinrīkenre, tö vënyu nö im Kalatī 5:22, 23 hēk in nup tahëng inrē miröökö tö vënyu nö imat ngam Paipöl. w22.03 pěch 8-9 përa 3-4

Mihôiṅ yin më minṙöinylen nö sā inlahen ök tanīnöṙô ang Pôl nö rö-ö nöng chuh kūö patī nö ahangköm tölöök inhānga pön öp töng yòh ṙētak cha nö kô-òren nö ahangköm tölöök inhānga. ( Efi. 6:14, 15) Mihôiṅ më minṙöinylen nö asīnken Pôl yēḵ cha nö ṙònghöichṙen nö ahānga, ngaich mihôiṅ nö haköpten yip tahëng inrē, tö sā më mahayööken töla-evṙen. (1 Pīt. 5:1, 2) Ötkô pöri yip minṙöinylen nöng sānlen nö in minë la-en ngam māṅ ngaich öt ṙētakvö nö im la-en inhānga. (Mët. 28:19, 20) Lökten cha-a nö mihôiṅ nö hakūönngö minë la-en re. Yē më minṙöinylen nö kē-ěvkūö tö minë la-en ngaich urěh cha-a nö vë-ekūötēv ngaich mihôiṅ nö fēken minë la-en kinë-ekūö re. Ōt tit ṙētak hòng min cha-a inup tahëng la-en re, tö sā ngam manūlö mikūönö i töhěng afta nö kēkaren hēk in ngam la-en inhānga hēk holṙen yip kūön re nö ahānga hēk haköpten cha inrē. Mihôiṅ yip nö ṙātö-ellōnre tö Yāvē nö akahakūö tö cha nö chumkūöṙen nö ngëichkö nup tahëng inrē la-en. w22.03 pěch 27 përa 4, 7; pěch 28 përa 8

Kööpölōn man ik sāre öm haköp ngam kanô-en ngaich lohten më-eṅ öm vöö tö yip aṅ patī meh hēk yip hol meh min nö kunyah-elmat tö meh. Hēk öt teungten öm in ngam inlaha re inrē öm ahanga. Ngaich man më-eṅ öm lamök in në kanihngen, lökten öm akahakūö min tö kanihngen ngam tö kē-ē istötī. Akahakūö ök Yēsū tö kanihngen yip haköptöre, sön pöri anga-aṅ nö ṙūöhöl alaha yip haköptöre nö un ṙāngenre nö löklōn Yāvē tö kūö ngam vanöörö re. (Mët. 10:16, 17, 27) Haṙuntöm töhaköptu man tö Paipöl nö ahangköm tölöök inhanga. Ik sā Yēsū nö tinngen yip haköptöre nö ahanga ngaich vöö lohten acha-a. Ruhngen ngam vanöörö cha pöri ang Yēsū nö vë-eny nang cha nö achiö yip tö vēnyu nang min tö ngam tölöök inhanga hēk asuh öp ṙô cha min nö ṙô-òvö. (Mët. 10:5-7) Asup mihôiṅ inlahen meh öm asinken Yēsū? Mihôiṅ öm tölṙô ngam mahaköp nö fēken yip tarik tö mihôiṅ nö vēnyu nang tö ngam tölöök inhanga. Tö sā ò öre, yěn ōt mikahkūö tarik tö ṙamlōn nö hang ngam kanô-en aṅ mat ngam Paipöl. Mihôiṅ man öm haruntö ṙô ngam tö haköptu. w21.06 pěch 6 përa 15-16

Hěng heuh ök tökiröng kumyeūnö i Nēpal ik 2015. “Pōyen yik tö ngö ṙô, töm kumyeūnö nöng öt marò-òten. Ōt tö ngö lōn tö e nöng öt kinheūtuvö.” Tahëng pöri ngam ṙô kinyīnö në panamtö ngamuh—ngam kiyinkö në panam nö ṙòkhöre. Sā ṙô pròfet Hakai nö ngö ṙô: “Tön ngö ṙô an ngam Mā Tēv yip tömaṙôngö: Hĕngtöreheuh, rahëchtören an, ngaich chū-ö min kiyin minë halīöngö, tumlat inrē” (Hak. 2:6) Öt ṙôtö tökô-en kumyeūnö ök Hakai nö ihih, pöi pōyen pinlāngen hē el kumyeūnö. Hē ò pöri nö ṙôtö ngam kinyīnö në panam nö ṙòkhöre, ngaich meukö minë tövai ṙòng e. Ngö ṙô Yāvē: “Ngaich chū-ö min kiyin yip pumnāmö tarik nö ṙòkhöre, ngaich mīnö nup lōn vē pumnāmö tarik nö ṙòkhöre nö yih, ngaich chū-ö min hatööḵlö ngih patī tö kanôlò.” w21.09 pěch 14 përa 1-3

Ngön ngam innôlö hī nö in yip hol hī yēḵ hī öi örheūheu vë-ekūö cha. Ngatī ṙēngen ngam inlahen hī yěi hanôlö Yāvē öi hòṅ vë-eny nup mufē elkuilōnre öi in ò, nup taṙòkhöre inrē töng afēkö hī, inmeuktö hī min angū-ö öi ṙatö-ellōnre tö ò nö hangenlōn tö hī. (Sal. 94:17-19; 1 Yôh. 5:14, 15) Hòṅ hanòl yip tököp in lamöklōn ngam Tēv Yāvē öi örheūheu. Kahëtö Yāvē yin më hol maneuk hī aṅ el minë māṅ më ‘tö örheūheu nö hangenlōn tö hī.’ (Inch. 17:17) Kò-en yin nö aṅ in Yāvē nö tö pōi ṙāi nö raneusö hī. (Yāk. 1:17) Löktö in e mikah lōn in tö Yāvē nö chumkūöṙen tö hī. I mat ngam chitri kahūich re ang Pôl nö eūken yik Kristīön aṅ Kòlòsī nö “mahaṙamkölōn” ò. (Kòl. 4:10, 11) Ngatī inrē ang Yēsū nö lōnu tö hī öi hanòlö ò. Hē yik mahaköp tö yik ma-ahāngö misī nö hayööken ò nö hangönken ò, ngaich ṙamölōn anga-aṅ nö in cha. (Lūk. 22:43) Mihôiṅ in öi vë-eny nup kanihngen re, pinṙūtölōnre öi i yip tahëng, rö-ö pöri angū-ö nö tö ngö manah tö hī öi tö kūönen ṙinatö-ellōn. Pöi kò-en, yěi vë-eny nang yip holre min ngaich lanaklö ngam ṙinatö-ellōn hī min angū-ö. w21.04 pěch 24-25 përa 14-16

Yēḵ hi haṙivlōn tö kūö inlahen öp hol hi ngaich hòṅ sitih inlahen ayī-ö? Hòṅ vī ngam lanāmö ayī-ö nö ihôihö höö ngaich ròngnyökūö ellōn re ayī-ö in Yāvē. Ngaich hòṅ vë-elkui yip prötör sistör ayī-ö hòṅ hi öi ngëichkö nup tö vai tinringen cha—sā Yāvē nö nëichkö nup tö vai tinringen cha. (Lūk. 6:28) Yēḵ hi öt vaichngö tö nup vanachö cha ngaich hòṅ vë-ekūö cha ayī-ö. öt kô ayī-ö ngö mufē tö cha nö tölngen re nö haṙivngölōn hī. (Mët. 5:23, 24) Yēḵ cha vë-ekūö hī ngaich hòṅ hangihtöre cha ayī-ö ngaich hòṅ ṙatö ellōn re ayī-ö. Ngaich yēḵ ò nö ōt halāmtöre ngaich hòṅ möy ayī-ö. (Kòl. 3:13) Ngaich öt löng min ngam inòlö hi tö Yāvē. Ōt kò ayī-ö öi tī öp holre haṙivlōn. Inmeuktö hī min angū-ö öi möḵlö hangenlōn tö Yāvē.—Sal. 119:165. w21.06 pěch 23 përa 15