Mē

Unôichrit Yôhan nö meuk më tö 1,44,000, meuk më “tömaṙôngö” hēk anga-aṅ töt kanṙeuken tarik. Achiö öich cha-a më “tömaṙôngö” tarik? Ngöṙô ang Yôhan, “Cha-a yin vē ṙamā-ang el ök yöng kanihngen, ngaich cha-a nö söich minë tö aṙū-uti inyutre nö i mahām ngam pöököre.” (Inm. 7:14) Unôichrit inlahen më “tömaṙôngö” min töt kanṙeuken tarik nö ṙā-ang el ngam tökiröng kanihngen, örheūheu min cha-a nö aṅ nö ikūö ngih panam ngaich teūngen min tö minë töpōyen inkôlò re. (Sal. 37:9-11, 27-29; Inch. 2:21, 22; Inm. 7:16, 17) Kô-òren öi fē-a, yěn teungta ṙô min ngam Inmeukhömat tö 7 mirulö, ngaich sitih inlahen lōn min ayī-ö? Kô-en min nö kirööngen ngam ṙanamlōn hī, pòrô öi tö maheūṅkku el halīöngö hēk ikūö ngih panam inrē. Ṙòkhöre min ayī-ö öi ṙamlōn pô hī öi i rītö Yāvē. w22.05 pěch 16 përa 6-7

Hòṅ īnu ayī-ö tö ngam mikah yēḵ hī hòṅ löngö atöllö. Ik sā meh lohten öm kihngen atöllö lōnre ngaich pi-a më-eṅ öm havëkö kūö Yāvē tö mikahelmat re. (Yāk. 1:5) Ngö ṙô ang rācha Sòlòmön, “Töṙāmölōn ön ngòh tarik tökôtökūö tö mikah, ngòh tarik inrē kamëḵ mikah elmat. Pōi ṙāi an tö yanöṅtö, ötkô nup lōn meh inrē nö hanṙongten nö in e.” (Inch. 3:13, 15) Hö-ö pöri ang Sòlòmön nö ngö ṙö tö hī öi kēḵ mikah öi i tarik, pön hōten hī anga-aṅ öi kēḵ mikah re öi in ngam Tēv Yāvē. Mihôiṅ hòng rih ngam mikah ngam Tēv nö hayööken hī öi la-al nup kanihngenre? Heūṅ mihôiṅ ön. Nët tak nan mina tarik tö eūnyu mikah nö imat ngam Paipöl. Ngam raneh ang Sòlòmön. Ngö kinūichngö inlahen anga-aṅ “kētö mikah Sòlòmön ngam Tēv” kētö mikah elmat ò inrē. (1 Rā. 4:29) Innëtö hēk ang Yēsū. Öl nö hěngtak tarik tö sāta mikah nö in ò. (Mët. 12:42) Urěhngöre inrē ngam inlahen ineūkö ò. “Ngaich ngam töhet fanöinylö ngam Tēv nö teungtöre nö ikui ò, lökten anga-aṅ nö aṅhav in tö ngam mikah, mikah elmat inrē.” (Isa. 11:2) Yēḵ hī min haköp minë inlēnö kahëtö mina tö nët tak tarik hēnghöre asīnken u inrē. Ngaich mihôiṅ min ayī-ö öi kaheūkö öi tö aṅhav in tö ngam mikah. w22.05 pěch 20 përa 1-2

Öp töng yòh ṙēḵti hī öi kē minë chö-öny re. Lökten pòrô ngaich yěi tö ṙēḵtivö, sön ayī-ö mihôiṅ teungten in minë tö hòṅ kēkaṙen la-en öi teungen tö u. Hěngtak öp i kanānö hī tö Pevörlī minë-eny. Tö sat anāi taneūi samyeūheu ngaich tö vahavö inrē anga-aṅ ötkô anga-aṅ nö halēnyköre. Kalēḵ-e lōn pöri anga-aṅ nö hòṅ kētöre nö in ngam kömpēn nö in ngam memorīöl. Lökten anga-aṅ nö kē minë tö rahëichyën chö-öny re. Ik sā ò nö teungten nö kē mië chö-öny re ngaich teungen anga-aṅ tö ṙānamlōn re. Sīöplöre kuilōn yip tahëng nö meuk kumlēḵ alaha ò nö ahānga. Kô-en yip tö ṙēḵtivö prötör sistör nö öt uroh nö teungten nö in minë la-en re, sön pöri Yāvē nö milēḵṙen tö minë la-en cha. (Sal. 71:17) Mihôiṅ in öi teungten in minë tö hòṅ kēkaren la-en hī. Ngaich hòṅ asīöp minë tinrīken ayī-ö tö mihôiṅ nö ṙamölōn tī tö Yāvē. Ngaich hòṅ haṙunöre ayī-ö in minë heuneū-en la-en, hòṅ hī öi teungten öi in nup la-en ngam söngkötön Yāvē. Hòṅ fē-a inrē ayī-ö öi sitih inlahen mihôiṅ hayööken më prötör sistör re. Yēḵ min öi natī inlahen kē-ěkūö hī min Yāvē tö inkòlô ngaich ‘meukkö min minë la-en hī nö ikūö taṙòkhöre.’—1 Tim. 4:15. w22.04 pěch 27 përa 18-19

Sitih inlahen pöri min më-eṅ, yěm pòrô ngaich öm ma-any re öm haköptö ngam kūön re tö inlahen Yāvē sön pöri ngam kūön meh nö ngö ṙô, hö-ö chin hòṅ löklōn Yāvē? Um haṙivlōn, um rěhěn afukkui re tö e nö vanaichö re. Uh inrē öm ngö lōn, sön chin lohten ötlöngö tī halēn ngam kūön re. Pöi ṙòkhöre öi tö halöngtuṙen tö Yāvē öi kahngenre atöllö lōn re tö inlahen re yěi hòṅ löklōn ò hēk yěi hö-ö. Uh më-eṅ haṙivlōn. Meūkkö inlahen ò pöri nö havantöre nö in Yāvē. Mihôiṅ öm fēkö inlahen ngam kūön töchatngen. (Lūk. 15:11-19, 22-24) Marôvat ök sin ngaich anga-aṅ ngaich kēken nuk tötlöng la-en, havantöre pöri ngaich anga-aṅ im unôich.Yī-ö inyööngö, tökiröng ön ngam la-en tö hakeunlöng nö el ranôṙö yīö, ngam inköptö inlahen Yāvē in më yamih tumkölchap tarik. (Sal. 78:4-6) Hö-ö ön nö kūöṅnö ngam la-en yī-ö. Pöi hòṅ ma-anyre in e, eūḵ minë lumrāḵ yīö in haköptö më kūönre nö hāngenlōn tö Yāvē hang minë chööngö ò inrē. Mihôiṅ më-eṅ ṙinātu-ellōn tö Yāvē nö ṙamlōn tö minë la-en meh.—Efi. 6:4. w22.05 pěch 30-31 përa 16-18

Yēḵ hī öi ṙòkhöre öi in öp töng tölngöre öi sā lōn Yāvē öi la-envö ngaich sīöp min ngam hinëngö hēk tö ngam lanāmö nö el ngam māṅ. Ngëichkö inchōḵkūö re in, in yik raneh senchurī Kristīön. Pōyen nuk töṙōlkangen inlōnti cha, heuneu-en la-en cha inrē. (1 Kòr. 12:4, 7-11) Hö-ö pöri angū-ö nö tö ngö manah tö cha nö im kinsalö pön hareuskö alaha cha ang Pôl nö hōten cha nö hameuktö ngam heuneu-en re nö kū-ö urěh nö im alaha Kristu hēk ngön inrē nö el ngam māṅ. Sā ṙô Pôl. “Lökngörit in ò ön ngam alaha nö lööken.” (Efi. 4:1-3, 11, 12) Pōyen yip Kristīön hamang ngih inlēnö lökten ngam lanāmö töm hinëngö nö el ngam māṅ nö köp. Ngatī maheuṅk in inrē öi el në māṅ töngamuh. Uh yin öi asīntöre in yip tahëng. Hòṅ haköp pöri ayī-ö in Yēsū hēk sā inlahen ò öi hameukten minë tövai tinrīken. Nup töng la-en meh kahëken meh, keuheūttö ellōn re me-eṅ kētöre. ‘Ngaich öthō Yāvē min nö vaichkngö tö minë la-en meh.’ (Hep. 6:10) Rö-ö min öm höng më-eṅ tö ṙamlōn pön Yāvē min inrē tö ṙamlōn nö meuk minë la-en meh. w22.04 pěch 14 përa 15-16

Ötkô in öi yahlö mufē tö ngòh tarik tö fāluṙen yěn aṙēlöng hēk yěn hö-ö pön höng eltī Yāvē ngam inṙē-ěl. Tö ngö manah hòng ngaich angū-ö tö hī hòng ṙāngen re? Pi-a lohten öp tarik nö fāluṙen nö in meh hēk mumṙivngölōn meh inrē. Yěn pòrô öp tarik nö havëkö inṙē-ěl re nö in meh hēk hö-ö, sön më-eṅ öm löktö in re tī öm aṙēlen ò. Pòn el tī meh ngam inlahen meh yěm hòṅ köptī tö ngam lanīnö re hēk yěm hòṅ aṙēlen ò. Pöm öt lööṙen öm havaichngöre tö öp fālen ò. Vënyu nang in ngam Chūökamahati-E, Septempör 15, 1994. Ngö ṙô angū-ö: “Yēḵ meh aṙēlö öp tarik, ngaich rö-ö angū-ö nö tö ngö manah tö meh om höng höhölōn tö ngam fālen ò, pöm höng ṙālen e öm höng eltī Yāvē. Lökten ayī-ö öi ṙatö-ellōnre tö Yāvē nö tö heuveū-en nö Kamhôka. Ngaich anga-aṅ min in nup yamih ṙētak nö halööktit u.” w22.06 pěch 9 përa 6-7

Kilēḵngôre ang Yāvē tö yip pumnamö tarik, miyööngö, tum mi-ëlô min nö hěngkang chūök nö ha-öönyan in në ṙētak hī töngamuh. Teung töngamuh ngih kinlēḵngô Yāvē nö meūkö tö hī. “Tökiröng kiteūm” ngö ṙô an ngam Paipöl tö më tarik. (Inm. 7:9, 10) In cha më aṅ ngam kiteūm, ōt më tarik, yöngnyīö, hēk nyīö inrē. Më tö ṙōlkangen ëlô, pumnāmö, hēk tinrīken inrē. Sön cha-a nöng sā tö hěng mikūönö, pön köp ngam hanangenlōn tö ngam hinëngö nö ihôi cha. (Sal. 133:1; Yôh. 10:16) Kalēḵ alaha yin nö ahangkö ngam tölöök inhānga, nö vë-eny ngam maheūṅkkö re nö in më tarik tö inlahen ngam Tēv min ngaich nö kēngö në kanihngen hī. (Mët. 28:19, 20; Inm. 14:6, 7; 22:17) Tö pōiṙāi an ngam mineūka aṅ in meh, yēḵ meh öm aṅ ngam tökiröng kiteūm, hökken e man tön öt hō an min nö öt teung. Hōten hī an ngam Sī-ö öi löhlö tī tö ngam maheūṅkkö re, hòṅ hī öi ngö lōn tö Yāvē nö töt mahateung nup ṙô re. Yēḵ hī min öi löhlö tī tö ngam maheūṅkkö re, ngaich mihôiṅ min nö yih ngam öt kumlē-en nö in hī, ngaich ṙāngenre min öi löklōn Yāvē. w22.06 pěch 20-21 përa 2-3

Ngam maheūṅkkö mahaköpken hī öi la-al nup kanihngen re. Öt yahlö mufē inrē ayī-ö tö minë kanihngenre pō hī öi akahakūö tö ngam chanôichö min nö ṙāḵtöre, vë-eny nang hī inrē ang Yēsū tö hī min öi ötlēḵaṙen. (Yôh. 15:20) Lökten yēk hī min öi chumkūöṙen tö ngam maheūṅkköre ngaich öthō min ngam ṙinātö-ellōn hī nö kannyichken ngaich yěn yih min minë kanihngen iṙūöhen min ayī-ö öi löklōn Yāvē. Akahakūö ang Yēsū tö ò min nö ötlēḵkaṙen nö fēli. Kūö ngam maheūṅkköre pöri anga-aṅ nö chiplö. Ik 33 C.E., ik Pentĕkòstē ang Pītör nö kētö minkahten nö vē-eny inlahen Yēsū nö in minë tö eūka nö in ngam līpöre Salmai, kūichi minë tö eūka nö in e akahakūö ayī-ö tö ngam ṙinātö-ellōn Yēsū haköpken e anga-aṅ inrē, ngö mufē anga-aṅ: “Pò Meh öt ṙāngö ngih nômö Chu nö el Chūök Tökapah; ötrēhĕn Öm halöngngen ngam Töhet Meh nö meuk chinhūngö. Mikahtölōn Chu Man ngaich tö ngam talöökö nômö; hatööḵngen Chu min inrē tö ṙanāmölōn i kūö Meh.” (Inl. 2:25-28; Sal. 16:8-11) Ngön ngam maheūṅkkö Yēsū tö ò min nö öthō nö öt hachohlöng tö Yāvē ngaich hēk min nö in ò nö holṙen ò nö el halīöngö.—Hep. 12:2, 3. w22.10 pěch 25 përa 4-5

Hěngheuh nā Yāköp, nā Yôhan nö tölṙô ṙô ök yöngre kikānö nö havëkö chūök cha tö minā-aṅ nö el ngam Pūlngö Yēsū. (Mët. 20:20, 21) Inmeuktö nā Yāköp nā Yôhan angū-ö nö īnu tö ngam tanāilölōn, hòṅ kiröng inrē cha-a tö yip tahëng. (Inch. 16:18) Öt höng nā Yāköp nā Yôhan hē e mahameuktöre nö īnu tö minë öt kumlēḵ-enre. Pöi meuk inlahen yik hol cha tanīnöṙô inrē, hē cha nö akahalōn tö inlahen cha. Ngö ṙô an ngam Paipöl: “Ngaich hē yik tö söm tak nö hāngö e, kunyahaṅlōn cha-a ngaich nö i nak tönët tak tö kahëmre.” (Mët. 20:24) Mihôiṅ in asehkūöre tö inlahen hē Yāköp, Yôhan tö yik hol cha inrē tanīnöṙô, nö la-al kūöre lohten. Sitih inlahen ngaich ang Yēsū hē ò nö meuk inlahen cha? Mihôiṅ öre anga-aṅ nö tainy nö ik yik tanīnöṙô. Öt rēhěn anga-aṅ nö ngö ṙô nö in cha, hòṅ chöh yip tahëng chin hēk haköptöre yip tö yāchö ellōn, yip tökô-en hanangenlōn inrē tö höö. Öt kësen ang Yēsū nö in cha. Höng möi pöri nö in cha, hangenlōn inrē tö cha. Pön akahakūö anga-aṅ tö minë ellōn cha nö het. (Mët. 20:25-28) Sön ang Yēsū nö hangenlōn tö cha. w23.03 pěch 28-29 përa 10-13

Pōyen nup ngaich la-en kahëken meh. Lohten man öm tö samyeūheuv öm haköp mat ngam Paipöl, ngaich in e ṙinatö-ellōn më-eṅ tö ngam Paipöl nö kahūich ngam Tēv. Ngaich löktö in e më-eṅ öm akahakūö tö Yāvē ngaich hangenlōn inrē tö ò. Ngaich rūöhöl re ngam hanangenlōn meh nö in Yāvē, ngaich kētöre min më-eṅ öm kē ngam vinôkö hēk vītöre inrē öm tarik ò. Kirööngen ṙanamlōn in öi in meh. Urěhēkūö meh kē ngam vinôkö ngaich pōyen nup yamih kanihngen nö lākūö meh lohten, töp lökten meh öm kihngen chiplö i linöökö lōn Yāvē. Yēḵ meh pöri ngaich kiröng im ṙinātö-ellōn ngaich pōyen min nup yamih kanihngen nö lākūö meh. Pön lōnu ngam Sī-ö tö meh öm rūöhöng re tö Yāvē, sōten meh inrē hangenlōn tö ò hēk söten meh inrē löklōn ò. (Efi. 4:14) Pòrô öp tö sitih um halöng ngenre ngatī inlahen. Ik sā meh pöri kētöre löklōn Yāvē, ngaich kilēḵngôre më-eṅ öm in ò töre öm söl manā-aṅ öm chiplö i linöökö lōn ò. Sitih inlahen pöri më-eṅ hateungngö ngam ṙô re? Hòṅ ma-ainyre man kūö urěh öm asīöp ngam inlahen re töteung Kristīön.—Hep. 6:1. w22.08 pěch 2 përa 1-2

Hòṅ chumkūöṙen yin më el ngam minkūönö tö minë inlahen ṙô cha yěn ṙô-òvö nöng tölngö in cha anū-ö. Pi-a lohten nap pamīhöre nö tö örheūheu ngam inlahen cha nö hayīölngö nup inlahen re. Ngaich yēḵ cha pöri nö hōluvö ngaich ötkô cha-a nö vë-eny nö ikūö cha. Pön mihôiṅ min nö aṙē-ěvö öp töpīhövö. Yēḵ minā pamīhöre nö hāngenlōn tö höö öthō min cha-a nö mumṙēngen höö nö inup ṙô re nö lökten cha nö haṙivlōn. (Efi. 5:33) Ngatī inlahen inrē nö lōnu më ṙālö nö hòṅ milēḵṙen tö höö. Lökten nö hòṅ chumkūöṙen mina inyööngö tö inlahen cha nö ötkô nö vë-eny nup vanaichö re nö i tahëng. (Kòl. 3:21) Ngaich yip tö kūönu, ngaich hòṅ haköptö më kūn re cha-a nö ötkô nö kakken nup inlahen yip holre nö in yip tahëng hòṅ öp hol cha-a nö öt aṙē-ěvö. Yēḵ yip aṅ ngam mikūönö nöng tölngö in re tī tö nup ṙô re, ngaich vai min ngam innôlö nö ihôi cha. w22.09 pěch 10 përa 9

Vë-ekūö Yōp ngaich ang Yāvē. Löktö in minë tö ṙōlkangen vahīlöre töṙeūla ang Yāvē nö fēlen Yōp tö ṙôken ngam mikah re hēk ngam kumlēḵ re inrē. Tö ò inrē nö tö chumkūöṙen tö minë vahīṙen re. (Yōp 38:1, 2; 39:9, 13, 19, 27; 40:15; 41:1, 2) Löktö in Ĕlihū tī ang Yāvē nö hareuskö alaha Yōp hēk hangönkö alaha ò inrē. Kētö ṙinātö-ellōn Yōp ang Ĕlihū tö yip tarik Yāvē yěn köp nö i linökölōn ò ngaich kētö inkôlò cha min ang Yāvē. Löktö in Ĕlihū tī inrē ang Yāvē nö halööktö mufē Yōp. Ngöṙô inrē ang Ĕlihū nö in Yōp tö ò nö un yahlö mufē tö re. Hōten ò inrē nö köplōn töre nö kūöṅnö nö ikūö ngam vamīlö në taṙòkhöre ikūö ngih panam. Kě-ěkūö Yōp ang Yāvē töp töhěng la-en. Tölṙô ò anga-aṅ nö vë-elkui yip tö lūöi tak holre. (Yōp 42:8-10) Sitih inlahen tī pöri ang Yāvē nö hayööken hī yěi kihngen ing töngamuh? Öt sā Yōp in ayī-ö öi vë-evkūö töngamuh tö Yāvē. Löktö im Paipöl ṙô pöri anga-aṅ nö vë-ekūö hī.—Rōm. 15:4. w22.08 pěch 11 përa 10-11

Ngatī sanöklöre kanihngen yik misī el ök māṅ i Rōm. Pön ōt yik töt Yahūti Kristīön, ngaich ngam chööngö Môsös nö öt kēkaṙen nö ik hē e. Lökten nuk nyā-aṅkūö cha nö tölöök. (Māk. 7:19) Lökten yik Yahūti Kristīön nö ṙòkhöre kāha, ngaich ōt yik Yahūti Kristīön töt hòṅ hang ngam chööngö. Lökten ngaich nö pasū ngam lanāmö nö ihôi më holmaneuk cha. Akahakūö pöri ang Pôl tö në ngatī lāinyngen nö mihôiṅ nö fukngö tī tö cha. Ngaich mihôiṅ nö yih ngam tinṙōlen nö ihôi më holmaneuk cha nö el ngam māṅ. Lökten anga-aṅ nö kētö inlēnö më holmaneukre. Lōnu ang Pôl tö ngam lanāmö nö el ngam māṅ. (Rōm. 14:19, 20) Lökten anga-aṅ nö halöktö tinrīkenre, hòṅ yik hol ò nö öt fukngö. (1 Kòr. 9:19-22) Mihôiṅ inrē ayī-ö ngatī inlahen, yěn tahëngö mufē öp hol hī tö öp mufē hī. Yēḵ e pöri nö öt filal chööngö aṅmat ngam Paipöl, ngaich ötkô ayī-ö öi höng köp öi in minë ṙô re. In e min ayī-ö öi vī ngam lanāmö. w22.08 pěch 22 përa 7

Yēḵ hī min öi ṙūöhöl inlahenre öi i linökölōn Yāvē, ngaich kēkö minë la-en tö hòṅ kēkaṙen, ngaich öthō min ayī-ö öi öt ma-anyre öi in u. Ngaich ngatī inlahen min ayī-ö öi kēken minë tölöök la-en öi ma-anyre, ngaich sā famchūrit ngam lanöökö min ayī-ö. Yēḵ hī öi iṙūöhen öi i linökölōn ngam Tēv Yāvē, ngaich öthō min anga-aṅ nö öt hayööken hī. Ngaich mihôiṅ min öi hang minë chööngö ò kahëtö ò nö in hī. (Sal. 84:5, 7) Ötkô in öi ngö mufē tö minë inchöngten hī kahëtö Yāvē nö lumngan anū-ö hēk kihngen inrē öi hāngö u. (1 Yôh. 5:3) Pöi hòṅ chumkūöṙen ayī-ö tö hī yēḵ hī öi örheūheu hang minë chööngö ò, ngaich lanaklö hī anū-ö. Köplōn öm tö minë kahëtö ngam Tēv aṅtī hī öi kiyung, minë vahënyö Pôl? (Efi. 6:14-18) In e ngam töhěng chehen hī ngam “lanak elngòh tö ngam lanöökö,” tö ngö manah tö hī öi akahakūö tö minë tölöng tötlöng nö inchöngten hī tö Yāvē. Inuk mā misī ṙētak yik kumyung, yēḵ ngòh kumyung nö īnu tö ngam lanak elngòh. Ngaich mihôiṅ anga-aṅ nö laklöre tö tī yip lama-alre. Ngatī inlahen min ayī-ö yēḵ hī öi chumhenlöre tö ngam lanaklöre. Tö ngö manah tö minë inchöngten hī kahëtö Yāvē yēḵ hī öi hāngö u, ngaich mihôiṅ min ayī-ö laklöre tö minë tī ngam Sī-ö. Lökten ayī-ö hòṅ örheūheu hayutlöre tö minë lanaklöre.—Inch. 4:23. w22.08 pěch 29 përa 13-14

Minë tövai inlēnö tökūichhötvö tö ngam Tēv misī nö imat ngam Paipöl nö yöölen tī tö yik tarik mahayönglen re nö in ò. Nö sitih inlahen? Pön chumkūöṙen ang Yāvē nö halēnlö insīnkö kinūichö ngam Paipöl. Höng sā hī yik misī tarik nö töthet yik ma-asīnkö kinūichö ngam Paipöl, lökten yik nö chumkūöṙen nö asīnkö nuk kinūichö e hòṅ cha nö öt vāichö tī. Kò-òren hang ṙô ök ihih tö hěngtak kamūich, nö ngö ṙô, “Öt hěng līpöre tö sā ngam hötṙeh kinlēḵngô nö töt haṙī-ingre kinūichö nö sölta nö in hī.” Lökten öi mihôiṅ ṙātö-ellōnre tö minë haköpre aṅmat ngam Paipöl töngamuh tö u nö anū-ö tinöölö ṙô yik kamūich tö Yāvē, hö-ö anū-ö nö haṙī-ingre. Ṙòkhöre nup “tölöök inlōnti, nup töteung inlōnti inrē, nö ṙamā-ang in Yāvē.” (Yāk. 1:17) Ōt hòng kamë-ekūö meh tö töngatī inlōnti kūö meh öm lōnu tö töngatī? Inmeuktö öp tarik angū-ö nö akahakūö tö meh tö nup kuilōn meh inrē. Töhěng an inrē ngam Paipöl nö inlōnti. Yěi vë-ekūö e min ngaich meūkö Yāvē min ayī-ö nö akahakūö takô tö hī, akahakūö inrē tö nup kuilōn hī. Akahakūö inrē min ayī-ö tö minë tinrīken ò yēḵ hī öi vë-ekūö ngam Paipöl. Tö ò nö tö akaha, tölöngö tī nö kahôka, hangenlōn takô inrē anga-aṅ tö hī. w23.02 pěch 2-3 përa 3-4

Asehkūöre man tö ngih, ngaich ang Yēsū nö rulten re nö hayöng im töhěng köiny samyeūheu, ngaich hökken öp ṙētak re më-eṅ öm meukkūö yip hanangenlōn re yik tökapah sin. Teungtökūö ngaich ngam ṙētak, kirööngen ṙanamlōn më-eṅ öm kôta mat meūkö u! Keuheūtngöre chūök ngam ṙanamlōn ip hē e. Pön ṙòkhöre yip tarik nö meukkūö yip hanangenlōnre, fūölö cha inrē. Ròkhöre in ayī-ö öi hökken öp töngatī ṙētak, ngatī inrē ang Yāvē nö kapahare nö hökken e angū-ö sakāmö. (Yōp 14:15) Yěn töfömngöre ṙen öp hanāngenlōn meh nö kapah, ngaich lohten min anga-aṅ nö in yip tarik tö urěhlö inchohlö in yip tökapah. Yip “tölöök” hēk “tötlöök” tarik, nö ha-aṅlöng nyöre min cha-a. Kūichi minë-eny yip “tölöök” tarik nö im līpöre nômö, lökten min cha-a nö ha-aṅlöng nö “im invanlö nômö.” Ngaich yip “tötlöök” tarik pöri nö öt teūngen cha-a tö ṙētak re nö haköp inlahen Yāvē hēk löklōn ò inrē, lökten min cha-a nö ha-aṅlöng “im invanlö kinṙôka.” (Inl. 24:15; Yôh. 5:29) Pōyen haköplö yip min tö ha-aṅlöng. (Isa. 26:9; 61:11) Lökten nö kirööngen pumnamö min tö haköptu ip hē ē.—Isa. 11:10. w22.09 pěch 20 përa 1-2

Hameuktöre ang Yāvē nö tökiröng tö më töng mahayöng. Hē yik aṅ Israel nö iyöngkūö ngam panam kinlēḵngô, ngaich Yāvē nö holṙen yik aṅ Israel nö kiyung ngaich ötkô yik rācha nö la-al cha. (Yôs. 11:4-6, 20; 12:1, 7, 24) Ṙōlheuh ang Yāvē nö hameuktöre nö tö kiröngkūö tökiröng, ōt inrē më ṙamātö-ellōnre rācha nö in ò. Ngam rācha aṅ Pēpilön ang Nēpukatnēsar nö eu-eū re anga-aṅ pön anga-aṅ ma-asöklö ngam inyöngöre hēk tö aṅhavin inrē tö kumlēḵ re tö lōnre. Lökten ang Yāvē nö kētö sācha ò ngaich katūöyaṙen ngaich anga-aṅ. Hē ò pöri ngaich nö lööken ngaich hē e anga-aṅ nö ṙatö-ellōnre tö Yāvē nöng anga-aṅ tökiröngkūö tökiröng. Ngaich anga-aṅ nö ‘hakôlò ngam Lamātulöng nö ha-öny ngam Tēv’ nö ngöṙô: “Pò ngam pūlngö ò nö töt chanūhuvṙen nö pūlngö.” Ngöṙô inrē anga-aṅ öthěng tak tökô nö asökngö ngam kuilōn Yāvē. (Tan. 4:30, 33-35) Ngö ṙô ök töhěng tak kamūich ngam Salmai: “Tökôlò öp pumnāmö tarik, öp tö Tēvu tö ngam Mā Tēv: yip tarik katöllö ò nö amin ò.” (Sal. 33:12) Kô-en in yöölen yēḵ hī öi chiplö im linöökö lōn Yāvē! w22.10 pěch 15-16 përa 13-15

Pōyen nup tö kūichi imat ngam Paipöl tö teungtökūö in minë tö eūka. Sīöplöre inrē ngam ṙinatö-ellōn hī tö Yāvē min nö hateungngö ngam kinlēḵngôre ip yamih ṙērak. Mihôiṅ in ayī-ö öi sā inlahen ngam kamūich ngam salmai nö ngöṙô: “Tayēṙö el lōn chin tö kūö lōn re töm inyööken: im ṙô Meh pöri chū-ö meūka.” (Sal. 119:81) Kētö maheukkö hī ang Yāvē nö in ngam ṙô re Paipöl tö hī min öi kuchīken ip yamih ṙētak. (Yar. 29:11) Rö-ö ngam maheukkö hī nöng löktö in minë kahëken hī hēk töt kahëken hī la-en, pön ngam kahëtö Yāvē maheukkö hī öi mihôiṅ ṙatö-ellōnre tö u min nö öthō nö öt teungtökūö. Ta-a chěi töi chumkūöṙen haköp minë tö vënyu imat ngam Paipöl. Ngaich sīöplöre min ngam ṙinatö-ellōn hī tö minë tö kūichi aṅ mat ngam Paipöl nö kanô-en. Ṙën in öi ṙatö-ellōnre in minë ṙô aṅ mat ngam Paipöl, pò yip tö pōyen tarik töngamuh hamangö u nö yöölen nö löktö in u. (Sal. 119:66, 138) Tö sā yip pamīhöre nö fēkö ngam inlahen re nö hòṅ ṙāngen höö, ik sā cha pöri nö hang minë inlēnö aṅ mat ngam Paipöl tökūichi vailöre ngaich ngam innôlö cha tö höö. Kuchīken ngaich cha-a nö el ngam mikūönöre. Vāyö tī inrē cha-a nö haruklö më kūönre, ngaich ṙòkhöre cha-a inrē nö hangenlōn tö höö nö el ngam mikūönöre.—Efi. 5:22-29. w23.01 pěch 5 përa 12-13

Fekö nup yanöölen re man tökūö inlahen Yāvē nö hateūng minë ṙô re. Ngö ṙô ang Yēsū tö ngam yöng ò nö öthō nö öt kētö minë hanakten hī. (Mët. 6:32, 33) Yēḵ hī havëkö ngam töhet kumlēḵ öi in ò öthō anga-aṅ nö öt kē-ěkūö hī. (Lūk. 11:13) Kilēḵngôre inrē Yāvē nö in hī tö ò min nö aṙēlen hī hēk hareushkö alaha hī inrē, halēnlö öp inlahen inrē hòṅ hī mikahtökūöre tö ò öi haköp inlahen ò inrē hēk hangönlö ngam innôlö inrē öi in ò. (Mët. 6:14; 24:45; 2 Kòr. 1:3) Ngaich öm më-eṅ meuk taneungtökūö në kinlēngô Yāvē? Yēk meh min öm fēken u tö Yāvē nö sitih inlahen anga-aṅ nö hateunngö nup ṙô re nö in meh ngaich ngönlöre inrē min ngam maheūṅkkö meh, ngaich ṙatö-ellōnre min inrē tö minë kinlēngô ò nö öthō nö öt teung ip yamih ṙētak. Ṙinātu-ellōn in tö Yāvē nö hateung minë kinlēḵngôre min. Sā ṙô ngam kamūich ngam Salmai nö ngö ṙô, “Tö ṙāmölōn öp anga-aṅ öp tö hōluṙen tö aṅ im Tēv . . . öp mī-im Mā Tēv maheūṅkka, ngam Tēv Ò.”—Sal. 146:5, 6. w22.10 pěch 27 përa 15; pěch 28 përa 17

Teungtökūö hòng ngih tö eūka ing töngamuh? Heūṅ teungtökūö nun! Sā inlahen yik aṅ Israel misī ik sā cha nö ṙānyu nö löktö Pēpilön, ngatī inrē nö lāku ṙôken yik tarik ik 1919 C.E. tö ṙānyu nö im tökiröng Pēpilön ngam tövaich tinlööken. Sā inlahen yik Israel nö ṙānyu nö ṙā-ang Pēpilön nö havan nö chuh im Kinlēḵngô panam, ngatī ṙēngen më tarik tö pōyen töngamuh nö ṙānyu nö im tövaich tinlööken ngaich sā mi-iyöng kūö ngam ispirichuěl (spiritual) peretāis ngaich ayī-ö. (Isa. 51:3; 66:8) Löktökūö in ngam 1919 C.E. yip tö-akaha mahalānṙen nö el ngam ispirichuěl peretāis. Ngatī inrē më tahëng kiteūm nö hireūtkenre nö mūlhöt nö el ngam ispirichuěl peretāis më tö maheukkö töre min nö aṅ nö ikūö ngih panam. Pōyen nun minë inkòlô cha kahëtö Yāvē nö el ngam ispirichuěl peretāis. (Yôh. 10:16; Isa. 25:6; 65:13) Sā ṙēngen më-el peretāis yin ngaich më tarik Yāvē nö keuheūtngöre chūök nö ikūö ngih panam. Lökten öp töng kamngö chūök hī ikūö ngih panam, yē hī pöri öi kô-en ha-öinyö Yāvē. Ngaich sā mi-iyöngkūö ngam ispirichuěl peretāis min ayī-ö. w22.11 pěch 11-12 përa 12-15

Kihngen mikah elmat hòng më-eṅ tö Yāvē nö töt ranehluvö hēk töt manāngenvö pò-ò nö “Tēv tö-örheūheu-aṅ”? (Isa. 40:28) Ngatī kanihngen misī yik tarik nö akah elmat tö ṙô e. Sā Elihū nö ngöṙô nö vë-eny inlahen ngam Tēv: “Kiröng an ngam Tēv, öt akahakūö ayī-ö tö ò, öt chanöhen nup tum samyeūheu ò.” (Yōp 36:26) Köpölōn pöri yē hī öt akahakūö tö ngam ṙô e, ngaich öt tö ngö manah ngaich angū-ö tö e nö vaich. Tö sā ngih inchōḵ elmat, tö hī öt uroh öi akahakūö tö la-en ngam ngam yanāngö. Tö ngö manah hòng angū-ö tö e nö öt ōt? Hö-ö! Ngaich ngatī lohten ayī-ö öt uroh öi ṙòklöre mikahkūö, tö Yāvē nö töt ranehluvö hēk töt manāngenvö inrē pön ngaich anga-aṅ nö urěh tö ngih panam, halīöngö, tavūöi hēk chingëṅt inrē. (Rōm. 11:33-36) Anga-aṅ an vamī ngam tumlat nö lökten i minhôiṅyö re hēk lökten i mikah elmat re inrē nö hanyāṅknyö minë halīöngö. —Yar. 51:15. w22.12 pěch 2-3 përa 3-4

Ngaich in ṙung öi hěngtak vë-ekūötēv. Hēkpī pöri öi mihôiṅ töölô öi vë-ekūötēv ihôi yip taṙòkhöre tarik. Tö sā ngih, yēḵ öp sistör nö hol öp holre nö istöti, ngaich töölô ṙung anga-aṅ nö vë-ekūötēv urēhěkūö cha nö kēken ngam istöti. Ngaich pi-a lohten ngam sistör nö öt akahakūö tö inlahen ngam mahaköp. Lökten anga-aṅ nö mihôiṅ nö ngö ṙô nö unôich min nö kēḵ ngam vinë-ekūötēv. Yēḵ ò nö ngatī inlahen ngaich chumkūöṙen tö kuilōn ngam mahaköp, ngaich ngatī ṙô min nö vë-elkui ò. Pi-a inrē öp töhěng tak prötör nö töölô nö vë-ekūötēv nö el mīting hēk el ngam mīting fòr filt sörvis inrē. Ngaich hòṅ köplōn anga-aṅ tö në. Hòṅ köplōn anga-aṅ töp chö-öny ngam mīting nö kēkaṙen. Ngaich yēḵ ò nö vë-ekūötēv, ngaich ötkô anga-aṅ nö kētö inlēnö yip prötör sistör hēk ötkô inrē nö kētö minkahtölōn nö in e. Töng taneui-taneui minit rô-òten ṙung ngam ṙētak hī öi tikökṙô re hēk vë-ekūötēv inrē im raneh hēk im kinheūten ngam mīting. Lökten yēḵ öp prötör nö töölô nö vë-ekūötēv, ngaich hòṅ chumkūöṙen anga-aṅ tö re nö ötkô nö ‘yaha ṙôken ṙô’. Möthë yēḵ ò nö kēḵ ngam raneh vinë-ekūötēv nö el mīting.—Mët. 6:7. w22.07 pěch 24 përa 17-18

Urěhnyi ṙô ang Yēsū nö ing manā-aṅ sakāmö min nö keuheūtngöre chūök minë “tölëlngökūö invah.” (Lūk. 21:11) Yēḵ hī öi chumkūöṙen tö e ngaich sitih inlahen ayī-ö teūngen tö ngam lanāmö? Yěn keuheūtngöre chūök minë invah ngaich uroh ayī-ö öi pingangkūö pò hī akahalōn tö u nö tö hòṅ ngatī. Lökten yěi hang në tö ngatī niūs ngaich hang ngih inlēnöre ayī-ö tö Yēsū “Uh yī-ö pa-ekūö.” Yěn keuheūtngöre chūök ngam tölëlngökūö invah ngaich harīkngöre ngaich minë inlahen hī öt sā tö urěh. Pòrô pöri öi kihngen ötkô öi ṙāngenre im kanahngenre inköpö hēk ötkô öi ṙāngenre öi chuh el mīting. Pōyen nun minë ekspirīön in minë vitiō hēk in minë pöplikěsön in u min öm teūngen tö yanöölen re öm meuk inlahen yip prötör sistör tö sā kanihngen meh. Sön pöri cha-a nö öt ṙāngenre nö löklōn Yāvē teūngen min më-eṅ tö nganöönöre yěm hang në ekspirīön. w22.12 pěch 17 përa 4, 6

Hangenlōn ang Yāköp tök kūönre Yôsěf. (Ran. 37:3, 4) Lökten yik mëm Yôsěf nö ṙāinyngö tö ò. Hěng heuh ngaich cha-a nö meūkan nöng hěngtak, inyihngen ò ngaich cha-a nö in yik mi-inyiha aṅ Mitiā. Ngaich yik mi-inyiha ngaich nö söömngen ò nö chuh Aikup. In e ngaich anga-aṅ nö yöngkūö yik amahati nö i patī Fërō ang Pòtiför. Kô-en ngaich ngam inlahen tinrīken Yôsěf nö harīkngöre, pò ò nö lālö ök yöngre kikōnyö. Ngaich pöri anga-aṅ nö yihīvö tö minë kanihngen. (Ran. 39:1) Hö-ö nun në kanihngen nö tö mötlö, ṙòkhöre ayī-ö tarik öi la-al në tö ngatī kanihngen. (1 Kòr. 10:13) Pōyen pöri nup kanihngen yamih nö in hī, pò hī öi mahaköp öi in Yēsū. Tö sā inlahen hī öi hayīöliṙen, öt lēkaṙen hēk hayë inrē. (2 Tim. 3:12) Mihôiṅ pöri min ayī-ö kūö hinòlṙenre tö Yāvē, pòrô nup töng sitih kanihngen yamihen hī. w23.01 pěch 14-15 përa 3-4

Lohten in ṙung hòṅ meukkūö yip prötör yip chūök hī öi haṙivlōn. Urēhěkūö hī pöri öi ngatī inlahen, söö ayī-ö yěi fēkö öp lāinyngen ngam miṙivlōnre öi in öp holre, öi ngö ṙô ‘keuheūtlöre mikahkūö öich ngaich töp lāinyngen ai, ai la-akūöre?’ (Inch. 18:13) ‘Hēk yěich höng öt akahngenre öich höng chū-ö tövaich?’ (Mum. 7:20) ‘Hēṙu öich ṙung chū-ö öich ngatī vanāchö?’ (Mum. 7:21, 22) ‘Yēḵ chu min öich chuh in ò öich vë-ekūö ò lāmta ai min ai in höö hēk ṙöng min ai lā-alkūöre?’ Yēḵ hī min öi kēnyö ṙētakre öi fēkö ṙô në intöönö, ngaich sīöp min ngam hanangenlōn hī töp prötör chūök hī öi miṙīvulōn. Ngaich lohten min öi havaichngöre töp vanāchö ò, höng aṙēlen ò inrē Yēḵ hī min öi höng hangenlōn tö më prötör sistör re pòrô cha-a nö miṙivngölōn hī hēk pòrô minë ötkumlē-en cha, ngaich inmeuktö hī min angū-ö öi tökô-en tamömrit Yēsū. Yēḵ hī min öi ngatī inlahen, ngaich meūkö hī min yip tahëng tö hī öi Vamënyen Yāvē öi tö aṅhav in tö ngam kanô-en. Ngaich lohten min cha-a nö yihtöre nö holṙô hī öi ha-öiny ngam Tēv re Yāvē, ngam tö hangenlōn tö taṙòkhöre tarik. Ta-a chěi töi haköp inlahen re öi hangenlōn tö höö, ngam inkahkö hī öi tökô-en Kristīön. w23.03 pěch 31 përa 18-19

Löknyö mat ngam Paipöl in öi akahakūö tö tinrīken ngam kamūichö e nö Tēv hanangenlōn. (1 Yôh. 4:8) Akahakūö ang Yāvē töp tölngö kanò-òṅ hī öi haköp ngaich höng anū-ö vahënyö ò nö imat ngam Paipöl. In e mikahkūö ayī-ö tö ò nö hangenlōn takô tö hī. (Yôh. 21:25) Löktö in minë ṙô tö kūichhötvö tö Yāvē nö imat ngam Paipöl in inrē öi akahalōn tö ò nö hangenlōn takô tö hī, milēḵṙen inrē anga-aṅ tö hī. Öt höng keuheūt höt minë chööngö anga-aṅ minë inlēnö hī, öi inup kahëkenre la-en nö sā ṙô re nö halēn yip nyīö töt īnu tö mikah. Pön höng kētö minë tövai anga-aṅ inlēnö, tö minë tö eūka kinlēḵngô, inlahngen hēk tinrīken yik tarik inrē töpōyen, anū-ö tö kūichhötvö tö ò. Lökngöre ellōn takô ayī-ö öi hāngö u, ngaich sīöp ngam hanangenlōn hī tö Yāvē hòṅ hang minë chööngö ò inrē. Löktö im vinë-ekūö mat ngam Paipöl in inrē öi akahakūö tö Yāvē nö chumkūöṙen takô tö hī. Pön kūichhöt inlahen yik tarik anga-aṅ nö imat ngam Paipöl yik tö sā ta ‘tinrīken hēk mufē nö in hī.’ (Yāk. 5:17) Lökten ayī-ö öi akahakūö tö inlahngen cha. Rö-ö pöri nöng anū-ö pöi haköplu tö inlahen Yāvē tö minë tinrīken ò inrē, yēḵ ò nö vë-ekūö yip tahëng, in e mikahkūö ayī-ö tö Yāvē “nö tö tööḵlö tö miṙēḵlōn tööḵlö inrē tö neūkölōn.”—Yāk. 5:11. w23.02 pěch 6 përa 13-15

Rěhnyôre ngam līpöre Inmeukhömat, nö ngö ṙô: “Ngam Inmeukhömat aṅ in Yēsū Kristū, ngam kahëtö ngam Tēv nö in Ò, tö hameuktu nö i yip tanöölöṙô Ò.” (Inm. 1:1) Lökten ayī-ö öi chumkūöṙen öi ngëichken minë inlahngen ikūö ngih panam öi ngëichken minë pròfesī tö u yěn teungtökūö hēk yěn hö-ö. Ngaich lohten öi hòṅ kakken u öi in yip tahëng. Yēḵ hī öi kakken minë tö-eūka kinlēḵngô aṅmat ngam Paipöl ngaich ötkô ayī-ö öi höng lökṙôre. Pò hī min yěi ngatī, ngaich mihôiṅ min nö taṙōl ngam Māṅ. Öt lōnu pöri ayī-ö tö e nö ngatī. Tö sā hī yěi hang ṙô më mahayöng ing panam nö vë-eny inlahen re nö ngaich nö kēngö në kanihngen, ngaich vītö ngam lanāmö töm kumchikṙen inrē nö ing panam. Ngö mufē hòng min ngaich ayī-ö tö u, nö taneungtökūö ṙô ngam 1 Tösalònike 5:3, ngaich kakken u öi in yip holre? Hö-ö, pöi hòṅ hayönglenre öi in minë tötufömngöre minkahtölōn lamöktö in ngam söngkötön Yāvē. Ngaich yēḵ hī min asīnkö minë minkahtölōn öi kakken u in höö, ngaich ‘hěng min minë mufē’ hī ngaich köp min ngam hinëngö nö el ngam Māṅ.—1 Kòr. 1:10; 4:6. w23.02 pěch 16 përa 4-5

Kūö yòh öm hangenlōn tö Yēsū Kristū? Vënyu an Yēsū nö töhangenlōn töm kanô-en hēk töm lanöökö, hōten taṙòkhöre inrē anga-aṅ nö īnu töm inyāichngö. Yē meh min më-eṅ hangenlōn töm kanô-en hēk töm lanöökö, ngaich öthō min öm öt hangenlōn tö Yēsū. Lohten man köplōn tö nuk inlahen ò nö öt pinhë-evkūö nö kē la-a ngam kanô-en, la-evṙen inrē anga-aṅ tö tölöök. (Yôh. 18:37) Sitih inlahen pöri anga-aṅ nö ṙūöhöl alaha hī öi īnu töm inyāichngö? Töi mikahtökūöre? Löktö in minë tinrīkenre ang Yēsū nö haköpten hī töm inyāichngö. Tö sā ò nö öt lōnu töre nö harōyö minë-eny, kēten u pöri anga-aṅ nö nöönyö ngam yöng re. (Māk. 10:17, 18; Yôh. 5:19) Sitih mufē öm yěm ngëichkö inlahen Yēsū nö hayāichngöre? Öt sīöp öng ngam hanangenlōn meh tö ò hēk hòṅ asīnken ò inrē? Lohten nö ngatī! Asuh pöri öp lāinyngen Yēsū nö ngatī inyāichngö? Pön hangenlōn misī anga-aṅ tö ngam yöngre ngam tö yāichö ellōn, ngaich hòṅ asīnken ò anga-aṅ. (Sal. 18:35; Hep. 1:3) Kô-en takô ang Yēsū nö sā tinrīken Yāvē. Hö-ö öng pökeh ngam hanangenlōn meh tö Yēsū nö ṙūöhölre ṙôken? w23.03 pěch 3-4 përa 6-7

Ngö ṙô ngam Paipöl tö “yip tölöök hēk tötlöök” inrē nö ha-aṅlöng min cha-a. Ngaich kētu ṙētak cha-a nö teūngen tö ngam nômö tö-örheūheu aṅ. Yip tarik samöl kinpahare nö chiplen nö i linöökö lōn Yāvē cha-a yin “tölöök” tarik. Ngaich “tötlöök” tarik ngö ṙô ayī-ö tö yip töt akahakūö tö Nëtkangen cha min nö ha-aṅlöng nö ing panam. Tö ngö manah hòng angū-ö, tö ngam minë-eny cha nö ōt nö imat ngam līpöre nômö? Kūichiyö minë minë-eny yip “tölöök” tarik urēhěkuö kinpaha cha nö imat ngam līpöre nômö. Sīchiyö hòng ngaich ngam minë-eny cha unôichrit kinpaha cha? Hö-ö, pön öt vāichngö ang Yāvē tö cha. Ngö kinūichngö an nö imat ngam Paipöl tö Yāvē nö ‘rö-ö nö Tēv yik tö kapah; Tēv vē tö aṅ pöri. Pò vē taṙòkhöre tarik nö aṅ nö in ò.’ (Lūk. 20:38) Tö ngö manah angū-ö tö yip tölöök tarik yěn ha-aṅlöng min nö ikūö ngih panam, ngaich ōt min minë minë-eny cha nö i mat ngam līpöre nômö, höng sā tö kūichi pöri anū-ö tö pensil.—Lūk. 14:14. w22.09 pěch 16 përa 9-10

Hē Yāvē misī nö vīlen ök raneh tarik ang Ātöm. Lōnu anga-aṅ tö ò nö ṙamlōn nö meuk minë vahīlö ò. Vīlö ök tövai anga-aṅ Peretāis nö chūök Ātöm nö iyöng ngaich tölṙô ò nö ūlö e, aṅten e inrē. (Ran. 2:8, 9) Pingangkūö lohten ang Ātöm yěn meuk nup kulöl el ngam tumlat nö lakukkönykūö hēk yěn meuk panöpnyökūö ṙòng nup pūl inrē, ngaich ṙamlōn lohten anga-aṅ. Töl ṙô ò hēk ngam Tēv Yāvē nö kaheuk minë-eny minë töṙeūla. (Ran. 2:19, 20) Höng minhôyö Yāvē anū-ö, kēten u pöri anga-aṅ nö la-en Ātöm. Lohten ang Ātöm nö urěh nö chumkūöṙen mat nö ngëichkö minë töṙeūla, ngam inlahen mineūkö u hēk inlahen u yěn halöinyköre ngaich möl anga-aṅ nö vī minë-eny u. Kuchīken lohten anga-aṅ töm la-en kinë-ekūöre! Löktö in e mikahkūö anga-aṅ tö Yāvē nö tö akaha takô, tövai inrē minë vahī kūö kuntī ò. w23.03 pěch 15 përa 3

Ngam kalröön ngam tökiröng insā, inmeuktö ngam inyööngö angū-ö tö Pritēn ngaich Amerikā, ngam tö vënyu nö manā-aṅ mahayöng. (Tan. 2:31-33) Angū-ö an töngamuh tö ṙònghöichṙen nö hayöng inë ṙētak hī, öt ōt min hēk mahayöng unôichrit e. Ngam Pūlngö ngam Tēv min kamëtö manāngen në inyööngö tö tarik nö ṙòkhöre ikūö ngih panam ip Armakētòn. (Inm. 16:13, 14, 16; 19:19, 20) Sitih inlahen ngih tö-eūka nö ngönlöre tī töm ṙinātö-ellōn hī? Kòtökūö in tö ngam minkahngö öi in ngam kinlēḵngô tö-eūka tö Tanīěl, tö hī ngaich töngamuh öi el ngih manā-aṅ sakāmö. 2,500 samyeūheu rò-angen ang Tanīěl nö urěhngöre ṙô nö vënyö inlahen më töfën tak Tökalēḵ Mahayöng unôichrit Pēpilön, nö hayöng min nö ikui yip tarik ngam Tēv. Vënyu inlahen inrē ngam Tökalēḵ Mahayöng ang Pritēn-Amerika nö manā-aṅ min nö mahayöng. Löktö in e öi teūngen tö hanöhlöre, maheūkkuvö inrē tö ngam Pūlngö ngam Tēv nö ngaich min nö piyāingö në inyööngö tö tarik nö ing panam, ngaich keuheūtngöre chūök min ngaich angū-ö nö hayöng nö ing panam. w22.07 pěch 4 përa 9; pěch 5 përa 11-12