Nòvempör

Pōyen nup inlahen tī Yāvē nö hayööken hī. Sā öp tarik öre yěn tainyö ṙô, ngaich hayööken hī Yāvē öi vī ngam lanāmö. Yěn ōt yip tarik tö yal nö hang ngaich fēḵlen hī anga-aṅ tö nup tö löngta miröökö. Yěi in nup kamngö chūk yip töt hòṅ hang öi ahānga, ngaich kētö kumlēḵ hī anga-aṅ, hòi iṙuhen im la-en inhānga. (Yar. 20:7-9) Ōtngöre ön inrē ngam inlahen Yāvē nö hameūktöm lanöököre nö in hī. Nö haköpten hī öi sitih inlahen im ahānga. El minë mīting öi haruntuvö öi vë-ekūö tarik yei ahānga ṙuhlöng alaha inrē öi asīnken minë inlēnöre. Ik raneh sin lòhten öi kihngen öi asīnken u. Ngaich pöri ing sā hī ngati inlahen, hang ṙô hī yip tarik. El minë mīting hēk könvensön öi ṙuhlöng alaha öi asīnken minë tufömngöre inlēnö. Lòhten öi höng kihngen asīnken u, ngaich yěi ngati inlahen pöri kētö inkòlô hī min ang Yāvē. Öp töng sitih inlahen hī, hòṅ ṙatö ellōnre öi in Yāvē, vī inlahen re öi i linökölōn ò, ngaich kētö inkòlô hī min anga-aṅ. w21.08 pěch 27 përa 5-6

Ik sā Pôl nö kūich chitri yik Kristön aṅ Kòrin nö halēnö cha. Ngaich unôichrit e hēk anga-aṅ nö tīnten Taitös nö chuh in. Ngaich ik sā ò nö akahalōn tö cha nö hang minë inlēnö ngaich pōyen ṙanamlōn anga-aṅ! (2 Kòr. 7:6, 7) Mihôiṅ inrē yip minṙöinylen nö asīnken Pôl nö kēnyö ṙētak re nö in më prötör sistör. Ngam raneh inlahen, urēhěkūö ngam mīting cha-a nö yihtikūö hòṅ cha nö ṙētakvö nö ṙòngnyökūö ellōn re nö vë-ekūö më prötör sistör. Yēḵ më minṙöinylen nöng rahëichta ṙô nö vë-ekūö më prötör sistör ngaich kô-en min cha-a nö teūngen tö inreuskö alaha re. (Rōm. 1:12) Mihôiṅ inrē yip minṙöinylen nö asīnken Pôl nö löknyö mat ngam Paipöl ṙô nö hameukhömat cha hēk hangön ngam ṙinātö-ellōn cha inrē ngaich ṙātö-ellōn re min cha-a tö Yāvē nö hangenlōn tö cha. Ngaich ngam tahëng inrē inlahen cha nö in minë ṙô re hēk löktö in minë inlahen re nö hameuktö ngam hanangenlōn re nö in më prötör sistör. Mihôiṅ inrē cha-a yěn meukkūö re ngaich kö hareuskö alaha höö. Ngaich yēḵ öp minṙöinylen nö kētö inlēnö öp prötör sistör ngaich hòṅ löknyö imat ngam Paipöl ṙô anga-aṅ nö halēn. Havai ṙô re anga-aṅ hēk holtö hanangenlōn re nö kētö inlēnö,hòn hāngö ngam inlēnö kahëtö ò.—Kal. 6:1. w22.03 pěch 28-29 përa 11-12

Mihôiṅ Yāvē töngamuh, nö kētö kumlēḵ hī “tö nup chamööngö minhôṅyö” hòṅ hī köp öi lök lōn ò. Ngam vinë-eṅkūötēv ön töhěng nö tī ò nö hangönken hī. Ṙūölö alaha hī ang Pôl im Efisös 6:18 öi “I nup tökeūheuttöre” öi vë-kūötēv. Hang ṙô hī ang Yāvē yěi vë-ekūötēv hēk kētö inngëṅkö alaha hī inrē. (Rōm. 8:26, 27) Hangönken hī an inrē nö löktö im Paipöl. Hòṅ asīnken Pôl in öi haköp mat ngam Paipöl. Teūngen in tö inngëṅkö alaha re hēk inreuskö alaha inrē. (Rōm. 15:4) Yēḵ hī öi haköp mat ngam Paipöl hēk fēkö nup haköpre, ngaich hayööken hī min ngam Töhet kumlēḵ Yāvē. Akahakūö ayī-ö tö yanöölen minë inlēnö aṅ mat ngam Paipöl.—Hep. 4:12. w21.05 pěch 22 përa 8-10

Öt ṙāngenre ayī-ö tö ngam la-en kinë-ekūöre pòrô nö pōyen minë kanihngen hī. Höng lōnu ayī-ö ōt pöri minë kanihngen. Ōt yip pöplisör töt kô nö havötköre tökūö kanöinyö re invah re inrē. Yēḵ meh tö ngatī kanihngen, mihôiṅ më-eṅ höng i patī re kēḵ istötī öm löktö el fôn ṙô. Ōt mine hēk tahëng talöökö inlahen hī kò-òren chöh istötī re. Pōyen ṙung yip tarik töt meūkö kūö tö hī yěi chuh kūö patī öi ahangköm tölöök inhānga, el harap pöri höng löö öi yōm peuheū teūngen tö cha. Mihôiṅ öm rih kēnyö ṙētak re haköpten cha el minë ṙētak meh teūngen tö cha? Lohten öm hòṅ ka-euilö kūö tö peuheū hēk el hatööm inrē öm haköpten cha. El hatööm ök Yēsū hē ò nö haköpten Nikòtimös pön hē e anga-aṅ nö ṙētakvö.—Yôh. 3:1, 2. w21.07 pěch 5 përa 10-11

Öt akaha elmat yik mahaköp nö in Yôhan ök Vamôk, tö lāinyngen yik haköptö Yēsū nö öt ahik. (Mët. 9:14-17) Öt lēkôre inrē yik Feresī tö Yēsū kūö ò nö öt asīnkö nuk la-en cha. Tainy acha-a nö in ò kūö ò nö öt milēken ngam töhet sakamö tö lōn cha nö halinken tö vahav. (Māk. 3:1-6; Yôh. 9:16) Vë-enyre cha-a nö milēṙen tö ngam töhet sakamö; ngaich inyīha pöri nö el ngam töhet chūök. Tainy pöri cha-a hē Yēsū nö vënyen ngam la-en cha nö vaich. (Mët. 21:12, 13, 15) Hē Yēsū nö el ngam töhet chūök nö haköphöti ngaich ngöṙô anga-aṅ tö cha, nö sā yik Israel yik töng ngamëichköre töt aṅhav in inrē töm ṙinatö-ellōn. (Lūk. 4:16, 25-30) Öt asīnkö nuk ṙô yik tarik ang Yēsū nuk lōn cha inrē lökten cha-a nö öt ṙatö-ellōnre tö nuk ṙô ò.—Mët. 11:16-19. w21.05 pěch 5-6 përa 13-14

Pōyen nup inchōḵ-elmat yip tarik aṅ mat ngam Paipöl tö kò-òng vah tö tī ngam yinikhanga hēk tanāilö lōn. Urěh ngam Sī-ö nö töchiplö nö ma-aṅhanga Yāvē. Lohten nö pōyen nup la-en taneungen ò. Öt ṙamlōn pöri anga-aṅ nö in u, hòṅ hēku lōn anga-aṅ nö höng ha-öönyö. Höng Yāvē pöri tö hòṅ haöönyö tö hī. Lōnu inrē ngam Sī-ö tö hī öi asinken ò. Lōnu anga-an tö hī öi sā mufē ò öi öt ṙamlōn in nup aṅ inre. Angū-ö tī ò nö in Ēva. Kē-ēkūö na Ātöm na Eva öng Yāvē tö nup tökeuheut töre nya-ākūö cha—Mihôiṅ “acha-a nö nyā minë ṙòng chōn el panô-òṅ” nö öt chuhēṙenkūö höng hěng pöri ngam tö hö-ö. (Ran. 2:16) Vīlö ellōn Ēva pöri ngam Sī-ö nö hōtu nö nyā ròng öp chōn ngam sinôtö kūö cha tö Yāvē. Lökten anga-aṅ nöng hòṅ nyā aṅ in ngam chōn. Ngam ṙòng e ngaich nö kēkö tökööl anga-aṅ ngaich kapah.—Ran. 3:6, 19. w21.06 pěch 14 përa 2-3; pěch 17 përa 9

Yēḵ nā Ātöm nā Ēva nö la-evṙen nö asā nup chööngö kahëtö ngam yöngre Yāvē, ngaich köp öre cha-a tö yip kūön cha nö el ngam mikūönö Yāvē. Vënyö inlahen ngam tarik ang Tāvit in ngam Salmai 8:5 nö ngö ṙô: “Pò meh vīlen ò nö lātaṙeū hö-ö tö më ma-ahānga ngaich hatullö kui ò më-eṅ tö minā-aṅ, ineū-euṅ inrē.” Kò-en më tarik nö öt asā kinē-ekūö më ma-ahānga nö aṅhav in tö kumlēḵ re, mikah re hēk heuneū-en inrē. (Sal. 103:20) Öt uroh inrīkngöre pöri cha-a tö më ma-ahānga. Pön vīlen ò nö “lataṙeū” tö më ma-ahānga. Akahalōn ayī-ö tö nā Ātöm nā Ēva nö kamngövö nö el ngam mikūönö Yāvē. Haṙivlōn ayī-ö tö nā Ātöm nā Ēva nö öt hang chööngö ngam Tēv, lökten cha-a nö öt köp nö el ngam mikūönö Yāvē. Lökten yip kūön cha töngamuh nö kihngen. Öt harīkngö re pöri ngam kuilōn Yāvē. Pön lōnu anga-aṅ tö më tö chiplö tarik nö kūön ò. w21.08 pěch 2-3 përa 2-4

Pōyen töngamuh yip tarik ngam Tēv Yāvē tö hakihtuṙen. Ōt yip mi-iyöng inup panam chūök minë la-en ngam Tēv nö asöökiröön. Pi-a cha-a nö hachēlhötvö, ngaich kētu nö “i yip kamhôṅka, ikūö yip mahayöng inrē.” (Mët. 10:17, 18) Ōt pöri yip prötör sistör tö tahëngö löktö kanihngen. Lohten yip aṅpatī cha nö sōten cha nö löklōn Yāvē. (Mët. 10:32-36) Öt heūlngöre pöri cha-a pön höng iṙūöhen nö löklōn Yāvē. Lökten yip mahakihten cha nö hēkpī nöng ṙāngenre nö hakihten cha. Ngaich vītöre ngam prötör sistör ngam tö hakihtuṙen sin, nö tö ngöt nö lamöklōn ngam Tēv. Lökten yěm la-al nup kanihngen re, ngaich um heūlngöre. In meh an Yāvē, kē-ěkūö meh inrē anga-aṅ tö ngam töhet kumlēḵre. w22.03 pěch 16 përa 8

Vënyu nang in tö ngam Paipöl tö Yāvē nö surīkhö në “Tunlēchngö mat, litāk töminyôny, kël inrē kumtaknyö mahām töt akahaṙa.” (Inch. 6:16, 17) Sa-òkkūö an tö yip tö-angëṅ, tö yip tarik mahachīl. (Sal. 5:6) Kunyah elmat takô an ngam Tēv tö yip tarik tö ngatī la-en. Lökten anga-aṅ misī nö fëlngö yik tarik inuk sakamö Nō-a yik töngatī la-en. (Ran. 6:13) Lökten in ök pròfět Malakī ṙô inrē ang Yāvē nö vë-eny kumnyah elmat re tö yip tarik vamīlö inlahen re nö ṙāngö pīhöre. Yip töngatī la-en, öt hō-ov nup ṙô cha nö ha-öiny ngam Tēv Yāvē, kētu sācha inrē min cha-a. (Mal. 2:13-16; Hep. 13:4) Lōnu ang Yāvē tö hī “surīkhö ngam tötlöök.” (Rōm. 12:9) Tö sitih manah ngam inlahen hī yěi “surīkhö” nup tötlöök. Yěn ōt ṙung nup surīkhö hī ngaich öt hamehten re ayīö in u. Ngatī ṙēngen ayī-ö ötkô afēkö nup la-en tö surīkhu tö Yāvē. w22.03 pěch 4-5 përa 11-12

Röhta inlahen an ngam Yöng hī nö kētö inkôlò hī nö löktö im Pūlngö re tī. Yip tö maheūṅkkuvö nö in Yāvē, acha-a min tö teūnglen tö nup tö pōyen inkôlò, ngaich iyöng kūö ngam tufömngöre panam inrē min cha-a. Yěn yih min ngam tufömngöre panam ngaich öthō min ayī-ö öi la-al minë kanihngen re minë maheūṅk hī töngamuh. Rôkhöre min minë öt linēken hī tö minë chanöökö na ha-etiyö. (Inm. 21:4) Pōyen aṅ in min ayī-ö tö nup töng sitih, lökten min ayī-ö öi öt yaha mufē. (Sal. 72:16; Isa. 54:13) Kô-en ön ngih nö tö kirööngen nö inkôlò hī! Hayööken hī an Yāvē töngamuh öi ṙāngen minë tötlöök la-en, hēk kē minë tö vai tinrīken re hòṅ hī öi aṅ yěn yīh ngam Pūlngö ò. Lökten ayī-ö i ngih ṙētak öt kò öi heūlngöre hòṅ iṙūöhen i linöökö lōn Yāvē. Pòn ṙöhta ngam tö vai kumchikṙen hī min kahëtö ò. Ta-a chěi töi hamôiyö re öi hökkö ngam ṙētak hanang saha ngam kuilōn Yāvē nö öl nö teung! w21.08 pěch 13 përa 17-19

Ik sā taneūngen më Kristīön aṅ Yūta tö ngam chitri tanīnöṙô Pôl, unôichrit e cha-a nö falngöre nö chuh kui rôngö. (Mët. 24:16) Ṙòkhöre nuk ṙahangö cha kanôlò hēk patī tö yip mak alaha cha yip töt sā ṙinatö-ellōn cha. Lökten nö töt ṙanāngen ngam inlahen cha nö hayööken yip tahëng. Urěhkūö cha nö falngöre, hang ngam inlēnö cha-a ṙô Pôl. Lökten nö mihôiṅ nö chuh in öp tufömngöre chūökö nö harunöre nö ha-aṅ nômöre nö in minë tö rahëichyen taneunglenre. Öt uroh min më prötör sistör nö ṙô-òvö töre nö hòṅ hayöökaṙen. Lökten öi hòṅ hanôlö cha hòṅ cha nö nö un piyū-en. Ōtre yip ṙung el ngam māṅ yip prötör sistör, tö örheūheu nö i inyööken yip tahëng. Öt hěngheuh cha-a nö vë-enyre nö in hī töre nö kihngen tö tī hī, hēk lāngan inrē. Akahakūö in töre yěi hòṅ lōnu tö inyöökenre, ngaich chuh in cha ṙung. hòṅ ngatī inlahen in ayī-ö inrē. w22.02 pěch 23-24 përa 13-15

In nuk i-a samyeūheu minë inrīkköre inlahen minë māṅ hēk el ngam sörkit inrē. Yēḵ hī öre ayī-ö öi tīni öi chuh in e, kiröönngöre öi öre? Pi-a öi kihngen kūö hī öi ṙāngö yip holre hēk yip mak alaha re. Hěng ngih chöönyö hī inrē öi kihngen öi hang minë chööngö. Hö-ö ön Yāvē nö vë-eny minë-eny yip pöplisör yip tö tīniyö nö chuh el nup tahëng māṅ nö in yip minröinylen. Pön höng cha-a kamtöllen yip pöplisör. Ṙatö-ellōnre pöri ngam Tēv nö in cha lökten ayī-ö inrē hòṅ ṙātö-ellōnre öi in cha. Hēṙu in ṙung öt hō-en nup fësla yip minröinylen. Sön pöri ayi-ö hòṅ kēken nup chööngö cha. Yēḵ hī min ngatī inlahen ngaich lanāmö min nö ihôi hī hēk hinengö inrē. Ngih inrē yěḵ më body of elder nö kēḵ fësla ngaich hòṅ hāngö u ayī-ö. Ngaich köp min ngam hanangenlōn hēk ngam ṙanamölōn min nö el ngam māṅ. (Hep. 13:17) Ngih inrē tökiröng chöönyö hī öi hòṅ hang minë fësla më minröinylen, ṙatö-ellōnre Yāvē nö in më minröinylen lökten nö katöllen cha nö ngamëichkö minë māṅ. Yēḵ hī ṙatö-ellōnre in cha töng sā ṙamātö-ellōnre ayī-ö in ngam Tēv Yāvē.—Inl. 20:28. w22.02 pěch 4-5 përa 9-10

Yēḵ meh öm prötör töngaich öm vōkö, mihôiṅ më-eṅ ṙūöhlö heuneū-en re im ṙinô-òvö hēk inköphöti inrē. Kūöyòh? Pön yöölen min yip hamang ṙô meh tö tī meh, yēḵ meh “hakūötenre” vë-ekūö līpöre, ṙô-òvö, haköphöti inrē. (1 Tim. 4:15) Mihôiṅ öm harunöre tö minë kun(quality) tövënyu imat ngam prōsör Pörnë Òr Sikhane Me Chichān Lökayēṅ. Katöllö öp töhěng Kun më-eṅ ngaich harūnöre tö e, kò-òren öm hameuknyö ngam Kun yěm mikahten el mīting. Kēḵ inlēnö re in öp hamòlṙen mahalēn hēk in öp minröinylen inrē öp tö heuveū-en nö im ṙinò-òvö hēk inköphöti inrē. (1 Tim. 5:17) Fēkö inlahen yip hamang ṙô re pöri më-eṅ hòṅ cha nö yöölen tö nup ahang re ngaich kēkö u inrē. Sīöpö ṙanamlōn man min yěm ngatī inlahen holre tö yip hamang rô meh. w21.08 pěch 24 përa 17

Yēḵ hī min öi öt mööḵlö mat tö re ngaich öt hō min ayī-ö öi asīntöre öi in yip prötör sistör yip tö heuveū-en nö in nup la-en. Ngaich ṙamölōn min inrē ayī-ö yěi meuk nup heuneū-en cha nö i līnöökö lōn Yāvē. Ngaich köp ngam lanāmö hēk ngam hīnëngö nö el ngam māṅ. Yēḵ hī min akahakūö tö öp tölngöre ngaich öt hō min ayī-ö öi ṙainyngö öi i tahëng. Öt hō inrē öi kirööngö elmat tö re yěi akahakūö töp tölngöre. Öt hō min inrē öi eu-eure öi tö mötlö heuneū-en tö tahëng. Pöi kēḵ nup tövai min haköplöre öi in cha. Tö sā në inchō elmat yěn vayö ṙô öp prötör kamēḵtöp tôkre. Mihôiṅ öm hatöönan nö sitih inlahen nö halēn öp tôkre. Ngaich yěn hěng tak öp sistör inrē tö heuveū nö kahul ngaich mihôiṅ öm hatön tī ò nö kahul. w21.07 pěch 16 përa 8-9

Sā ṙô ngam līpöre kinṙeūkö tö inlahen Yāvē nö fëlngen ök aṅ Israel kūö ò nö hamūl ngòh hē el tökiröng sakamö. (Kin. 15:32,35) Sā ṙô ngam tövënyu im līpöre 2 Samuel tö Tāvit nö asěhken Petsipa, fëlngen ök pīhö ò inrē Uriyā. Sön pöri ang Yāvē nö aṙēlen ò. (2 Sa. 12:9, 13) Pi-a lohten öi ngö mufē tö Yāvē nö kūö yòh nö fëlngen ngam tarik töng rahëichyen falen ngaich aṙēlen Tāvit anga-aṅ ngam tökirööngen falen? Öt keuheūtnyö vahënyö re ngam Paipöl tö inlahen nup tö kūichi inlahen. Yěi ngëichkö ngam inchōḵ elmat tö sā hī ngaich akahakūö tö Tāvit nö halööktit minë vanaichö re. (Sal. 51:2-4) Öt vënyu inlahen pöri tö ngam Paipöl ök i aṅ Israel ök tumṙōlngö chööngö el tökiröng sakamö ötrěhěn in öi akahakūö töm tinrīken ò tö sitih inlahen anga-aṅ nö tarik haṙivlōn hòng anga-aṅ tö nuk la-en re ṙōlheuh hòng anga-aṅ nö tiṙōlngö minë chööngö ngam Tēv hē ò nö fēlöng hang hòng anga-aṅ höö ṙöng. Öt timhöre mikahkūö in tö inlahen ò lökten öi ötkô lök ṙô re. Asā ṙôken mikahkūö hī pöri tö ngam Tēv Yāvē ngatī ṙinātö-ellōn ayī-ö tö ò nö ṙòkhöre nup kahëken ò nö tölöök.—Sal. 145:17. w22.02 pěch 2-3 përa 3-4

Ngòh tö akaha tarik akahakūö anga-aṅ tö nup la-en kanò-òre. (Inch. 11:2) Ṙamlōn anga-aṅ nö la-evṙen, öthō nö ṙangenre. Töi hachōḵ elmatre töp chumvē kūö lòrī, yēḵ òn peūlöre ngaich hòṅ “hakūönngö öp kīör re” anga-aṅ, kô-en min ngam lòrī ò nö kūönngöre yanītö, kū-ö urěh pöri min anga-aṅ. Ngatī inlahen ngòh tarik ma-akah kanô-òre nö la-evṙen nö öthō nö öt kū-ö urěh nö im linöklōn Yāvē, inyööken tahëng inrē. (Filip. 4:5) Hē Pārsilāi nö 80 samyeūheu ṙēḵti, hòṅ kē-ěkūö ò ök Rācha Tāvit tö minā-aṅ. Akahalōn pöri Pārsilāi töre ngaich nö köiny. Lökten ò nö sō-o ṙô ngam rācha, höng tīnten ök ṙāl tarik anga-aṅ ang Chimham nö kēḵ ngam chūök ò. (2 Sa. 19:35-37) Ngatī yip tököiny töngamuh ma-akah kanô-òre, nöng tölṙô yip ṙāl tarik nö kēḵ nup chūök cha. w21.09 pěch 10 përa 6-7

Kihngen öm ṙatö-ellōn re tö Yāvē nö tö hangenlōn nö inyöngö? Pōyen yip tö ngatī kanihngen kūö inruklöre. Ṙamlōn pöri ayī-ö pön keuheutlö re mikahkūö Yāvē tö hī. Lökten ò nö tölṙô hī, nö ngö ṙô: “Ṙūötöre im Tēv, ngaich ṙūötöre min anga-aṅ nö in yīö.” (Yāk. 4:8) Hameuktöre anga-aṅ nö töt insā-av hanangenlōn nö inyöngö. Mihôiṅ ang Yēsū nö hayööken hī öi ṙūöhtöre in Yāvē. Pön keūheutlöre mikahkūö anga-aṅ tö ò, nö holre tö minë tinrīken ò. Lökten ök nö ngö ṙô: “Ngòh mameūkö Chu, ngaich meuk ngam Yöng inrē.” (Yôh. 14:9) Sā ṙēngen mëm hī anga-aṅ, nö hachōten hī öi milēḵṙen hang chööngö ngam Yöngre. Hameuknyöm tökiröng hanangenlōn Yāvē ang Yēsū tö hī. w21.09 pěch 21 përa 4-5

Hinëngö pöri nö in yip vamë-ekūö ngam Tēv Yāvē. Hěng ön ngih tökiröng la-en kahëtö ngam Tēv Yāvē nö in më minṙöinylen, ngam inlahen cha nö ha-etlö ngam māṅ. Yěn hěng tak Kristīön tö kiröngö fālen ngaich lōnu ngam Tēv tö më minṙöinylen nö kēḵ fësla re nö ṙānyen ò nö ṙa-ang el ngam māṅ hēk hö-ö. Öt tö lööṙen pöri angū-ö nö in cha. Hòṅ mikahtö kūöre yip minröinylen töp tö faluṙen tarik, yěn kô-en anga-aṅ nö haṙivlōn tö ngam fālen re. Pi-a anga-aṅ nö haṙivlōn tö ṙô re. Hameukten u hòng anga-aṅ nö in minë la-enre? Minë fālen ò haṙivlōn hòng anga-aṅ tö u? Yēḵ ò nö kūö innôlö nö faluṙen, mihôiṅ anga-aṅ nö ṙāngö yip hol re? Në inrē la-en më minṙöinylen. Urěh vë-ekūö ngam Tēv ngëichkö minë töhameuktu inlahen ngëichkö minë lökngörit minë chööngö aṅmat ngam Paipöl. Hēk ngëichkö tinrīken ngam tarik ngaich möl cha-a nö kēḵ fësla re nö ṙānyen ngam tarik nö ṙā-ang el ngam māṅ hēk hö-ö. Ōtre öp inrē inlahen öp tarik nö hòṅ ha-uknyu.—1 Kòr. 5:11-13. w22.02 pěch 5 përa 11-12

Pòrô öi tö samyeūheuvö hēk töfömtöreṙen öi kē ngam vinôkö, ṙòkhöre in lōnu töre öi havai minë tinrīken re pöi hòṅ hanghuṙen tö Yāvē. Lökten ayī-ö hòṅ chumkūöṙen tö inlahen minë mufē re. Pön mihôiṅ minë tinrīken hī min nö lökngöre nö asā nup mufē hī. Yē hī min öi afēkö nup töt löng elkuilōn re, ngaich mihôiṅ min ayī-ö vaichköreṙen in nup ṙô re hēk in nup la-en re inrē. (Efi. 4:17-19) Yē hī pöri fēkö nup tölöök, vai min minë ṙô hī hēk vai inrē min minë la-en kahëken hī. Ṙamlōn min ang Yāvē nö meuk inlahen hī. (Kal. 5:16) Ötkô in asökngö minë yamih tötlöng elkuilōn re, mihôiṅ pöri ṙapöre öi ui kēken u. Lökten yē hī urěhēkūö re kē ngam vinôkö, ṙāngen nup la-en ayī-ö nup surīkhö Yāvē. Angū-ö ngih raneh inlahen hī ṙāngen ngam hötṙeh tinrīken re. Yē hī lōnu tö Yāvē nö ṙamlōn nö in hī, ngaich hòṅ hayutlöre ayī-ö tö ngam tufömngöre tinrīken. w22.03 pěch 8 përa 1-2

Öt lööṙen yin më minṙöinylen nö akahakūö tö ngam tö fāluṙen yěn kô-en nö halööktit re hēk yěn hö-ö. Kūöyòh? Pön öt mameuk ellōn tarik cha-a. Höng hěng ngam tö mihôiṅ nö inlahen cha. Hòṅ chumkūöṙen cha-a nö ngëichkö minë la-en ngam tarik. Lökten nö chumkūöṙen cha-a nö ngëichken ngam tö fāluṙen yěn kô-en nö haṙivölōn töm fālen hēk un hēk nö havantö inlahen re nö kēken e. Lohten nö hòṅ kētu ṙētak anga-aṅ nö hameuktöre nö halööktit re. Yēḵ kô-en nö halööktit re ngam tarik tö ha-uknyu, ngaich yihtökūö min anga-aṅ nö el minë mīting, vë-ekūötēv inrē, ngaich haköp mat ngam Paipöl inrē min. Ṙūöhngöre inrē tö nup tömihôiṅ min hēk nö havantö inlahen ò nö fāluṙen. Yēḵ ò nö ma-anyre nö halööktit ngam tö pasū innôlö re nö in Yāvē, ngaich öt löktu ang Yāvē nö öt aṙēlen ò min, havantu inrē min anga-aṅ nö el ngam māṅ tö tī më minṙöinylen. w21.10 pěch 6 përa 16-18

Kūö ngam tökiröng hanāngenlōn re ang Yēsū tö Yāvē, lökten nöng anga-aṅ lahök lōn ò, nö el halīöngö hēk ing panam inrē. (Lūk. 4:8) Haköptö yik haköptöre inrē anga-aṅ nö ngatī inlahen. Öt hěngheuh Yēsū, ötrēhěn yik haköptö ò nö vī insā ngaich vë-ekūö u. Kūöyòh? Pön öt hěngtak tökô nö meuk ngam Tēv, kūö ò nö töt meukö. Lökten öi öt kô öi haṙongten ò inup tö vī-i nyat hēk insā inrē. (Isa. 46:5) Löng hòng ayī-ö yěi vī insā yip tarik töhet tö ṙô ngaich vë-ekūö cha? Hē Yāvē nö kētö minë Tösöm Chööngö ngaich ṙô-òvö anga-aṅ sā ngam tövë-evkūö töngamuh. Lökten yip tarik tö hòṅ haṙamlōn ngam Tēv, nö öt vë-ekūö insātēv. Vënyu inlahen yik raneh Kristīön tö më tarik vamë-eny inlahen nuk töngaichngen tö cha nö öt vë-ekūö tahëng Tēv. Ngatī yin töngamuh vē Vamënyen Yāvē nö asīnkö inlahen yik raneh Kristīön. w21.10 pěch 19-20 përa 5-6

Hōten yik Kristīön aṅ Yūta ang Yēsū nö hīnöre pön yih min öp ṙētak Yerūsalem nö ‘havīlöngö tö yik kumyung.’ Ngaich hē e cha-a nö “falngöre nö i kui minë rôngö.” (Lūk. 21:20-24) Pōyen nup ṙahangö cha nö falngöre nö laklö ngam nômöre. Ngatī kinūchngö angū-ö in ök Chūökamahati in nuk urěhngöre samyeūheu, ‘tö cha nö ṙāngö nuk panò-òre, patī re hēk nup töng sitih. Ṙatö-ellōnre cha-a tö Yāvē min nö hayööken cha, laklen cha inrē. Lökten cha-a nö mötlö lōn tö ngam nööinyö Yāvē tö nup töng sitih chehen.’ Ngöṙô hēk angū-ö, “Ngatī min nup kanihngen yamihen hī, nö kamlah nup ṙôken ṙinatö-ellōn hī yěi mötlö lōn tö Yāvē, hēk yěi lōn tö nup kanôlò re. Kô-en nup kanihngen hī min nö pōyen, ōt inrē min nup chehen ṙāhangö hī. Hòṅ hīnöre ayī-ö.” w22.01 pěch 4 përa 7-8

Unôichrit ngam Maneutnyi yik Israel nö ṙā-ang Aikup, vë-eny minë-enyre ang Yāvē nö in Môsös tö minë tinrīken re inrē. Ngö ṙô anga-aṅ: “Ngam Mā Tēv [Yāvē] Tēv an tööḵlö tö miṙēlōn neūkölōn inrē, töt veūtö lanīnö, tö pōyen miṙēlōn kanô-en inrē, ṙātö miṙēlōn i tö kööinyu aṙēlö ötlanöökö tanôichngen tökööl inrē.” (Man. 34:6, 7) Sitih ṙô ang Yāvē nö ihih nö vë-eny ngam töt chanuhuvṙen hanangenlōn re? Öt höng vë-enyre ang Yāvē nö īnu töm hanangenlōn, tön vë-enyre anga-aṅ nö ‘tööḵlö tö ngam töt chanuhuvṙen hanangenlōn.’ (Kin. 14:18; Nah. 9:17; Sal. 86:15; 103:8; Yôěl 2:13; Yôna 4:2) Höng Yāvē töngatī vinënyi nö imat ngam Paipöl. In e mikahkūö ayī-ö tö ò nö mööḵlö lōn tö ngam töngatī tinrīken. w21.11 pěch 2-3 përa 3-4

Mihôiṅ yip pamīhöre nö haköplu nö in Pītör tök pīhö ò inrē. Unôichrit tö tafūöl chumngeṅtö hēk ang Pītör nö meuk kūö Yēsū, ngaich tölṙô ò ang Yēsū nö keuheūttö ṙētakre nö im inhangköm tölöök inhanga. Tökiröng angū-ö nö fësla Pītör, pön ōt ngam mikūönö ò töhòṅ ngëichka nômö tö ò. Kamēḵ kāḵ ang Pītör nö chöh anaha nômö ngam mikūönö re. (Lūk 5:1-11) Atöllö inlahen re pöri ang Pītör, nö kētöre nö holṙen Yēsū nö ahangköm tölöök inhanga. Holuṙen inrē anga-aṅ tö ök pīhöre. Vë-eny nang hī ngam Paipöl tö inlahen Pītör nö kumtö ök pīhöre nö yěn havötaröön nö ahangköm tölöök inhānga. (1 Kòr. 9:5) Kô-en nö tö akaha ök pīhö Pītör. Lökten ang Pītör nö öt piyu-uṙô nö kētö inlēnö yik pamīhöre. (1 Pīt. 3:1-7) Ṙinatu-ellōn nā Pītör nö in Yāvē tö cha min yěn urěhlö minë kuilōn ngam Tēv ngaich öt löktu ang Yāvē nö öt chumkūöṙen tö cha.—Mët. 6:25, 31-34. w21.11 pěch 18 përa 14

Hāngenlōn takô ang Pôl tö më holmaneuk re. Ma-anyre anga-aṅ nö hayööken cha. (Inl. 20:31) Lökten yik holmaneuk ò inrē nö hangenlōn tö ò. Ik sā yik minṙöinylen aṅ Efisös nö akahalōn töre nö öt hēk min nö meuk kūö Pôl “ṙòkhöre cha-a ngaich nö peuiny.” (Inl. 20:37) Ngatī inlahen töngamuh më minṙöinylen nö hangenlōn tö më prötör sistör hěnghöre hayööken cha inrē nö öt ṙākenre. (Filip. 2:16, 17) Hēṙu ṙung pöri nö kihngen më minṙöinylen nö kēken nup la-en re ngaich hòṅ sitih inlahen cha-a? Haköplu yin më minṙöinylen nö in Pôl. Hö-ö ök nö aṅhavin tö tö harīkngöre kumlēḵ pön ngatī inrē anga-aṅ nö töthet, lökten anga-aṅ nö ma-anyre nö kēken minë tölöök la-en. (Rōm. 7:18-20) Pōyen inrē nup kanihngen lamākūö ò, mihôiṅ inrē öre anga-aṅ nö ṙāngenre kūöṅnngöre inrē ngam ṙanamlōn ò. Hö-ö pöri anga-aö nö halöngngenre nö ngatī inlahen. Ngatī inlahen më minṙöinylen nö haköplu nö in Pôl tö cha nö sitih inlahen nö el minë kanihngen re hēk holtö ṙanamlōn re nö löklōn Yāvē. w22.03 pěch 26 përa 1-2

Hěng öp chööngö tökētu nö im La-en Lēvī 19:3. Ngö ṙô ang Yāvē nö in cha: “Haköpkö në töhet sakamö chu.” Hö-ö in ayī-ö Kristīön öi el katôh chööngö Môsös lökten öi öt kēken ngam töhet sakamö. Haköplu pöri ayī-ö tö minë yanöölen yik aṅ Israel nö kēken ngam töhet sakamö. Pön hòṅ Ha-öinyö Yāvē cha-a hē el ṙētak ngam töhet sakamö, öt kēken minë tahëng la-en yik aṅ Israel. Ngatī ök inrē ang Yēsū nö chuh el chūök vinë-eṅkūötēv he el töhet sakamö ngaich haköp ngam ṙô ngam Tēv. (Man. 31:12-15; Lūk. 4:16-18) Haköplu in öi in ngam chööngö ngam in ngam La-en Lēvī 19:3 öi in minë tö örheūheu la-en öi kēnyö ṙētakre öi ha-öinyö Yāvē. Mihôiṅ öm më-eṅ hēk öm ṙūhlö inlahen re in në tö ngatī la-en? Yēḵ meh örheūheu kēnyö minë tö ṙahëichyen ṙētak re öm ha-öinyö Yāvē, ngaich hēk min më-eṅ öm röhta öm in Yāvē, ngam mahayööken meh min im hanëtö. w21.12 pěch 5 përa 13

Hē Yēsū misī nö ing panam öt atöltuṙen anga-aṅ tö tarik. Nya-avkūö misī anga-aṅ nö hol kūö yik tökôlò, kēnyö ṙētakre pöri anga-aṅ inrē nö in yik yāich tarik hēk yik tö haṙivlōn inrē. Aṙē-ělōn anga-aṅ tö yik tö haṙivlōn tö nuk “tökööl” kahëkenre, yik töt kôlò nö imat yik tarik. Lökten ang Yēsū nö vaich nö imat cha. Ngaich hatön yik haköptö ò nö ngö ṙô: “Kūö yòh ang nö nyā nö holkūö mahamūl ṙāi kinëhöt chehen, tököölö fālen inrē?” Ngaich sapṙô cha ang Yēsū nö sā ṙô ngam tövë-evkūö töngamuh. (Lūk. 5:29-31) Ha-ehangen ṙô Isayā tö ngih panam min nö Sō-en ngam Mesayā. Ngö ṙô ngam Töhet līpöre: “Töt hakūökaṙen an tösō-ovö inrē tö tarik. . .sā öp töhĕng tak an inrē chūök tarik nö hanyatngö kūö re öt hakūökaṙen anga-aṅ rö-ö ayīö inrē hāngen tö ò.” (Isa. 53:3) Tö sō-ovö ngam Mesayā “tö tarik,” hòṅ ngatī mikah elmat öre yik Yahuti misī töm tökūichi inlahen ò nö tö sō-ov min. w21.05 pěch 8-9 përa 3-4

Ōt yik Kristīön töt lööṙen nö hang inlēnö re tö ngam Paipöl. (Yāk. 1:22) Ōt yik tö atöltuṙen tö tökôlò hēk tö yip yāich inrē. (Yāk. 2:1-3) Ōt inrē yip in cha töt ma afēkö nup ṙô re yěn ṙô-òvö. (Yāk. 3:8-10) Pòrô nö pōyen minë öt kumlē-en cha sön ang Yāköp nö öt ngö lōn tö cha min nö öt haṙīngö minë tinrīken re. Holtö hanangenlōn re pöri anga-aṅ nö halēnö cha nö hòṅ sitih inlahen. Ṙūöhlö alaha cha inrē nö kēḵ inyööken re nö in yip minṙöinylen. (Yāk 5:13, 14) Haköp hī in e: Hòṅ akahakūö tö inlahen yip holre, hēk um ṙā-ang lōnre. Ōt yip kahë istötī hī lohten töt lööṙen nö kēkö kaha nup inlēnö re imat ngam Paipöl. (Yāk. 4:1-4) Lohten cha-a nö kihngen nö ṙāngö minë tötlöng sin la-en re ngaich hameuktö minë tövai tinrīken Kristīön. Hòṅ iṙūöhen ayī-ö öi vë-eny nang ngam haköptöre tö nup chūök ò nö hòṅ halööktit re. Ötkô ayī-ö ṙā-ang lōnre in cha. Yěn tö yāichö ellōn ngam tarik öthō ang Yāvē nö öt tūökten ò ngaich kētö kumlēḵ ò inrē min nö ṙāngen minë tövaich la-en re.—Yāk. 4:10. w22.01 pěch 11 përa 11-12

Ṙòkhöre vē Kristīön nö asīnken Yāvē nö hameuktö neūkölōnre. Pön öt hāngö min nup ṙô cha tö Yāvē yěn öt aheukölōn lōn tö holre. Öt hěngtak in hī tö lōnu töre nö öt hāngô tö ngam Tēv. Lökten yē hī öi meuk öp hol maneukre Kristīön nö kihngen, ngaich hôṅ hayööken ò min ayī-ö. Kööpölōn inrē ayī-ö tö ṙô ngam Pāipöl nö ngö ṙô “Pò ngam kinṙôka nö öt miṙē-ěvlōn nö in ò ngam töt mahameuktö miṙēlōn.” (Yāk. 2:13) Yēḵ hī min kööpölōn töre öi hòṅ aṙētu, ngaich ngatī inlahen min ayī-ö öi hameuktö neūkölōnre tö yip tahëng. Möthë inlahen ayī-ö hòṅ hameuktö neūkölōn re tö cha yip mahavanhötre nö el ngam māṅ. Pōyen nun minë inchōḵ-elmat hī, i mat ngam Pāipöl inlahen inmeuktö ngam miṙēlōn, öi uh harūnöre im töt miṙēlōn. w21.10 pěch 12 përa 16-17

Pòrô nö röhta ngam ṙētak finëlngö Yēsū sön anga-aṅ nö kēnyö ṙētak re nö vë-ekūötēv, afītöre inrē. Chöh ök tö chēvngen anga-aṅ chūök re nö el ök panô-òṅ Ketsēmenī. Hē e angū-ö hatööm, ang Yēsū nö haköptö yik tanīnöṙô tö inlahen ngam vinë-ekūötēv. Lohten ngaich nö chūöltööm tö taneungö cha nö el ök panô-òṅ Ketsēmenī. Tölṙô yik haköptöre anga-aṅ nö “aṅhati” ngaich kiröönngöre nö vë-ekūötēv. (Mët. 26:37-39) Ik sā ò pöri nö vë-ekūötēv, haṙòhlö yik haköptö ò. Ik sā Yēsū nö meukö cha nö haṙòh, tölṙô cha hēk anga-aṅ nö “aṅhati vë-ekūötēv inrē.” (Mët. 26:40, 41) Akahakūö ang Yēsū tö cha nö larāḵ. Lökten ò nö ngö ṙô, “öt kalēḵ pöri ngih alaha.” Nët heuh hēk ang Yēsū nö havanngöre nö vë-ekūötēv, im invanö re hēk anga-aṅ nöng kôtökūö tö cha nöng haṙòh, öt vë-ekūötēv cha-a.—Mët. 26:42-45. w22.01 pěch 28 përa 10-11