Ngaich öm Më-eṅ Haköp Nup Tökeuheūtöre Inlahen Hī Höng Ṙamlōn Inup Töng Aṅ In Re?

1. Asuh öp manah ngam inlahen hī höng ṙamlōn in nup töng aṅ in re hēk asuh inrē öp töt manah e?

ṘAMÖLŌN öm më-eṅ in nup töng aṅ in re? Chumkūöṙen ön tö minë inkòlô re ngòh tarik tö ṙamölōn nö in nup töng aṅ in re, lökten ò nö ṙamölōn hēk öt piṙūtkuvö inrē töp yò-òv. Öt piṙūtkö nup töt aṅ in re anga-aṅ ngaich haṙivlōn, pò ò nöng ṙamlōn. Öt tö ngö manah pöri ngam inlahen ò ngaich min nöng öt hěng milòhò la-en tö kūö ò nöng ṙamlōn nö in nup töng aṅ in re. Pò ò nö hòṅ iṙūöhen nö kū-ö urěh ngaich afēkö nup tö hòṅ inlahenre hēk nö i linökölōn Yāvē. (Rōm. 12:1; 1 Tim. 3:1) Yēḵ ò nö öt teūngen tö nup la-en kuilōnre, ngaich sön anga-aṅ min nö öt halöngngen ngam ṙanamlōnre nö kūöṅngöre.

2. Asuh nup mihôiṅ tötlöng ṙòng ngam inlahen hī yěi öt ṙamlōn inup töng aṅ in re?

² Pōyen nun minë tötlöng ṙòng inlahen ngòh tarik yēḵ ò nö öt ṙamlōn nö inup töng aṅ in re. Lohten min anga-aṅ nöng öt inròhòvö nö la-evṙen tö kūö kuilōnre nöng hòṅ hamūl minë chehen inṙamlōn. Lohten inrē min anga-aṅ nö ulāya. Haṙivlōn in pò yip rīkre Kristīön ngaich nö ngatī inlahen. Lohten cha-a nö ngö mufē, ‘angū-ö ön ngih chehen lōn chu kē-ě chin ngaich,’ ‘ötkô takô chin hēk marò-òten hökken e,’ hēk ‘kē në chin sin pësare, unôich chin min haṙīnngen u.’ Tökööl pöri nö imat Yāvē minë tö sitih inlahen hī yěi ulāya, ngaich mihôiṅ nö lökngen in e ngam minë-eny ò nö chōchngöre. (Inch. 30:9) Rīkre yin inrē më Kristīön tö haṙivlōn kūöre nö öt teūngen tö minë kuilōnre la-en el ngam māṅ, ngaich ṙāngenre cha-a nö löklōn Yāvē. (Kal. 6:9) Ngamuh pöri intöönö, kūö yòh min nö ngatī inlahen ngòh tarik ngòh kamëtöre nö löklōn Yāvē? Yēḵ ngòh Kristīön nöng öt ṙamlōn nö inup töng aṅ in re, ngaich mihôiṅ min anga-aṅ nö kēken në tö ngatī tövaich fësla.

3. Asūp haköplö hī im Filipī 4:11, 12?

³ Mihôiṅ in ayī-ö ṙòkhöre öi höng ṙamlōn inup töng aṅ in re. Ngöṙô tī ang tanīnöṙô Pôl nö kūich: ‘Pön pòṙô öp tö sitih inlahen chu haköplu chū-ö töre öich höng in u ṙamlōn.’ (Vë-evkūö Filipī 4:11, 12.) Ik sā Pôl nö haköövö ngaich hē e anga-aṅ nö kūich ngih ṙô. Öt kūöṅngöre ngam ṙanamlōn ò hē e pòrô anga-aṅ nö hakihtuṙen. Ṙënten anga-aṅ nö ngatī inlahen pò ò ngaich nö ‘haköplu nö inup tö keuheūttöre’ nöng ṙamlōn. Yēḵ hī öi kihnngen öi ṙamlōn in nup töng aṅ in re, ngaich mihôiṅ ayī-ö afēkö ngam inlahen Pôl. Löktö in minë inlahen ò hēk minë ṙô ò in öi akahakūö tö hī inrē mihôiṅ ayī-ö öi ṙamölōn in nup töng aṅ in re, pòrô öi el nup tö sitih kanihngen. Hö-ö ön nö tö lööṙen, töp lökten hī öi hòṅ hakööpö e angū-ö inlahen. Öi sitih inlahen? Ta-a töi chumkūöṙen tö nup ihih tö lūöi inlahen.

ṘŪÖHLÖ NGAM INLAHENRE MAN HA-ÖINY NUP TÖNG AṄ IN RE

4. Sitih inlahen öi min höng ṙamlōn öi ha-öiny nup töng aṅ in re? (1 Tösalònikē 5:18)

⁴ Mötlö ṙanamlōn yin më tarik më maha-öiny nup töng aṅ in re. (Vë-evkūö 1 Tösalònikē 5:18.) Yē hī min öi ha-öiny ngam inlahenre aṅhav in tö minë chehen minë töt ṙanāngen nö in hī, ngaich öthō min ayī-ö öi afēkö nup chehen nup töt aṅ in re. Yēḵ hī min ha-öiny tī Yāvē nö kētö ṙētak hī öi löklōn ò, ngaich kalēḵ alaha min ayī-ö la-evṙen in nup töng kinë-ekūöre la-en, öthō min öi fachūrit nup tahëng la-en. Ṙūöhlöng alaha in töm Paipöl öi kētö tëngs Yāvē öi vë-ekūötēv, ngaich möl min ayī-ö ha-öiny nup töng aṅ in re. Teūngen inrē min ayī-ö tö ngam ‘lanāmö aṅ in ngam Tēv’ ngam ‘chamöḵngen nup taṙòkhöre mikah.’—Filip. 4:6, 7.

5. Asuh nup ihih lāinyngen yik Israel öre nö ha-öiny nup töng aṅ in re? (Ngëichkö ngam nyat.)

⁵ Töi chumkūöṙen tö inlahen yik Israel misī. Ṙōlheuh cha-a nö uyëkenre nöng öt aṅhav in tö minë nyā-aṅkūö, minë taneūngen cha sin nö i Aikup. (Kin. 11:4-6) Kô-en ön hē e nö töt lööṙen ngam inlahen cha nö iyöng el ngam tönyalnyi, mihôiṅ pöri öre cha-a nöng ṙamlōn nö inup töng aṅ in re. Nö sitih inlahen? Mihôiṅ öre cha-a nö fēkö inlahen nup tö urěhangen tī Yāvē nö chö-öinyten cha, ngaich ha-öinyö ò tökūö u. Tö sā inlahen cha ik sā cha nö haköövö nö i Aikup hēk ötlēḵlaṙen inrē, ngaich kētö minë tö söm kanihngen ang Yāvē nö i Aikup ngaich ṙānyen cha nö ṙā-ang in e. Ngaich ik sā cha nö ṙangen ngam panam Aikup ngaich havëkö kūö më tarik aṅ in e cha-a tö minë sunna chantī hēk tö minë tahëng inrē hilā, sā ṙēngen töng lamūtngen cha cha-a. (Man. 12:35, 36) Ngaich ik sā yik kumyung aṅ Aikup nö fachūlörit cha in ngam töngāṅv mai, ngaich hameuktö pinngangkūö ang Yāvē nö nëttit tī tö ngam mai. Rö-ö nöng angū-ö pön kaheuk sakāmö ang Yāvē nö kētö nyā-aṅkūö cha tö ngam manna ik sā cha nö el ök tönyalnyi. Kūö yòh pöri më Israel nö uyëkenre nöng öt nyā-aṅvkūö? Kūö cha nöng öt ṙamölōn nö in nup töng aṅ in re, öt milēḵṙen cha-a tö minë tī Yāvē nö in cha.

6. Asūp mihôiṅ inlahen hī yěi ṙūöhlö ngam inlahenre öi ha-öiny nup töng aṅ in re?

⁶ Sitih inlahen öm mihôiṅ ṙūöhlö inlahenre ha-öiny nup töng aṅ in re? Raneh, kaheuk sakāmö öm kēnyö ṙētakre afēkö inlahen nup töng aṅ in re chehen nup chūök meh öm ṙamlōn. Mihôiṅ man öm kūichngö inlahen nup töhěng nët chehen. (Inrā. 3:22, 23) Innëtö, hameuktöre man öm ha-öiny nup töng aṅ in re. Ha-öiny inlahen tī yip holre yēḵ cha nö hayööken meh. Möthë, kaheuk sakāmö öm ha-öiny nup töng tī Yāvē nö in meh. (Sal. 75:1) Linūöyö, hanôl yip tarik man yip maha-öiny nup töng aṅ in re. Yēḵ meh min ngatī inlahen, ngaich sā cha min më-eṅ. Yēḵ meh pöri öm hanôl yip tarik sumṙösṙôre, ngaich mihôiṅ min më-eṅ sā inlahen cha öt ṙāmlōn in nup töng aṅ in re. (Chöö. 1:26-28; 2 Tim. 3:1, 2, 5) Yēḵ hī min afēkö nup inlahen, nup chūök hī mihôiṅ ha-öiny nup töng aṅ in re, ngaich öthō min ayī-ö kihngen ellōn öi afēkö nup chehen nup töt aṅ in re, pò hī min höng ṙamlōn in nup aṅ in re.

7. Sitih inlahen ang Āchī nö ṙūöhlö ngam inlahen re nö ha-öiny nup töng aṅ in re ngaich asuh ngaich öp ṙòng e?

⁷ Töi ngëichkö inlahen Āchī ngòh mi-iyöng Intonēsiā. Ngöṙô anga-aṅ: “Ik sā ngam COVID-19 nö ṙònghöichṙen, ngaich höng haṙongtö minë inlahen re chū-ö öich in më tahëng prötör sistör. Fēkö inlahen cha chū-ö nöng kuchīken, angū-ö ngaich ngih lāinyngen chu öich haṙivlōn.” (Kal. 6:4) Sitih inlahen ngaich ang Āchī nö halöktö ngam mufē re? Ngöṙô anga-aṅ: “Afēkö minë inkòlô re chū-ö kahëtö Yāvē minë tö kaheuk sakāmö. Rö-ö nöng angū-ö pöich afēkö minë inkòlô re inrē minë taneūngen chu kūö chu öich alaha ngam söngkötön Yāvē. Ngaich ha-öinytī Yāvē chū-ö tökūö ò nö kēten u nö in chu. Anū-ö ngaich në tö tī-iv tö chu öich höng ṙamlōn in nup töng aṅ in re. Yēḵ meh inrē më-eṅ haṙivlōn tö kūö minë inlahenre, ngaich mihôiṅ më-eṅ öm asīnken Āchī, yěm hòṅ ṙūöhlö ngam inlahenre öm ha-öiny nup töng aṅ in re.

HATEUNGNGÖM KUILŌN YĀVĒ NGAICH ĪNU TÖM INYĀICHNGÖ

8. Asuh ök ihih inlahen Parök

⁸ Hěngheuh ök sekretrī (secretary) Yarimiā ang Parök nö kihngen ellōn nö afēken nup töt aṅ in re chehen. Teūngen hē e anga-aṅ tö ngam tökihngen la-enre. Tölṙô Yarimiā hē e ang Yāvē nö ahangnyö ngam tökiröng kinṙôka nö in yik Israel yik töt maha-öiny kinë-ekūöre hē e. Hòṅ holṙen Yarimiā hē e ang Parök nö in ngih la-en. Höng yahlö mufē pöri ang Parök tö inlahenre, öt chumkūöṙen anga-aṅ nö in ngam la-en kahëtö Yāvē nö in ò. Lökten ngaich ang Yāvē nö löktö in Yarimiā ṙô nö ngöṙô: ‘Uh man öm yahlö lōn tö minë tökiröng kuilōnre.’ (Yar. 45:3-5) Sā tö ngöṙô hē e ang Yāvē nö in ò, ‘höng ṙamölōn man in nup töng aṅ in re.’ Hang chööngö Yāvē ngaich ang Parök ngaich halööktit ngam mufē re. Angū-ö ngaich lāinyngen ngam inkòlô lamöktö in Yāvē nö köp nö in ò.

9. Yēḵ hī min öi īnu töm inyāichngö ngaich sitih inlahen min ngam mufē hī i alaha minë la-en? (1 Kòrin 4:6, 7) (Ngëichkö minë nyat.)

⁹ Löhten öp töhěng tak Kristīön nö ngöṙô lōn tö ò nö hòṅ teūngen öre töp töhěng la-en. Ṙën lohten anga-aṅ nö ngatī mufē kūö ò nö tö heuveū-en, tökalēḵ alaha nö la-evṙen hēk tö ekspirīönu inrē. Tahëng pöri ngaich öp tö teūngen tö ngam la-en. Lohten nö haṙivlōn ngòh Kristīön nö meūkö e. Asuh pöri mihôiṅ öp inlahen ò? Mihôiṅ anga-aṅ nö afēkö ngam ṙô tanīnöṙô Pôl im 1 Kòrin 4:6, 7. (Vë-evkūö.) Vënyu angū-ö nö in e tö nup töng taneūngen hī la-en hēk nup heuneū-en hī inrē, ngaich höng lamöktö in Yāvē anū-ö. Öt tö teūngen in ayī-ö öre tö u, hameuktö ngam tökiröng miṙēḵlōnre pöri anga-aṅ nö in hī, ngaich kēten u nö inlōntö hī.—Rōm. 12:3, 6; Efi. 2:8, 9.

10. Asuh öp mihôiṅ inlahen hī yěi hòṅ īnu tö ngam inyāichngö?

¹⁰ Yēḵ hī min öi chumkūöṙen öi afēkö ngam inlahen Yēsū, ngaich sā ò min ayī-ö öi īnu tö ngam inyāichngö. Chumkūöṙen tö ṙô ngam Paipöl nö vë-eny inlahen Yēsū ik sā ò nö söch röön yik tanīnöṙô. Ngöṙô tī ang tanīnöṙô Yôhan: “Akahakūö ang Yēsū [1] tö minë taṙòkhöre nö kētu tö ngam Yöng nö eltī ò ngaich [2] ṙamā-ang in ngam Tēv anga-aṅ ngaich [3] havan nö chuh in ngam Tēv, . . . ngaich söichröön yik haköptöre.” (Yôh. 13:3-5) Öt ngö mufē ang Yēsū misī, ‘kūön ngam Tēv chin chū-ö, ngaich më haköptö chu tö hòṅ samöchröön chu.’ Öt rēhěn anga-aṅ nö lōnu töre nöng hòṅ kumchikngenre nö in nup töng kuilōnre ik sā ò nö ing panam. (Lūk. 9:58) Īnu misī ang Yēsū töm inyāichngö, ngaich höng ṙamlōn anga-aṅ nö in nup töng aṅ in re. Kô-en anga-aṅ nö töt insā-av nö inchōḵ-okūö hī!—Yôh. 13:15.

11. Sitih inlahen ang prötör Tënis nö ṙamlōn nö in nup töng aṅ in re kūö ò nö īnu töm inyāichngö?

¹¹ Ma-ainynre ang prötör Tënis ngòh aṅ Nitörlëns nö asīnken Yēsū nö īnu tö ngam inyāichngö. Öt tö lööṙen pöri angū-ö nö in ò. Ngöṙô anga-aṅ: “Yěich meuk yip tahëng nö teūngen tö ngam la-en ngam tö hòṅ taneūngen chu lang la-en, ngaich līplölōn chū-ö. Yēḵ chu öich ngatī mufē, ngaich istötī inlahen ngam manööyö ṙung chū-ö öich sitih inlahen mihôiṅ öich īnu tö e. Rīkre nun minë miröökö tö tëkiyö (tag) tö chu nö el ngam JW Laëprërī ëp inlahen ngam inyāichngö. Ngaich löktö in u chū-ö ṙung öich lööṙen chöh minë miröökö, ngaich örheūheu öich haköpö u. Rīkre nun inrē minë minkahten inlahen ngam inyāichngö tö taōnlōtlöng tö chu nö el ngam fūn chu, ngaich ṙōlheuh chū-ö öich hang ṙô u.a Haköplu chin tö nup töng inlahen hī nöng hòṅ nööinyö Yāvē anū-ö, rö-ö nö nööinyö hī. Yěi ngëichken Yāvē nöng anga-aṅ tö la-evṙen, ngaich höng hamôlṙen ò ayī-ö.” Yēḵ meh më-eṅ öm hěngheuh öm haṙivlōn tö kūö meh öm öt teūngen tö ngam la-en ngam lōn meh, ngaich harūnöre më-eṅ ma-ainynre öm īnu tö ngam inyāichngö. Yēḵ meh min ngatī inlahen, ngaich ngön min ngam innôlö meh nö in Yāvē ngaich höng ṙamlōn min më-eṅ inup töng aṅ in re.—Yāk. 4:6, 8.

AFĒKÖ INLAHEN NGAM MAHEŪKKÖRE

12. Asuh öp maheūkkö hī ip yamih ṙētak, ngam tö tī-iv tö hī töngamuh öi höng ṙamlōn inup töng aṅ in re? (Isayā 65:21-25)

¹² Kētö ngam tövai maheūkkö hī an Yāvē in nup yamih ṙētak. Yēḵ hī min öi fēken e, ngaich heuveū min öi ṙamlōn in nup töng aṅ in re. Akahakūö in öi lökten im ṙô pròfět Isayā tö Yāvē nö keuheūtlöre mikahkūö tö nup kanihngen ellōn hī, ngaich kilēḵngôre anga-aṅ tö ò min nö kēngen u nö örheūheu ip yamih ṙētak. (Vë-evkūö Isayā 65:21-25.) Iyöng el nup patī min ayī-ö tövai el öp tufömngöre panam hēk öt pinhë-evkūö inrē. Īnu min ayī-ö tö nup la-enre nup chūök hī min ṙamölōn. Tö kuchik min nup nyā-aṅkūö hī ip hē e hēk kòlô el alaha inrē ayī-ö. Ötrēhěn min öi piṙūtkö inlahen kanihngen re hēk kanihngen yip kūönre inrē min yěn ngaich nö kiröng. (Isa. 32:17, 18; Isi. 34:25) Ngaich an Yāvē nö urěhangen inlahen nö afēkö inlahen ngam töt insā-av yamih ṙētak ngam taneūngen hī min.

13. Asuh nup ihih kanihngen ṙung la-al hī, ngaich sitih inlahen ayī-ö öi yöölen yěi afēkö inlahen ngam maheūkköre?

¹³ Hòṅ mötlö chumkūöṙen in töngamuh tö ngam maheūkköre. Kūö yòh? Kūö hī öi el ngih “manā-aṅ sakāmö” ngih chūök hī ‘la-al minë kihngen.’ (2 Tim. 3:1) Kaheuk sakāmö pöri ang Yāvē nö hachō-okūö hī öi lök el ngam tölöng talöökö, hangönken hī hēk hayööken hī anga-aṅ. (Sal. 145:14) Rö-ö nöng anū-ö, pön löktö in minë töt insā-av maheūkkö hī tī inrē anga-aṅ nö hayööken hī öi la-al minë kanihngenre. Lohten man më-eṅ öm öt inròhòv öm la-evṙen öm chö-öinytö ngam mikūönöre, höng öt fūra pöri minë inlahen tī meh öm ha-aṅkökūö e. Tö ngö manah hòng ngaich angū-ö tö meh min öm höng köpsöreṙen im yanāichö? Hö-ö öt ngatī. Kilēḵngôre an Yāvē nö in hī tö ò min nö hateungngö nup tö sitih kuilōn hī nö el öp Peretāis. Mötlö tī min anga-aṅ nö kē-ěkūö hī tö nup kuilōn hī. (Sal. 9:18; 72:12-14) Lohten man më-eṅ öm tö īnu töp tökiröng invahre hēk lohten inrē öm örheūheu halöinyöre hēk lohten öm höng haṙivlōn. Tö ngö manah hòng ngaich angū-ö tö meh min öm höng örheūheu halöinyöre tökūö chönökö re, ngaich öt teūngen tö hanöhlöre? Hö-ö ön nö tö ngatī manah. Pön kēngö minë tö sitih invah hēk kēngö ngam kinpaha min ngam Tēv ip tufömngöre panam. (Inm. 21:3, 4) Yēḵ hī öi afēkö inlahen ngih maheūkköre, ngaich öthō min ayī-ö īnu tö ngam kumnyahlōn hēk tanāinyö, īnu pöri min ayī-ö töm ṙanamlōn. Yēḵ hī pòrô ötlēḵkaṙen, kapahlöng tö yip holmaneukre, vahavö hēk la-al nup tö sitih inrē kanihngen, sön ayī-ö höng īnu tö ngam ṙanamlōn. Kūö yòh? Pò hī öi akahakūö tö minë kanihngen hī nöng töng rahëichtaṙen, ngaich ip tufömngöre panam min ayī-ö öi örheūheu ṙānyu tö u.—2 Kòr. 4:17, 18.

14. Sitih inlahen öi mihôiṅ öi hangönkö ngam maheūkköre?

¹⁴ Tö urööṙen ön ngam inlahen hī öi tö hòṅ maheūkku ip yamih ṙētak yěi hòṅ ṙamölōn in nup töng aṅ in re. Sitih inlahen pöri mihôiṅ ayī-ö hangön ngam maheūkköre? Sā ṙēngen öp töhěng tak tarik yēḵ ò nö tinmëlu mat ngaich hëtö maheuk anga-aṅ nö meuk öp tö marôvat, ngatī ṙēngen ngam inlahen hī yěi la-evṙen tö nup la-en öi chö-öinytö inngöönö ngam maheūkköre, ngaich hëtö maheuk min ayī-ö öi meuk inlahen ngam yamih min Peretāis öi löktö in ngam mat ngam ellōnre. Tö sā ṙēngen hī yěi kihngen tö pësa, ngaich mihôiṅ ayī-ö afēkö inlahen ngam Peretāis, ngam chūök hī min öi öt lōntö pësa, ötrēhěn min öi hòṅ kē hötṙeh re, ötrēhěn inrē min nö ōt ngam inyāichö. Yē hī öi paṙūtalōn töre öi öt teūngen töp töhěng la-en, ngaich mihôiṅ ayī-ö öi fēkö ngam inlahenre yěi ngaich min het hēk kööṅnyu samyeūheu rò-òten min öi löklōn Yāvē, ngaich töng hö-öv min në pinṙūtölōn hī nö elmat hī. (1 Tim. 6:19) Lohten inrē min öi kihngen afēkö inlahen minë taneūngen re min inkòlô el öp tufömngöre panam. Yēḵ hī pöri min öi afēkö inlahen u, ngaich lööṙen min ayī-ö chumkūöṙen tö ngam maheūkköre.

15. Asūp haköplö meh in ngam ekspirīön Kristā?

¹⁵ Töi chumkūöṙen tö inlahen Kristā ngam pīhö prötör Tënis ngam prötör tö vënyu inlahen taheui ik urěh nö in ngih ātiköl. Ngöṙô ang sistör Kristā: “Īnu chin tö ngam töhěng invah re ngam töt kalēḵngöre tī tö minë ṙòng rahë chu. Ötkô chin töngamuh kiröön höng el ngam vīl chër. Höng hulalhak chin ngaich el chamamre. Örheūheu inrē öich höng halöinyöre töm chanöökö re. Fömngöreṙen ngam tòktör nö vë-eny nang chu tö ngam invah chu nö öt line-ënen ötrēhěn inrē min öich lanökuṙen. Höng ellōnre lōn pöri chū-ö öich ngö mufē, ‘Hö-ö an nö akahakūö töp töt insā-av maheūkkö chu min ip yamih ṙētak.’ Höng ngëichkö ngam maheūkköre chū-ö, angū-ö lāinyngen chu öich teūngen tö lanāmö elkuilōnre. Akahakūö chin tore öich hòṅ la-al në tö ngatī kanihngenre öich i ngih panam, hö-öv pöri min minë tö sitih chanöökö nö el öp tufömngöre panam, ngaich haṙamngölōn re min chū-ö öich aṅ öich ikūö e!”

“ÖT HANĀTUṘEN YIN MË TÖ PA-EKŪÖ TÖ Ò”

16. Kūö yòh ang Rācha Tāvit nö ngöṙô tī nö kūich tö yip tö pa-ekūö tö Yāvē nö ‘öthěngö hanakten’?

¹⁶ Kihngen yin inrē ṙung më tarik Yāvē më töng ṙamölōn nö in nup töng aṅ in re. Kò-òṙen öi chumkūöṙen ngëichkö inlahen Rācha Tāvit. Vënyu nang in töm Paipöl tö ò nö kapahlöng tö yik tö lūöi tak kūönre. Sūöchka fālen inrē anga-aṅ, hachīlö hēk ṙōl samyeūheu inrē nö falngöre nö laklö ngam nômöre. Unôichrit inlahen ò nö la-al në tö ngatī kanihngen, ngaich sön anga-aṅ nö ngöṙô tö inlahen Yāvē: “Öt hanātuṙen yin më tö pa-ekūö tö ò.” (Sal. 34:9, 10) Kūö yòh Tāvit nö ngatī ṙô? Pön akahakūö misī anga-aṅ tö Yāvē nö rö-ö nö örheūheu nö laklö më tarikre nö in nup kanihngen, kē-ěkūö cha pöri tö nup chehen nup töt ṙanāngen kuilōn cha. (Sal. 145:16) Mihôiṅ in inrē ayī-ö ṙatö-ellōnre tö Yāvē min nö öthō nö öt hateungngö nup hanakten hī. Chumkūöken hī min anga-aṅ el nup tö sitih kanihngen hī. Lökten nö pòrô öp tö yòh inlahen hī, ngaich höng hòṅ ṙamölōn ayī-ö in nup töng aṅ in re.

17. Kūö yòh öm më-eṅ hòṅ haköp nup tö keuheūttöre inlahen yēḵ meh öm hòṅ ṙamlōn in nup töng aṅ in re?

¹⁷ Lōnu an Yāvē tö hī öi ṙamölōn in nup töng aṅ in re. (Sal. 131:1, 2) Lökten öm ma-ainyre haköp nup tö keuheūtöre inlahen yěm hòṅ īnu töm ṙanamlōn inup töng aṅ in re. Yēḵ meh min öm ma-ainyre ṙūöhlö ngam inlahen re öm ha-öiny nup töng aṅ in re, chumkūöṙen im la-en inteungngö kuilōn Yāvē hēk īnu tö ngam inyāichngö, hěnghöre hangön ngam maheūkköre. Ngaich mihôiṅ min më-eṅ öm ngöṙô tö meh öm höng ṙamlōn in nup töng aṅ in re.—Sal. 16:5, 6.