Òköst

Vë-eny nang hī ngih miröökö, tö yip tarik tö akahka nö lökten in minë ṙô re nö tö pa-ekūö tö Yāvē hēk famëkö ngam minë-eny ò inrē, köplōn ang Yāvē tö cha ngaich kūichhöt minë minë-eny cha inrē nö imat ngam “līpöre inköpkölōn.” Kūöyòh ang Yāvē nö ngatī inlahen? Pön löktö in minë ṙô hī nö meukö nup mufē elkuilōn hī. Sā ṙô Yēsū, ‘Nup elkuilōn meh ngatī minë ṙahônyö meh nö löknyö elvang meh.’ (Mët. 12:34) Ngaich lōnu inrē ang Yāvē tö yip tö hangenlōn tö ò nö örheūheu min cha-a nö aṅ. Yěn hī öi vāyö vanë-e, hē e min ang Yāvē nö ṙamlōn tö minë nöönyö kahëtö hī. (Yāk. 1:26) Cha-a yip töt hangenlōn tö Yāvē, töng örheūheu nö holtö tanainyö re hēk kesô inrē yěn ṙô-òvö ngaich haṙivlōn tī inrē tö më tahëng tö minë ṙô re. (2 Tim. 3:1-5) Hö-ö in ayī-ö öi hòṅ asīntöre sā cha, pöi lōnu töre haṙamlōn Yāvē tö minë ṙô re yěi ṙô-òvö. Lökten rö-ö nöng hē hī öi ahangköm tölöök inhānga hēk el mīting öi vayö vanë-e, tön hòṅ i patī re inrē öi holtö hanangenlōnre hēk minlēḵṙen re öi ṙô-òvö. Möl min ang Yāvē nö ṙamlōn yěi vë-ekūö ò.—1 Pīt. 3:7. w22.04 pěch 5 përa 4-5

Vīhöt ellōn minë tö söm sinrōl hēk tö ngam töṙeūla inrē ngam Tēv hòṅ cha nö piyāingen ngam Tökiröng Pēpilön. Vīhöt ellōn ngam tö turëṙö kaha töṙeūla min ang Yāvē anga-aṅ ngam Yunainet Nēsön nö ha-etngö minë tövaich tinlööken min ikūö ngih panam. (Inm. 18:21-24) Hòṅ asuh öp rih inlahen hī yēḵ hī ngaich akahakūö? Hòṅ chumkūöṙen ayī-ö tö minë kahëtöre nöönyö ngam Tēv nö ‘ötkô anū-ö nö pitōtuvö hòṅ het pöri.’ (Yāk. 1:27) Lökten ayī-ö ui hanôl ngam Tökiröng Pēpilön! Ötkô ayī-ö hang minë tövaich inköphöti hēk ötkô inrē öi in minë vinë-ekūö insā. Hēk hòṅ köptī inrē ayī-ö tö ngam töhet inchöngten. Ötkô öi la-entö la-en minlūönö. Öt höng angū-ö pöi hòṅ hayööken yip tahëng inrē nö ‘kunyi-inyre nö ṙā-ang in e’ hòṅ cha nö öt nôlhöt nö in minë tökööl cha.—Inm. 18:4. w22.05 pěch 11 përa 17; pěch 14 përa 18

Kēnyö ṙētakre yī-ö inyööngö öi haköpten më kūönre tö inlahen Yāvē tö nup tī ò inrē nö in hī. (Chöö. 6:6, 7) Tö hòṅ urööṙen angu-ö yē ngam pīhö meh nö öt sā ṙinātö-ellōn meh töp lökten meh ötkô kē istötī më kūön re. Ngöṙô ang Kristīn: “Öt keuheutnyöre ṙô öich i patī haköpten yip kūönre, lökten yěch höng teūngen tö ṙētak re ngaich haköpten cha chu-ö tö nup aṅ mat ngam Paipöl.” Hôṅ vāyö ṙô inrē öm kakken yip prötör sistör tö ngam söngkötön Yāvē. Um miyëṙô tö yip minṙönylen, tön ötkē inyööken re min yip nyīö nö in yip minṙönylen yē cha nö kihngen. Vī ngam lanāmö öm el patī. Hameuktö hanangenlōnre in më nyīö in ngam pihöre kikōnyö inrē öm i ṙô i nup la-en re inrē. Milēḵṙen öm vë-ekūö ngam pihöre kikōnyö, haköpten më kūönre inrē nö milēḵṙen töm yöngre. Yěm ngatī inlahen ngaich hayööken ngam kūön re më-eṅ nö mikahtökūöre tö Yāvē.—Yāk. 3:18. w22.04 pěch 18 përa 10-11

Ngam ṙô Yēsū nö in ngam māṅ Efisös, in e öi akahakūö tö inlahen cha nö pōyen kanihngen, söönen cha-a nö möi iṙūöhen inrē nö i linökölōn Yāvē. Hö-ö pöri ngam hanangenlōn cha tö Yāvē nö sā inlahen ngam urěh hanangenlōn cha. Lökten cha-a öre nö hòṅ asīöp ngam hanangenlōn re tö Yāvē, ngaich ṙamölōn ang Yāvē nö in minë inlahen cha öre nö ha-öinyö ò. Ngatī in ayī-ö ṙung öi hamöiyöre yěn ōt nup kanihngen hī. Rö-ö pöri nöng angū-ö tö ngëichka tö Yāvē ngam manöiyö hī, pön ngam chöönyö hī inrē. Lōnu anga-aṅ tö hī öi holtö ellōn re öi ha-öönyan. Ngaich ha-öiny minë tī ò inrē. (Inch. 16:2; Māk. 12:29, 30) Hòṅ höngöre ayī-ö. Ngöt sin yik Kristīön aṅ el ngam māṅ i Sārtis nö i linökölōn ngam Tēv. Kūöṅnngöre pöri ngaich angū-ö im rô-òten cha. Lökten ang Yēsū nö tölṙô cha nö “höngöre”. (Inm. 3:1-3) Akahalōn in tö ngam Tēv Yāvē nö öt vaichngö tö nup la-en hī.—Hep. 6:10. w22.05 pěch 3 përa 6-7

Vë-eny nang hī ang Sòlòmön, tö hī öi ṙamlōn yěi öt ṙāhata la-evṙen. Lumnööṙö hī angū-ö nö “kahëtö ngam Tēv.” (Mum. 5:18, 19) Kôten inrē ang Sòlòmön nö la-evṙen! Tö sā ò nö vīlö patī re, teūch nuk chōn vain, vī panô-òṅ re hēk vī chūök mak inrē. Ōt inrē nuk elpanam vahīlö ò. (1 Rā. 9:19; Mum. 2:4-6) Teūngen ang Sòlòmön tö ṙanamlōn re nö in minë la-en re. Akahakūö pöri anga-aṅ tö ngam tökô-en ṙanamlōn nö öt löktö in në töngatī la-en, pön löktö im linökölōn Yāvē. Lökten anga-aṅ nö vīlö ngam töhet chūök Yāvē. Sat samyeūheu rò-òten vinī-i angū-ö. (1 Rā. 6:38; 9:1) Ṙòkhöre kahëken ang Sòlòmön tö nuk la-en, ngaich kôtökūö anga-aṅ tö ngam linöökölōn Yāvē nö töt ṙanāngen nö nö in u nö la-en. Lökten anga-aṅ nö kūich nö ngöṙô tī: “Manā-aṅgrit ön ngih; keuheūtlöre nup nö ngaich nö hāngö. Pa-ekūö töm Tēv, haköp nup chöngö ò inrē; pò e nö angū-ö la-en tarik nö keuheūtlöre.”—Mum. 12:13. w22.05 pěch 22 përa 8

Pōyen yip tarik tö vënyu inlahen nö imat ngam Paipöl yip tö aṙēlöng tö Yāvē. Kò-òṙen öi ngëichkö inlahen Rācha Manasē. Tökirööngen nup fālen kahëkö ò. Pön vë-ekūö insātēv anga-aṅ ngaich tölṙô yip tarik inrē nö ngatī inlahen. Ngaich kētö yip kūön re inrē anga-aṅ nö fööngö nö tö kētu. Uroh inrē anga-aṅ nö asöklö ngam insā nö el ngam töhet chūök vinë-ekūö Yāvē. Ngö kinūichngö ngam inlahen ò nö imat ngam Paipöl: “La-evṙen anga-aṅ tö tötlöök nö i kūö ngam Mā Tēv, ngaich vīlö lanīnö ò.” (2 Kin. 33:2-7) Ik sā ò pöri nö halöktitre ngaich aṙēlöng anga-aṅ tö Yāvē. (2 Kin. 33:12, 13) Töi ngëichkö inlahen Rācha Tāvit inrē. Kirööngen nup inrē fālen ò. Pön asěhha anga-aṅ ngaich fëlngen öp tarik töt falūṙen. Ik sā ò pöri nö hō-en minë vanāichöre nö holtö ellōnre nö halöktitre, ngaich aṙēlen ò ang Yāvē. (2 Sa. 12:9, 10, 13, 14) In në inchō elmat ayī-ö öi akahakūö tö Yāvē nö hīnöre nö aṙē-ěl. w22.06 pěch 3 përa 7

Ṙōlheuh in ṙung öi kihngen öi hameuktö ngam manööyöre ngaich minhôiṅ ngam maheūṅkkö hī min nö kūöngöre, mihôiṅ min öi ngö mufē ihē ang min Yāvē nö hateung ngö minë kinlēḵngô re. Hòṅ köplōn pöri ayī-ö tö Yāvē nöng anga-aṅ tö köp nöng örheūheu lökten ṙung yěn marôta ngam ṙētak nö i mat hī höng töng cheūta angū-ö nö i mat Yāvē. (2 Pīt. 3:8, 9) Lökten ayī-ö mihôiṅ öi ṙatö-ellōnre tö Yāvē min nö löngö ṙētak nö hateung minë kinlēḵngôre. Öt sā öp ṙētak lōn hī pöri angū-ö nö yih sā minë kinlēḵngô Yāvē pöri nö öl nö teung hòṅ sitih inlahen ayī-ö öi hangönkö ngam maheūṅkköre? (Yāk. 5:7) Asīöp ngam ṙinātö-ellōnre öi in Yāvē ngaich hangön ngam innôlö re öi in ò, ngaich hēk min ngam maheūṅkkö hī nö ngönlöre. Vënyu nang in inrē tö ngam Paipöl nö ngö ṙô. Yēk hī īnū tö ngam ṙinātö-ellōn tö Yāvē nö ōt ngaich kē-ěkūö cha min anga-aṅ tö raneushö ‘yip chamöhö ò nö holtö ellōre.’ Ngaich möl min ayī-ö aṅhavin tö ngam maheūṅkköre tö minë kinlēḵngô ò nö öthō nö öt teung. (Hep. 11:1, 6) Yěi lōnu tö ngam maheūṅkkö hī min nö ngönlöre, ngaich hòṅ vë-ekūö Yāvē hēk haköp mat ngam Paipöl ayī-ö. Hö-ö in ayī-ö kô meūkö Yāvē, sön pöri mihôiṅ öi haröhtöre in ò öi löktö in ngam vinë-ekūötēv öthō anga-aṅ nö öt hang ṙô hī.—Yar. 29:11, 12. w22.10 pěch 26-27 përa 11-13

Asehkūöre man tö inlahen Yōp nö ūichhaka nö el tisum nö halöönyöre tö chanököre. (Yōp 2:8) Öt ṙākôre më hol ò nöng ötlēḵkö elnang ò. Sā tö fukkui ang Yōp tö ngam tökiröng kanihngen. Hòkhöt miṙivlōn tö kinpahlöre tö yik kūön re, sön anga-aṅ nöng öt ṙò-òv. (Yōp 2:13) Hē cha ngaich nö meūkö ò nöng öt ṙò-òv, ngö lōn ngaich cha-a, ngaich an min nö havööngökūöre tö Yāvē, ötlēḵkö elnang ò inrē. Hö-ö pöri ang Yōp nö ngatī inlahen. Ngö ṙô pöri anga-aṅ nö sapṙô yik holre: “hanöng saha chu kapah öthòṅ ṙāngö ngam hinëngö chū-ö min nö ṙā-ang in chu [sō ang Yōp nö hēngö fālen nö ikūö ngam Tēv]!” (Yōp 27:5) Kūö yòh ök Yōp nö ngatī nganöönö ṙinatö-ellōn hēk öt ṙāngenre inrē nö löklōn Yāvē, pòrô nö ngatī kanihngen? Pön ṙatö-ellōnre tö Yāvē nö kēngen nuk kanihngen ò min. Ṙatö-ellōnre inrē anga-aṅ tö Yāvē nö hachohlen ò min nö ṙā-ang im kinpaha.—Yōp 14:13-15. w22.06 pěch 22 përa 9

Kò-òren in fēkö inlahen re öi mihôiṅ vë-ekūö ngam vamīlö në taṙòkhöre ing panam. Irôken ngam minlēken hī! Mihôiṅ öi öp töng yòh ṙētak öi vë-ekūö ò öi köö ëlô re, hēk vë-eny minë elkuilōn re inrē öi in ò. Öp töng inlahen ṙētak hī mihôiṅ öi vë-ekūö ò, pòrô öi el āṅspū hēk el chěl. Öp töng yòh kamngö hī mihôiṅ öi vë-ekūö Yāvē. Mihôiṅ öi ṙatö-ellōnre inrē tö ò nö öthō min nö öt hang ṙô hī. Kô-en, kirööngen ngih inkôlò nö lamöktö in Yāvē. Ngaich ötkô ayī-ö öi kūön elmat tö ngam kinë-ekūöre. Tökiröng inrē ngam vine-ekūötēv nö imat Tāvit. Lökten anga-aṅ nö ngö ṙô nö in Yāvē. “Hökngen ngam vine-eṅkūö Meh tö chu, nö ṙātu nö i kūö Meh, nö sā lōpān.” (Sal. 141:1, 2) Chumkūöṙen misī yik mākūö kūön ṙô inuk ṙētak Tāvit yěn halēnlö nup tö föngö tö tahūsā nö ikūö Yāvē. (Man. 30:34, 35) Lökten ik sā Tāvit nö ngö ṙô, tö ò nö lōnu tö ngam vinë-ekūötēv nö sā inlēnlö ngam tö tahūsā. In e mikahkūö ayī-ö öi hòṅ chumkūöṙen urēhěkūö re öi hòṅ vë-ekūötēv, öi hòṅ sitih ṙô öi vë-ekūö Yāvē. Ngatī inlahen in ayī-ö öi hòṅ sā Tāvit öi haṙamlōn Yāvē löktö in minë ṙô re öi vë-ekūötēv. Lökten ayī-ö öi hòṅ holtö mikah elmatre yēḵ hī hòṅ vë-ekūötēv. w22.07 pěch 20 përa 1-2; pěch 21 përa 4

La-en Yāvē ön ngam invahalvah. Öt kě-ěkūö hī ang Yāvē tö hī öi in ngam invahalvah hēk kētö sācha inrē. (Rōm. 12:20, 21) Öt het in lökten ayī-ö öt fūra mikahkūö töm lāinyngen. Ngaich öt sā inlahen Yāvē inrē öi löngö tī öi kahôka. (Hep. 4:13) Ngaich pi-a inrē ṙung ayī-ö öi haṙivlōn öi in yip holre ngaich mihôiṅ öi vaichö kahë tö fësla. Lökten ang Yāvē nö lökten in Yāköp ṙô nö kūichhöt e, “Pò ngam lanīnö ngòh tarik nö öt ṙūönyö ngam lanöökö ngam Tēv.” (Yāk. 1:20) Lökten ayī-ö ui havahalvah re pöi hòṅ ṙātö-ellōnre tö Yāvē nö inup yamih min ṙētak nö öthō min nö öt kahòklö kui hī. Yēḵ hī öi aṙě-ěl, ngaich hameuktöre ayī-ö öi ṙātö-ellōnre tö Yāvē min nö öthō nö öt kahòklökui hī. Yēḵ hī öi ṙālö nup taṙòkhöre öi eltī Yāvē. Hameuktöre ayī-ö öi ṙātö-ellōnre in ò tö ò min nö öthō nö öt halööktit u, pön kilēḵngôre anga-aṅ tö hī min inup tufömngöre panam nö öt köpsöṙen min minë hötṙeh mufē hī. Hēk ‘öt yih min anū-ö nö elkuilōn hī.’.—Isa. 65:17. w22.06 pěch 10-11 përa 11-12

Yēḵ hī ötlēkaṙen, ngaich hòṅ köplōn ayī-ö tö e nö kūö yòh nö ngatī inlahen pò ngam la-en hī nö tölöng ngaich ṙamlōn ang Yāvē nö in ngam la-en hī. (Mët. 5:11, 12) Löktö in më tarik tī ngam Sī-ö nö ötlēken hī. Ötkô pöri ayī-ö vöö pò Yēsū nö tökalē tö cha. Löktö im inyööken hī tö Yēsū töngamuh ngih la-en nö keuheūngöre chūök nö ikūö ngih panam nö ahangkö ngam tölöök inhānga. Ta-a chěi hēk töi mikahtökūöre Pōyen në ëlô ikūö ngih panam töngamuh, angū-ö ngih hēk kanihngen hī yěi ahangkö ngam tölöök inhānga öi in minë ëlô. Ngaich pöri ang Yēsū nö löktö in ngam maheuk Yôhan nö vë-eny nö ing manā-aṅ sakāmö min nö keuheūtngöre ëlô min ngam inhangkö ngam tölöök inhānga. (Inm. 14:6, 7) Ngaich ön töngamuh nö ngatī inlahen. Ngaich töngamuh öi pōilö inlahen öi vë-eny ngam inhangkö ngam tölöök inhānga öi in minë ëlô. Ngaich töngamuh inrē yip tarik nö in ngam website jw.org nö pōyen tö-tö 1,000 ṙôken ëlô ngam Paipöl hēk tö minë kun līpöre inrē nö vë-evkūö! Ngaich inrē më kamë istöti nö in ngam tufömngöre līpöre Mihôiṅ Man Örheūheu Ṙamlōn! nö pōyen tö tö 700 ṙôken ëlô angū-ö nö halēnlöng. w22.07 pěch 9 përa 6-7

Akahakūö an Yēsū tö miṙivln ngòh tarik lökten anga-aṅ nö lōnu töre nö hòṅ hayööken cha. Ngö inlahen kinuichngö angū-ö nö im līpöre Mëtiv: “Hē Ò pöri nö meuk yik tömaṙôngö, ngaich aṙē-ĕlōn Anga-aṅ tö cha; pò cha nö ötkôlò, parāta inrē, sā pököre töt yōmu.” (Mët. 9:36) Kirööngen hanangenlōn an inrē Yāvē tö tarik. Ngö ṙô ang Yēsū nö vë-eny: “Ngatī an nö ötlōn ngam Yöng chu el halīöngö, nö hĕng hang tak i vē kun kūönnö nö ötkôlò.” (Mët. 18:14) Hö-ö öm lökngöre ellōn öm hang ngih ṙô! Kô-en, asā ṙôken mikahkūö hī min tö Yēsū ngaich ngatī ṙôken min ngam hanangenlōn hī tö Yāvē. Yēḵ meh hòṅ asīöp ngam hanangenlōn re tö Yāvē hēk yěm hòṅ töteung Kristīön, ngaich hòṅ kēnyö ṙētak re më-eṅ öm in yip holmaneuk hī el ngam māṅ yip tö ekspirīönu ngaich mikahtökūö re tö cha. Ngaich chumkūöṙen öm ngëichkö ngam ṙanamlōn cha, tö inlahen cha nö löngö fësla nö i linöökö lōn Yāvē. Pōyen inrē nup tövai ekspirīön cha nö i linöökö lōn Yāvē. Ngaich mihôiṅ më-eṅ hatöönö cha tö inlahen u. Yēḵ meh öm kē ngam tökiröng atöllö re, ngaich mihôiṅ më-eṅ kē inlēnö re in cha. Kô-en in, ‘teungten yěi kē minë tö pōyen inlēnö.’ w22.08 pěch 3 përa 6-7

Ṙòkhöre in öi la-al minë kanihngen re. Hö-ö pöri ayī-ö öi höng hěngtak. Pön in hī ang Yāvē. Tö sā öp töhěng tak inyöngö nö hangenlōn tö öp kūön re ngaich örheūheu nö chumkūöṙen tö ò, ngatī inlahen ang Yāvē nö hangenlōn tö hī lökten nö örheūheu nö chumkūöṙen tö hī. Yē hī pöri havëken minë-eny ò, ngaich öt löktu anga-aṅ nöt hang ṙô hī hēk hīnöre inrē anga-aṅ nö hayööken hī. (Isa. 43:2) Pōyen nup tī Yāvē nö hayööken hī, kētö ṙētak hī inrē anga-aṅ öi vë-ekūötēv, kētö ngam Paipöl inrē nö in hī hēk kētö minë vitiō tö minë līpöre lamökngörit in ngam Paipöl, kē-ěkūö hī inrē anga-aṅ tö më prötör sistör nö töhangenlōn tö hī. Pòrô öp tö sitih kanihngen hī mihôiṅ min ayī-ö la-al u. Kirööngen ṙô in öi ha-öinyö Yāvē pò ò nö chumkūöṙen nö ngëichken hī. Tööḵlö ayī-ö tö ṙanamlōn re yěi fēken u. (Sal. 33:21) Yēḵ hī lōnu pöri tö Yāvē nö chumkūöṙen tö hī, ngaich hòṅ ōt nup kahëken hī. Ngaich kē yanöölen re inrē in minë tö halēnlöng tö ò. Hòṅ ma-ainyre inrē ayī-ö öi örheūheu hang chööngö ò, ngaich nup tölöng nö imat ò la-en kahëken hī ngaich hòṅ kēken u ayī-ö, ngaich möl min ang Yāvē nö chumkūöṙen tö hī.—1 Pīt. 3:12. w22.08 pěch 13 përa 15-16

Pōyen tarik töngamuh töt akahakūö tö chūök re nö ṙatö-ellōnre. Höng katöngalōn cha-a. Ötrēhěn cha-a nö ṙatö-ellōnre nö in më mā mahayöng, më saëntist, më mi-inyiha hēk tö më mahaköptö tinlööken inrē. Öt ṙatö-ellōnre më tarik hēk öt milēḵṙen inrē tö më pötrī tö la-evṙen nö el ngam keurcha kūö nup kahëken cha la-en. Lökten ngaich tarik nö pōyen töt ṙamatö-ellōnre nö in ngam Paipöl. Ṙatö-ellōnre pöri ayī-ö in ngam Tēv Yāvē tö ò nö ‘Tēv kanô-en,’ lōnu inrē anga-aṅ tö hī öi yöölen. (Sal. 31:5; Isa. 48:17) Akahakūö in ayī-ö töre mihôiṅ öi ṙatö-ellōnre in ngam Paipöl. Löngö ṙô ök ihih kamūich ngam Paipöl: “Tö ngam Tēv nö öthō nö minyônyaṅ nup ṙô lamöknyö elvang ò nö kanô-en. Lökten më tarik ò nö ṙatö-ellōnre nö in e.” w23.01 pěch 2 përa 1-2

Hěng ang ngam inlahen hī öi hangönkö më prötör sistör, yēḵ hī asīöp ngam ṙinatö-ellōn cha nö in Yāvē. Ōt re yip prötör sistör hī tötlēkaṙen tö yip töt ṙamātö-ellōnre. Ōt re yip tahëng tö īnu tö invah re hēk lohten inrē cha-a nö haṙivlōn tö kūö ṙô yip tahëng. Ōtre yip prötör sistör tö marò-òten nö hökkö yanīhi ngam manāngen. Angū-ö lāinyngen cha inrē nö kuṅngöre ngam ṙinatö-ellōn cha. Ngatī inlahen yik raneh senchurī Kristīön nö la-al në tö ngatī kanihngen. Löktö in ngam Paipöl ṙô ang Pôl nö hangönkö ṙinatö-ellōn yik holmaneukre. Yik Yahūti vamītöre nö Kristīön, pī-a yik aṅ patī cha nö ötlēken cha hēk ngö ṙô inrē tö cha, “Tö ha-ehten ön ngih tinlööken hī Yahūti, ngaich hòng yī-ö öi vīngöre öi Kristīön!” Ngaich pī-a lohten yik Kristīön nö öt akahakūö tö ṙô re nö sapṙô cha. Ik sā cha pöri ngaich nö haköp ngam kahūich Pôl chitri nö chamuh in yik aṅ Heprāi, ngaich vë-ekūö e cha-a ngaich ngönlöre ngam ṙinatö-ellōn cha. (Hep. 1:5, 6; 2:2, 3; 9:24, 25) Pōyen nuk kahūich Pôl imat ngam chitri nö lökngöre yik tarik, ngaich ngatī inlahen më Kristīön nö sapṙô më aṅ patī re nö löktö in e. w22.08 pěch 23-24 përa 12-14

Öt ṙātö-ellōnre yin më tarik nö in höö kūö nup la-en më yōm tinlööken, mahayöng hēk tö më mi-iyiha, lökten tarik töngamuh nö öt lööṙen nö ṙātö-ellōnre nö in cha. Söl ing töngamuh tarik nö öt ṙātö-ellōnre nö i holre, in yip lā chīrö re hēk in yip aṅ patī re inrē. Öt pingangkūö pöri ayī-ö meūkö u, pön urěhngöre ṙô ngam Paipöl nö vë-eny inlahen yip tarik ing ‘manā-aṅ sakāmö, nö mahanyatkö elmat, . . . vamë-eng nang, . . . hēk mahachīl.’ Ngatī maheuk ayī-ö töngamuh, kūö ngam Tēv ngih panam ngam Sī-ö öi ötkô ṙātö-ellōnre in ò. (2 Tim. 3:1-4; 2 Kòr. 4:4) Hö-ö yin më tarik aṅ kūö ngih panam nö akahakūö tö chūök re nö ṙātö-ellōnre, hö-ö pöri ayī-ö ngatī inlahen, pò hī akahakūö tö Yāvē nö kiröngen hanangenlōn tö hī, ngaich kilēḵngôre inrē nö in më holre tö ò min “öt ṙāngen cha.” (Sal. 9:10) Mihôiṅ ayī-ö ṙātö-ellōnre in Yēsū kūö ò nö kēngö nômö re tö kūö hanangenlōn re tö hī. (1 Pīt. 3:18) Mihôiṅ inrē öi ṙātö-ellōnre tö minë tö kūchi aṅmat ngam Paipöl. Pò hī öi kôtamat tö minë inlēnö nö yanöölen hī.—2 Tim. 3:16, 17. w22.09 pěch 2 përa 1-2

Pōyen nup chehen ing panam tö mihôiṅ nö ṙamlōn tī tö hī, hö-ö pöri anū-ö nö kē-ěkūö hī tö ngam tökô-en ṙanamlōn, pò ngam tökô-en ṙanamlōn nö töng örheūheu. Hē Yēsū misī nö kētö ök minkahten nö ikui rôngö ngaich vë-eny nang hī anga-aṅ tö hī öi sitih inlahen öi teūngen tö ngam tökô-en ṙanamlōn. Ngöṙô anga-aṅ, “Tökôlò yin vē tö ha-euk tö inchō-okūöre tö ngam Tēv.” (Mët. 5:3NW) Akahakūö ang Yēsū tö hī öi töngatī vinī-i tö ngam Tēv. Tö hòṅ haköp inlahen ò ayī-ö tö hòṅ ha-öinyan inrē. Yēḵ hī min ngatī inlahen ngaich möl min ayī-ö teūngen töm tökô-en ṙanamlōn. Pò Yāvē “nö Tēv ṙanamlōn” lökten yēḵ hī öi ha-öinyan ngaich ṙamlōn min ayī-ö. (1 Tim. 1:11) Ngaich öi min öi öt ṙamlōn yěn pōyen nup kanihngen hī? hö-ö. Ngö ṙô ök Yēsū nö vënyö inlahen yip “Tö haṙīvölōn” Tö cha nö mihôiṅ inrē cha-a nö ṙamlōn. Cha-a inrē më tö pōyen kanihngen tökūöre nö hakihtuṙen tö kūö nup tölöök la-en re. (Mët. 5:4, 10, 11) Mikahtö elnang hī ang Yēsū tö inlahen hī yěi hòṅ teūngen töm tökô-en ṙanamlōn, nö rö-ö nöng kūö hī öt hanaktuṙen hēk öt kanihnguṙen inrē. Teūngen pöri ayī-ö töm tökô-en ṙanamlōn yěi haköp inlahen ngam Tēv ha-öinyan inrē hēk ṙūöhtöre öi in ò.—Yāk. 4:8. w22.10 pěch 6 përa 1-3

Holtö mikah elmat re öm la-evṙen. Yēḵ ngòh tarik nö holtö mikah-elmat re nö ṙô-òvö, ngaich ṙātö-ellōnre min yip tahëng nö in ò pön akahakūö anga-aṅ tö öp ṙētak ṙô re nö öt ṙô-òvö hēk ihē nö ṙô-òvö. (Mum. 3:7) In e mikahkūö ayī-ö tö hī öi hēṙu öi ötkô öi ṙô-òvö. Töi chumkūöṙen tö inlahen öp ihih minṙöinylen. Ōtre yin minṙöinylen aṅ el ök tahëng māṅ, nö havëkö inyööken re nö in ò pön tö aṅhavin anga-aṅ tö ekspirīön re. Hěng tak öp minṙöinylen aṅ el ngam māṅ nö vënyö inlahen ò. Chumkūöṙen anga-aṅ tö hī öi ötkô öi vënyö inlahen yip aṅ el ngam tahëng māṅ. Ngam minṙöinylen nö chumkūöṙen tö minë ṙô re ngaich öt vë-eny nup ṙô anga-aṅ nö in yip tahëng pön höng in re tī. Lökten yik minṙöinylen aṅ el minë māṅ nö ṙātö-ellōnre, nö örhō min anga-aṅ nö vë-eny inlahen ngam māṅ nö in minë tahëng māṅ. Lökten cha-a nö milēḵṙen tö ò. Yēḵ öp tarik inrē nö tökô-òṙô ngaich ṙātö-ellōnre ayī-ö öi in ò.—Efi. 4:25; Hep. 13:18. w22.09 pěch 12 përa 14-15

Yēḵ ngam ‘tökô-en mikah nö pōitô nö ayôra nö el talöökö,’ ngaich pōyen yip tarik tumlupngö elnang re pön sō nö hang. (Inch. 1:20) Lūöi kangen yip tarik tö sō nö hang minë tökô-en mikah ngam Tēv. Cha-a yip “töt akaha,” ‘tö miyëḵ’ hēk “tökulō-ov.” (Inch. 1:22-25) Më “töt akahaṙa tarik” ilööṙen yin nö lō-ongkūö nö in minë ṙô yip tahëng. (Inch. 14:15) Lāku ṙôken ngaich tarik töngamuh ikūö ngih panam hamang chööngö më mahayöng hēk më yōm tinlööken inrē. Nup töng ṙô cha nö vë-ekūö cha ilööṙen cha-a nö hāngö u. Unôichngöre pöri cha-a nö akahalōn töre nöng halō-oikūö, ngaich haṙivlōn cha-a. Ōt pöri yip töng öt lökngöre, höng hòṅ köpsören cha-a nö töt akahaṙa. Pön ṙamlōn cha-a nö chūkörit më yöngkūöre. (Yar. 5:31) Pōyen inrē yip tarik tö sō nö hang ṙô ngam Paipöl. Löng minë la-en kahëken cha tölōn cha. Hö-ö in ayī-ö hòṅ halöngngenre öi sā inlahen yip tö ngatī, yip töng tamölngenre nö öt akahaṙa!—Inch. 1:32; 27:12. w22.10 pěch 19 përa 5-7

Pōyen nup inlēnö hī löktö in ngam söngkötön Yāvē hòṅ hī öi öt pala-aiṙen, hōtu inrē ayī-ö öi kētö minë fūn nömpör re öi in më minṙöinylen tö ngam kamtö chūök hī inrē hòṅ cha nö fūnken hī el ṙētak kanihngen. Pī-a öm teūngen tö inlēnöre tö hī öi höng ngöh öi i patī hēk ṙāngö ngam patīre öi chu in nup chūökö tahëng. Vënyu nang in inrē tö hī min öi sitih inlahen öi teūngen tö nyā-a kūöre hēk sitih inlahen inrē öi hayööken yip tahëng. Yēḵ hī öi hang në tö ngatī inlēnö ngaich ötkò-òngvah min ayī-ö hēk öt kihngen inrē min më minṙöinylen. Ötkô ayī-ö öi vītö kanihngen më mahayōmken hī. (Hep. 13:17) Ōtre yip ṙāmangö kamngö chūökre prötör sistör tö kūö minë tö faltöre kanihngen, ngatī inlahen yik raneh senchūri, ik sā më Kristīön nö ötlēkaṙen lökten ngaich cha-a nö parāti, öp töng kamngö chūök cha pöri ‘ahangkö ngam tölöök inhānga cha-a.’ (Inl. 8:4) Ngatī inlahen töngamuh më prötör sistör nö chuh in nup tahëng chūökö nö ahangkö ngam tölöök inhānga nö in nup tufömngöre chūökö. Öt ṙāngen minë töhěng mīting inrē cha-a. Kūö cha nö örheūheu nö la-evṙen nö in ngam inhāngkö, öt yahlö mufē ngaich cha-a tö minë kanihngen re. Haköp matre cha-a nö in ngam Pūlngö ngam Tēv teūngen cha-a tö lanāmöre hēk ṙamlōn inrē. w22.12 pěch 19 përa 12-13

Pōiṙāi ön ngòh tö hěngtak tarik nö imat Yāvē. Hē Yēsū nö tīnngen yik tanīnöṙô nö ahangkö ngam tölöök inhānga, ngaich hareuskö alaha cha anga-aṅ hòṅ cha nö öt vöö yěn ötlēḵkaṙen. (Mët. 10:29-31) Hachō elmat cha anga-aṅ tö minë kun chehechōn, minë tö chöngṙen mineūkö nö i Israel. Töng öt uroh minë chehechōn nö töpōiṙāi inuk ṙētak Yēsū misī. Ngö ṙô pöri anga-aṅ nö in yik haköptöre: ‘Öt hĕng hang nòng min tösuktöre nö el tumlat, nö töt mikahngen ngam Yöng.’ Ngö ṙô hēk anga-aṅ nö in cha: ‘Mötlö yin yī-ö tö töṙōlnòng kun chehechōn.’ Ngatī ṙô ang Yēsū nö hōten yik haköptöre nö ṙatö-ellōnre tö Yāvē nö pōiṙāi mat tö cha. Lökten yēḵ cha min nö ötlēḵkaṙen ngaich mihôiṅ cha-a nö öt pa-ekūö. Yěn meuk minë chehechōn min cha-a yěn ahānga, ngaich fē-ělre tö ṙô Yēsū nö haköpten cha. Lökten yěm hēṙu öm meuk nup kun chehechōn ngaich hòṅ köplōn më-eṅ tö Yāvē nö pōiṙāi mat tö meh. Kô-en in öi “mötlö tö minë töṙōlnòng kun chehechōn.” Köplōn tö Yāvē nöng in meh, pòrô min öm hakihtuṙen, öthō min öm pa-ekūö tö yip la-alre. w23.03 pěch 18 përa 12

Yěn ōt nup kanihngen yamīhen hī. Tö sā hī, yěi löhlö tī tö ngam kinmānöre hēk yěn kunyah elmat më aṅ patī hī tö hī. Lohten nö ōt nup kanihngen hī tö maṙò-òten, ngaich mihôiṅ haṙivlōn hēk ngölōn tö u nöng öt kinheūtu. Hē e min ngam Sī-ö nö ma-anyre nö vīlö ellōn hī, öi ngölōn, hangenlōn ang Yāvē tö chu hēk hö-ö ṙöng. Mihôiṅ inrē min öi ngölōn tö në kanihngen hī nöng löktö in ngam Tēv hēk ngam söngkötön ò. Ngatī inlahen ngam Sī-ö misī i nuk ṙētak yik aṅ Israel. Ik hē cha nö haköövö nö i Aikup, ngaich ṙatö-ellōnre sin cha-a tö nā Môsös nā Āròn nö tahīntö tö Yāvē nö ṙamānYěn cha. (Man. 4:29-31) Unôichrit e ngaich Fërō nö pōyěn kahëti tö la-en yik aṅ Israel, ngaich vītö fālen nā Môsös nā Āròn ngaich acha-a. (Man. 5:19, 20) Haṙivlōn in tö inlahen tī më aṅ Israel nö vītö fālen minā tarik ngam Tēv më chūök cha nö hayönglenre. Yēḵ meh marò-òten la-al minë kanihngen re, ngaich vë-eny nup ṙô ellōnre më-eṅ in Yāvē ngaich ṙātö-ellōnre in ò tö min nö hayööken meh. w22.11 pěch 15 përa 5-6

Yāvē an kamë-ekūö hī tö ngam nômö. Lökten yēḵ öp töhěng tak tarik nö kapah ngaich mihôiṅ hēk ang Yāvē nö havantö ngam nômö ò. Ik sā ök tafīösi aṅ Sērefāt nö kapahlöng tö ök kūönre, ngaich kētö kumlēḵ Ēlaicha ang Yāvē nö ha-aṅlen ök kūön ò. (1 Rā. 17:21-23) Ngatī inlahen inrē anga-aṅ nö kētö kumlēḵ pròfět Ēlaisa nö ha-aṅlen ök kūön ök yöngnyīö aṅ Sunēm. (2 Rā. 4:18-20, 34-37) Pōyen nup imat ngam Paipöl tö vënyu nö löktö im inyöökenre tö Yāvē cha-a nö mihôiṅ nö ha-aṅlen yip tarik. In e mikahkūö ayī-ö tö Yāvē nö īnu tö kumlēḵ re nö ha-aṅlen yip tö kapah. Kē-ěkūö Yēsū inrē anga-aṅ tö ngam kumlēḵ. Lökten ik sā ò nö ing panam, ngaich ha-aṅlen yik tarik anga-aṅ. (Yôh. 11:23-25, 43, 44) Kilēḵngôre inrē ang Yēsū “hē yip taṙòkhöre el anūlö nö hang ṙô Ò min, ngaich kunyī-inyre.” Ngaich töngamuh Yēsū nö el halīöngö ngaich ‘ṙòkhöre minë chööngö nö kētu nö in ò, el halīöngö, ing panam inrē.’ Lökten anga-aṅ nö mihôiṅ nö hateungngö ngam kinlēḵngôre nö ha-aṅlen yip tarik min ngaich kē-ěkūö cha tö ngam nômö tö örheūheu aṅ.—Mët. 28:18; Yôh. 5:26-29. w22.12 pěch 5 përa 10

Löktö in e mikahlōn ngaich ang Isikīěl tö yip tarik min nö öt ṙòkhöre nö hang ṙô ò. Sā ṙô ngam tövë-evkūö töngamuh, rö-ö pöri nö kūö ò nö öt heuveū-en tö ngam la-enre, tön kūö cha nö sō nö hang ṙô Yāvē. Vë-eny nang Isikīěl inrē ang Yāvē töre min yěn kētö sācha yip tarik, ngaich möl min cha-a nö fē-ělre töre nö ‘inu misī tö pròfět.’ (Isi. 2:5; 33:33) Teūngen ang Isikīěl tö hanöhlöre yēḵ ò nö hang ṙô Yāvē, ngaich öt pa-ekūö ngaich anga-aṅ nö keuheūtngö ngam la-enre. Öt pa-ekūö in inrē ayī-ö töngamuh kūö hī öi akahakūö tö Yāvē nö anga-aṅ tamīnten hī öi ahangkö ngam tölöök inhānga. Kaheukö hī inrē ang Yāvē öi “vamënyen” ò. (Isa. 43:10) Sitih inlahen pöri ayī-ö yěn ōt yip tö hòṅ asökngö inlahen hī öi ahangkö ngam tölöök inhānga, ötkô ayī-ö öi vöö tö cha pöi hòṅ köpölōn tö Yāvē nö anga-aṅ tamīnten hī hěnghöre holṙen hī inrē. (Isi. 2:6) Ngaich sā ò misī nö sōten Isikīěl nö pa-ëkūö, ngatī anga-aṅ töngamuh nö sōten hī inrē öi pa-ekūö.—Isa. 44:8. w22.11 pěch 3-4 përa 4-5

Ngatī inlahen in ayī-ö töngamuh öi hameuktöm ṙinātö-ellōn re öi in yip minṙöinylen hēk in yip mahayööken töla-evṙen el ngam māṅ. Kô-en in öi kētö nöönyö Yāvē tö ò nö halēnlö më prötör më tö chumkūöṙen tö hī. Hòṅ sitih inlahen öi hòṅ asīnken më prötör öi sā cha öi chūök ṙinātö-ellōn? Hāngenlōn in tö yip prötör sistör re lökten öi hatönkö inlahen cha. Hòṅ chumkūöṙen inrē ayī-ö tö hī öi ötkô yah hötre in minë kanahngen cha la-en. Ōtre yik Kristīön ik raneh senchurī el ngam māṅ “tamūölngö ṙô, kahòkkö nup töt ṙô cha öre” inrē. (1 Tim. 5:13) Lökten ayī-ö öi hòṅ chumkūöṙen, öi ötkô öi asīnkö inlahen cha. Yěn hěng tak öp vamë-eny nang hī tö öp ṙô tötkô nö vënyu, ngaich hòṅ in re tī ayī-ö tö e. Tö sā öp sistör öre yěn vënyö öp invah re hēk kanihngen re inrē, ngaich ngö ṙô anga-aṅ nö in meh tö meh öm in re tī tö e. Ngaich ngatī inlahen më-eṅ öm ötkô öm vënyen e i tahëng. w22.09 pěch 10 përa 7-8

In ngam ëlô krīk “tumfömlö ngam mufēre”, tö ngö manah angū-ö tö hī öi hòṅ haṙīngö minë mufēre. Tö sā öp patī hī öre yēn chahu-iyö, ngaich hö-ö min ayī-ö öi höng havai öp lamā-uk, pöi vī ngam patī öi kēnyen nup hötṙeh i alaha e ngaich vītö nup tufömngöre. Ngatī inlahen ayī-ö öi ötkô öi höng havai nup la-enre. Pöi hòṅ örheūheu öi ngëichköre yěi kô-en öi halööktitre. Hòṅ hī öi asā minë inchöngtenre lamöktö in Yāvē. Rö-ö ayī-ö öi höng hěngheuh öi halööktit minë mufēre, pöi hòṅ örheūheu. Yē hī min öi hetlöre, ngaich örheūheu min ayī-ö teungten öi kēken nup la-en tö ṙamlōn tī tö Yāvē. Lökten ayī-ö töngamuh öi hòṅ mā-anyre öi haṙamlōn Yāvē. Chumkūöṙen tö ngam ṙô Pôl in ngam Rōma 12:2 Yē hī öi ‘tumfömlö ngam mufēre’ ngaich in e min ayī-ö öi akahakūö töp kuilōn ngam Tēv. Pöi mihôiṅ öi ilööṙen sā mufē ngih panam. Lökten nö töt ṙanāngen ngam inlahen hī öi hòṅ ngëichköre öi ui höng sāḵta la-en öi ing panam hēk kô-en hòng minë la-en hī nö sā nup kuilōn ngam Tēv. w23.01 pěch 8-9 përa 3-4

Yěn yih minë kanihngen nö ikui hī, ngaich ngö mufē hòng ayī-ö tö Yāvē nö kēngen u hòṅ hī min öt yaha kanihngen? Hö-ö, öt ngatī ṙô an ngam Paipöl nö vë-eny nang hī. (Mum. 8:9; 9:11) Vënyu nang pöri ayī-ö tö hī yěi kihngen, ngaich akahakūö ang Yāvē tö hī öi sitih inlahen öi la-al u ngaich yē hī pöri öi havëkö inyöökenre öi in Yāvē, ngaich hang ṙô hī anga-aṅ. (Sal. 34:15; Isa. 59:1) Öt höng angū-ö, pön hayööken hī ang Yāvē öi la-al minë kanihngenre hòṅ hī öi mihôiṅ tö minë la-enre. Nö sitih inlahen tī anga-aṅ? Yěn yih minë kanihngen nö in hī ngaich kētö inreuskö alaha hī Yāvē hēk hangönken hī inrē hòṅ hī öi la-al minë kanihngenre. Örheūheu an nö lööngö ṙētak tī nö hareuskö alaha hī el ṙētak hī öi lōnu tö inyöökenre. (2 Kòr. 1:3, 4) Ōtre hòng kanöpölōn meh inuk ṙētak meh kētu inreuskö alaha tö Yāvē hēk kētu nganönö inrē el ṙētak kuilōn meh öm hòṅ hayöökaṙen? Hēṙu in ṙung yē minë kanihngen nö kirööngen nö in hī, ngaich öt akahakūö ayī-ö tö inlahen Yāvē nö sitih inlahen tī nö hayööken hī. Yěi unôichngöre pöri öi afēken u, ngaich akahaiṙen ayī-ö tö Yāvē nö ṙapken hī. w23.01 pěch 17-18 përa 13-15

Anga-aṅ ngam “insā ngam töṙeūla.” Sā mineukö ngam tö satö kui anga-aṅ töṙeūla, hěng pöri pön turëṙö kaha anga-aṅ. Vënyu inrē anga-aṅ nö “hinëvhöre” tak nö rācha. (Inm. 13:14, 15; 17:3, 8) Eūka inlahen anga-aṅ ngam “rācha” nö hö-öv sin min nö rahëichtakūö ngaich havantöre min nö hēk. Löngta angū-ö nö in ngam Yunaitet Nēsön. Kaheukö sin ngam minë-eny ò nö Līk òf Nēsön. Chatngen sin anga-aṅ hē ök innëtö tökiröng kinyūngö. Hēk pöri anga-aṅ nö havanlöre ngaich kaheūkö töngamuh nö Yunaitet Nēsön. Ṙôkhöre min minë töṙeula, acha-a më mahayöng nö tölṙô yip tarik nö la-al më tarik ngam Tēv Yāvē. Ngatī inlahen tī min ngam töṙeūla nö ‘hamūl më rācha’ nö in ngam “tökiröng sakamö ngam Tēv” ngam Armakētòn tö ṙô hī.—Inm. 16:13, 14, 16. w22.05 pěch 10 përa 10-11

Hē Yēsū ngaich nö heuveū-en nö haköp mat minë tölömö līpöre, akaha elnang ngaich anga-aṅ tö minë tö kūichi imat ngam Töhet Līpöre, hangenlōn inrē tö u, ngaich kēkö kaha minë haköpre inrē. Löktö in ngih inlahen ò in öi akahakūö, hē Yēsū nö ṙòmöng 12 höiny samyeūheu. Ngaich ūichhaka anga-aṅ nö ihôi yip tö pōihöl mahaköp yik tö akahakūö tö minë chööngö Môsös. Ngaich pöri cha-a “nö pingangkūö tö mikah Ò [Yēsū], ane inrē huneū-euṅ ṙô Ò nö sapṙô.” (Lūk 2:46, 47, 52) Yēḵ hī inrē min ayī-ö örheūheu haköp Ṙô ngam Tēv, ngaich sīöpö mikah elnang min ayī-ö hēk ṙūöhölre ṙôken ngam hanangenlōn hī tö e. Mihôiṅ in haköplu öi in minë ṙô Yēsū. Pōyen yik tarik inuk ṙētak ò tö akahakūö tö minë chööngö. Tö sā yik kamūich, Feresī hēk Satukī inrē. Höng haköp ngam Ṙô ngam Tēv cha-a, öt akaha elnang pöri tö manah ṙô nuk vahë-ekūö re. Minë ṙô Yēsū nö in cha, in e ayī-ö öi akahakūö tö minë tö lūöi tö mihôiṅ öre nö inlahen cha, hòṅ cha nö yöölen nö in minë haköp re. Yēḵ hī min ayī-ö chumkūöṙen tö minë ṙô Yēsū, ngaich (1) akah elnang min ayī-ö tö minë vahë-ekūöre, (2) teūngen tö minë töpōiṙai kanô-en, hēk (3) asīnken u min ayī-ö öi inup tinrīken re. Anū-ö nun min kahakkö hī in ngih ātiköl. w23.02 pěch 8-9 përa 2-3

Pōyen nup mihôiṅ tö pasū-utī tö ngam innôlö hī öi in Yāvē. Tö sā ngam inyikngö kikānö hēk hayikngö kikōnyö, töpōivat kin-eūtö hēk töm töyahlö ṙôkvat kam-eūt, töpōivat nö nyā, tö chökhuṙô yěn ṙô-òvö, tötlöngö hanôl, mineūkö nup sinimā famël hēk meuk minë tötlöng nyat hēk vitiō inrē. Hòṅ ṙūöhöngöre in tö u anū-ö tö ngatī. (Sal. 101:3) Pön öt ṙākenre ngam Sī-ö nö hòṅ tiṙōl ngam innôlö hī öi in Yāvē. (1 Pīt. 5:8) Yēḵ hī min öt hīnöre ngaich mihôiṅ min ngam Sī-ö nö chaphöt minë tötlöng nö elkūilōn hī. Tö sā në, mihôiṅ min öi ṙānyngö tö yip tahëng, miyôny-aṅ, michūṙen, yikngö chehen holre, tāilölōn inrē töre, asīöp lanīnöre öi i holre hēk kunyaha elmat inrē tö holre. (Kal. 5:19-21) Yēḵ hī pöri öi öt ilööṙen öi kēnyen u nö ṙā-ang elkuilōnre, ngaich sīöplöre min anū-ö nö sā kun chōn tö kapahukūö nö in hī. (Yāk. 1:14, 15) Ngih inrē kô-òren pinlāḵngen töt meukö, yěi ötlöngö hanôl. Kô-en in tö hòṅ vāyö inlahen hēk hòṅ milēḵṙen tö holre, hòṅ köplōn pöri ayī-ö töre yěi yahlö inlahen min hanôlö cha, ngaich sā tinrīken cha min ayī-ö. (1 Kòr. 15:33) Lökten öi hòṅ köplōn tö ṙô Yēsū, öi hòṅ chumkūöṙen töre. Ngaich öthō min öi yahlö inlahen öi hanôl yip tö ngatī, yip tö sō tö minë tölöök inchöngten kahëtö Yāvē. Pöi akahakūö tö u nö vītö kanihngen hī min.—Lūk. 21:34; 2 Kòr. 6:15. w23.02 pěch 16 përa 7; pěch 17 përa 10-11

Ik sā meh ngaich öm mikahtökūöre tö Yāvē, haköp inlahen ò inrē ngaich ṙūöhölre ṙôken ngam hanangenlōn meh tö ò. Ngönlöre inrē ngam innôlö nā an in höö. Lōnu inrē më-eṅ tö ngam innôlö nā nö köp. Lōnu ang Yāvē tö meh öm haṙamlōn ò, haröhtöre inrē öm in ò. (Inch. 23:15, 16) Kò-òren öm inup ṙô re hēk inlahenre öm ngatī inlahen. Löktö in minë tinrīken meh min inrē öi meuk ngam hanagenlōn meh tö Yāvē, tö meh inrē öm hòṅ haṙamlōn ò. Töt insā-av nun anū-ö nö la-en kahëken meh. Hòṅ sitih inlahen öm öreh hòn meūkö ngam hanangenlōn meh tö Yāvē? Ngam raneh, mihôiṅ öm vë-ekūötēv öm vë-eny re hòṅ keuheūttöre öm kētöre öm löklōn ngam Tēv. (Sal. 40:8) Ngaich hameuktöre öm ikūö yip tömaṙôngö öm kē ngam vinôkö. Ngaich angū-ö min nö tökiröng nö ṙētak meh mihôiṅ öm ṙamlōn. Kūö e nö ranehlöröön ngam tufömngöre tinrīken meh. Hö-ö min ngaich më-eṅ höng chö-önytöre, chö-önyten tö Yāvē pöri öm aṅ. (Rōm. 14:8; 1 Pīt. 4:1, 2) Lohten pöri öm ngölōn, tökiröng ön ngih nö la-en, pön kô-en angū-ö nö ngatī. Uh pöri öm pa-ekūö, tön öt ōtngöre tövai nö tinrīken meh nö tö sā e. w23.03 pěch 5-6 përa 14-15