Hòṅ Sitih Inlahen Öm In Minë Yamih Tinrōlen?

Röhtö manāngen ön ngih panam, lökten nö sīöplöre minë finël tarik, tö kūö tirōlen. (Inm 6:4) Sitih inlahen öi min lēn in minë yamih kanihngen?

• Lēn töhëichren im chaniplö: Vë-ekūö minë lökngörit minë chööngö aṅ mat ngam Paipöl öi la-al minë kanihngen re. Sīöplöre min ngam ṙinatö-ellōn meh in Yāvē hēk tö ngam söngkötöng ò ngaich öt hěngö la-a min më-eṅ. (Inch 12:5; jr 125-126 përa 23-24) Löktö kūö töngamuh öm vī hol re tövayö tinrīken el ngam māṅ.—1Pī 4:7, 8

• Lēnö tī tö nup chehen töt ṙanāngen: Hamulngö nup nyā-akūöre i patī re hòṅ meh öm öt kihngen i nup yamih ṙētak. Fē-a inrē më-eṅ yěḵ meh hòṅ ṙāngen ngam patī re, ngaich iyöng yih min më-eṅ. Chaplö nup chehen el ngam pëk tö sā ngam inyulkuntī hēk mās hēk pësa inrē hòṅ meh öt kihngen öm fālngöre yěn fāltöre nup kanihngen. Ngëichkö aṅ ngam pëk re inrē yěn keuheūtlöre nup tö chapö tö meh. Ngaich kētö ngam fūn nömpör re inrē in më minṙöinylen ngatī inrē më-eṅ öm kē minë nömpör cha hòṅ meh öm öt kihngen.—Isa 32:2; g17.5-HI pěch 3-7

Yěn ōt minë tinrōlen, ngaich ui ṙākenre öi vë-ekūötēv, im inkööpö hēk chinuh el mīting inrē. (Filip 1:10) Um kiröön ngöre töm chūök re yěn öt tinrōlen. Yěn fāltöre nup tinrōlen ngaich möl më-eṅ öm kiröönngö re töm chūök re. (Mët 10:16) Katöll yip tahëng hol re tö minë nyā-akūö.—Rō 12:13

NGËCHKÖ NGAM VITIŌ NGAICH ÖM HÖÖNGÖRE TÖ NUP TÖ FALTÖRE YANĪHI PINLĀNGEN? NGAICH KĒTÖ SANAPṘÔ NË INTÖÖNÖ:

• Sitih inlahen ang Yāvē nö hayööken hī el ṙētak kanihngen?

• Asūp tö hòṅ inlahen hī yěn yih minë kanihngen?

• Sitih inlahen öi hayööken yip tö pala-airen tö kūö minë pinlāngen?