TÖHAKÖÖPÖ ĀTIKÖL 4
Kūö Yòh Öi Yihtökūö Im Infēkö Kinpaha?
“Ngatī tī pöichö haköpkölōnre tö Chu.”—LŪK. 22:19.
TINKÖÖKÖ 20 Kētöm Tölngö Hanangenlōn Më-eṅ Kūönre
RAHËICHTAMATa
1-2. (a) Yip hol hī tökapah, Ihē öi fēken cha? (b) Ik tö hěng hatööm urěhēkūö kinpaha Yēsū asuh ök la-en ò?
PÒRÔ nö marò-angen kinpaha yip holmaneuk hī, söönen ayī-ö öt vachngö tö cha. Mööhë yē hī fēken ngam ṙētak kinpaha cha.
2 Tö mötlö Pöri Yēsū nö in hī. Lökten öi fēken ngam kinpaha ò. Köönyu ṙôken yamih tökuö nö fēkö ngam kinpaha Yēsū. (1 Pīt. 1:8) Ṙen öi ngatī inlahen kūö ò nö kēngö nômöre nö ṙāi hī ṙa-ang im tökööl töm kinpaha. (Mët. 20:28) Lōnu Yēsū tö yip haköptöre nö fēken ngam kinpaha ò. Lökten ik tö hěng hatööm urěhēkūö kinpaha ò nö halēnlö öp nyina-āṅ ngach tölṙô yip haköptöre anga-aṅ: “Ngatī tī pöichö haköpkölōnre tö chu.”—Lūk. 22:19.
3. Asūp min kahakkö hī ing ātiköl?
3 Yip tö hachāmö el kui yip inrē ma-afēköm kinpaha Yēsū më mameukken re nö chuh el halīöngö. Pōyen pöri yip mameukkenre nö aṅ nö ikūö ngih panam. In ngih ātiköl in min mikahtökūöre tö në tö nët kīteūm nö kūö yòh cha-a nö fēken ngam kinpaha itö hēng samyeūheu. Asūp yanöölen hī yěi yih tökuö im infēkö kinpaha. Ta-a chěi töi urěh mikahtökūöre kūö yòh āch vē töhachāmö elkui nö yihtökūö im infēkö kinpaha.
KŪÖ YÒH ÖICH VĒ AṄ NGAM KITEŪM NÖ YIHTÖKŪÖ NÖ IM INFĒKÖ KINPAHA
4. Kūö yòh ach më töhachāmö elkūi nö kē ngam ròti töm vain?
4 Yih yin më töhachāmö elkui itö hěng samyeūheu i Infēkö kinpaha Yēsū nö nyama ngam ròti òk ngam vain inrē. Kūö yòh? yěi hòṅ teungen töp sanapṙô ngach fēken Yēsū urěhēkūö kinpaha ò. Kinheūten cha nö kēken ngam pāska halēnlö ngam nyina-aṅ anga-aṅ ngam tökaheūkö nö nyina-aṅ holkūö ngam Mā. Kē-ěkūö yik tö 11 tak mahaköp anga-aṅ tö ròti vain inrē ngaich ngö ṙô nya-aṅ e ôkö e inrē. Nët nup kinlēḵngô Yēsū nö in yik mahaköp, tufömngöre kinlēḵngô, Pūlngö kinlēḵngô.b (Lūk. 22:19, 20, 28-30) Kūö në kinlēḵngô yin më tö 1,44,000 nökatöllöngö nö chuh el halīöngö nö rācha hēk makūökūönṙô. (Inm. 5:10; 14:1) Lökten yin nöng më töhachāmö elkui,c nyama ngam ròtī òk ngam vain inrē.
5. Asuh öp mikahkūö më töhachāmö elkui töp maheukköre?
5 Ngih töhěng inrē chöönyö më töhachāmö elkui nö yih tökuö im infēkö kinpaha. Pò cha nö fēken ngam maheukköre. Tö ngam Tēv Yāvē nö kē-ěkuö cha tö ngam tötchanuhṙen nômö hēk tö ngam töt chahu-uyö alaha cha inrē nö el halīöngö. Holṙenre min cha-a nö löklōn Yāvē tö Yēsū tö yip tö ngach nö chuh el halīöngö töhachāmö. Kòta mat min cha-a nö meukkūö Yāvē. (1 Kòr. 15:51-53; 1 Yôh. 3:2) Akahalōn yin më töhachāmö elkui tö cha min nö teūngen töm tö örheūheu-aṅ nômö yē cha nö söl kinpahare nö köp nö i linöökö lōn Yāvē. (2 Tim. 4:7, 8) Ṙamölōn cha-a nö fēken ngam maheukköre im infēkö kinpaha. (Tai. 2:13) Kūö yòh më ‘tahëng kiteūm’ nö yihtökūö nö im infēkö kinpaha? (Yôh. 10:16) Ta-a töi ngëchköm chö-öny cha?
KŪÖ YÒH ÖICH VĒ TÖT AṄ NGAM KITEŪM NÖ YIHTÖKŪÖ IM INFĒKÖ KINPAHA
6. Kūö yòh nö öt ṙa-ang samyeūheu më tahëng kiteūm nö yihtökūö nö im infēkö kinpaha?
6 Hö-ö yin më töt aṅ ngam kiteūm nö kē ngam töhet inmūlkūö. Höng yihtökuö pöri nö im infēkö kinpaha Yēsū nö holtö ṙanamölōnre. Ik 1938 ngam invëtö cha nö yihtökūö nö im infēkö kinpaha. Sā ṙô ngam Chuökamahati-E Māch 1, 1938: “Invëtö më töt aṅ ngam kiteūm nö meuk ngam infēkö kinpaha Yēsū. . . . Ṙanamölōn angu-ö nö in cha.” Sā ṙanamölōn öp yamih tökūö nö i inpīhö, ngatī ṙanamölōn cha-a nö yihtökūö nö im infēkö kinpaha Yēsū.
7. Asuh öp yanöölen më töt aṅ ngam kiteūm nö hang ngam minkahten im infēkö kinpaha Yēsū?
7 Sā inlahen më aṅ ngam kiteūm yin më töt aṅ ngam kiteūm nö yihtökūö nö im infēkö kinpaha nö fēken ngam maheukköre inrē cha-a. Hangihtöre inrē töm minkahten inlahen tī Yēsū tö yip hol ò rācha tö tī cha nö halēnlö inlahen yip tarik ip tö hěngkööny samheūheu. Ngaich vī ngih panam min nö peretāis ngaich hiṙeūt-hiṙeūtkö ti re min nö ha-etlen yip tarik. Yē cha nö fēköṙô ngam Isayā 35:5, 6; 65:21-23; hēk Inm. 21:3, 4. Ngaich ṙamlōn cha-a sīöplöre inrē ngam nganönö ṙinatö-ellōn cha töm inlahen cha inrē nö i linöökö lōn Yāvē.—Mët. 24:13; Kal. 6:9.
8. Asuh öp chöönyö më töt aṅ ngam kiteūm nö yihtökūö nö im infēkö kinpaha?
8 Ngih tö hěng inrē chöönyö më töt aṅ ngam kiteūm nö yihtökūö nö iminfēkö kinpaha, pò cha nö hangenlōn tö më aṅ ngam kiteūm ngaich hôṅ holṙen cha inrē. Urěhnyi vinë-enyi nö i mat ngam Paipöl inlahen ngam innòlö cha. Ta-a töi ngëchken në tö urēhangen vinë-enyi.
9. Sakariā 8:23 asuh öp mikahkūö hī im tö urěhngyi ineūka inlahen ngam innòlö tö më töt aṅ ngam kiteūm tö më aṅ ngam kiteūm?
9 Vë-evkuö Sakariā 8:23. In ngih tö urěhnyi ineūka in akahakuö tö hanangenlōn më töt aṅ ngam kiteūm tö më aṅ ngam kieum. Ngòh tö “hěngtak Yahūti” ṙôtö më töhachāmö elkui. (Rōm. 2:28, 29) Hēk “yip tösömtak tökeuheut töre ëlô pumnamö tarik” ṙô tö më töt aṅ ngam kiteūm. ‘Kētötī re nö i kinfan ngam Yahūti,’ tö ngö manah tö më töt aṅ ngam kiteūm nö holṙen më tö hachamö elkui nö i ngam töhet vinë-ekūö Tēv. Lökten cha-a nö holṙenre nö fēken ngam kinpaha.
10. Sitih taneungti kuö ngam tö urěhnyi ineūka tö Yāvē im Isikīěl 37:15-19, 24, 25?
10 Vë-evkūö Isikīěl 37:15-19, 24, 25. In ngih perakraf öi akahakūö töp hinëngö ihòi më töhachāmö elkui tö më töt aṅ ngam kiteūm. Në tö nët chōn urěhnyi ineūka anu-ö. Hěng ngam chōn “Yūta” (ngam tö katöllöngö Racha aṅ Israel) Ngam tahëng chōn “Ifrēm.”d Ngam chon Yūta ṙötö më chamuh el halīöngö. Ngam chōn Ifrrēm ṙôtö yip mameukkenre nö aṅ nö ikūö ngih panam. Në tö nët chōn vītu cha-a nö hěng tö Yāvē nö elkatòh ngam Rācha Yēsū nö holṙenre nö löklōn ngam tēv Yavē. Yē më töhachāmö elkui hēk tö më töt aṅ ngam kiteūm nö yihtökūö nö im infēkö kinpaha itö hěng samyeūheu höng “hěng kiteūm” cha-a nö ël katòh ngam “töhěngtak yōm sīṅp.”—Yôh. 10:16.
11. Më tö vënyu ‘sīṅp’ im Mëtiv 25:31-36, 40 asuh ap la-en cha nö holṙen më kahem Yēsū?
11 Vë-evkūö Mëtiv 25:31-36, 40. Minë inchō-oṙô Yēsū ‘sīṅp,’ ṙô tö yip tölöök tarik töngamuh yip mameukkenre nö örheūheu aṅ nö ikūö ngih panam yip töt aṅ ngam kiteūm. Cha-a yin tö keuheūtngöre chūök nö ing panam nö ahangkö ngam tölöök inhānga nö holṙen yip kahëm Yēsū.—Mët. 24:14; 28:19, 20.
12-13. Yip töt aṅ ngam kiteūm asuh nup inrē la-en cha nö holṙen më kahëm Kristū?
12 Urěhēkūö infēkö ngam kinpaha nö kēkaṙen ngam kömpěn nö keuheūt ngöre chūök nö inë Panam. Vē töt aṅ ngam kiteūm yin kamëtöre nö in e angu-ö la-en havëtö yip tarik cha-a nö yihtökuö nö iminfēkö kinpaha. Angu-ö la-en cha nö holṙen yip kahem Kristū. (Vë-ekuö ngam pòks “Lēn Töhëchṙen Öm?”) Öt aṅhav në māṅ nö ṙôkhöre tö yip töhachāmö elkui, söönen cha-a nö halēnken ngam infēkö kinpaha. Angu-ö la-en cha nö holtö ṙanāmölōn re nö holṙen më kahëm Kristū. Akahalōn yin töre yěn holṙen cha, nöng sa hamòlṙen Yēsū.—Mët. 25:37-40.
13 Ōt nup muh inrē tahëng chöönyö hī yihtökūö im Infēkö kinpaha. Ta-a chěi tö mikahtökuöre tö u?
TÖ ŌT HĒK CHÖÖNYÖ HĪ YIHTÖ KŪÖ IM INFĒKÖ KINPAHA
14. Asuh öp tökiröng hanangenlōn Yāvē tö hī hēk Yēsū inrē?
14 Hôṅ ha-öny nup tī Yāvē in tö Yēsū inrē. Pōyen nup tī Yāvē nö in hī kūö ngam hanangenlōn ò tö hī. Ngam tökiröng hanangenlōn ò nö kēten ngam töng hěng maneuk kūönre. (Yôh. 3:16) Ngatī inrē Yēsū nö hangenlōn tö hī, lökten anga-a nö holtö ṙanamölōnre nö kēngö nômöre tö pò kūö hī. (Yôh. 15:13) Ötrēhěn öi kô haṙīnngen minë tī cha nö in hī. Mihôiṅ pöri höng in minë tinrīken re öi hameuktö hanangenlōnre tö cha. (Kòl. 3:15) Yěi yih tö kuö im infēkö kinpaha angu-ö inrē inlaha hī öi ha-öny minë ti cha hēk hameuktöre öi hangenlōn tö cha.
15. Kūö yòh öng nö tö pōiṙāi ngam ṙāi ṙinanyi nö in më tö hachamö elkui tö më töt aṅ ngam kiteūm?
15 Tö pōiṙāi an ngam ṙāi ṙinānyö hī. (Mët. 20:28) Ngatī elmat yih më töhachāmö elkui, angu-ö löktö ngam maheukkö cha nö chuh el halīöngö. Ṙatö ellonre inrē cha-a nö im ṙāi ṙinanyi lökten Yāvē nö kě-ē cha nö kūönre. (Rōm. 5:1; 8:15-17, 23) Pōiṙāi ön inrē ngam ṙāi ṙinanyi nö in më töt aṅ ngam kiteūm. Ṙatö ellōn re inrē cha-a nö e lökten nö het nö ikuö ngam tēv, ngaich mihôiṅ nö löklōn ngam tēv, ngaich meukkenre inrē cha-a nö mihôiṅ min töp ‘tökiröng kanihngen.’ (Inm. 7:13-15) Yěn yihtökūö më an ngam kiteūm tö yip töt aṅ ngam kiteūm nö im infēkö kinpaha ngaich töhěng angu-ö nö inlahen cha nö ha-öny ngam tö kitaknyu maham Yēsū.
16. Kūö yòh öi ayī-ö yihtökūö im infēkö kinpaha?
16 Hôṅ hang chööngö Yēsū in ayī-ö. Ik hatööm isa Yēsū nö rěhlörit infēkö ngam kinpaha, ngaich kētö chööngö anga-aṅ: “Ngatī tī pöichö haköpkö lōn yīö tö Chu.” (1 Kòr. 11:23, 24) Ṙòkhöre öi hôṅ hang ṙô Yēsū, pòrô yip mameukken ren chuh el halīöngö hēk ing panam.
YANÖÖLEN HI YIHTÖKUÖ IM INFĒKÖ KINPAHA
17. Yěi yihtökūö im infēkö kinpaha sitih inlahen ayī-ö haröhtöre in Yāvē?
17 Hôṅ haröhtöre ayī-ö in Yāvē. (Yāk. 4:8) Yěi yihtökūö im infēkö kinpaha, ngaich fēken minë maheukköre ayī-ö kahetö Yāvē ngam ṙôkö ngam hanangenlōn ò inrē. (Yar. 29:11; 1 Yôh. 4:8-10) Yē hī fēken në tī Yāvē nö in hī sīöplöre min ngam hanangenlōn hī tö ò ngam innôlö hī inrē nö ngönlöre.—Rōm. 8:38, 39.
18. Yěi afēkö inlahen Yēsū asūp la-en ṙinūhlö alaha hī?
18 Ṙinūöhlö alaha hī asinken Yēsū. (1 Pīt. 2:21) Urěhēkūö infēkö kinpaha öi haköp inlahen ngam mana-aṅ afta Yēsū nö aṅ nö ikūö ngih panam töm inlahen ngam kinpaha ò töm anahlö ò inrē. Ngaich im harap infēkö kinpaha, im minkahten fēlöngö ayī-ö töm hanangenlō Yēsū tö hī. (Efi. 5:2; 1 Yôh. 3:16) Ngam hinôtö hī ‘asīnken minë tinrīken Yēsū ik sa ò nö aṅ.’—1 Yôh. 2:6.
19. Sitih inlahen öi yēi hôṅ köp imhanangenlōn Tēv?
19 Harūköre hakööpöre im hanangenlōn ngam Tēv. (Yūt 20, 21) Yē hī hang chööngö Yāvē, ahetlö ngam minë-eny ò haṙamlōn ò inrē, ngaich köp min ngam hanangenlōn ngam tēv nö in hī. (Inch. 27:11; Mët. 6:9; 1 Yôh. 5:3) Im inlahen hī yih tö kūö im infēkö kinpaha ngönlöre ngam kuilōn hī asīnken nup lōn ngam Tēv, mihôiṅ ngöṙô in Yavē, ‘lōnu chin örheūheu köp im hanangenlōn meh!’
20. Kūö yòh öi hôṅ yihtökūö im infēkö kinpaha?
20 Hôṅ ṙôkhöre ayī-ö yihtökūö im infēkö kinpaha itö hěng samyeūheu,pòrô öi mameukken re chamuh el halīöngö hēk ing panam. Kūö yòh ök Yēsū nö kapah tö pò kūö hī fēken e min ayī-ö ip infēkö kinpaha. Fēkö ngam hanangenlōn Yāvē min inrē ayī-ö kūö ò nö kēten ngam kūönre nö ṙāi hī. El ngih samyeūheu öp infēkö kinpaha. Tinneūi van 15 Ĕprěl 2022 tö lā harap. Hangenlōn in tö Yāvē hēk Yēsū inrē, lökten ta-a töi örheūheu yihtökūö i tö hěng samyeūheu im infēkö kinpaha.
TINKÖÖKÖ 16 Eū-eu Yāvē Chö-öny Töm Töhachāmö Elkui Kūön Ò
a Kaheuk samyeūheu ayī-ö ṙung öi hökkken ngam Infēkö kinpaha, pòrô öi mameukenre chamuh el halīöngö hēk ing panam inrē. In ngih ātiköl in min mikahtökuöre i mat ngam Paipöl kūö yòh öi yihtökuö im infēkö kinpaha hēk asuh öp yanöölen hī.
b Yĕi hòṅ ṙūötö mikahkuö re töm tufömngöre kinlēḵngô hēk töm pūlngö kinlēḵngô imat ngam Chūökamahati-(HI) Òktopör 15, 2014, pěch. 15-17 in ngih ātiköl “Ngaich Yin Min Pūlngö in Chu öi Kūönṙô.”
c ASUH ÖP MANAH E: Ngam manah yip töhachāmö elkui yip tö ōttit nö ing panam.
d Yěm hòṅ ṙūhtö mikahkūöre tö inlahen minë tö urěhnyi vinënyi öm in ngam līpöre Keuheūtngöre Chūök Nö Havanlöng Kinëken Ngam Tökô-en Nööinyö Yāvē!(HI), pěch. 130-135, perekrāf. 3-17.