TÖHAKÖÖPÖ ĀTIKÖL 15
TINKÖÖKÖ 30 Yöhōvā, Měrā Pörmēsvör, Pitā ôr Tōst
‘Yöölen In Yěi Haröhtöre Im Tēv!’
“Tölöök pöri angū-ö nö in chu öich ṙūötöre im Tēv.”—SAL. 73:28.
ASUH ÖP MIN HAKÖP HĪ?
Asūp mihôiṅ inlahen hī yěi hòṅ haröhtöre in Yāvē hēk asuh inrē min nup inkôlò hī yěi ngatī inlahen?
1-2. (a) Asuh öp tö hòṅ inlahen hī yěi hòṅ vī holre? (b) Asuh öp min haköp hī in ngih ātiköl?
ŌT HÒNG tö akaha hol meh? Ngaich asuh öp inlahen meh ik sā meh hòṅ hanôlö ò? Lohten më-eṅ öm kē-ěny ṙētakre öm in ò, mikahtökūöre inrē tö nup ööilōn ò hēk töt ööilōn ò. Mikahtökūöre inrē më-eṅ lohten tö nup inlahen ò nö im tinrīkenre ngaich ik sā meh ngaich öm akahakūö tö ò nö akaha nö tarik ngaich pōyen inrē nup tövai tinrīken ò, töp lökten meh öm vī an nö holre. Ngatī inlahen ngaich anga-aṅ nö vītöre nö tökô-en nö hol meh.
2 Kô-en ayī-ö hòṅ kalē-ě alaha yěi hòṅ chöh holre. Ngatī inlahen ayī-ö öi hòṅ ma-ainyre haröhtöre in Yāvē. Mikahtökūöre in min in ngih ātiköl tö öp inlahen hī yěi hòṅ haröhtöre in Yāvē ngaich asuh inrē min nup inkôlò hī yěi ngatī inlahen. Urěh pöri ayī-ö öi ngëichkö ngam yanöölenre min yěi haröhtöre öi in ngam tö akaha holre ang Yāvē.
3. Kūö yòh öi hòṅ afēkö nup yanöölenre yěi haröhtöre in Yāvē? Kētö inchōḵ elmat.
3 Tövai ön ngam inlahen hī yěi haröhtöre in Yāvē, pöi yöölen öi löktö in e. Yēḵ hī min aṙū-utī mufē tö inlahen e ngaich mihôiṅ min ayī-ö haröhtöre in ò. (Sal. 63:6-8) Kò-òren öi chumkūöṙen tö ngih töhěng inchōḵelmat, ṙòkhöre in akahakūö tö hī yěi hòṅ vāyö el alaha ngaich hòṅ nyā nup tövāyö el alaha tī ayī-ö nyā-aṅkūö, hòṅ eksörsaes, hòṅ fūra mat öi haròh, kaheuk sakāmö inrē öi pōivat òk mak. Pōyen yip tarik tö akahakūö tö e, hö-ö pöri nö ngatī inlahen pò cha nöng öt afēkö inlahen e. Yēḵ ngòh töhěngtak tarik pöri nö afēken e min ngaich vai min ngam el alaha ò. Ngatī in ayī-ö inrē ṙòkhöre öi akahakūö tö ngam inlahen hī yěi haröhtöre in Yāvē nö tövai angū-ö, yēḵ hī pöri min öi aṙū-utī mufē öi fēkö inlahen e ngaich kūyulōn min ayī-ö öi hòṅ haröhtöre in ò.—Sal. 119:27-30.
4. Sitih ṙô öp kamūich ngam Salmai 73:28?
4 Vë-evkūö Salmai 73:28. Kahūich Āsap hēk kahūich öp töhěngtak kūön ò ön ngam Salmai tö 73 hēk tö nup tahëng inrē Salmai. Töhěngtak misī ang Āsap nö Lēvī nö ramöng ranöng nö el ngam töhet chūök Yāvē. Pī-a anga-aṅ misī nö ṙōl samyeūheu nö löklōn Yāvē, akahakūö pöri anga-aṅ tö ò min nö yöölen yěn haröhtöre nö in ngam Tēv. Ṙūöhlö alaha yip tahëng inrē anga-aṅ nö ngatī inlahen. Ta-a chěi töi ngëichkö ngam yanöölenre yěi haröhtöre in Yāvē.
TEŪNGEN IN TÖ ṘANAMLŌNRE YĔI “HARÖHTÖRE IM TĒV”
5. (a) Kūö yòh öi ṙamölōn yěi haröhtöre in Yāvē? (b) Sitih inlahen öm mihôiṅ yöölen hēk laklöre inrē yěm hang minë mikah ṙô Yāvē tökētu nö im Inchōḵ-oṙô 2:6-16?
5 Asā ṙôken inlahen hī min öi haröhtöre in Yāvē, ngatī ṙôken min ngam ṙanamlōn hī. (Sal. 65:4) Kūö yòh mihôiṅ öi ngatī ṙô? Pön pōyen minë lāinyngen e. Tö sā inlahen Yāvē nö kūichhöt minë mikah aṅmat ngam Paipöl, yēḵ hī min öi hāngö u ngaich yöölen min ayī-ö. Öthō min ayī-ö lō-ongkūö in nup tötlöng ṙô hēk öthō inrē öi kēken tökööl. (Vë-evkūö Inchōḵ-oṙô 2:6-16.) Angū-ö lāinyngen ngam Paipöl nö ngö ṙô: “Töṙāmölōn ön ngòh tarik tökôtökūö tö mikah, ngòh tarik inrē kamëḵ mikah elmat.”—Inch. 3:13.
6. Kūö yòh ök kamūich ngam Salmai tö 73 nöng haṙivlōn?
6 Kô-en yin ṙung më hol Yāvē nö ṙōlheuh nö haṙivlōn. Hěngheuh ök inrē kamūich ngam Salmai 73 nö haṙivlōn, ngölōn anga-aṅ tö më töt hangenlōn tö Yāvē hēk töt lamök in minë ṙahātö ò inrē inchöngten nöng ṙamlōn. Lökten ò nö yīhi tanāinyö ngaich rāinyngö tö inlahen cha. Ngölōn anga-aṅ tö më tö tailölōn hēk tö më ṙamūöhlö alaha minë ötlanöökö nöng ṙūöhölre ṙôken kanôlò hēk vāyö el alaha, öt hēngö kanihngen inrē. (Sal. 73:3-7, 12) Kihngen anga-aṅ nöng afēken u hēk ngölōn inrē anga-aṅ tö ngam inlahenre nö löklōn Yāvē nöng yanëḵngen. Holtö miṙivlōnre anga-aṅ nö ngö ṙô: “Kô-en chin chök alaha halööklö ellōn re: ngaich söichngö tī re öt hòṅ akah tökööl.”—Sal. 73:13.
7. Asuh öp mihôiṅ inlahen hī yěi haṙivlōn? (Ngëichköm nyat.)
7 Kalē-ě miṙivlōn ök misī kamūich ngam Salmai, öt kūöṅnngöre pöri ngam nganöönö ò. Chuh el ngam töt insā-av anga-aṅ patī ngam Tēv, ngaich in e ang Yāvē nö halööktö ngam mufē ò. (Sal. 73:17-19) Yēḵ hī ayī-ö öi kalē-ě miṙivlōn ngaich akahakūö ang Yāvē tö ngam kanihngen hī, töp lökten hī vë-ekūö ò öi vë-ekūötēv hēk havëkö inyöökenre inrē öi in ò. Ngaich löktö in ngam ṙô re Paipöl hēk löktö in yip prötör sistör aṅ el ngam māṅ min ang Yāvē nö hangönken hī, hòṅ hī öi höhlö tö ngam kanihngenre. Rö-ö nöng anū-ö, yēḵ hī inrē öi havīlöng tö minë pinṙūtölōnre ngaich hareuskö alaha hī min ang Yāvē hēk kētö lanāmö elkuilōn hī inrē.—Sal. 94:19.a
Ök Lēvī kamūich ngam Salmai tö 73 mirūlö, sökhak anga-aṅ nö ‘ikūö ngam tövai patī ngam Tēv’ (Ngëichköm perekrāf 7)
TEŪNGEN IN TÖ MAHEUṄKKÖRE HĒK CHÖ-ÖINYRE INRĒ ÖI AṄ, YĔI “HARÖHTÖRE IM TĒV”
8. Asuh öp yanöölen hī yěi haröhtöre in Yāvē?
8 Yöölen in yěi haröhtöre in Yāvē. Kūö yòh? Nët nun minë lāinyngen e. Ngam raneh, teūngen ayī-ö tö chö-öinyre öi aṅ. Ngam innëtö, kē-ěkūö hī ang Yāvē tö ngam töt insā-av maheūṅkkö hī ip yamih ṙētak. (Yar. 29:11) Ta-a chěi töi kakken u.
9. Sitih inlahen öi teūngen tö ngam chö-öinyre öi aṅ yěi haröhtöre in Yāvē?
9 Teūngen in ayī-ö tö chö-öinyre öi aṅ, kūö hī öi haröhtöre in Yāvē. Pōyen pöri töngamuh tarik ing panam tö ngölōn tö ngam Tēv nöng hö-öv, lökten cha-a nö öt īnu tö öp chö-öinyre nö aṅ nö ikūö ngih panam. Pön ngölōn cha-a tö ngih panam min nö aheti ngaich öt hěngtak min tarik ikūö e. Kūö hī pöri öi istötī ngam Paipöl lökten öi ṙatö-ellōnre tö ngam ‘Tēv nö kô-en nö ōt ngaich kētö raneushö yip tarik anga-aṅ yip hamôltö ellōnre nö chöhö ò.’ (Hep. 11:6) Tö ngatī vīni-i inrē ayī-ö tö Yāvē öi tö ṙamölōn öi löklōn, ngaich kô-en ayī-ö töngamuh öi ngatī ṙanamlōn.—Chöö. 10:12, 13.
10. Yip ṙamatö-ellōnre nö in Yāvē ngaich asuh min öp maheūṅkkö cha kahëtö ò? (Salmai 37:29)
10 Pōyen yin më tarik töt akahakūö tö ngam chö-öinyre nö aṅ nö ikūö ngih panam, lökten cha-a nö ngö ṙô, sööḵ chin min yěich chöh kinmānöre, hapīhö, kūönu hēk hamūl rupīöre inrē, hòṅ chu öich öt kihngen min yěich köiny. Öt akahakūö cha-a tö ngam kahëtö ngam Tēv maheūṅkkö hī ip yamih ṙētak. Akahakūö pöri ayī-ö tö ngam Tēv nö kē-ěkūö hī tö ngam tövai maheūṅkkö hī ip yamih ṙētak. (Sal. 25:3-5; 1 Tim. 6:17) Lökten ayī-ö öi haröhtöre öi in ò ngaich ṙatö-ellōnre inrē tö ò min nö hateungngö minë kinlēḵngôre. Hökkö ngam ṙētakre in inrē min öi holtö ṙanamlōnre öi örheūheu ha-öinyö Yāvē in öp tufömngöre panam.—Vë-evkūö Salmai 37:29.
11. Yēḵ hī öi haröhtöre in Yāvē ngaich sitih lōn anga-aṅ hēk asuh nup kahëtö ò inkôlò hī?
11 Ōt nun minë tahëng inkôlò hī yěi haröhtöre in Yāvē. Tö sā ò nö kilēḵngôre tö ò min nö aṙēlö nup tökööl hī yēḵ hī öi havöötö ellōnre in ò. (Isa. 1:18) Lökten ṙung ayī-ö öi öt lāngan öi keun minë vanāichöre, hěnghöre het inrē ngam elkuilōn hī. (Sal. 32:1-5) Yēḵ hī pöri öi haröhtöre in Yāvē ngaich ṙamlōn anga-aṅ. (Inch. 23:15) Mihôiṅ man kò-òren öm fēkö nup taneungenre inkôlò ik sā meh öm haröhtöre in Yāvē. Ta-a chěi töi mikahtökūöre töp inlahenre mihôiṅ örheūheu haröhtöre in Yāvē?
ASUH MIHÔIṄ INLAHEN HĪ ÖRHEŪHEU “HARÖHTÖRE IM TĒV”
12. Asuh nup tö hòṅ örheūheu nö inlahen meh yěm hòṅ haröhtöre in Yāvē?
12 Yēḵ meh ngaich öm kamë ngam vinôkö ngaich lohten më-eṅ öm la-evṙen tö nup la-en nup tö mihôiṅ nö röhta tī tö meh in Yāvē. Tö sā meh mikahtökūöre tö ngam kanô-en inlahen ngam Tēv Yāvē hēk inlahen Yēsū Kristū inrē. Haṙivlōn më-eṅ tö minë tököölre ngaich halööktitre, ṙūöhlö ngam ṙinatö-ellōnre inrē më-eṅ öm in Yāvē ngaich lök in minë kuilōn ò. Yēḵ meh pöri hēk öm hòṅ haröhtöre öm in Yāvē ngaich hòṅ iṙūöhen më-eṅ la-evṙen tö në la-en.—Kòl. 2:6.
13. Asuh nup ihih tölūöi inlahen hī yěi hòṅ haröhtöre in Yāvē?
13 Asuh öp mahayööken hī mihôiṅ haröhtöre in Yāvē? (1) Hòṅ kaheuk sakāmö ayī-ö öi vë-ekūö ngam Paipöl hēk istötirö e inrē. Yēḵ hī pöri öi ngatī inlahen ngaich rö-ö ayī-ö öi töng kamë mikahlōnre tö inlahen nup aṅmat e. Hòṅ mikahtökūöre pöri ayī-ö tö ngam mufē Yāvē, tö ngam kuilōn ò inrē ngaich asīnken u. (Efi. 5:15-17) (2) Hòṅ hangön ngam ṙinatö-ellōnre ayī-ö öi in ò öi sitih inlahen? Afēken minë tö ṙōlkangen inlahen tī ò nö hameuktö ngam hanangenlōnre tö hī. (3) Hòṅ surīkhö nup la-en ayī-ö nup surīkhö Yāvē, hòṅ ṙūöhöngre inrē ayī-ö tö yip tarik yip töng iṙūöhen nö la-evṙen tö minë tötlöng la-en.—Sal. 1:1; 101:3.
14. Asuh nup tö kaheuk sakāmö mihôiṅ inlahen hī yěi hòṅ haṙamlōn Yāvē (1 Kòrin 10:31) (Ngëichkö minë nyat.)
14 Vë-evkūö 1 Kòrin 10:31. Tötṙanāngen ön ngam inlahen hī öi la-evṙen tö nup la-en tö ṙamölōn tī tö Yāvē. Tö sā hī hòṅ im la-en inhānga hēk chuh el mīting, hö-ö pöri nöng anū-ö tölngö inlahen hī, pöi hòṅ kaheuk sakāmö öi la-evṙen tö nup la-en tö ṙamölōn tī tö Yāvē. (2 Kòr. 8:21; 9:7) Tö sā hī ötkô michūṙen in nup töng sitih hēk nup töng aṅ in hī ngaich hòṅ kē-ěkūö yip tahëng inrē ayī-ö tö u. Hòṅ pōiṙāi mat ayī-ö tö ngam nômöre, hòṅ havai mufēre i alaha minë nyīna-avkūö, hòṅ chumkūöṙen inrē tö ngam el alahare. Yēḵ hī min öi ngatī inlahen ngaich röhta min ayī-ö in Yāvē. Ngaich yěn meuk në tö rahëichyen inlahen hī min ang Yāvē öi hòṅ haṙamlōn ò ngaich hēk min nö ṙūöhlöre ngam hanangenlōn ò tö hī.—Lūk. 16:10.
Inlahen hī mihôiṅ haṙamlōn Yāvē: Chumkūöṙen yěi chuvē lòri, eksörsaes (exercise) hēk nyā-avṅkūö tö nup tökòlô tī tö ngam alaha; hameuktö hanangenlōnre öi havëten yip holre (Ngëichköm perekrāf 14)
15. Asuh öp lōn Yāvē nö in hī?
15 Milēḵṙen ang Yāvē tö taṙòkhöre tarik, pòrô cha-a nö tölöök hēk tötlöök. (Mët. 5:45) Ngaich lōnu inrē anga-aṅ tö hī öi ngatī inlahen. Lökten anga-aṅ nö ngö ṙô ‘Un lēkôre tö tarik, un la-alkūö holre inrē, holtö ṙanëmenre pöri i taṙòkhöre tarik.’ (Tai. 3:2) Chumkūöṙen in ayī-ö tö ngih ṙô, lökten öi öt minūö elmat tö yip tarik töt lamöklōn Yāvē. (2 Tim. 2:23-25) Havai ngam tinrīken ayī-ö öi in cha, ngaich angū-ö min ngih lāinyngen hī hēk öi röhta in Yāvē.
MIHÔIṄ IN “HARÖHTÖRE IM TĒV” YĒḴ HĪ PÒRÔ VAICHKÖRE INLAHEN
16. Sitih mufē ang ngam kamūich ngam Salmai tö 73?
16 Lohten më-eṅ öm ngö lōn tö Yāvē nö öt hangenlōn tö meh, kūö meh öm pōyen vanaichköre inlahen. Asuh pöri mihôiṅ öp mahayööken meh yěm ngatī mufē? Mihôiṅ më-eṅ öm fēkö inlahen ngam kamūich ngam Salmai tö 73. Ngö ṙô anga-aṅ: “Ngaich pöri chū-ö: höng öhngen minë kunröön chu: öhtö taleūsi vanāngö chū-ö.” (Sal. 73:2) Vë-enyre anga-aṅ nö “haṙivlōn” hēk “öt akaha” inrē, ngö ṙô inrē anga-aṅ töre ‘nöng sā inlahen nup töṙeūla nup töt akaha.’ (Sal. 73:21, 22) Angū-ö hòng ngaich ngih lāinyngen ò nö ngö mufē tö ò nö öt maheuṅkku, ngaich öt hanangenlōn hēk min ang Yāvē tö ò?
17. (a) Ik sā ngam kamūich ngam Salmai nö kalē-ě miṙivlōn ngaich asuh ök inlahen ò? (b) Asuh öp haköplö hī öi löktö in ò? (Ngëichkö minë nyat inrē.)
17 Yēḵ ngam kamūich ngam Salmai inrē nö ngöṙô lōn tö Yāvē nöng ṙāngen ò ngaich töng rahëichtakūö min ngih tö ngatī mufē elkuilōn ò. Ik sā ò hē e nö kalē-ě miṙivlōn ngaich akahaiṙen anga-aṅ töre nö hòṅ haröhtöre nö in Yāvē, lökten anga-aṅ nö ngö ṙô tī nö kūich: “Iṙūhen pöri chū-ö in Meh [Yāvē]; ṙapkö lahāmö chu Më-eṅ. Hachōkūö chu töp inlēnö aṅ in Meh: ngaich kē-ĕ chu unôich im kanôlò Meh.” (Sal. 73:23, 24) Yēḵ hī inrē ayī-ö ṙung öi haṙivlōn hēk akahaiṙen inrē tö minë ötkumlē-enre, ngaich hòṅ hayönglenre ayī-ö in ngam tö ngëḵ ihong innyatlö hī ang Yāvē ngaich ṙatö-ellōnre tö ò min nö hayööken hī. (Sal. 73:26; 94:18) Pòrô ayī-ö öi rahëichhang kūö öi lō-ongkūö, mihôiṅ pöri ayī-ö öi havantöre in Yāvē ngaich ṙatö-ellōnre tö ò nö ‘hamööngöre nö ma-aṙēlen’ hī. (Sal. 86:5) Yēḵ hī öi kalē-ě miṙivlōn ngaich tötṙanāngen ngam inlahen hī öi hòṅ hēk öi haröhtöre in Yāvē.—Sal. 103:13, 14.
Yěn hòṅ kūöṅnngöre ngam ṙinatö-ellōn hī, ngaich hòṅ vë-ekūötēv hēk chuh el mīting ayī-ö öi haröhtöre in Yāvē (Ngëichköm perekrāf 17)
IṘŪÖHEN “HARÖHTÖRE IN NGAM TĒV”
18. Kūö yòh ayī-ö öi hòṅ örheūheu öi haröhtöre in Yāvē?
18 Ngö ṙô an ngam Paipöl, öt ṙū-utivö an ngam kanôlò, mikah hēk mikah elmat ngam Tēv. ‘Öt akaha elmat ayī-ö’ tö nup fësla ò. (Rōm. 11:33) Öthō ayī-ö öi keuheūtlöre mikahkūö tö nup taṙòkhöre inlahen Yāvē. Lökten ayī-ö öi örheūheu hēk iṙūöhen öi haköp nup inlahen ò ngaich haröhtöre inrē öi in ò.
19. Asuh öp ihih ṙinatö-ellōn hī öi lökten im tökūichi im Salmai?
19 Kūichi an nö im Salmai 79:13 nö ngö ṙô: “Hòṅ ih ihö tarik Meh, sīṅp Meh inrē aṅ kui kiyôp, öi örheūheu ha-öinyö Meh: hameuktö nöinyö in min i tumkölchap nö ṙòkhöre.” Asā inlahen hī min haröhtöre in Yāvē, ngaich ngatī inlahen min nö ṙūöhlöre ngam ṙinatö-ellōn hī tö ò min nö kē-ěkūö hī tö minë töpōyen inkòlô. Ngaich möl min ayī-ö öi sā ṙô ngam kamūich ngam Salmai öi ngö ṙô: “Ngam Tēv an töngëḵ nö ihong nö mahangönlö ngam ellōn chu, anga-aṅ inrē tö örheūheu nö minchööḵö chu.”—Sal. 73:26.
TINKÖÖKÖ 32 Yöhōvā Ki Ōr Hō Chā!
a Yip tarik töpōyen pinṙūtölōn hēk tökiröngen miṙivlōn, lohten min cha-a nö hòṅ chuh in öp tòktör. Yěm hòṅ ṙūöhtö mikahkūöre, kò-òren öm vë-ekūö ngam Chūökamahati, Öng 1 2023.