Tisempör

Asīntöre ang Yēsū nö sā öp yōm sīṅp öp tö hāngenlōn tönup sīṅp re, ngaich më tamömköröön ò nö sīṅp ò cha-a. (Yôh. 10:14) Akah elnang nun në sīṅp tö ṙô ngam yōm sīṅp re hang ṙô ò inrē. Hěng tak ök ihih tarik tö kôta mat nö meuk inlahen nup sīṅp. Ngö ṙô anga-aṅ: “Ik sā ih öi haröhtöre in minë sīṅp pöi hòṅ kēḵ nyat re lang öi in u, ngaich ṙūöhöngre anū-ö tö ih. Ik sā ök kun kikōnyö pöri ök yōm minë sīṅp nö havëken u, ilöö yihtöre anū-ö nö in ò.” Fē-ělre ayī-ö im inlahen ngam tarik, tö ngam ṙô Yēsū nö vë-eny inlahen nuk sīṅp re, cha-a më tanīnöṙô ò. Ngö ṙô anga-aṅ: “Hang ṙô chu min anū-ö.” El halīöngö pöri ang Yēsū. Ngaich sitih inlahen min ayī-ö hang nup ṙô ò? Hěng ngam inlahen hī kò-òren hameuktö re hangṙô ngam Yōm sīṅp hī. Yēḵ hī kēkö kaha minë inköphöti ṙô ò.—Mët. 7:24, 25. w21.12 pěch 16 përa 1-2

Töt lamëken yik Kristīön sin ang Pôl. Unôichngöre pöri anga-aṅ nö akahalōn töre nö vaich, lökten anga-aṅ nö halööktit re. (1 Tim. 1:12-16) Hayöökaren ang Pôl tö Yāvē lökten nö inu tö ngam hanangenlōn inu inre tö ngam mikūöṙen tö ngam inyāchngö inrē nö töhěng tak nö minṙöinylen. Ṙātö-ellōn re anga-aṅ tö Yāvē nö aṙēlen ò. (Rōm. 7:21-25) Öt yahlö mufē anga-aṅ nö in re pön öp töng kanô-òṅ ò ngati inlahen nö la-envö. Asīöp minë tövai anga-aṅ tinrīken re nö ma-anyre nö in u. Kūö ò nö hayāchngöre lökten anga-aṅ nö hayönglenre nö la-evṙen nö in Yāvē. (1 Kòr. 9:27; Filip. 4:13) Ngatī inrē më minṙöinylen nö töthet. Ngaich lōnu ang Yāvē tö cha nö hō-en minë vanaichö re ngaich hòṅ halööktit re. (Efi. 4:23, 24) Mihôiṅ cha-a nö haköpmat ngam Paipöl ngaich halööktit re. Ngaich ngëichkö minë inlahen re inrē nö asuh nup töhòṅ halööktitvö tö cha. Ngaich hayööken cha min ang Yāvē hòṅ cha nö ṙamlōn hēk kaheukö inrē nö tö akaha nö minṙöinylen.—Yāk. 1:25. w22.03 pěch 29-30 përa 13-15

Yēḵ hī akahngenre öi kahòkken holre, ngaich hòṅ sitih inlahen ayī-ö? Hòṅ köpölōn ayī-ö töre öi hòṅ hāngenlōn tö më holmaneuk re. (Yāk. 2:8.) Havëkö hinòlṙen re inrē öi in Yāvē nö hayööken hī öi ṙāngenre kahòkken holre. Ngaich sā ṙô hī vë-ekūötēv, ngatī inlahen öi hòṅ kēnyö ṙētak re öi vë-ekūö öp holre öp chūök hī sin vaichö mufē. Mihôiṅ öi holröön ò öi chuh el fīl havëken ò inrē nö nyā nö i patī re. Yēḵ hī min ngatī inlahen ngaich ṙūöhtö mikahkūöre min ayī-ö tö nup tövai tinrken ò. Ngaich ṙāngenre min öi kahòkken cha. Hameuktöre inrē öi hangṙô ngm yōm sīṅp. Sā inlahen nup sīṅp nö hang ṙô öp mahayōmö re, ngatī inlahen yip tamömköröön Yēsū nö hangṙô ò. Yěi pòrô öi aṅ ngam “tökun kiteūm” hēk “tökiröng kiteūm,” mihôiṅ ayī-ö iṙūöhen hang ṙô ngam tö akaha yōm sīṅp hī.—Lūk. 12:32; Yôh. 10:11, 14, 16. w21.12 pěch 19 përa 11; pěch 21 përa 17-18

Ik sa Rēhōpoām nö rācha aṅ Israel, ōtre yip tarik chamuh in ò, ngö ṙô cha-a nö in Rēhōpoām, Langān in tö tī ök yöng meh Sòlòmön, ha-öhlen ih man tö në kaheūn ih. Hěng ngam tö vai inlahen ò. Pò ò nö kē inlēnöre nö in yik tököiny aṅ Israel ngö ṙô cha-a hôṅ hāngö ṙô yin ngach köp min cha-a nö tarik alaha hī. (1 Rā. 12:3-7) Öt söö-ölōn pöri Rēhōpoām töm inlēnöre. Lökten ò nö kē inlēnöre nö in yip ṙāl tarik yik töng anònglö sanīöpö ò. Ngö ṙô cha-a ṙūöhlö lumngan cha man. (1 Rā. 12:9-11) Mihôiṅ öre Rēhōpoām nö havëkö inlēnöre nö in Yāvē. Hö-ö pöri anga-aṅ pön hangṙô yip holre. Kanihngen cha pöri angu-ö töm Rācha hēk tö më tarik. Pi-a in ayī-ö halēnö tö nup töt öire. Yē u pöri nö lamöknyö mat Paipöl ngaich hôṅ hangö u ayī-ö. w22.02 pěch 9 përa 6

Ngòh tö īnu töm inyāichngö, tö akahakūö inrē töp tölngö kanô-òre. Öt ngölōn cha-a kē-ě nun min në la-en hī tö vē ṙāl tarik, höng holṙen cha pöri acha-a nö la-evṙen tö minë la-en re. Akahalōn yin vē tököiny hol maneuk hī tö vē tö ayal tarik nö inkôlò cha nö kahëtö Yāvē. Yěn yūs ngam kumlēḵre më ṙāl tarik nö im linöklōn ngam Tēv ngaich ṙamlōn min më tö köiny hol maneuk hī, ha-öiny kumlēḵ alaha cha inrē nö im linöökö lōn ngam Tēv. Yěn hòṅ hayööken më tököiny më tö ayal tarik nö el ngam māṅ ngaich hòṅ ṙamlōn më tököiny yěn hayöökaṙen tö cha. Ngëichköm inlahen Na-ōmī nö tövai nö inchō elmat hī. Hē Na-ōmī nö kapahlöng tö nak kūön re, ngaich tölṙô nak kankūön re anga-aṅ nö havan panam re. Sō pöri ang Rūt nö ṙāngen ò, vë-eny re anga-aṅ nö hòṅ holröön ò nö chuh Petlihem. Halöngten ò ngaich ang Na-ōmī nö holröön ò. (Rūt 1:7, 8, 18) Nët re tak cha-a ngaich nö yöölen nö lökten in ngam ṙô Rūt, teūngen cha-a tö minë inkôlò. (Rūt 4:13-16.) Yěn ha-öiny nup inyöökenre min më tököiny hol maneuk hī tö nup ṙô më tö ayal ngaich ma-asīnken Na-ōmī min cha-a. w21.09 pěch 10-11 përa 9-11

Höng Yāvē an töakahakūö tö minë inlahen hī. Lohten më-eṅ öm mööḵlö inlahen tö më tahëng prötör sistör öm i linöökö lōn ngam Tēv. Hēk mihôiṅ öm kūö ngam ṙēḵtire hēk vahavö inrē in minë mineukṙen më mikūönö re inrē öm öt yaha inlahen öm i linöökö lōn ngam Tēv. Ngaich uh më-eṅ öm haṙivlōn. (Kal. 6:4) öthō an Yāvē nö vāichngen minë la-en më Yēḵ meh öm löngö inlahen öm i linöökö lōn Yāvē öm keūheuttö inlahen re ngaich ṙamlōn min anag-aṅ. Pò Yāvē nö meuk minë inlahen hī i linöökö lōn ò. Ngaich lōnu anga-aṅ tö hī öi ṙamlōn hēk nup tölngö inlahen hī i linöökö lōn ò. Teūngen inrē ayī-ö töngamuh tö lanāmö elkui lōn re, pò hī akaha kūö tö Yāvē nö örhō nö ṙāngen yip lamök lōn ò. Lāklen hī inrē anga-aṅ hē el ṙētak kanihngen. (Isa. 41:9, 10) Kô-en in teūngen tö ṙanamlōnre öi ha-ööiny ngam yöngre Yāvē pò ò nö inu tö ngam ‘ineū-euṅ hēk minlēḵṙen’ inrē nö löktö in minë vahīre.—Inm. 4:11. w22.03 pěch 24 përa 16; pěch 25 përa 18

Hòṅ asīnken Yēsū ayī-ö, öt keuheūttöre inlahen pöri öi asīnken Yēsū, lökten ayī-ö ötkô öi haṙivlōn öi fēken e. (Yāk. 3:2) Sā ngih inchōḵ elmat hī, sā ngam istutent nö harunöre nö i vīni-i ngam pēnting nö in ngam tīchör re, pò ngam tīchör nö tö heuveū-en nö pēnting, sön ngam istutent nö öt sā tī ngam tīchör nö i vinī-i ngam pēnting. Yēḵ ò pöri nö halööktit ngam vanaichöre ngaich mihôiṅ min anga-aṅ nö sā tī ngam tīchör re nö pēnting. Ngatī inlahen in ayī-ö öt sāḵta in Yēsū. Yēḵ hī pöri örheūheu öi vë-ekūö ngam Paipöl hēk örheūheu inrē öi harīkngen minë tinrīkenre, ngaich ma-asīnkö röön Yēsū min ayī-ö. (Sal. 119:59) Pōyen yip tarik töngamuh töng ngamëichköre. Hö-ö pöri më tarik Yāvē nö ngatī inlahen, pò cha nö lökngöre tö ngam inlahen Yēsū nö harööḵngen re, ngaich hòṅ asīntöre cha-a nö in ò. (1 Pīt. 2:21) Yēḵ hī min öi asīnken Yēsū öi harööḵngen re ngaich hō-en hī min ang Yāvē, ngaich teungen min ayī-ö tö ṙanamlōnre. w22.02 pěch 24 përa 16; pěch 25 përa 18

Löktö im Paipöl tī ang Yāvē nö halēn yip tarik re. Yēḵ hī min afītöre tö nup haköptö Yāvē nö in hī, ngaich möl min ayī-ö hang minë inlēnö re ṙamā-ang in ò, heuveū-eu ṙô inrē öi haköptö holre. (1 Tim. 4:15, 16) Löktö in yip tö “tö-akaha mahalanṙen” tī inrē ang Yāvē nö halēnö hī. (Mët. 24:45) Ṙōlheuh yin nö kētö inlēnö hī.Pi-a in ṙung harīkngöre el nang öi hāngö u. Tö sa në, yěn vë-eny nang hī cha-a tö inlahen hī yěi hòṅ hīnöre tö nup yamih pinlāngen. Pi-a min öi ngölōn, öthō nö yih ngam töngatī pinlāngen nö ing kamngö ih. Sitih inlahen öi min yěi hang në tö ngatī inlēnö? Nup inchōḵ elmat hī aṅ mat ngam Paipöl, mihôiṅ öi fēken u. Yěi haköp inlahen u min ngaich akaha kūö min ayī-ö tö nup inlēnö yip tarik Yāvē hēk pī cha-a nö harikngöre ha-ang tö nup inlēnöre, sön pöri cha-a nö kēken u ngaich yöölen nômö.—Kam. 7:7; 8:10. w22.03 pěch 18-19 përa 15-16

Ṙatö-ellōnre ang Yēsū lökten ò nö ṙô-òvö tö ngam ṙô im tövë-evkūö töngamuh. Tö ngö manah ngam ṙô Yēsū, tö ngam yöng ò min nö hachohlen ò nö hēk. Lökten ò nö kēten ngam nômöre nö eltī ò. Ṙinatu-ellōn anga-aṅ tö ngam yöng ò min nö kööpölōn tö ò. Asup haköplö hī in minë ṙô Yēsū? Hòṅ köp takô in öi im linöökö lōn Yāvē, pòrô min mihôiṅ öi fëli, hēk pòrô kapah. Yēḵ hī pöri öi ‘keuheūttö ellōn re hayönglenre in ngam Tēv’ ngaich möl min öi mihôiṅ ngatī. (Inch. 3:5) Töi ngëichkö ngam inlahen Yôsuā ngòh tö 15 samyeūheu ṙēḵti, hē ò nö vahavö tök invahre nö hòṅ lā kinpaha. Hòṅ le-ënan yik lame-en tövahav tök nuk töt sā ta nö in minë chööngö ngam Tēv. Lökten anga-aṅ nö sō nö filal minë chööngö ngam Tēv. Urēhěkūö ò nö meuchngö mat re nö kapah ngöṙô anga-aṅ nö in ök yöngre kikānö: “Eltī Yāvē tī chin tö ngih nômöre ngaich öthō min anga-aṅ nö öt chumkūöṙen tö chu. Öthō min inrē anga-aṅ nö öt hachohlen chu, kūö ò nö meuk ngih ellōn chu, akahalōn inrē tö chu öich hangenlōn tö ò.” Hòṅ hatöönöre in ayī-ö inrē öi ngö ṙô, ‘Yēḵ ngam ṙinatö-ellōn chu min nö kalaha, köp öich min im linöökö lōn Yāvē? Kô-en öich ṙatö-ellōnre tö ngam Tēv Yāvē min nö öt hō nö vachngö tö chu?’ w21.04 pěch 12-13 përa 15-16

Ngönlöre yin vē tarik Yāvē nö löktö im la-en inhānga. Ṙamlōn in ayī-ö yěi ahānga, pòrò yip tarik nö hang ṙô hī hēk hö-ö. Ōt yip tahëng, tö kūö kanihngenre nö öt teūngten nö im inhangköm tölöök inhānga. Hòṅ köpölōn in öp tö yòh kanò-òṅ hī hòṅ holtö ellōn re ayī-ö la-evṙen in e, ngaich ṙamlōn min ang Yāvē. Akahalōn ang Yāvē tö inlahen yip hol hī tö vahavö töt kô nö kunyi-inyre tö patī re nö ahangköm tölöök inhānga. Mihôiṅ pöri cha-a nö chöh nup tahëng inlahen re nö ahānga. Tö sā cha nö mihôiṅ nö vë-ekūö yip tôktör, nörs hēk yip tahëng inrē. Yēḵ cha min nö fēkö nuk inlahenre nö kalēḵ alaha sin nö la-evṙen nö im linöklōn ngam Tēv, ngaich mihôiṅ min cha-a nö yihi miṙivlōn. Yēḵ cha pöri min nö akahakūö tö Yāvē nö öt timten cha nö pōyen kahëtī tö ṙētakre nö im inhangköm tölöök inhānga, ngaich angū-ö min tö tī-iv tö cha nö köptī töm ṙanamlōn re nö im inhangköm tölöök inhānga. Öt akahakūö in ayī-ö tö ngam kanô-en tö teūichtu, tö e min yěn sīöp hēk yěn hö-ö. Lökten öi öt kô ṙangenre öi ahangköm tölöök inhānga.—Mum. 11:6. w21.05 pěch 24-25 përa 14-17

Kūö inkôlò tī Yāvē ök Rācha Tavīt nö pōyen kanôlò, minë-enyvö hēk mihôiṅyö kūöre tö nup kinyungö. Ngö ṙô anga-aṅ tö Yāvē nö pōyen kahëtī tö inkôlò ò “ngaich pōyen anu-ö nö töt kanṙeūken.” (Sal. 40:5) Hěng heuh pöri öng Tāvit nö vaichngö tö nup mineukṙen re tö Yāvē. Pōyen yip pihö ò, sön pöri anga-aṅ nö ngëichken ök yöng nyiö tö ngaich nö pihövö öng Pětsīpā. Asěhken Pětsīpā ngaich öng Tāvit ngaich puyösö ngaich anga-aṅ tö tī ò. Kēk köm tökööl ngaich anga-aṅ ngaich asěha ngam tökirööng hēk falen ò pòn fēlngen Uriya öp pihö Pětsīpā. (2 Sa. 11:2-15) Samyeūheu rò-òten ök Tāvit nö chiplö nö in Yāvē, ngaich pöri anga-aṅ nö kēkö tökööl tö kūö ngam yinkhanga pōyen kanihngen inrē anga-aṅ. Unôich ngöre pöri öng Tāvit nö hō-en ngam vanachöre ngaich halöktitre. Ṙamlōn anga-aṅ pòn aṙělöng tö Yāvē.—2 Sa. 12:7-13. w21.06 pěch 17 përa 10

Lohten më-eṅ ngö lōn, öt heuveū chin chu-ö kēḵ istötī, hòṅ rahëichtöre heuneū-en chin öre ngaich möl öich kēḵ istötī tahëng. Yēḵ meh ngatī mufē, haköplōn re man tö në tölūöi ṙô mahayööken meh min öm kēḵ istötī. Ngam raneh, Yāvē an kamtöllen meh öm haköphöti. Innëtö, Yēsū tamölṙô meh öm haköphöti, ngam ‘tö kē-ěvkūö tö në chööngö el halīöngö ing panam inrē.’ (Mët. 28:18) Ngaich ngam linūöyö, mihôiṅ man kēḵ inyööken re i tahëng yěm öt heuveū-en. Sā Yēsū misī nö havëkö heuneū-eu ṙô re nö ṙô-òvö nö im Yöng re. (Yôh. 8:28; 12:49) Yěm hòṅ harunöre kēḵ istöti mihôiṅ më-eṅ kēḵ inyööken re in öp fīlt sörvis ovörsīör meh, in öp painīör hēk pöplisör inrē tö heuveu-en nö kēḵ istöti. Mihôiṅ öm hol cha yěn kēḵ istöti hòm meuk inlahen cha yěn kēḵ istötī. w21.07 pěch 6 përa 12

Röhta mana-ngen ön ngih panam lökten ayī-ö hòṅ ṙatö-ellōnre in minë la-en kahëken Yāvē. Pò hī min halēnö tö nup töt ööi re inlēnö hē el öp tökiröng kanihngen. Hē e min ngam Tēv nö halēnö hī nö löktö in yip mahayōmö hī, ngaich ngölōn min ayī-ö tö minë inlēnö yěn lamöktö im Tēv hēk yěn lamöktö in yip minṙöinylen. Hē u anū-ö kanihngen ṙatö-ellōnre hòng ayī-ö in ngam Tēv in ngam söngkötön ò inrē? In e min nö meukö minë inlahen hī. Yēḵ hī töngamuh hang minë inlēnö re lamöktö el ngam söngkötöng ngam Tēv ngaich ngatī inlahen min ayī-ö inup yamih. w22.02 pěch 6 përa 15

Mihôiṅ hē Kītiön tö yik tö 300 hol ò tö tī Yāvē ngaich pöri yik aṅ Ifrēm nö la-alkūö Kītiön, öt ṙamlōn cha-a tö ò nö mihôiṅ nö kiyungpön öt havëka cha-a nö holṙen ò nö kiyung. (Kam. 8:1) Fēḵlen cha ang Kitīön tö inlahen Yāve inrē nö kētö nuk tökiṙöng la-en cha. Ik sā cha ngaich nö hang ṙô ò “ṙātöre lanīnö cha-a ngaich.” (Kam. 8:3) Kūö Kītiön nö sōten cha nö la-al kūöre lökten ò nö hayaichngöre nö vë-ekūö cha ngaich vī ngam lanāmö nö i hòi cha. Haköplu öi in yik tarik Ifrēm tö hī ötkô mööḵlö lōn tö minlēḵkenre pöi hòṅ fēkö inlahenre öi milēḵṙen tö Yāvē. Yěi minṙöinylen hēk kūi ngam mikūönö, ngaich hěng ngam haköplö hī öi in Kītiön. Yěn hěng tak öp tö haṙivlōn tö tī hī ngaich hòṅ fēken öp mufē ò ayī-ö. Nup töng vai la-en ò, hòṅ ha-öiny inlahen ò ayī-ö. Hē-e ayī-ö hòṅ aṅhav-in töm inyaichngö. Mihôiṅ öi öt uròh öi hameūktöre öi tö löng ngamuh pöri inlahen hī öi hòṅ vī ngam lanāmö in yip prötör sistör. w21.07 pěch 16-17 përa 10-12

Vīlen hī ang Yāvē öi sā tinrīken ò. Tö ngö manah tö hī öi mihôiṅ öi asīöp minë tinrīken Yāvē tö sā ngam, hanangenlōn, neūkölōn, chaniplen hēk ngam lanöökö inrē. (Sal. 86:15; 145:17) Yēḵ hī min öi asīöp në tinrīken Yāvē, ngaich kētö nöönyö Yāvē ayī-ö kūö ò nö vīlen hī sā ò. (1 Pīt. 1:14-16) Ngaich ṙamlōn min ang Yāvē hēk ngatī inrē min ayī-ö öi ṙamlōn. Ngaich hameuktö re min ayī-ö öi hòṅ kaheuk hötvö öi el ngam mikūönö Yāvē. Vīlö ngam tö vai patī hī ang Yāvē. Urěhekūö vinīlö yip tarik ang Yāvē nö halēnlö ngih panam. (Yōp 38:4-6; Yar. 10:12) Lumvënyökūö ellōn re an Yāvē. (Sal. 104:14, 15, 24) Ngaich meuk minë vahīṙen re “ngam Tēv nö löök.”—Ran. 1:10, 12, 31. w21.08 pěch 3 përa 5-6

Ṙòkhöre ayī-ö öi kē-ěvkūö tö ngam la-en inhangkö ngam tölöök inhānga, vīten tarik inrē nö mahaköp. (Mët. 28:19, 20; Rōm. 10:14) Lökten in hòṅ ṙūöhlö heuneū-en re in e. Öi sitih inlahen min? Mihôiṅ öi haköpmat minë līpöre minë inrunten hī im la-en ngaich asīnkö minë haköp re tö sā ngam Chichān prōsör pōyen nun minë inchöngten hī imat e. Hěng kò-òren ngam tömihôiṅ nö la-en hī öi Kristīön, ngam inlahen hī öi asīöp nup tövai tinrīken re ööilōn Yāvē. (Kòl. 3:12; 2 Pīt. 1:5-8) Pōyen nup lohten lōn hī la-en i linökölōn ngam Tēv, öt teungten pöri ayī-ö kēken u. Yēḵ hī pöri öi keuheūttö ellōn re asā öp tölngö kanò-òṅ hī, ötlöktu ayī-ö haṙivölōn. Ötlöktu ayī-ö min öt hateung ngölōn re inup töng ööilōn re la-en el öp tufömngöre panam. Hanöng sā yanīhih e pöri, höng iṙūöhen ayī-ö chöh ṙanamlōn re inup töng ōt la-en hī töngamuh. Yēḵ hī ngatī inlahen harōilöng min ang Yāvē ṙamölōn inrē min anga-aṅ nö in hī. (1 Tim. 1:11) Ta-a chěi töi chöh ṙanamlōn re in minë töng kinë-ekūöre la-en! w21.08 pěch 25 përa 18-20

Ṙòkhöre yip aṅ patī meh nö Vamënyen Yāvē? Yěn hòṅ, ngaich lohten më-eṅ öm löktö kūö nyinī-öre öm haköp inlahen Yāvē. Haköp inlahen ò më-eṅ nö Vamīlen hī. Haköp nup tövai inrē tinrīken ò. Hangenlōn anga-aṅ tö hī ngaich vī ngih panam min nö peretāis. (Ran. 1:1; Inl. 17:24-27) Pōyen pöri yip töt ṙamatö ellōn re nö im Tēv tö ò nö Vamīlen hī. Ṙātö ellōn re cha-a tö në töng sitih ikūöng panam nöng kamnahngenre nö yih. Yip töngatī ṙinātö ellōn tö pōihöl cha-a nö haköp, lökten cha nö ngö mufē tö ngam science nö mihôiṅ nö hameuknyö minë ṙô ngam Paipöl nö tövaich. Ngö ṙô inrē cha-a tö yip töt akaha hēk yip töt pōihöl nö haköp höng acha-a ṙamātö ellōn re nö i ṙô ngam Paipöl. Pòrô ngaich öi tö samyeūheuvö rò-òten öi löklōn Yāvē, sön ayī-ö öi hòṅ hangön ngam ṙinatö ellōn re. Yēḵ hī min öi ngatī inlahen ngaich öthō min ayī-ö öi ilöö ṙatö-ellōn re öi inup ṙô cha, yip vamënyen minë inköphöti ṙô ngam Paipöl nö tövaich.—Kòl. 2:8. w21.08 pěch 14 përa 1-3

Milēḵṙen hēk hāngenlōn yik hē Āpēl, Nōva, Aprahām hēk Yōp inrē. Lökten cha-a nö hang minë chööngö Yāvē ngaich ṙatö-ellōnre inrē hēk kētö tökētu inrē. Nup tölngö kanô-ò cha nö ha-öinyö Yāvē ngaich ngatī inlahen cha-a. Ṙamlōn ang Yāvē nö in ngam inlahen cha nö ha-öinyö ò. Unôichrit e ang Yāvē nö kētö ngam chööngö Môsös nö in yik Israel. Pōyen hup chööngö kahëtö Yāvē i alaha ngam nööinyö ò. In e yik aṅ israel nö akahakūö tö cha nö sitih inlahen nö ha-öinyö Yāvē. Unôichrit Yēsū nö ha-aṅlöng rikre nuk tö haṙikiyö. Pön öt sā yip maha-öinyö Yāvē nö kēken ngam chööngö Môsös ngam inlahen cha nö öt tunkui minë chööngö nö i alaha ngam nööinyö ngam Tēv. (Rōm. 10:4) Pön kē-ěkūö yik Kristīön tö ngam tufömngöre chööngö, ngam “chööngö Kristū.” (Kal. 6:2) Öt maṙòtòng nup chööngö tö vī-i, höng hòṅ tömköröön Yēsū pöri cha-a hēk hang minë inköphöti inrē. Sā hamang chööngö Kristū min cha-a. Ngatī inlahen yip tarik ngam Tēv töngamuh nö pītnyöre nö tömköröön Kristū hòṅ Yāvē nö ṙamlōn nö in cha hēk kētö hanöhlö cha inrē.—Mët. 11:29. w22.03 pěch 20-21 përa 4-5

Hamang vinë-ekūöre an Yāvē. Hang ṙô ngam kūönre misī anga-aṅ nö vë-ekūö ò, hē ò nö ing panam. Hē Yēsū nö havëkö hinôlṙen re nö katöllö yik tö 12 tak mahaköp. (Lūk. 6:12, 13) Hang ṙô Yēsū inrē anga-aṅ nö vë-ekūö ò, hē ò nö kihngen. Hē ò nö kē-ě, ngaich vë-ekūö ngam Yöng re anga-aṅ tö nuk kanihngenre. Rö-ö pöri nöng hang nup vinë-ekūöre ang Yāvē pön hayööken ò inrē nö tīntö yip ma-ahāngare nö hangönken ò. (Lūk. 22:41-44) Hang ṙô yip tarik re an Yāvē töngamuh yēḵ cha nö vë-ekūö ò, asītö elnangre inrē tö nup ṙô cha yěn vë-ekūö ò. (Sal. 116:1, 2) Kò-òren in ngëichkö ngih inchō elmat inlahen ngòh tö hěng tak sistör aṅ Intia, hē ò nö īnu tök tökiröng kanihngenre. Ngö ṙô tī anga-aṅ nö kūich: “Sā inlahen sinap ṙô chu öich vë-ekūötēv ngam Mē 2019 JW Pròtkasting öich la-al ngam tökiröng kanihngenre.” w21.09 pěch 21-22 përa 6-7

Asehkūöre man tö kanihngen yik Kristīön ik raneh senchurī, ṙamāngö nuk töng sitih chehenre nö chuh ip tahëng chūök. Hòṅ ṙatö-ellōnre cha-a tö Yāvē nö hateūngö nup hanakten cha. Sitih inlahen pöri cha-a nö hameuktö ṙinātö-ellōnre? Urēhěkūö tö taneui samyeūheu hē Yerūsalem nö havīlöng, halēn yik Hiprū Kristīön ang Pôl nö ngö ṙô: “Ui aṅhavin tö hanāngen tö rupīö, ngāichö ṙôngònglōn tö nup in yīö inlānen: pòn ngô ṙò Anga-aṅ, Öthōḵ Chin löhlö tö meh ötrēhěn Chin min löktu ṙāngen meh. Lökten hī holtö nyanatlö öi ngö ṙô, ngam Mā Tēv an hamòlṙen chu; öt pa-ekūö chin min, töp tī öp tarik min tö chu.” (Hep. 13:5, 6) Yik Kristīön hamang ngam inlēnö kahëtö Pôl, heuveū cha-a lohten nö ha-aṅ nômö re nö in nup töng ṙahëichyen. Pön ṙātö-ellōnre cha-a tö Yāvē nö hateūngngö nup hanakten cha min. w22.01 pěch 4 përa 7, 9

Ngòh tarik tö aṙē-ělōn, hameuktö neūkölōn re anga-aṅ tö holre nö hayööken ò yěn kihngen. Sā inlahen ök aṅ Samaria im inchō-oṙô Yēsū, ök mahameuktö neūkölōn re nö ik Yahūti tö kilöönö tö yik tötūmu. Aheūkölōn anga-aṅ nö meuk kanihngen ök Yahuti, lökten nö hayööken ò. (Lūk. 10:29-37) Haköpten hī ngih istori tö ngam tövai tinrīken ngam Tēv—ngam neūkölōn. Örheuheū anga-aṅ nö hameuktö neūkölōnre tö hī pön hāngenlōn tö hī. Aṙēlö holre an inrē ngòh tarik tö īnu tö neūkölōn. Mihôiṅ anga-aṅ nö ṙa-alre nö chökṙen ngam tövaich. Yāvē an töngatī inlahen nö hameuktö neūkölōn re nö in hī. “Hö-ö an nö asā nup tökööl hī nö lök alaha hī,” tö ṙô ngam kamūich Salmai. (Sal. 103:10) Yěn chökṙen yip tö fāluṙen pöri ang Yāvē, ngaich inmeuktö neūkölōn ò angū-ö tö yip tö fāluṙen. w21.10 pěch 8 përa 1-2

Höng in yip tarik re ang Yāvē nö hameuktö ngam töt chanuhuvṙen hanangenlōn re. Ngatī ṙô nak nā Rācha Tāvit nā pròfět Tanīěl. Ngöṙô Tāvit: “Iṙūhen tī man tö ngam hanangen neūkölōn meh in cha yip tö-akahakūö tö meh.” “Ngam neūkölōn ngam Mā Tēv pöri nö töng öt chanūhuvṙen, nö in cha yip tö pa-ekūö tö Ò.” Ngaich ngö ṙô ang Tanīěl: “Ō Mā [Yāvē] . . . tököp inrē tö hanāngenlōn in cha yip töhāngenlōn tö ò mahaköp në chööngö ò inrē.” (Sal. 36:10; 103:17; Tan. 9:4) In e mikahlōn ayī-ö tö Yāvē nö ṙën nö hangenlōn tö më tarik re, pò cha nö akahakūö tö ò, pa-ekūö tö ò, hāngenlōn tö ò, hang minë chööngö ò inrē. Pòrô hē e ayī-ö öl im kanô-en, sön ang Yāvē nö hāngenlōn tö hī. Hameuktöm töt chanuhuvṙen hanangenlōn re pöri ngaich anga-aṅ tö hī kūö hī öi löklōn ò.—Sal. 104:14. w21.11 pěch 4 përa 8-9

Pòrô öp sitih inlahen, köpölōn ayī-ö tö ngam ṙô Yēsū. Pōyen tarik ṙamatö ellōn re nö in yip tökiröng tö akahka mahaköphöti nö el minë chūök vinë-ekūötēv. Uroh mihôiṅ nö ha-ööinyö cha. Havah nup līpöre cha, ngaich kētö tö pōyen tōnesön inrē nö in cha. Hang nup töng sitih ṙô cha inrē cha-a. Pòrô öre Yēsū nö yih nö ihôi cha öt rēhēn min cha-a nö hōḵ nö hangṙô ò. Öt ngatī pöri yip lamöklōn ngam Tēv, pön höng hangṙô Yāvē cha-a mötlö tö tarik. Milēḵṙen cha-a tö yip töhalēnlöng nö mahayöngken cha, köpölōn pöri inrē tö ngam ṙô Yēsū nö ngö ṙô: “Ṙòkhöre yī-ö öi holre.” (Mët. 23:8-10) Hö-ö in ayī-ö ha-öiny tarik. Pòrö nö yōm kūö tinlööken hēk yip mākūö ngih panam inrē. Öt rēhēn ayī-ö öi asinkö nup lōn cha. Öt atöltuṙen pöri ayī-ö öt rēhēn öi löök lōn ngih panam. Pöi harikngöre tö yip ameūkköre nö Kristīön.—Yôh. 18:36. w21.10 pěch 20 përa 6-7

Yēḵ hī öi hòṅ köpsören öi hòṅ het, ngaich hòṅ chumkūöṙen ayī-ö nöt kô nö tarōli ngam innôlö hī öi in Yāvē tö kūö tī tarik hēk nup chehen inrē. Lökten ayī-ö öi hòṅ köplōn tö hī ötkô öi kēken nup sahō Yāvē, pòn mihôiṅ min nö chōchngöre ngam minë-eny Yāvē. (Lēv. 19:12; Isa. 57:15) Hòṅ asūp inlahen yik Israel nö hameuktöre nö hō-en Yāvē nö Tēv cha. Ngö ṙô ngam La-en Lēvī 18:4: “Ngam aṅ in Chu inkaha fālen lahök yīö min, minë chööngö Chu inrē haköp yīö, öi lök in u; Chu-ö Chin [Yāvē] Tēv meh.” Ōt nun minë chööngö in ngam 19 miṙūlö tö vënyu. Tö sā ṙô minë tö 5-8, 21, 22 miröökö nö vënyö minë chööngö kinëtö töṙeūla nö tökētu. Hòṅ löngö inlahen tī yip aṅ Isarel nö kētö tökētu, pò cha min nö ‘miyë elmat tö minë töhet aṅ in ngam Tēv.’ Yēḵ hī öi vë-ekūö në miröökö ngaich ṙūhlöng alaha ayī-ö öi haṙamlōn Yāvē hēk kē-ěkūö ò inrē tö nöinyö.—Hep. 13:15. w21.12 pěch 5-6 përa 14-15

Yēḵ nā an töfömtöre ön pīhöre, ngaich mihôiṅ nā-a ön kē haköp re in yip holmaneuk hī, ma hameuktö ṙinatö-ellōn re nö in Yāvē. Tö sā yik Kristīös pamīhöre tö pōyen nö maṙò-òten nö keuheūttö ṙētakre nö i linöökö lōn ngam Tēv. Mihôiṅ më-eṅ öm kē inlēnö re öm in cha. Angū-ö ngih inlahen meh hameuktöre öm ṙatö-ellōnre öm in Yāvē. (Inch. 22:17, 19) Köplōn, Inlōnti ön ngam pinīhö nö ṙamā-ang in Yāvē. (Mët. 19:5, 6) Lōnu anga-aṅ tö hī öi ṙamölōn öi im pīnihö. Lökten man chumkūöṙen tö inlahen tī re töm kinē-ëkūö re. Mihôiṅ öm ṙūöhlö inlahen re i linöökö lōn Yāvē? Vë-ekūötēv më-eṅ öm vë-ekūö Yāvē. ngaich chöh minë mahayööken meh min ṙô imat ngam Paipöl, hō yěm halēnö tö Yāvē. Yēḵ meh min öm kētö ṙētakre i linöökö lōn Yāvē, öt löktu nā-a min ön öt ṙamalōn im pīnihö tö nā! w21.11 pěch 19 përa 16, 18

Öt yahlö mat ang Yāköp töre. Öt ngö mufē anga-aṅ töre, kahëm Yēsū chin chū-ö hēk pōyen inrē minë la-en chu lökten öich mööḵlö tö më tahëng. Ngöṙô pöri anga-aṅ tö yik prötör sistör re “kahōlö.” (Yāk. 1:16, 19; 2:5) Öt vë-eny re anga-aṅ nö töhet hēk töt hěngö vanaichö inrē. Haköp hī in e: Köpölōn tö hī ṙôkhöre tö vaichköre ṙen. Yēḵ hī min hameuktöre ikūö öp kahë istötī re öi töt hēngö vanaichö, ngaich mihôiṅ min anga-aṅ nö haṙivlōn, pön ötkô min anga-aṅ tölōn re nö sā hī nö hang minë chööngö ngam Tēv. Yēḵ hī pöri halööknyôre tö hī ṙung hēkpī kihngen hang nup chööngö ngam Tēv, hayööken hī pöri ngam Tēv hē e, ngaich ngönlöre min anga-aṅ yěn hāngö e, pön akahakūö min anga-aṅ tö re nö mihôiṅ nö löklōn Yāvē. w22.01 pěch 11-12 përa 13-14

Asā ṙòken mikahkūö hī min tö Yēsū ngaich ngatī inlahen min ayī-ö in nup mufē re hēk mihôiṅ min inrē öi sā inlahen ò. (Hep. 1:3) Mihôiṅ ayī-ö ngö mufē, ‘hö-ö chin kô öich asīnken Yēsū pön tö töhet anga-aṅ ngaich töthet chū-ö.’ Yěi ngatī lōn pöri ngaich haköplōn re më-eṅ tö minë tö lūöi ṙô. Raneh, Pò meh öm tö sā vinī-i nā Yāvē hēk tö Yēsū inrē. Lökten yēḵ meh öm ma-ainyre öm hameuktö minë tövai tinrīken sā inlahen cha min më-eṅ. (Ran. 1:26) Innëtö, Kē-ěkūö meh ang Yāvē tö ngam töhet kumlēḵ, ngam tökalēḵ kūö tökalēḵ ikūö ngih panam. Löktö in e inyööken min më-eṅ öm teungten inup la-enre, nup töt kô nö kanò-ò meh ṙung. Linūöiyö, Hö-ö an Yāvē nö kuiyulōn tö meh öm löktö kūö ing töngamuh öm hameukten minë ṙòng ngam töhet fanöinylö. Pön halēn ngö ngam tö hěng köiny samyeūheu ang-aṅ ip yamih ṙētak, ip hē hī min öi vīlöng öi het. (Inm. 20:1-3) Lōnu pöri ang Yāvē tö hī öi pītnyöre asīnkö mufē Yēsū ngaich yē hī pöri kihngen, havëkö inyööken re ayī-ö in Yāvē. w22.03 pěch 9 përa 5-6

Hö-ö in höng kūö vinë-ekūötv öi ngönö innôlö in Yāvē. Tön hòṅ haköpmat ngam Paipöl inrē ayī-ö hēnghöre chuh el mīting inrē. Hòṅ sitih inlahen öi rih yēḵ hī sōḵ halo-oiṙen yěi haköpmat ngam Paipöl hēk el mīting inrē? Hòṅ hatönö re ayī-ö, ‘asuh nup tömihôiṅ nö lōngen tī min tö chu?’ Lōngen öich min yěn ōt öp mö mesēchö chu hēk fūnö chu yěich ṙònghöichṙen haköp? Yěm öt chumkūöṙen haköp hēk mīting inrē ngaich mihôiṅ öm havëkö inyööken re in ngam Tēv. Kihngen in hangihtöre yěi īnu tö nup kanihngen re, sön pöri öi hòṅ pītnyöre chumkūöṙen hangihtöre. Vë-ekūö ngam Tēv Yāvē öm havëkö lanāmö, ngaich ngam lanāmö ngam Tēv imin nö aṅtö nômö me.—Filip. 4:6, 7. w22.01 pěch 29-30 përa 12-14

Rācha Usīya inrē töt hamang inlēnö. Kuhěthötre anga-aṅ nö chuh el ök tempöl nö föng tötahūsa. Ngö ṙô yik kūönṙô Yāvē: ‘Öt la-en meh an Usiyā öm föng tötahūsa i kūö Yāvē pön la-en yip kūönṙô.’ Sitih inlahen ngach Usiya? Yē Usiyā öre nö inu tö inyāchngö kunyi-inyre öre anga-aṅ nö ṙa-ang in e, öthō Yāvē nöt aṙēlen ò. “Tainy ngach Usiyā nö in yip kūönṙô.” Kūö yòh anga-aṅ nöt hang inlēnöre? Lohten anga-aṅ nö ngö lōn rācha chin chu-ö, öp töng yòh la-en chu. Vach pöri ngam mufē ò nö in Yāvē. Kūö ngam inkeūlenre Usiyā nö yihivö tö yeūnyö “Söl kinpahare anga-aṅ nö yeūnyu.” (2 Kin. 26:16-21) Asuh öp haköp hī, yē nup töng sitih la-en hī yē hi min öt hang nup inlēnöre ṙāma-ang mat ngam Paipöl, öthō-en hī min Yāvē. w22.02 pěch 9 përa 7

Ngòh tarik tö īnu tö ngam hötṙeh tinrīken, ötlöng minë mufē ò hēk minë la-en ò inrē. (Kòl. 3:9) Pi-a anga-aṅ nöng ngamëichköre, tö veutö tanainyö inrē. Öt ameū kinë-ekūöre hēk tö tāilölōn inrē. Töyal inrē anga-aṅ nö meuk minë tötlöng nyat hēk sinemā inrē famël tarik. Rö-ö pön ōt nup tövai tinrīken ò, akahakūö inrē anga-aṅ tö minë la-en re nö vaich. Öt kē-ělkūö alaha re pöri anga-aṅ nö halööktit re. (Kal. 5:19-21; 2 Tim. 3:2-5) Ṙòkhöre ayī-ö öi töt het. Lökten öi kihngen öi kēngö minë tötlöng mufē elkuilōn re. Ṙōheuh öi fēḵ unôich tö nup ṙô re hēk tö nup la-en re inrē. (Yar. 17:9; Yāk. 3:2) Yēḵ hī pöri ngaich ṙòngngen ngam hötṙeh tinrīken re, ngaich öt köpsören ayī-ö sā ngam inlahen re ik urěh, pöi heuveū ngaich öi ṙap minë töchōich mufē re ngaich ṙūöhöngre inrē tö minë tötlöng la-en.—Isa. 55:7. w22.03 pěch 3 përa 4-5

Yī-ö minṙöinylen chumkūöṙen yin tö më tövayö tinrīken prötör sistör. Ṙòkhöre in el ngam māṅ öi töthet, ōt pöri minë tövai tinrīken. Kô-en ön ngam inlahen më minṙöinylen nö halööktit minë mufē më prötör sistör. Hòṅ sā Pôl pöri cha-a nö havai mufē re nö in më prötör sistör. Ötkô cha-a nö yahlö mat nö ngëichkö minë törahëichyen vanaichö cha. Hòṅ chumkūöṙen inrē ayī-ö tö cha nö hāngenlōn tö Yāvē lökten cha-a nö ma-anyre nö halööktit re nö i linökölōn ò. Yēḵ më minṙöinylen nö havai mufē re nö in më prötör sistör ngaich sīöp min ngam hanangenlōn töm hinëngö nö el ngam māṅ. Köpölōn öt yaha lōn an Yāvē nö in hī pò hī öi töng öthet. Höng ngam kuilōn ò tö hī öi chiplö öi in ò, öi keuheūtngö minë la-en kinë-ekūö re. (1 Kòr. 4:2) Yěi ma-anyre min in minë la-en re ngaich mihôiṅ ayī-ö ṙinātu-ellōn tö Yāvē min nö ṙamlōn nö in hī. Pön rö-ö anga-aṅ nö “nö tövaichngö tö la-en yīö ngam hanāngenlōn inrē, hameuktö yīö lā i mine-eny Ò, tī yīö meukṙen yip töhet.”—Hep. 6:10. w22.03 pěch 31 përa 19, 21