Um Ahākenre Kē Ngam Vinôkö

1. Asuh nup mihôiṅ lāinyngen hī kētöre öi im vinôkö?

HANGENLŌN öm më-eṅ tö Yāvē ngam kamë-ekūö meh tö minë tövai inlōnti hēk tö ngam nômö tö örheūheu aṅ? Lōnu öm më-eṅ töre hameuktö ngam hanangenlōnre tö Yāvē? Ngih ön mihôiṅ töt insā-av inlahen meh keuheūttö ngam nômöre öm kē ngam vinôkö. Yēḵ meh min kētöre in e, ngaich kaheukö min më-eṅ aṅ el ngam mikūönö Yāvē hēk yöng meh min anga-aṅ hěnghöre hol meh inrē. Hachōḵ kūö meh min anga-aṅ tö ngam tölöng talöökö hēk chumkūöken meh inrē, pò meh ngaich vītöre öm aṅ el ngam mikūönö ò. (Sal. 73:24; Isa. 43:1, 2) Yēḵ meh min kētöre in ò hēk kē ngam vinôkö inrē, ngaich teūngen min më-eṅ tö ngam nômö tö örheūheu aṅ.—1 Pīt. 3:21.

2. Asuh nup min kahakkö hī in ngih ātiköl?

² Ōt hòng öp ma-asöngö röön meh kētöre im vinôkö? Yěn heūṅ, ngaich rö-ö më-eṅ hěngtak tö ngatī inlahen. Pōyen takô yip tarik tö ngatī mufē. Halööktit nup tinrīken re hēk mufē re pöri cha-a kūö cha nö hòṅ kē ngam vinôkö. Ngaich cha-a töngamuh nö holtö ṙanamlōnre hēk holtö nganötöre nö i linökölōn Yāvē. Ta-a chěi töi chumkūöṙen tö ngih inchōḵ elmat inlahen yik rīkre tarik yik kamë ngam vinôkö ik raneh senchurī. Mikahtökūöre min ayī-ö nö sitih inlahen cha-a nö la-al nup insökngö röönre nö kē ngam vinôkö hēk asūp haköplö hī min öi in cha.

KĒ NGAM VINÔKÖ YIK TARIK AṄ SAMARIĀ

3. Asuh nuk misī kanihngen yik rīkre aṅ samariā tarik nuk tö hòṅ lālöng tö cha?

³ Tökalēḵ-e ṙinatö-ellōn misī yik tarik aṅ Samariā nö in ngam tinlöökenre in nuk ṙētak Yēsū. Iyöng in minë kamngö cha-a i Sīkem hēk Samariā minë mi-i lā kapā Yūta. Hòṅ akahakūö takô hē e më aṅ Samariā tarik tö minë ṙô ngam Tēv urēhěkūö cha nö kē ngam vinôkö. Kūö yòh? Kūö cha sin nö ṙatö-ellōnre tö minë taneūi raneh līpöre imat ngam Paipöl nöng anū-ö kahūich ngam Tēv. Tö sā ngam Ranehlö söl in ngam I.Chööngö. Ṙatö-ellōnre inrē lohten cha-a misī nö in ngam līpöre Yôsua. Sā minë kinlēḵngô ngam Tēv inrē misī yik aṅ Samariā nö hökken öp Missayā, sā ṙô ngam I.Chööngö 18:18, 19. (Yôh. 4:25) Töt ṙanāngen pöri ngam inlahen cha nö hòṅ hō-en Yēsū nö anga-aṅ tökilē-ěyö nö Missayā urēhěkūö cha nö kētöre nö im vinôkö. ‘Maṙôngö ngaich yik aṅ kūö ngam panam Samariā’ tö ngatī inlahen. (Yôh. 4:39) Rīkre pöri yik tarik aṅ Samariā tö kihngen nö hō-en Yēsū nö anga-aṅ Missayā, pò cha misī nö öt ööire tö yik Yahūti hēk atöltuṙen inrē.—Lūk. 9:52-54.

4. Sitih inlahen yik rīkre tarik aṅ Samariā ik sā cha nö hangṙô Filip nö ahānga? (Inlahen 8:5, 6, 14)

⁴ Asuh öp ihih mahayööken yik tarik aṅ Samariā nö kētöre im vinôkö? Ik sā Filip nö vë-eny nang cha tö inlahen Kristu, ‘ngaich rīkre yik aṅ kūö ngam panam Samariā hamô-en ngam ṙô ngam Tēv.’ (Vë-evkūö Inlahen 8:5, 6, 14.) Yahūti ök misī Filip, sön pöri cha-a nö hangihtöṙô ò. Lohten cha-a nö fē-ělre tö ngam töhěng miröökö imat minë tö taneūi raneh līpöre ngam Paipöl, kūichi ngam inlahen ngam Tēv nö töt atöltuṙen. (Chöö. 10:17-19) Ik sā Filip nö vë-eny nang cha tö inlahen Kristu, ngaich ‘chumkūöṙen cha-a tö minë ṙô ò.’ Pōyen inrē minë la-en pinngangkūö hameuktö Filip nö in cha, tö sā ṙēngen ò nö halanken yik tövahav ngaich kēnyen yik tötlöök ma-ahānga inrē nö el alaha yik tarik. (Inl. 8:7) Löktö in minë ṙô hēk la-en ò öi akahakūö tö ò nö tīntu tö ngam Tēv.

5. Asuh öp haköplö meh öm lökten in yik tarik aṅ Samariā?

⁵ Mihôiṅ öre yik tarik aṅ Samariā nö öt hang nuk ṙô Filip nö haköpten cha, pò ò nö Yahūti. Hēk mihôiṅ öre cha-a nö ngö mufē tö minë haköptö Filip nöng harīkngöre. Hö-ö pöri cha-a nö ngatī inlahen. Pön ik sā cha nö ṙatö-ellōnre tö nuk haköptö Filip nö kanô-en, ngaich öt ahākenre cha-a nö kētöre vōkö. Ngöṙô an ngam Paipöl: “Hē cha pöri nö ṙātö-ellōnre i ṙô Filip, nö ahangkö ngam tölöök inhangkö ngam pūlngö ngam Tēv, Mine-eny Yēsū Kristū inrē; vōkö cha-a ngaich, hĕnghöre kikōnyö kikānö inrē.” (Inl. 8:12) Ṙatö-ellōnre öm inrē më-eṅ tö minë ṙô ngam Tēv nö kanô-en? Ṙatö-ellōnre hòng inrē më-eṅ tö më Vamënyen Yāvē nö ahaṅv in tö ngam hanangenlōn ngam inkahka më mahaköp nö in Yēsū hēk töt alöltuṙen inrē? (Yôh. 13:35) Yěn ngati, ngaich asuh öp ma-asökngen meh öm kē ngam vinôkö. Ṙatö-ellōnre man tö Yāvē min nö öthō nö öt kē-ěkūö meh tö töpōyen inkòlô.

6. Asuh öp yanöölen meh öm lökten in ngam ekspirīön Rūpön?

⁶ Töi chumkūöṙen tö ngih ekspirīön Rūpön ngòh mi-iyöng Chörmönī. Tö haruklöng anga-aṅ nö el ngam mikūönö më Vamënyen Yāvē. Ik sā ò ngaich nö ṙālö ngaich yīhi kintööngö elkuilōn anga-aṅ tö Yāvē yěn kô-en nö ōt hēk yěn hö-ö. Sitih inlahen pöri anga-aṅ nö ṙūöhngen ngih kintööngö elkuilōnre? Rīsörch anga-aṅ nö in minë pöplikēsön hī ngaich mikahkūöre tö inlahen e. Ngöṙô anga-aṅ: “Höng löktö im pörsönöl istötī chū-ö öich mikahtökūöre töm kanô-en. Töp lökten chu öich ṙōlheuh haköp inlahen ngam evulīusön (evolution) imat minë pöplikēsön hī.” Haköp ngam töhěng līpöre hī ang Rūpön ngam vamënyen öp töhěng tak vamīlen në taṙòkhöre aṅkūö ngih panam ngam tö chumkūöṙen tö hī.a Lökngöre anga-aṅ tö ṙô ngih līpöre ik sā ò nö vë-ekūö e. Ngö mufē anga-aṅ, ‘kô-en takô an Yāvē nö ōt.’ Unôichrit e ngaich anga-aṅ nö chöhken ngam vöölt hetkòtör. In e anga-aṅ nö meuk inlahen më prötör sistör hī nö sā inlahen töhěng mikūönö nö holṙen re nö ha-öinyö Yāvē, pòrô nö kötahëngö lökti. Angū-ö ngih inrē lanökngöre ellōn ò. Ik sā ò nö havan nö chuh Chörmönī, ngaich 17 höiny samyeūheu ṙēḵti anga-aṅ nö kētöre nö im vinôkö. Yēḵ meh më-eṅ inrē ngatī kintööngö elkuilōn, ngaich kò-òren më-eṅ rīsörch in minë pöplikēsön hī. Mihôiṅ man min öm ṙūöhngö ngam kintööngö elkuilōnre öm höng lökten im “tökô-en mikah.” (Efi. 4:13, 14) Yēḵ meh min hang minë ekspirīön inlahen ngam hanangenlōn hēk tö ngam hinëngö nö ihôi më prötör sistör hī tö keuheūtngöre chūök ikūö ngih panam, ngatī mikahngen inrē min öm el ngam māṅre hēk ṙūöhlöre inrē min ngam hanangenlōn meh tö ngam mikūönö Yāvē.

KĒ NGAM VINÔKÖ ANG SÔL NGÒH AṄ TĀRSÖS

7. Kūö yòh ang Pôl nö hòṅ harīngö ngam mufē re?

⁷ Ta-a töi chumkūöṙen tö inlahen Sôl ngòh aṅ Tārsös. Tö keuheūtlöre mikahkūö misī anga-aṅ tö nup chööngö yik Yahūti hēk tövayö minë-eny inrē anga-aṅ misī nö ikūö yik tarik. (Kal. 1:13, 14; Filip. 3:5) Ngöṙô lōn misī yik tö pōyen Yahūti tö më Kristīön nö apòstēt, lökten ang Sôl nö yīhi inngëṙö ngaich ötlēḵken cha. Ngöṙô lōn misī anga-aṅ tö ngam Tēv nö ṙamölōn nö in ò yěn ngatī inlahen. (Inl. 8:3; 9:1, 2; 26:9-11) Hòṅ halöktö ngam mufē re anga-aṅ, yēḵ ò nö hòṅ ṙatö-ellōnre nö in Yēsū hēk vōkö inrē, ngaich vītöre nö Kristīön hěnghöre hòṅ hīnöre inrē anga-aṅ nö la-al nup inkihtenre.

8. (a) Asuh ök mahayööken Sôl nö kē ngam vinôkö? (b) Sā ṙô ngam Inlahen 22:12-16, sitih inlahen Ananī nö hayööken Sôl? (Ngëichkö ngam nyat.)

⁸ Asuh öp mahayööken Sôl ngòh aṅ Tārsös nö kē ngam vinôkö? Ik sā Yēsū nö hameuktöre nö ikūö Sôl, ngaich öt meuk anga-aṅ tökūö ngam tökalēḵ yanānga. (Inl. 9:3-9) Unôichrit e ang Sôl nö lūöi höng sumkam nö öt hěng milòhò nyā-akūö. Lohten anga-aṅ hē e nö afēkö ngam inlahngen, töp lökten ò ngaich nö ṙatö-ellōnre tö Yēsū nö anga-aṅ Kristū hēk më haköptö ò inrē tölöngö inlahen nö ha-öinyö Yāvē. Lohten inrē ang Sôl nö haṙivlōn nö fēkö inlahen re nö fëlngen Satēpan! (Inl. 22:20) Unôichrit tö lūöi sumkam pöri ngaich ngam tö Ananī minë-eny mahaköp nö in Yēsū nö chuh in Sôl. Lë-en minë mat Sôl ngaich anga-aṅ, ngaich tölṙô ò nö un ahākenre nö kē ngam vinôkö. (Vë-evkūö Inlahen 22:12-16.) Holtö inyāchngöre ngaich ang Sôl nö hangṙô Ananī nö kē ngam vinôkö ngaich havailö ngam tinrīkenre.—Inl. 9:17, 18.

9. Asuh öp mihôiṅ haköplö meh öm lökten in Sôl?

⁹ Pōyen haköplö in mihôiṅ öi lökten in Sôl. Mihôiṅ öre anga-aṅ nö kūö ngam tanāilölōnre hēk pinhë-ekūöre tö tarik nö öt kētöre nö im vinôkö. Hö-ö pöri anga-aṅ nö ngatī inlahen. Ik sā ò nö haköp ngam kanô-en inlahen Kristū, ngaich ṙatö-ellōnre anga-aṅ nö in u. Ngaich hayāichngöre nö halööktit nup tinrīkenre. (Inl. 26:14, 19) Akahakūö ök misī Sôl tö ò min yěn vītöre nö Kristīön ngaich ötlēḵkaṙen min, sön pöri anga-aṅ nö iṙūöhen nö kē ngam vinôkö. (Inl. 9:15, 16; 20:22, 23) Unôichrit ngam inlahen ò nö vōkö, sön anga-aṅ nö öt ṙāngenre nö hayönglenre nö in Yāvē. Angū-ö ngih lāinyngen ò nö heuveū nö la-al nup kanihngenre tö ṙōlkangen. (2 Kòr. 4:7-10) Yēḵ meh min më-eṅ kē ngam vinôkö, ngaich vītöre öm Vamënyen Yāvē, ngaich lohten min nö pōyen nup kanihngen lamakūö meh hēk kalaha inrē min ngam ṙinatö-ellōn meh. Mihôiṅ pöri më-eṅ ṙatö-ellōnre tö nā Yāvē nā Yēsū min nö ötlöktu nö öt hayööken meh.—Filip. 4:13.

10. Asuh öp yanöölen meh yěm chumkūöṙen ngëichkö ngam ekspirīön Ëna?

¹⁰ Töi ngëichkö ngih ekspirīön Ëna ngòh mi-iyöng Īstön Yurōp. Unôichrit ngam yöng ò kikānö nö kē ngam vinôkö, ngaich havë-engritre anga-aṅ nö im yöngre kikōnyö tö ò nö hòṅ istötī ngam Paipöl. Ṙömöng 9 samyeūheu anga-aṅ ik hē e. Öt ööire yip aṅ patī ò tö ngam inlahen ò, aṙē-ěv cha-a tö ngam inlahen ò nö ṙāngen ngam tinlööken yip muvöhngöre nö chuh el tahëng tinlööken. Pòrô ngaich ang Ëna nö 12 samyeūheu ṙēḵti, sön anga-aṅ nö vë-eny nang ngam yöngre kikōnyö tö ò nö hòṅ kē ngam vinôkö. Hòṅ mikahtökūöre hē e ngam yöng ò, tö ò yěn löknyö ellōnre nö kē ngam fëslare hēk yěn höng timlöng alaha ṙöng tö yip tahëng. Vë-eny nang ò ngaich ang Ëna töre nö hangenlōn tö Yāvē, lökten nö hòṅ kē ngam vinôkö. Hō-en ngam ṙô ò ngaich ngam yöng ò. Unôichrit ngam vinôkö Ëna, hayëḵ-e anga-aṅ tö yip aṅ patīre hēk ötlēḵka elnang inrē. Uroh nö ngöṙô öp töhěng tak aṅ patī ò, “Ĕhten man öre höng pamôp sikret hēk tötlöngö inlahen töre öm vītöre Vamënyen Yāvē.” Sitih inlahen pöri Ëna nö la-al në tö ngatī kanihngenre? Ngöṙô anga-aṅ, “Kētu nganöönö chū-ö tö Yāvē, örheūheu inrē minā yöng chu nö holṙen chu.” Ngamuh inrē töhěng mahayööken Ëna, pön kūichngö nuk inlahen Yāvē anga-aṅ nö hayööken ò. Ngaich örheūheu nö haköpö u, hòṅ ò nö köplōn tö Yāvē nö örheūheu nö chumkūöken ò. Yēḵ meh më-eṅ inrē pa-ekūö afēkö inlahen re min ötlēḵkaṙen hēk kunyahav inrē, ngaich köpölōn më-eṅ tö Yāvē min nö hayööken meh.—Hep. 13:6.

KĒ NGAM VINÔKÖ ANG KÒRNĒLI

11. Asuh öp öre ma-asökngö röön Kòrnēli nö kētöre nö im vinôkö?

¹¹ Ta-a töi chumkūöṙen tö inlahen Kòrnēli. Vënyu nang in töm Paipöl tö ò nö töhěng tak nö “yöngkūö kumyung” töngö manah, tö ò nö yöngṙen tö 100 ṙôken kumyung aṅ Rōm. (Inl. 10:1) In e mikahlōn ayī-ö tö ò nö tökirööngö kamngö chūök hēk tövayö minënyö inrē nö in yik kumyung. Töpōyen tī ök inrē misī Kòrnēli nö “alōntö yip tarik.” (Inl. 10:2) Lökten ang Yāvē nö tīnngen ök tanīnöṙô Pītör nö chuh in ò nö vë-eny nang ò tö ngam tölöök inhānga. Heūlngöre hòng ang Kòrnēli nö öt kētöre nö im vinôkö kūö ò nö tökirööngö minā-aṅ?

12. Asūp ṙamūöhlö alaha Kòrnēli nö kētöre im vinôkö?

¹² Asuh ök mahayööken Kòrnēli nö kē ngam vinôkö? Ngöṙô an ngam Paipöl nö vënyö inlahen ò, ‘tö ò misī hēk tö yik aṅ patī ò nö ṙòkhöre nö tö pa-ekūö tö ngam Tēv.’ Rö-ö nöng angū-ö pön örheūheu misī ang Kòrnēli nö kalēḵ-eṙô nö vë-ekūö ngam Tēv. (Inl. 10:2) Ik sā Pītör nö vë-eny nang ò tö ngam tölöök inhānga, ngaich ṙatö-ellōnre anga-aṅ hēk tö yik taṙòkhöre aṅpatī ò nö in Kristū, ilööṙen inrē cha-a nö kē ngam vinôkö. (Inl. 10:47, 48) Löktö in e ayī-ö akahakūö tö Kòrnēli nö hamīnöre nö mahalööktitre, hòṅ ò nö holṙen më aṅpatī re nö ha-öinyö Yāvē.—Yôs. 24:15; Inl. 10:24, 33.

13. Asūp mihôiṅ haköpö meh in Kòrnēli?

¹³ Sā Sôl ök misī Kòrnēli nö tökirööngö minë-eny hēk tökirööngö kamngö inrē. Mihôiṅ öre anga-aṅ nö sōḵ nö kē ngam vinôkö. Hö-ö pöri anga-aṅ nö ngatī inlahen. Ōt hòng inrē tinrīken meh më-eṅ tö hòṅ halööktitvö tö meh yēḵ meh hòṅ kē ngam vinôkö? Yěn heūṅ, ngaich holṙen meh min ang Yāvē. Yēḵ meh asīnken minë lökngörit chööngö aṅmat ngam Paipöl hēk kē fëslare inrē öm löklōn Yāvē, ngaich öthō min anga-aṅ nö öt hayööken meh.

14. Asūp yanöölen meh yěm chumkūöṙen ngëichkö ngam ekspirīön Suyosī?

¹⁴ Töi ngëichkö ngih ekspirīön prötör Suyosī ngòh aṅ Chapān. Ōt nuk tö harīkiyö inlahen ò nö im kinmānöre kūö ò nö hòṅ kē ngam vinôkö. Tö la-evṙen anga-aṅ nö el ngam iskul Ikenopō, chūök maharuntö innyöötö minë pūl. Hamòlṙen ngam hetmastör anga-aṅ nö la-evṙen. Yēḵ ngam hetmastör ṙung nö öt yihtökūö in minë prōkrām linapngö yip kupah, ngaich ichūök ò ang Suyosī nö kiröönngöre hēk kēken minë la-en ngam tinlööken puttis inrē anga-aṅ i alaha linapngö yip kupah. Ik sā ò pöri nö akahakūö tö ngam kanô-en inlahen yip tökapah, akaha elmat ngaich anga-aṅ töre nö hòṅ ṙāngenre u yēḵ ò nö hòṅ kē ngam vinôkö. Kē fëslare anga-aṅ nö öt hēk min nö kētöre nö u anū-ö la-en. (2 Kòr. 6:15, 16) Vënyö ngam fëslare ngaich anga-aṅ nö in ngam hetmastör. Asuh ngaich ök ṙòng e? Öt timlö alaha ò ngam hetmastör nö kēken në tö ngatī prōkrām, ötrēhěn inrē nö ṙānyen ò nö im kinmānö. Hěng samyeūheu ṙò-òten ngaich ang Suyosī nö istötī ngam Paipöl, unôichngöre ngaich anga-aṅ nö kē ngam vinôkö.b Yēḵ meh më-eṅ inrē hòṅ harīkngö nup la-enre im kinmānöre kūö meh haṙamlōn Yāvē, ngaich ṙatö-ellōnre më-eṅ tö ò nö öthō min nö öt hateungngö nup kuilōn meh hēk kuilōn ngam mikūönö meh inrē.—Sal. 127:2; Mët. 6:33.

KĒ NGAM VINÔKÖ YIK TARIK AṄ KÒRIN

15. Asuh nuk mihôiṅ ma-asöngö röön yik tarik aṅ Kòrin nö kē ngam vinôkö?

¹⁵ Tö akahka misī panam Kòrin nö in nuk urěh ṙētak. Töhangen yip aṅ in e tarik tö rupīö hēk töng ötlöngö tinrīken inrē. Tanten inrē cha-a nö in minë la-en sin-òkkūö ngam Tēv. Kihngen takô yip tarik nö hō-en ngam tölöök inhānga nö in e kūö töng ötlanöngö ngam panam. Ik sā Pôl pöri nö chuh in ngam panam nö ahangkö ngam tölöök inhānga inlahen Kristū, ngaich ‘maṙôngö yik tarik aṅ Kòrin ṙamatö-ellōnre nö in ngam ahangkö ò ngaich kē ngam vinôkö.’ (Inl. 18:7-11) Hěngheuh ang Yēsū nö hameukhömat Pôl tök töhěng heūvö ngaich ngöṙô nö in ò: “Pōyen yin më tarik chu ikūö ngam panam.” Lökten ngaich ang Pôl nö ṙôngti samyeūheu ṙò-òten nö ikūö ngam panam nö ahānga.

16. Sitih inlahen yik tarik aṅ Kòrin nö la-al nuk ma-asökngö röönre nö kē ngam vinôkö? (2 Kòrin 10:4, 5)

¹⁶ Asuh ök ma-hayööken yik tarik aṅ Kòrin nö kē ngam vinôkö? (Vë-evkūö 2 Kòrin 10:4, 5.) Kūö ngam Ṙô ngam Tēv hēk tö ngam töt insā-av kumlēḵ ò më tarik nö halööktit minë tinrīkenre. (Hep. 4:12) Ik sā yik tarik aṅ Kòrin nö hō-en ngam tölöök inhānga inlahen Kristū, ngaich ṙāngenre takô cha-a tö nuk tötlöng la-en hēk nuk tinrīkenre inrē. Tö sā ṙēngen ngam inôkö ka-eūt, unlāyö hēk asëha nö i kikōnyö nöng kikōnyö, kikānö nöng i kikānö.—1 Kòr. 6:9-11.c

17. Asūp haköplö meh öm lökten in yip tarik aṅ Kòrin?

¹⁷ Töi chumkūöṙen tö inlahen yik rīkre aṅ Kòrin yik ṙamāngen nuk tötlöng inlahenre. Öt ngö mufē cha-a töre min nö öt teungten nö vītöre nö Kristīön. Ma-āinyre pöri cha-a nö la-evṙen hòṅ cha nö lök elngam tö cheūktikūö talöökö, ngam chamuh im nômö tö örheūheu aṅ. (Mët. 7:13, 14) Yēḵ meh më-eṅ inrē ṙönghëichṙen la-al nup tötlöng tinrīkenre, pòrô öm lōnu töre kē ngam vinôkö. Ngaich um ṙāngenre. Kalēḵ-e ṙô më-eṅ havëkö kūö Yāvē tö ngam töhet kumlēḵ ò, hòṅ ò nö hayööken meh ṙap minë tötlöng elkuilōnre.

18. Asuh öp yanöölen meh yěm chumkūöṙen ngëichkö ngam ekspirīön Monikā?

¹⁸ Töi ngëichkö ngih ekspirīön Monikā ngòh mi-iyöng Chôrchiyā. Lōnu anga-aṅ töre nö kē ngam vinôkö. Hòṅ ma-āinyre pöri anga-aṅ nö ṙāngen minë tötlöng ṙinô-ò hēk minë tötlöng inrē inṙamlōn. Ngöṙô anga-aṅ: “Ik sā chu öich ṙömöng ṙālö, ngaich teūngen chū-ö tö ngam kumlēḵ yēḵ chu öich vë-ekūötēv. Akahakūö hē e ang Yāvē tö chu öich hòṅ löngö kahëken tö la-en, lökten ò nö örheūheu nö hayööken chu hēk hachōḵ kūö chu inrē öich lök im tölöng talöökö.” Yōkö ngaich ang Monikā ik sā ò nö 16 höiny samyeūheu ṙēḵti. Ōt hòng tötlöng tinrīken meh tö hòṅ ṙā-ayö, kūö meh hòṅ löklōn Yāvē? Yěn heūṅ, havëkö kūö Yāvē më-eṅ tö ngam kumlēḵ hòṅ meh öm teungten halööktit minë tinrīkenre. Vënyu nang in tö ngam Paipöl tö Yāvē nö holtö ellōnre nö kē-ěkūö yip tarikre tö ngam töhet kumlēḵ.—Yôh. 3:34.

NGAM ṘINATÖ-ELLŌN HĪ ÖN MIHÔIṄ KAMËNGÖ NGAM RÔNGÖ

19. Sitih inlahen öm mihôiṅ la-al nup kanihngen tö sā inlahen rôngö? (Ngëichkö ngam nyat.)

¹⁹ Lohten më-eṅ hòṅ la-al nup tökirööng kanihngen, yēḵ meh hòṅ kē ngam vinôkö. Ṙatö-ellōnre pöri më-eṅ tö Yāvē nö hangenlōn takô tö meh hēk hòṅ kaheukhöt meh inrē el ngam mikūönö ò. Ngöṙô ök misī Yēsū nö in yik rīkre haköptöre ik raneh senchurī: “Yēḵ ngam ṙinatö-ellōn yīö öre nöng sā ṙòngòng öp kun kun kulöl rāi, ngaich mihôiṅ öre yī-ö öi ngö ṙô tö ngih rôngö, ‘Kē-ěngre man ṙā-ang ihih ngaich kiröönngöre umu-a,’ ngaich kò-òren angū-ö nö kē-ěngre, ngaich öt hēngö öt kanô-ò öre yī-ö.” (Mët. 17:20) Yik tarik hamang ngih ṙô Yēsū, rěh rô-angen samyeūheū cha-a nö vītöre nö mahaköp nö in ò, ngaich tötṙanāngen ngam inlahen cha nö ṙūöhlö ngam ṙinatö-ellōnre. Kētö ṙinatö-ellōn cha hē e ang Yēsū nö ṙô-òv tö ngih ṙô re. Tö cha min yěn ṙūöhlö ngam ṙinatö-ellōnre, ngaich mihôiṅ min ang Yāvē nö hayööken cha nö la-al nup kanihngenre tö sā rôngö. Ṙatö-ellōnre man tö Yāvē inrē min nö hayööken meh la-al minë kanihngen!

20. Asūp ṙinūöhlö alaha meh in minë inchōḵ elmat in ngih ātiköl inlahen yik raneh senchurī kristīön hēk tö yip ing töngamuh Kristīön?

²⁰ Yēḵ meh ngaich akahakūö töp ma-asökngö röön re öm kē ngam vinôkö, ilööṙen më-eṅ kētöre la-al e. Mihôiṅ man min teūngen tö inreuskö alahare hēk nganöönöre, yēḵ meh chumkūöṙen ngëichkö inlahen yik Kristīön ik raneh senchurī hēk tö yip ing töngamuh inrē. Vë-elkui meh in öm teūngen tö yanöölenre lökten in minë inlahen cha hēk kētöre öm in Yāvē öm kē ngam vinôkö. Töt insā-av min angū-ö nö fësla meh!