Septempör

Nuk ṙô Yēsū misī inköphöti, öt ṙamlōn yik tarik tö u nö ṙòkhöre. Pön öltöre lōn cha-a tö nuk minkahngö vinënyö ò nö Mesayā. Hē Yēsū pöri nö sō nö hameuktö tahëng pinngangkūö ngaich öt hòṅ ṙatö-ellōnre cha-a tö ò nö Kristū.. (Mët. 16:4) Sitih ṙô öng ngam Töhet līpöre? Hang ṙô Isayā nö vë-eny inlahen ngam Mesayā: “Öt hū-a öp min öt rēhĕn nö pōitö ṙô, öt rēhĕn öp ṙô ò min nö hāngö nö el talöökö.” (Isa. 42:1, 2) Öt hěng heuh Yēsū nöng kūöre nö hòṅ meūkö tö tarik nö la-evṙen. Öt vīlö tökiröng chūök vamë-ekūötēv anga-aṅ. Öt chōk inyut re tö nup tö tohtöre mineūkö. Sō anga-aṅ nö havëka tö yik tarik nö mā. Öt hameuktö pinngangkūö anga-aṅ nö ikūö ök Rācha Heròt hē ranöhta ngam kinpaha ò. (Lūk. 23:8-11) Kô-en pöri anga-aṅ nö hameuktö pinngangkūö inuk tahëng ṙētak, ngam inhangköm tölöök inhānga tömötlö nö la-en ò. Lökten ò nö ngö ṙô, “angu-ö an lökten Chu yih.”—Māk. 1:38. w21.05 pěch 4 përa 9-10

Chöh yip tarik ayī-ö yip tö “hōtu nö im nômö tö örheūheu-aṅ.” (Inl. 13:48) Yēḵ hī pöri lōnu tö cha nö mahaköp ngaich hòṅ hayööken cha ayī-ö nö (1) akah elnang, (2) ṙātö ellōnre, hēk (3) kēkö kaha minë haköp re inrē. (Kòl. 2:6, 7; 1 Tös. 2:13) Ṙòkhöre ayī-ö el ngam māṅ öi hòṅ hameuktö hanangenlōnre tö yip tö tufömngöre ma haköpmat Paipöl, hòṅ ṙamölōn ayī-ö öi ha-öinytö yanīhi cha yěn yihtökūö nö el mīting. (Yôh. 13:35) Mööḵlö inlahen pöri ngam kamë istöti nö hòṅ hayööken ò nö ṙāngö nup “töngëḵ” tö töphöt ṙinātö ellōn hēk la-en inrē. (2 Kòr. 10:4, 5) Lohten min öm chumngëṅtu haköpten ò. Öt yëḵngen pöri ngam lumrāḵ meh haköpten ò, ṙamölōn min më-eṅ öm meukö ò nö kētöre nö löklōn ngam Tēv. w21.07 pěch 3 përa 6

Kô-en öi ayī-ö ṙatö-ellōnre, töre öi lööngö inlahen öi löklōn Yāvē? Asuh nup lāinyngen hī ṙātö-ellōnre? Ṙātö-ellōnre takô ang Pôl töre nö īnu töm kanô-en. (1 Tös. 1:5.) Rö-ö pöri ngam ṙinatö-ellōn ò nö töng öt chöönyu. Pön chumkūöṙen anga-aṅ nö haköp minë Ṙô ngam Tēv. Ṙatö-ellōnre inrē anga-aṅ tö ngam “Töhet Līpöre nö tö uhômhötvö nö ellōn tö ngam Tēv.” (2 Tim. 3:16) Asuh nuk rih kanôtökūö ò nö haköp? Kôtökūö anga-aṅ tö nuk ineūkö Yēsū tö ò nö tö kilē-ěyö nö Mesayā. Hö-ö pöri yik mākūö kuönṙô yik Yahuti nö ṙātö-ellōnre tö u. Vë-enyre cha-a nö mahaköptö ṙô ngam Tēv, öt ngatī pöri minë la-en cha. (Tai. 1:16) Öt sā cha ang Pôl nö atöllö lōn re tö nup chūök re nö ṙātö-ellōnre ngaich sō-en nup tahëng. Pön hō-en minë “inlēnö aṅ im Tēv” anga-aṅ nö keuheūtlöre.—Inl. 20:27. w21.10 pěch 18 përa 1-2

Kalēḵ alaha in ṙung öi ahangköm tölöök inhānga, haköptö yip tarik inrē töm kanô-en öthō pöri yip tarik nö yihtöre nö haköp ngam kanô-en yěn öt lōn Yāvē angū-ö. (1 Kòr. 3:6, 7) Pōiṙāi nômö tarik nö meūkö tö Yāvē. Tökiröng inrē nö minlēḵken hī tö ò öi holṙen ngam kūön ò im inmūlö tarik nö haköp ngam kanô-en urēhěkūö öp manāngen nö yih. (Hak. 2:7) Sā ṙēngen lamaklö nômö tarik in ayī-ö yip tö lōngti kupòk. Töng la-evṙen ayī-ö öi el ngam tīm öi kamëhöt yip tarik nö i kuyāyö, yip tö lōngti nö elmai. Pôrò cha-a nö öt ṙōltit tak, sön minë nômö cha nö pōiṙāi. Ngatī inlahen ngam inhānga nö lamaklö nômö yip tarik yěn hāngö e min cha-a. Öt akahkūö ayī-ö inrē tö ṙôktit yip tö hôṅ hang ngam kanô-en nö ing panam ngam Sī-ö. Höng ngamuh mikahkūö hī tö Yāvē nö mihôiṅ nö aṅtī ten tö hī nö kēnyen cha. Ngö ṙô ang Antrīās ngam aṅ Poliviā, “Yěn hěngtak öp tarik yamihtöre nö haköp, ngaich kēḵ ngam vinôkö, ṙòng kumlēḵ akaha yip töpōyen angū-ö nö meūkö tö chu.” Yēḵ hī min ngatī mufē öi im inhānga. Öthō min Yāvē nö öt kētö inkôlò ngih la-en hī ngaich teūngen min inrē ayī-ö töm tökô-en ṙanamlōn. w21.05 pěch 19 përa 19-20

Hěng an ngam kūilōn ngam mahacheū—kēḵ ngam hacheū re, hēk fēl höngö. hariktö tī re anga-aṅ nö vī inhūt re, sā kinuchngö e imat ngam Paipöl. (Yōp 18:8-10) Sitih inlahen tī pöri anga-aṅ nö kēḵ ngam hacheū re? Chumkūöṙen anga-aṅ nö ngëich ngö ṙöön ò. Asup min aṅh tī ò inhut hòṅ ò nö vöönhöt tī tö ngam hacheūre ngaich vöönhöt anga-aṅ im inhut. Sā ṙēngen mahacheū ön inrē ngam Sī-ö. Chumkūöṙen anga-aṅ nö ngëichngö öp kūö-ö hī hēk nup kuilōn hī inrē. Ngaich asā nup inlahen hī anga-aṅ ngaich ngatī tī anga-aṅ nö vī inhut hī. Kētö ṙinatö ellōn hī pöri ngam Paipöl yēḵ hī öi vööngö in minë inhut ò ngaich mihôiṅ öi ra-ööny re ra-ang in e. Vë-eny öp tö hòṅ inlahen hī ön inrē ngam Paipöl hòṅ hī öt kò-òng vah tö nup inhūt ò. Ngaich ön ngam Sī-ö nö kò-òng vah tī tö yip tö pōyen tarik nö chehetī tö minë tö nët inhūtre. Anu-ö në, tanāilölōn hēk yinikhanga. Samyeūheu rò-òten ön nö yūs ngih chehetīre. Sā ṙēngen öp mahacheū anga-aṅ nö vītö nup tinngöp re nö kē öp hacheūre. (Sal. 91:3) Ngaich pöri nö urěhnyi ṙô öng Yāvē nö vë-eny minë tinngöp tī ngam Sī-ö. Yēḵ hī min öi chumkūöṙen tö u ngaich öt hō min ayī-ö öi kò-òngvah.—2 Kòr. 2:11. w21.06 pěch 14 përa 1-2

Sā minë töpōiṙāi chehen yin më tököiny hol maneuk hī. Minë pakūkui cha nö ineū-eu nö sapīöv. (Inch. 20:29) Pòrô nöng öt chumkūökaṙen. Öi Sön mihôiṅ haköpluvö öi in cha. Pōiṙāi yin më tököiny nö i mat Yāvē, akahakūö anga-aṅ tö nup tinrīken cha hēk mikah cha inrē. Lökten yēḵ chan halēn më ṙāl tarik tö nup inlēnö ngaich ṙamlōn ang Yāvē nö in cha. (Yōp 12:12; Inch. 1:1-4) Akahalōn ang Yāvē tö ngam manööyö cha. (Mal. 3:16) Pòrô cha-a nö pōyen kanihngen, sön ngam ṙinatö-ellōn cha nö ngön nö in minë kinlēḵngô Yāvē. Örheūheu cha-a nö la-evṙen nö im linöklōn ngam Tēv. Lökten Yāvē nö hangenlōn tö cha.—Sal. 92:12-15. w21.09 pěch 2 përa 2-3

Kô-en in öi hòṅ kënyö ṙētakre öi hatöönöre, Tö sā në: ‘Vayö mufē öich chu-ö inrē tö kūö chu mööḵlö heuneū-en tö yip tahëng? Ma-ainyre hòng chu-ö la-envö el ngam māṅ tö kūö chu öich hòṅ hameuktöre öich tö mötlö tö cha? Höng ma-ainyre ṙöng tö kūö chu hòn Yāvē nö ṙamlōn nö in chu?’ Vë-eny nang hī ön ngam Paipöl tö hī öt kô öi asīntöre i tahëng. Kūö yòh? Hěng ngam lāinyngen, yēḵ hī min öi mööḵlö elmat tö re ngaich mihôiṅ min öi tailölōn. Ngam Innëtö, öt kô inrē öi mööḵlö mat tö yip holre pöi löktö in e min öi yīhi miṙivölōn. (Rōm. 12:3) Hòṅ köplōn pöri ayī-ö tö ngam Tēv Yāvē nö kūö yòh nö kě-ē hī öi löklōn ò. Kūö hī öi hangenlōn tö ò ngaich hang ṙò ngam kūön ò inrē, rö-ö nöng kūö ngam inlahen hī öi tö löök töpōyen hol hēk töheuveū-euṙò öi ṙô-òvö.—Yôh 6:44; 1 Kòr. 1:26-31. w21.07 pěch 14-15 përa 3-4

Lökten ayī-ö öi hòṅ Vë-evkūö ngam Paipöl, fēken u hēk Vë-evkūötēv inrē. Ngaich hòṅ örheūheu öi ngatī inlahen. Ngaich kētö kumlēḵ hī min ang Yāvē. Ngaich hayööken hī inrē nö kētö ngam töhet fanöinylö hòṅ hī öt asintöre öi i tahëng. Ngaich örhō min ayī-ö aṅhav in tö ngam tanāilölōn hēk ranānyngö, hòṅ havëkö inyööken re ayī-ö in Yāvē, hòṅ hī öi kavalngen u. (2 Kin. 6:29, 30) Meuk ellōn hī an Yāvē. Akahakūö inrē anga-aṅ tö nup mufē hī, hēk sitih inlahen kuilōn ayī-ö inrē. Akahakūö an inrē tö hī öi hòṅ laköre tö ngih inlahen ngih panam, hòṅ hī öi la-al minë ötkumlēḵ-enre öi ma-öönyre öi in e. Yēḵ hī öi ngatī inlahen öi ma-öönyre öi meukö tö ò, ngaich hameuktö hanangenlōn re anga-aṅ nö in hī. Iṙôken hanangenlōn an Yāvē tö hī, lökten anga-aṅ nö hachōḵ elmat hī nö in ök inyööngö kikānö. (Isa. 49:15) Yěn ngëichken hī ang Yāvē öi holtö ellōnre öi la-evṙen i linöökö lōn ò öi ma-öinyre ngaich ngatī mufē anga-aṅ, sā mufē ngam inyöngö kikanö. Löktö in e ayī-ö teūngen tö inreuskö alahare! w21.07 pěch 24-25 përa 17-19

Mihôiṅ ayī-ö öi asīöp ngam ṙanamölōn re i linökö lōn Yāvē, yēḵ hī asīnkö inlahen ngam innët tak mahalanṙen öi holtö ellōn re inup töng kinë-ekūöre la-en. Hòṅ ngöt ayī-ö im inhangköm tölöök inhānga, holtö ellōn re inrē in nup töng kinë-ekūöre la-en el ngam māṅ. (Inl. 18:5; Hep. 10:24, 25) Hòṅ halēn nup sanapṙô re ayī-ö urēhěkūö re chuh el mīting, halēnöre inrē yěi kētu talk. Ngaich yěi kētu la-en el ngam māṅ, hòṅ keuheūtngen u ayī-ö in ngam ṙētak. Ötkô ayī-ö kūöṅn elmat tö nup töng la-en. (Inch. 22:29) Yēḵ hī min holtö ellōnre in minë la-en kinë-ekūöre ngaich ngönlöre min ngam innôlö hī in Yāvē. (Kal. 6:4) Ṙamölōn min inrē ayī-ö yěi meuk öp holre nö kē-ěvkūö tö ngam la-en ngam kuilōn hī lang nö la-en.—Rōm. 12:15; Kal. 5:26. w21.08 pěch 22 përa 11

Ötkô öi tāilölōn hōḵ pöri yěi haköptu. Sā ṙēngen öp lamatuhēt invah nö mihôiṅ nö hangëṅḵlö ngam rahē lamöknyö im fanöinylö, töp lökten ngam fanöinylö hī nö sökngenre nö la-evṙen. Ngatī inlahen ngam tanāilölōn nö hangëṅḵlö ngam ellōn hī, ngaich mihôiṅ min ayī-ö ṙāngenre hang nup inlēnö re lamöktö in Yāvē. Sā inlahen yik Feresī nö hangëṅḵngö ellōn re, lökten cha-a nö sā tö tilupi mat ngaich öt ṙātö-ellōnre tö Yēsū nö kūön ngam Tēv. (Yôh. 12:37-40) Löhlö tī ngaich cha-a tö ngam nômö tö-örheūheu aṅ. (Mët. 23:13, 33) Kô-en, ötkô takô in öi öt hang minë inlēnö re aṅ im ṙô ngam Tēv, ngaich halööktit nup mufē re yěn öt sāta anū-ö nö inup ṙô ngam Tēv! Īnu ang Yāköp töm inyāichngö, lökten nö hōḵ tö nuk inlēnö re tö Yāvē. Heuveū inrē anga-aṅ nö haköptö tahëng. w22.01 pěch 10 përa 7

Yēḵ hī min öi “haköpöre im vinë-eṅkūötēv”, ngaich mihôiṅ öi ṙātö-ellōn re tö Yāvē nö kētö sanapṙô hī min. (Kòl. 4:2) Pī-a öi ngö lōn lohten, hāṅ-en an ngam Tēv nö sapṙô hī, kilēḵngôre pöri Yāvē töre nö ‘löngö ṙētak’ nö sap minë ṙô hī vë-ekūötēv. (Hep. 4:16.) Lökten ayī-ö öt kô öi vīlö fālen Yāvē. Töi hachōḵ elmat re, samyeūheu ṙô-òten ayī-ö öi havëkö yanīhih ngam Pūlngö ngam Tēv nö ha-etngen në ötlanöökö ikūöng panam. Ngatī ṙô inrē Yēsū nö hachōḵtô hī vë-ekūötēv. (Mët. 6:10) Sitih inlahen pöri yěn öt yih ngam manāngen nö im ṙētak lōn hī? Öt ṙātö ellōnre hòng ngaich min ayī-ö im Tēv pön öt teung angū-ö nö sā lōn hī, hö-ö, höng kumlō-ov min angū-ö yěi ngatī mufē! (Hap. 2:3; Mët. 24:44) Iṙūöhen pöri ayī-ö öi hökken Yāvē, ṙinātu ellōn inrē öi in ò tö ò min nö sapṙô hī. Ötlöktu an Yāvē nö ha-aṅkenre nö ha-etngen yip tötlöök tarik. Lēnngö tī anga-aṅ nö ṙātö ngam ‘sakamö hēk ṙētak’ re. Tölöng min angū-ö nö ṙētak.—Mët. 24:36; 2 Pīt. 3:15. w21.08 pěch 10 përa 10-11

Akahalōn yin vē tököiny hol maneuk hī töre nö öt köpsören kumlēḵ alaha. Lökten cha nöng ṙamlōn tö nup la-en kinë-ekūö re. Tö sā më, sörkit ovörsīör yěn 70 samyeūheu ṙēḵti nö ngaich, mihôiṅ min cha-a nö kihngen nö kē minë tufömngöre la-en. Sön cha-a nöng hayööken më hol maneuk re. Lökten yin nö harun më ṙāl tarik nö kē minë la-en töt kanô-ò cha. Nö asīnken yik Lēvi yik tö 50 samyeūheu ṙēḵti nö la-evṙen nö el ngam rūkui manūlö. Unôichngöre cha-a nö harun yik ṙāl tarik. (Kin. 8:25, 26) Holtö ṙanamlōn re cha-a nö kēken u. Ngatī inlahen yin vē sörkit ovörsīör töngamuh, nö hayööken më hol maneuk re nö el minë māṅ. w21.09 pěch 8-9 përa 3-4

Imat ngam Lūkös 15:11-32 in öi meuk ngam inchō-oṙô Yēsū, inlahen ök kūön tö chatngen. Ṙāngö patī ngam yöng re anga-aṅ ngaich kiröönngöre nö chuh “tö marôvat panam.” In e anga-aṅ nö hatöö-önglōn re tö nuk tötlöng kuilōn re. Ik sā ò pöri ngaich nö kihngen, möl anga-aṅ nö fēken nuk tövaich kahëken re. Fēkö nuk kumchikṙen re inrē nö i patī ök yöng re. Sā ṙô Yēsū, “hē ò nö fē-ělre,” halēn ellōnre ngaich anga-aṅ nö hòṅ havan nö chuh in ök yöng re ngaich havëkö inṙē-ěl nuk fālen re. Löng ngam inlahen ò pön fē-ělre tö nuk vanāchö re. Hòṅ halööktit nuk tövaich la-en re anga-aṅ! Hameuktöre ngam kūön töchatngen nö halööktit re tö nuk tövaich la-en re. Pōyen nun minë haköp yip minṙöinylen nö im inchō-oṙô Yēsū. Möthë yěn hòṅ ngěichkö ngam tö fāluṙen cha-a el ngam māṅ, yěn kò-en nö halööktit re hēk yěn hö-ö. w21.10 pěch 5 përa 14-15

Asup min chehen töt kanyinken nö hō? Ngö ṙô tī Pôl nö kūich: “Lökten, sā hī ngaich teūngen tö ngam pūlngö töt kanyinken, ta-a töi ha-öiny, . . . ngam Tēv holtö ṙanāmölōn, pinhe-eṅkūö inrē.” (Hep. 12:28) Yěn keuheūtngöre nup töng sitih nö ahëtiyö, höng ngam Pūlngö Yāvē an min tö köp töt hanlöinyken. (Sal. 110:5, 6; Tan. 2:44) Öt pōitit an ngam ṙētak! Hòṅ katöllö lōn re ön ngòh tarik: Yēḵ ò min nö lā ing panam ngaich kò-òngvah min anga-aṅ. Yēḵ ò pöri nö katöllö ngam linöökö lōn Yāvē, halööktitre tö nup la-en kahëken re tötlöng, teūngen min anga-aṅ töm nômö tö örheūheu aṅ. (Hep. 12:25) Ta-a chěi töi iṙūöhen ahangköm Pūlngö ngam Tēv. Köplōn tö ṙô Yēsū nö ngö ṙô: “Ahangka min ngih tölöök inhangkö ngam pūlngö, i në taṙòkhöre panam, inmeukhömat taṙòkhöre tarik; ngaich möl min öp manāngen nö yih.”—Mët. 24:14. w21.09 pěch 19 përa 18-20

Yī-ö minṙöinylen, tökiröng an ngam la-en tö hakeunlöng nö el ṙanôrö yīö öi haṙamkölōn më hol maneuk hī tö ṙā-ayö tö më tö ha-uknyu. (1 Tös. 5:14) Rēhěre yin öi hareuskö alaha cha, urēhěkūö minë mīting unôichrit u inrē. Kē-ěny ṙētak re chöhken cha, vë-elkui cha inrē. Kò-òren öm hōluröön tö cha öm chuh el filt. Hēṙu inrē öm havëten cha nö haköp mat Paipöl nö im manūlö mikūönö yīö. Hòṅ hameuktö ngam neūkölōn re yin tö minë sīöṅp ngam Tēv Yāvē, hòṅ cha nö meuk ngam hanangenlōn töm chumkūöṙen yīö inrē tö cha. (1 Tös. 2:7, 8 ) Öt lōnu an Yāvē tö yīö “hěng hang tak tölëlngö, hōten yīö pöri ṙòkhöre yihtöre im invöötö ellōn.” (2 Pīt. 3:9.) Kò-òren afītöre töm ṙāi tī Yāvē nö havaha hī nö kētö ngam kūön re. Rēhěre Yāvē nö hameuktöm hanangenlōn re tö hī. Ngatī mufē anga-aṅ nö in yip tö ha-uknyu, yēḵ cha nö havan. Hang ṙô ngam inchōḵ-oṙô vahënyö Kristū inlahen ngam kūön ò tö chatngen.—Lūk. 15:11-32. w21.09 pěch 30-31 përa 17-19

Sitih inlahen pöri më-eṅ yěm öt teungten im la-en inhanga töm inköphöti inrē, kūö meh öm vahavö hēk öt kalē-en inrē? Sön man mihôiṅ öm teungen tö ṙanamlōn re öm in minë la-enre. Töi ngëichkö inlahen Rācha Tāvit, tö yik hol ò inrē ik sā cha nö la-al yik aṅ Amalēk. Nëtòng yik tarik töng ngöh nö aṅtö nup chehen cha, öt holröön Tāvit cha-a nö kiyung. Ik sā Tāvit pöri nö havan nö ṙa-ang im kinyungö, tölṙô yik tarik anga-aṅ nö kē-ěvkūö tö nup minchö-ö pòrô inrē yik tö nëtòng yik töng ngöh. (1 Sa. 30:21-25) Ngatī inlahen in ayī-ö töngamuh yēḵ hī öi keuheūttö ellōnre in minë la-enre, ngaich ṙamölōn min ayī-ö öi meuk öp tö tufömngöre tarik nö löklōn ngam Tēv. Ngëichkö minë la-en hī ang Yāvē. Haköpten hī inrē anga-aṅ öi chöh ṙanamlōn re in minë töng la-en, heuneu-enre hēk kanô-òre inrē. (Yôh. 14:12) Ta-a chěi tö ui cheingö hēk ui ṙāngenre im la-en, ngaich irūöhen öi haṙamlōn ngam Tēv Yāvē! w21.10 pěch 28 përa 15-17

Mihôiṅ yip tököiny nö ngölōn, öt yanööluṙen yip tahëng nö in chu. Kô-en yin ngaich nö ötkalě-en, sön yin nö mihôiṅ nö harun më tö ayal tarik nö inup la-en. Hòṅ chan heuveū-en töminë la-en kinë-ekūö cha tö Yāvē. Yēḵ më tököiny nö hayööken më tö ayal tarik, hòṅ īnu cha-a töm inyāichngö. Yēḵ cha min nö īnu töm inyāichngö ngaich öt tulöng mat min cha-a töre tö yip holre. (Filip. 2:3, 4.) Ngòh tököiny tarik tö īnu töm inyāichngö, hō-en nup tufömngöre anga-aṅ inlahen tö la-evṙen pôrò minë inlahen më tö ayal tarik nö öt sāta nö inup lōn ò. (Mum. 7:10) Kô-en yin vē tököiny nö pōyen heuneū-en lökten cha nö mihôiṅ nö hayööken më tö ayal tarik. Öt köpsören pöri ngih panam nöng hěngren. Lökten më tököiny nö hòṅ hō tö minë tufömngöre inlahen kinëken minë la-en.—1 Kòr. 7:31. w21.09 pěch 8 përa 1, 3

Öt hěngheuh ang Yāvē nö tölṙô yik aṅ Israel nö kēken minë töchōch la-en. Pön töhet ang Yāvē. Hōten yik Israel ang Yāvē nö köpölōn tö e. Lökten ò nö tölṙô vinī-i ök sun-na tö yohtu nö i taseū ök sapīöv makūö kūönṙô. Ngöṙô ngam tökūichö, “Töhet im Mā Tēv.” (Man. 28:36-38) I yip aṅ Israel nö ngëichken öp tö ka-ipö in öp sapīöv, ngaich kööpölōn cha-a tö Yāvē nö töhet. Ngaich yě ngòh tö hěngtak pöri aṅ Israel nöt mihôiṅ nö chuh in ngam kūönṙô ngaich öt meuk ngam tö ka-ipö, ngaich sitih inlahen anga-aṅ nö fēlöng tö e? Yěn hakööpö ngam chööngö nö el minë māṅ, ngaich hē e cha-a nö fēlöng tö Yāvē nö töhet. (Chöö. 31:9-12) Yēḵ meh öm in cha öre, ngaich örheūheu më-eṅ öm hang ngam tö ngö ṙô: “Chu-ö chin [Yāvē] Tēv meh. Ahetlöre yin . . . tön töhet Chin Chu-ö.” “Töhet yin yī-ö min in Chu pò Chu Chu-ö töhet Öich [Yāvē].”—Lēv. 11:44, 45; 20:7, 26. w21.12 pěch 3 përa 6-7

Ōt yip pumṙūtkö hanaḵten re. Tö kūö re nö yāich hēk öt lööṙen inrē nö teūngen tö kinmānö re. Kihngen cha-a nö ha-aṅkö nômö ngam mikūönö re. Hēk kapahlöng cha-a tök ma ha-aṅkö nômö re. Haköplōnre pöri, kilēḵngôre an Yāvē tö re min nö hateung nup kuilōn hī yēḵ hī urěhlö minë la-en ò. Lökten ayī-ö ötkô yāha piṙūtka, hòṅ ṙinatu-ellōn pöri öi in Yāvē. (Mët. 6:32, 33) Mahateung nup ṙô re an Yāvē. (Chöö. 8:4, 15, 16; Sal. 37:25) Yēḵ Yāvē nö chumkūöṙen tö minë pūl tö minë chehechōn inrē, ngaich ötlöktu min anga-aṅ nöt chumkūöṙen tö hī inrē! (Mët. 6:26-30; Filip. 4:6, 7) Sā yip inyööngö nö chumkūöṙen tö kūön re kūö hanangenlōn re tö cha, ngatī inrē ang Yāvē nö chumkūöṙen tö hī kūö hanangenlōn re tö hī! w21.12 pěch 17 përa 4-5; pěch 18 përa 8

Ōtre hòng prötör sistör mumṙiv ngölōn meh? Ngëichkö inlahen Yôsěf ök tö ötlēkaṙen tö yik mëm re. Hö-ö pöri anga-aṅ nö kunyaha elmat tö cha. Iṙuöhen pöri anga-aṅ nö löklōn Yāvē, hamöiyö re inrē lökten ang Yāvē nö kētö inkôlò ò. Im rôtòng ngam ṙētak anga-aṅ nö aṙēlen yik mem re ngaich meuk ṙôken minë inkôlò re kahëtö Yāvē. (Ran. 45:5) Yēḵ hī öi asīnken Yôsěf, öi hangön ngam innôlö re öi in Yāvē hēk yěi ṙatö ellōn re tö ò min nö löngö ṙētak nö kahôkhen hī, lökten in e min ayī-ö öi teūngen tö inreuskö alaha re. (Sal. 7:17; 73:28) Yēḵ meh öm ötlēkaṙen hēk haṙivölōn inrē, ngaich kööpölōn më-eṅ tö Yāvē nö röhta nö in “yip töpaṙööyi ellōn.” (Sal. 34:18) Hangenlōn anga-aṅ tö hī, lōnu inrē tö hī hamöiyö re ngaich hakeunlö nup lumngan re öi in ò. (Sal. 55:22) Yāvē an Kamhòkken ngih panam, öt hěng tö hayunngöre nö ikūö ò. (1 Pīt. 3:12) Yēḵ meh ngatī kanihngen hēk ötkô inrē öm la-al u, hōḵ öm min hökken Yāvē nö halööktit u? w21.08 pěch 11 përa 14; pěch 12 përa 16

Tö-akaha min ayī-ö yěi kēkö nup la-en inṙamlōn Yāvē. Hòṅ urěhlö nup töt ṙanāngen la-en ayī-ö. Asehkūö re man, yěn tönët öre nup la-en meh, töng löng nyöre anū-ö. Kūönen pöri ngam ṙētak, sitih inlahen öm min? Lohten öm urěhlö öp tö mööḵlö nö in u ngaich unôichngö öp tahëng. Töi mikahtö elmat re tö e, im inlahen nā Mārta nā Mariā, hē Yēsū nö chuh patī cha. Ṙamlōn ang Mārta pön yih ang Yēsū nö i patī cha lökten anga-aṅ nö halēn nuk nya-aṅkūö töpōyen. Ūichtöre pöri ang Mariā nö iröön Yēsū ngaich hangihtöṙô ò. Öt vaich nuk la-en Mārta, vënyen Mariā pöri ang Yēsū nö “kēḵ ngam tölöök lā-a.” (Lūk. 10:38-42, ftn.) Lohten ang Mariā nö vaichngö tö nuk nya-aṅkūö re ik hē e, köpölōn pöri anga-aṅ tö nuk haköp re nö in Yēsū. Pòrô anga-aṅ nöng rahëichtakūö nö in Yēsū sön nö töpōiṙāi nuk taneūngen ò. Ngatī ayī-ö yěi hanôlö Yāvē. Lökten ayī-ö hòṅ lööngö tī yūs ngam ṙētak re öi hanôlö Yāvē. w22.01 pěch 27 përa 5-6

Kò-en ang Ahap nö hayāichngöre nö ikūö Yāvē, in minë la-en re pöri anga-aṅ nö meūkö nö öt kô-en nö halööktit re. Tö sā ò nö öt kēngen yik vamë-ekūö Pě-al, ötrēhěn nö hayööken yik tarik lamöklōn Yāvē. Unôichrit kinpaha Ahap ang Yāvē, nö vë-eny mufē re tö inlahen ò. Vënyu anga-aṅ tö pròfět Yēhū nö “tötlöök.” (2 Kin. 19:1, 2) Yēḵ Ahap öre nö kô-en nö halööktit re, ngaich kūöyòh ngam pròfět nö kaheūkö ò nö tötlöök nö tarik ane inrē tökunyaha elmat tö Yāvē. Kô-en ang Ahap nöng haṙivölōn tö nuk fālen re, hö-ö pöri nö hôṅ halööktit re. Asuh öp haköp hī in Ahap? Rö-ö an ngam invöötö-ellōn re nöng tölngö im inlahen hī hameuktö miṙivlōn re tö minë fālen re. Pön hòṅ meūkö anū-ö nö in miinë tahëng la-en hī inrē. w21.10 pěch 3 përa 4-5, 7-8

Pròfět ang Isayā, ngaich vënyö nang hī ngam Paipöl tö ök pīhö ò inrē nö “kikānö nö pròfět.” (Isa. 8:1-4) Tövai cha-a nö inchōḵ elmat yip töfömtören nö pīhöre pön urěhlö minë la-en ngam Tēv cha-a! Mihôiṅ yip Kristīön pamīhöre inrē töngamuh nö asīnken Isayā tö ök pīhö ò inrē nö pōyen la-en nö i linökölōn Yāvē. Mihôiṅ cha-a nö haköp inlahen minë pròfěsī imat ngam Paipöl ngaich kakkö inlahen taneung tö kūö u töngamuh. Yēḵ cha min nö ngatī inlahen ngaich ngönlöre ṙinatö-ellōn cha-a min nö ikui Yāvē. (Tai. 1:2) Mihôiṅ inrē cha-a nö afēkö inlahen re nö sitih inlahen nö hateūngngö minë pròfěsī töngamuh. Tö sā ngam pròfěsī inlahen inhangkö ngam tölöök inhanga urěhěkūö yanihi ngam manāngen, mihôiṅ cha-a nö fēkö nup tīre nö i inteunngö ngam pròfesī. Yēḵ cha min nö meuk taneungtökūö minë pròfěsī ngaich ngönlöre min ngam kuilōn cha nö hòṅ tānyö ṙòken minë la-en re nö i linöökö lōn Yāvē. w21.11 pěch 16 përa 9-10

Paṙūtalōn ang Yēsū tö ngam yöngre Mariā, pò ò ngaich nö tafīösi. Lökten ang Yēsū nö fē-ělre tök holre Yôhan, ngaich kētö ngam yöng re nö eltī ò. Öt kintööngulōn ang Yēsū tö Yôhan min nö hayööken ngam yöng ò Mariā nö im linök lōn ngam Tēv. Lökten ang Yôhan nö hēten tö e nö keun löre tö ngam inyööken ngam yöng ò. Pingang öi meuk hanangenlōn Yēsū tö ngam yöng re, pòrô ngaich nö hòṅ meuchngö mat re nö kapah. Asup haköplö hī öi in minë ṙô Yēsū? Hôṅ pōyen an ngam hanangenlōn meh tö yip hol maneuk meh, aṅ el ngam māṅ. Hòṅ mötlö ṙôken töm hanangenlōn meh tö yip aṅ patī meh. Pön mihôiṅ min yip aṅ patī meh nö kunyaha elmat tö meh, sō-en meh inrē. Yěm haköpngöre pöri min öm in ngam Tēv Yāvē, el ngam söngkötön ò inrē. Ngaich öt hō min më-eṅ öt teūngen tö yip hol maneuk re. Tö ngö manah, tö meh min öm teūngen tö yip kūönre, yöngre inrē yip tö sā ṙinatö-ellōn meh. (Māk. 10:29, 30) Sitih inlahen öp mufē meh yěm hāngö e? Tö meh öm aṅ ngam mikūönö ngam Tēv Yāvē ngam chūök më tarik tö hangenlōn tö höö.—Kòl. 3:14; 1 Pīt. 2:17. w21.04 pěch 9-11 përa 7-8

Samötlöng inlahen nö hayööken holre ngam tö īnu töm töt chanuhuvṙen hanangenlōn. Pōyen yip prötör sistör töngamuh mahameuktö ngam töt chanuhuvṙen hanangenlōn, nö in yip tö sā ṙinātö-ellōnre, pòrô yip töt maheukkūö cha inrē. Tö sā cha yěn hang nup tö faltöre kanihngen, ngaich ilööṙen cha-a nö kē-ělkūö alaha re nö hayööken yip tö kihngen. Yěn meuk yip tö kihngen cha-a tö rupīö, ngaich chöhtö inlahen re nö hayööken cha tö nup hanakten cha. Sā inlahen yik Kristīön aṅ Makētòni cha-a nö Samötlöng tī tö nup kanô-òṅ re nö hayööken yip holre tö kihngen. (2 Kòr. 8:3) Ngatī töngamuh yip minṙöinylen nö vë-eny ṙanamlōn re hēk eū-eu cha inrē yěn meuk yip prötör sistör nö hayööken holre. Anū-ö në tölöngö ṙētak inreuskö alaha min mahayööken më prötör sistör nö iṙūhen nö hayööken yip holmaneuk re tö kihngen tö haṙivlōn inrē.—Isa. 32:1, 2. w21.11 pěch 11 përa 14; pěch 12 përa 21

Hēṙu in öi hòṅ halēnö. Havëkö inlēnöre in ṙung ip tarik mikahkūöre. Hēkpi yip tahëng nö halēnö hī. Yē cha nö meūkö hī vachköreṙen. (Kal. 6:1) Yē hī inrē kēken tökiröng fālen ngach halēnö hī anga-aṅ halööktö nup tö vach inlahen hī inrē. Öp töng sitih inlēnö hī, hòṅ hang ayī-ö. Höng yanöölen hī min anu-ö hēk lamaklö ngam nômö hī inrē. (Inch. 6:23) Ṙūöhlö alaha hī ngih tövë-evkūö ing sakamö öi hangihtöre töṙô tö akaha.) Öt hěngtak tarik tö ṙòklöre mikahkūö. Ōt re pöri in hī tö mötlö mikah elmat,tö mötlö heuneū-en inrē. (Inch 12:15.) Yē hī hang nup inlēnöre tö holre, inmeuktö hī angu-ö inu tö inyāchngö. Akaha kūö in töp tölngöre hēk akahakūö tö hī ötkô öt hayöökaṙen inup la-enre pò hī öthō teungten in u. Ngatī ṙô ang Rācha  Sòlòmön: “Ṙōlö ṙô pöri mahalēn teunglen anu-ö.”—Inch. 15:22. w22.02 pěch 8 përa 1-2

Rö-ö in ngaich öi mahalööktit re yěi vë-enyre haṙivölōn tö minë la-en re. Tön hòṅ halööktit mufē hēk tinrīken re ayī-ö, ngaich ṙāngenre inrē tö nup tövaich la-en re ngaich hang minë chööngö Yāvē. (Isi. 33:14-16) Hòṅ havailö ngam innôlö re inrē ngam tö fāluṙen nö in Yāvē. Sitih inlahen pöri min ayī-ö yěi hang öp hol re nö fāluṙen? Ötkô in hayunngö fālen öp holre, pön öt yöölen min anga-aṅ. Ötrēhěn öi kô hayuntö mat Yāvē, pön keuheūt maheuṅk re anga-aṅ. (Inch. 5:21, 22) Tölṙô ngam holre pöri min ayī-ö nö vë-eny ngam fālen re nö ikūö yip minṙöinylen. Yěn öt ngatī inlahen pöri anga-aṅ ngaich hòṅ hakôtenre më-eṅ vë-eny nang yip minṙöinylen. Yēḵ meh min ngatī inlahen, ngaich hameuktöre min më-eṅ hangenlōn töm holre. w21.10 pěch 7 përa 19-21

Mihôiṅ in öi asīnken Yēsū öi harööḵngen re. Vënyu nang in töm Paipöl tö Yēsū nö “kēḵ inlaha mahalanṙen.” (Filip. 2:7) Tö sā inlahen öp mahalanṙen nö chöh inlahenre nö meukṙen öp mā re. Ngatī in ayī-ö tanöölô ngam Tēv Yāvē öi meukṙen yip prötör sistör re. Lökten in öi lōnu töre öi hayööken yip holmaneukre hēk löklōn Yāvē inrē. Hòṅ hatöönöre in öi ngö ṙô, ‘Ilööṙen öich chū-ö hayööken yip tahëng? Hō hòng chū-ö? Yēḵ chu inrē öich töölô öich ha-et chūök hī im Könvensön hēk minë inlēnö el ngam patī pūlngö, kētöre hòng chū-ö öich holṙen cha? Hēk tö sā meh öre öm ngëichkö re, ngaich akahaiṙen më-eṅ öm hòṅ hēk öm hameuktö inlahenre öm harööḵngen re. Hö-ö pöri më-eṅ öm hòṅ ngatī kuilōn. Hòṅ sitih inlahen öm kò-òren? Keuheūtnyö ellōnre öm vë-ekūö Yāvē. Ngaich tölṙô ò nö ngëichken ngam kuilōn meh tö meh öm hòṅ asīöp ngam inlahenre öm in ngam inrööḵngen. Hòṅ ò min nö ‘asīöp ngam ellōn meh, hēk kētö kumlēḵ meh’ öm harööḵngen re.—Filip. 2:13. w22.02 pěch 22-23 përa 9-11

Hameuktöneūkölōn re ang Yēsū nö in yip tarik. Mikūöṙen anga-aṅ hēk milēḵṙen inrē tö cha. Yē hī ngëichkö ngih inchōḵ elmat, ik sā ök tö hěngtak yöng nyīö aṅ Poinikē nö yihtöre anga-aṅ nö chuh in Yēsū nö ṙô-òv anga-aṅ tö ò nö lë-en öp kūön ò. Urěh anga-aṅ nö öt hō-en ṙô ngam yöng nyīö. Ngaich ik sa ò pöri nö meuk ngam ṙinatö-ellōn ò ngaich möl ngaich anga-aṅ nö lööken tī töp kūön ò. (Mët. 15:22-28) Rö-ö ök Yēsū pön tö aṅhavin tö ngam neūkölōn, ōt pöri nup umuh ṙētak ò nö halēn. Hěngheuh ang Pītör nö ṙô-òv nö in Yēsū, tö ò nö un hateungngö kuilōn Yāvē ngaich vëkö ṙô ò ang Yēsū nö ikūö yik haköptöre. (Māk. 8:32, 33) Pön haköpten cha nö un vaichngö töp tölngö kūöre. Lohten ök Pītör nö haṙivlōn, örheūheu pöri anga-aṅ nö köpölōn tö ngam inlēnöre. Hēk pī in ṙung kētö inlēnö in yip hanangenlōnre. Tö hěngkangen inrē angū-ö nö inmeuktö neūkölōn hī tö cha. Yē hī hòṅ ngatī inlahen ngaich köpöölōn ayī-ö tö inlahen Yēsū. Tövai ngam inlahen hī löknyö mat ngam Paipöl öi vayö ṙô halēnö cha. w22.03 pěch 11 përa 12-13

Yē hī öi harōilen Yāvē sā maha-ööinyö ò ayī-ö. (Sal. 34:1) Yē hī öi holtö ellōnre öi ha-öiny tī Yāvē, ngaich örhō min ayī-ö öi öt ha-ööinyö ò. Sā maharōilen Yāvē inrē ayī-ö yěi vë-eny nang yip tahëng tö minë tinrīken ò hēk la-en ò inrē. Lökten öi kēnyö ṙētakre öi fēkö minë tölöök la-en Yāvē nö in hī. Ngaich pōyen min nup löktö ṙô hī öi ha-ööinyö Yāvē. Yē hī inrē öi ahānga öi in yip tarik ngaich ha-ööinyö Yāvē inrē ayī-ö öi in e. Lökten ayī-ö ‘kētö minë tökētu öi löktö in në ṙòng në minuh re’ öi ha-ööinyö Yāvē. Lōnu in tö minë kahëtöre nö tövai, lökten ayī-ö halēn minë ṙô re urēhěkūö hī ahānga in yip tahëng sā inlahen hī yē hī ṙung vë-ekūötēv ngaich halēngö nup ṙô re ayī-ö hòṅ minë ṙô hī nö vai. w22.03 pěch 21 përa 8