Örheūheu Pa-ekūö Tö Ngam Tēv Hòṅ Meh Yöölen

1-2. Asuh öp kanihngen vē Kristīön tö sā nuk kanihngen Lōt?

NGAICH ön ngih panam töngamuh nöng kū-ö tö im ötlanöökö, sā inlahen mufē Lòt ayī-ö yěi meuk inlahen cha. ‘Kihngen ellōn anga-aṅ nö meuk në ötlanöökö,’ akahalōn inrē tö Yāvē nö kunyahalōn tö u. (2 Pīt. 2:7, 8) Tö pa-ekūö ök Lòt nö tarik ngam Tēv, hangenlōn inrē tö ò. Lökten ò nö öt asīnkö nuk tinīken yik tötlöök tarik. Havīlöng inrē ayī-ö töngamuh tö yip tarik yip töng lōntöre hēk töt milēḵṙen inrē tö minë töhet chööngö Yāvē. Yēḵ hī pöri hòṅ asīöp ngam tölöng pinhë-eṅkūöre tö ngam Tēv, hangenlōn inrē tö ò, ngaich köp min ngam hanëtö hī, pòrô öi el ṙôngö yip tötlöök tarik.—Inch. 14:2.

² Öthō ön min Yāvē nö öt hayööken hī. Nö sitih inlahen? Pōyen nup tövai inlēnö kahūichhöt ò nö imat ngam līpöre Inchōḵ-oṙô. Hòn ngönlöre ngam lōn hī öi iṙūöhen kēken nup tölöök la-en. Ṙòkhöre in min yöölen yěi hang ngih inlēnö, pòrô öi kikōnyö, kikānö, ṙālö hēk tököiny inrē.

LANAKLÖ HĪ AN NGAM PINHË-EKŪÖ TÖM TĒV

3. Sā ṙô ngam Inchōḵ-oṙô 17:3, asuh öp chö-öiny hī hòṅ laklö ngam ellōnre? (Ngëichköm nyat.)

³ Hĕng ön ngam lāinyngen hī laklö ngam ellōnre, pön mameuk ellōn hī ang Yāvē. Tö ngö manah angū-ö tö ò nö rö-ö nöng chumkūöṙen tö ngam lamātunyi, pön meuk ellōn hī inrē. (Vë-evkūö Inchōḵ-oṙô 17:3.) Yěi hang minë ṙô mikah kahūichhöt ò, ngaich teūngen min ayī-ö tö ngam nômö tö-örheūheu aṅ. (Yôh. 4:14) Yēḵ hī min öi fēken u ngaich öt chūöku min minë tö minyôiny ṙô ngam Sī-ö hēk minë tötlöök ṙô nö ellōn hī minë tö sā tökapahhukūö. (1 Yôh. 5:18, 19) Ṙūöhölre min ngam hanangenlōn Yāvē tö hī. Yēḵ hī min haröhtöre in ò, ngaich ṙūöhölre min ngam hanangenlōn hī hēk minlēḵṙen hī tö ò. Öt lōnu min ayī-ö öi kēken nup la-en nup tö haṙivlōn tī tö ngam yöng hī Yāvē. Lökten öi hòṅ kunyaha elmat tö nup tötlöök mufē. Ngaich yěi töölô min öi kēken nup tötlöök la-en, ngaich ngöṙô min ayī-ö, ‘Sitih inlahen öich min kēken ngih la-en öich miṙivngölōn ngam tö hangenlōn tö chu?’—1 Yôh. 4:9, 10.

4. Sitih inlahen öng ngam pinhë-eṅkūö hī tö ngam Tēv nö laklen ngam sistör nö öt kēken nup tötlöök la-en?

⁴ Hachō-oi ang sistör Marta nö kēken nup tötlöök la-en ngam mi-iyöng Kōsiā, ngöṙô anga-aṅ: “Öt akahakūö chū-ö tö inlahenre ik hē e öich hayunngen ngam fālenre chö-öinyten ngam töng rahëichtakūö ṙanamlōnre. Kūö ngam pinhë-eṅkūöre pöri chū-ö tö Yāvē öich laklöng.”b Sitih inlahen ngam sistör nö laklöre tö kūö pinhë-eṅkūöre tö ngam Tēv? Urěh anga-aṅ nö fēken nup tötlöng ṙòng ngam kahëken re la-en. Mihôiṅ in ayī-ö inrē öi urěhngöre inlahen öi fēkö nup tötlöng ṙòng nup kahëken re la-en. Ngam tökiröng tötlöng ṙòng ngam la-en, ngam inlahen hī yěi miṙivngölōn Yāvē hēk öt köpsörören min öi im linöökö lōn ò.—Ran. 6:5, 6.

5. Asuh öp haköplö hī in prötör Liō?

⁵ Yěi pa-ekūö min tö Yāvē, ngaich öthō min ayī-ö ngö ṙô tö nup kahëken hī la-en nö vaich. Haköplu ang prötör Liō nö in ngam vanāchöre ngam mi-iyöng Kòngkō. Unôichrit tö fën samyeūheu ò nö vōkö, ngaich hanôl yip holre anga-aṅ yik tötlöökö la-en. Ngö mufē anga-aṅ öt tö vaich ön ngam inlahen chu öich hanôlö cha, pöich öthō asīnken nup tötlöök la-en cha. Unôichngöre pöri ngam prötör nö sā yik holre nö pōivat nö òk ka-eut hēk kēken nup tötlöök la-en inrē. Fēkö nuk inköptöre ngaich anga-aṅ tö nak yöngre, fēkö ngam ṙanamlōnre inrē anga-aṅ nö löklōn Yāvē. Fē-ělre ngaich anga-aṅ, kūö inyöökenre ngaich anga-aṅ tö yik minṙöinylen ngaich havan nö in Yāvē. Ngaich öp töngamuh nö minṙöinylen hēk ispësöl painīör inrē.

6. Sitih inlahen nak ihih kikānö tö kakka tö hī?

⁶ Töi chumkūöṙen ngëichkö ngam Inchōḵ-oṙô tö 9 mirūlö, nö vënyö inlahen minā tö nët tak yöngnyīö. Hěngtak ök tö akahaṙa hēk hěngtak ngam tö kulō-ov.c Kööpölōn tö ngih panam ngam Sī-ö nö fahchūrit minë tötlöök la-en (sex), mineūkö minë tötlöng nyat hēk vitiō (pornography) inrē. (Efi. 4:19) Lökten nö tötṙanāngen ngam inlahen hī öi örheūheu pa-ekūö tö Yāvē hēk havööngökūöre inrē tö nup tötlöng la-en. (Inch. 16:6) Lökten in min chumkūöṙen kakka ṙô ngam Inchōḵoṙô tö 9 mirūlö. Yöölen yip min kikōnyö, kikānö nö löktö in e. Mina tö nët tak yöngnyīö tö vënyu in ngam mirūlö, havëken yik töt akaha cha-a nö ngö ṙô “ta-a nyā nya-aṅkūö chu.” (Inch. 9:1, 5, 6, 13, 16, 17) Kö harīkngöre pöri minë ṙòng ngam invëtö cha nö nët tak.

UM HŌ-O ṘÔ NGAM TÖT AKAHA YÖNGNYĪÖ

7. Sā ṙô ngam Inchōḵ-oṙô 9:13-18 asuh nup min ṙòng ngam inlahen hī yěi hō-o ṙô ngam tökulō-ov yöngnyīö? (Ngëichköm nyat.)

⁷ Töi ngëichkö inlahen yik hamang ṙô ngam “tökulō-ov yöngnyīö.” (Vë-evkūö Inchōḵ-oṙô 9:13-18.) Öt aṙē-ěv anga-aṅ nö havëken yik töt akahaṙa nö ngö ṙô, “Chuh hih yin” nyā haṙamlōnre inrē. Asuh pöri ngaich ök ṙòng e? Ngö ṙô ön hēk ngam mirūlö nö vë-eny nang hī ‘chūök kupah an ngam patī ò.’ Lohten öm köpölōn tö ṙô nuk urěhngöre mirūlö in ngih līpöre, tö hī öi hōtu hīnöre tö yip tö ngatī inlahen yöngnyīö yip tötlööngö kuilōn hēk tinrīken inrē. Ngö vinënyi an ‘höng mameuk kūö ngam kinpaha yěi chuh patī cha.’ (Inch. 2:11-19) Im Inchōḵ-oṙô 5:3-10 in hēk hōtu hīnöre tö ngam tötlöngö tinrīken yöngnyīö ngam ‘kamū-ötö im kinpaha röön kalröön.’

8. Asuh öp mihôiṅ katöllö hī min?

⁸ Yip tarik hamang invëköre tö ngam ‘tökulō-ov yöngnyīö,’ hòṅ kēḵ fëslare cha-a. Yěn hòṅ hang ngam invëköre tö ò hēk yěn hö-ö. Mihôiṅ in min ayī-ö inrē ngatī inlahen: Lohten öi halo-oikūö öi kēken nup tötlöök la-en, meuk nup tötlöng nyat hēk vitiō öi el intörnet. Sā ṙēngen mahavëken hī min ngam tökulō-ov yöngnyīö, hē e ayī-ö öi hòṅ kēḵ fësla re öi sitih inlahen min?

9-10. Kūö yòh öi hòṅ ṙūöhöngre tö minë tötlöng la-en?

⁹ Pōyen nup tötlöng ṙòng ngam inlahen hī asěha, lökten ö I hòṅ ṙūöhöngre tö e. Ngö ṙô an ngam “tökulō-ov yöngnyīö,” “Tö pachāka ön ngam mak tö-ulāyi.” Asuh öp manah ngam mak tö-ulāyi? Vënyu an tö ngam Paipöl tö inlahen minā pamīhöre nö hameuktö hanangenlōnre tö höö, na sā ṙēngen ngam tö pachāka mak. (Inch. 5:15-18) Yēḵ ngam kikōnyö hēk kikānö nö rechistrēsönö, ngaich möl mihôiṅ cha-a nö holtöṙah höö nö kē-ěkūö höö tö ngam ṙanamlōn. Hö-ö pöri ngam ‘tö-ulāyi mak’ nö ngatī inlahen, pön ṙô tö ngam chinô-òṅkānö angū-ö. Tö hayunkaṙen kinëken ön angū-ö la-en, nö sā inlahen yip mu-ulāya nö hayungkenre nö ulāya. Pachāka ngam mak tö-ulāyö nö in yip tö ngölōn töre nö öt akahka min nö kēken e angū-ö la-en. Töng mahachīlöre yip tö ngatī inlahen, pò Yāvē nö keuheūtlöre maheuk! Hö-ö pöri angū-ö nö tö ‘pachāka,’ pön tökunyah. Yēḵ ngòh töhěng tak tarik nö ngatī inlahen, öt hō-ov min anga-aṅ tö Yāvē. (1 Kòr. 6:9, 10) Ōtngöre nun inrē minë tötlöng ṙòng e.

¹⁰ Yip tarik kamëken ngam chinô-òṅkānö, unôichngöre cha-a nö aṙě-ěv hēk kūön elmat inrē töre. Hěnghöre öt köp ngam mikūönö cha. mihôiṅ inrē min nö kūönhöre pòrô nöng öt lōnu. Lökten angū-ö nö tölöök nö inlahen hī, yěi sō öi chuh patī ngam tökulō-ov kikānö öi haṙamngölōnre. Yip tö ngatī inlahen min ngaich öt köp min ngam innôlö cha nö in Yāvē, höng sā ṙēngen tökapah cha-a. Rö-ö nöng angū-ö, pön pōyen ngaich yip tö vahavö, angū-ö lāinyngen cha nö kapah. (Inch. 7:23, 26) Kô-en an nö lööngö ṙô nö vë-eny nang hī ngam manā-aṅ ṙô ngam tö 9 mirūlö ‘nö el öp tö-aṙū Chūök Kupah ngam ngahöönkö ngòh tökulō-ov kikānö.’ (Miröökö 18) Yěn tötlöng ngam ṙòng invëkö hī töm tökulō-ov kikānö, ngaich kūö yòh nö pōyen yip tarik chamuh in e?—Inch. 9:13-18.

11. Kūö yòh öng ngam mineūkö minë tötlöng nyat nö tö pala-aiṙen tī?

¹¹ Pōyen yip ngaich töngamuh tö fukta nö i mineūkö minë tötlöng nyat. Ōt yip tö ngölōn tö e nö öt vaich angū-ö. Ngaich pöri nö pōyen yip tö kihngen tö kūö e, pön öt löng cha-a tö tī e, öt lööngö mat inrē yěn ngëichken yip tahëng, ööire inrē nö meuk nup tötlöng. Yēḵ ngòh tarik nö meuk nup tötlöng nyat, kihngen min anga-aṅ nö vaichngen u. Pò ngam mineūkö minë tötlöng nyat nö öt ṙaptö minë tötlöng kuilōn hī, pön höng ṙūöhlöng alaha tö u. (Kòl. 3:5; Yāk. 1:14, 15) Lökten yip mameuk minë tötlöng nyat min nö teungten cha-a nö kēken nup tötlöök la-en.

12. Hòṅ sitih inlahen öi yěi sō fēken nup tötlöng mufē?

¹² Sitih inlahen öi min ayī-ö Kristīön yěn yih nup tötlöng nyat nö imat minë fūn hī hēk kömpiutör hī inrē? Hòṅ ilöö kēngen u ayī-ö. Yěi fēkö ngam innôlöre in Yāvē min im hē e nö tö pōiṙāi, ngaich ilööṙen min ayī-ö öi kēngen u. Mihôiṅ min lohten nup nyat tö hameuknyu nö öt yahngen nö chōich, öt löng pöri min nup mufē hī yěi meūkö u. Kūö yòh rih öi ötkô meuk nup tö ngatī nyat? Pöi lōnu töre öi öt fēkö nup tötlöng hēk kēkö nup tötlöök inrē ellōnre. (Mët. 5:28, 29) Ngam minṙöinylen aṅ Tailën ang prötör Tēvit, ngö ṙô anga-aṅ: “Ngö lōn chū-ö öich in re: ‘Ōt nup nyat töt uroh nö chōichngen, ṙamlōn hòng pöri min ang Yāvē nö in chu, yěich haköpmatre öich meūkö u?’ Lööngö katöllö chū-ö tö la-enre, yěich ngatī inlahen öich afē-a.”

13. Asuh öp ṙô tö hòṅ kanöplōn hī hòṅ hī holtö mikah elmat re la-evṙen min?

¹³ Yēḵ hī min öi pa-ekūö töre öi miṙivngölōn Yāvē, ngaich holtö mikah re min ayī-ö öi la-evṙen. Pò ngam pinhë-eṅkūö tö ngam Tēv nö ‘ranehlö mikah.’ (Inch. 9:10) In ngam līpöre Inchōḵ-oṙô tö 9 mirūlö in öi mikahtu elmat tö e. Vinënyö inlahen ök tahëng kikānö, ngam ṙamô tö ngam “tökô-en mikah.”

HŌ-EN NGAM INVËTÖRE TÖM TÖ AKAHA KIKĀNÖ

14. Asuh öp invëtö hī im Inchōḵ-oṙô 9:1-6?

¹⁴ Vë-evkūö Inchōḵ-oṙô 9:1-6. Havëtu in hēk öi in ngih miröökö. Löktö in Yāvē pöri ngam invëtö hī, ngam Vamīlen hī hēk Kamëtö mikah taṙòkhöre inrē. (Inch. 2:6; Rōm. 16:27) Vënyu nang in öi in ngih miröökö tö inlahen ngam tökiröng patī ngam tö sat tö machööḵlö. In e mikahkūö ayī-ö tö Yāvē nö töt ma-iöṅhtīre, nö havëten yip taṙòkhöre tarik nö kēḵ inköptöre hēk mikahre nö in ò.

15. Asuh öp ṙinūöhlö alaha hī tö Yāvē?

¹⁵ Töt milip an ngam Tēv, hòṅ kē-ěkūö hī inrē anga-aṅ tö nup taṙòkhöre chehen. Vënyu ngam ṙô e im Inchōḵ-oṙô tö 9 mirūlö inlahen ngam inchōḵ elmat ngam kikānö, nö ṙô töm “tökô-en mikah” öi akahakūö töm tinrīken ngam Tēv. Vī tökiröng alaha kāḵ yip yamihtökūö anga-aṅ, halēnlö vain, lēnö tī inrē ngaich tö ngam mīs yip nyāma. (Inch. 9:2) Ngö ṙô ön ngam tö 4 hēk 5 miröökö: “Ngö ṙô an [tökô-en mikah] nö in ò öp töt akaha, ‘Tā-a, nyā nyā-aṅkūö chu.’” Kūö yòh öi hòṅ hō ngam invëtöre tö ò ngaich haṙamngölōnre im nyinā-avkūö? Lōnu an Yāvē tö yip kūönre nö akaha hēk kuchīken inrē. Öt lōnu anga-aṅ tö cha nö kēken nup tövaich la-en ngaich kēḵ inköplöre nö in u. “Hachūökngö tölöök mikah an hinöngken töchiplô; lanaklö cha an yip lamök i hinëngö.” (Inch. 2:7) Yěi pa-ekūö min tö ngam Tēv, ngaich pītnyöre min öi haṙamlōn ò. Chumkūöṙen inrē min öi hang minë inlēnöre kahëtö ò ngaich kēken u.—Yāk. 1:25.

16. Sitih inlahen öp prötör Ëlen nö lööngö kahë tö fëslare kūö ò nö pa-ekūö tö ngam Tēv, ngaich asuh ök ṙòng ngam inlahen ò?

¹⁶ Chumkūöṙen tö inlahen Ëlen nö lööngö kahë tö fëslare kūö ò nö pa-ekūö tö ngam Tēv. Minṙöinylen an hēk mahaköphöti inrē nö el iskul. Ngö ṙô anga-aṅ: “Pōyen yip tīchör i chūök chu öich haköphöti tö ngölōn tö ngam mineūkö minë tötlöng sinima nö töt vaich. Ngö ṙô cha-a tö u nö chūök hī öi kēḵ minë minkahtölōn i alaha ngam sex.” Akahalōn pöri ngam prötör tö u nö vaich. Ngö ṙô an nö hēk, “Pa-ekūö chin chū-ö tö ngam Tēv, lökten öich öt meuk nup tö ngatī inlahen sinima. Vë-eny nang yip tīchör inrē chū-ö tö ngam lāinyngenre öt meūkö u.” Hang ṙô ngam “tökô-en mikah” ngam prötör ngaich ‘lök im talöökö mikah hinëngö.’ (Inch. 9:6) Köp ngam prötör nö in ngam fëslare, ṙamlōn ngaich yik rīkre tīchör nö meūkö ò ngaich haköpmat ngam Paipöl hēk yihtökūö inrē ngaich cha-a nö mīting.

17-18. Yip hamang ṙô ngam mikah asuh nup inkôlò cha töngamuh hēk sitih inlahen öp yamih ṙētak? (Ngëichköm nyat.)

¹⁷ Kētö minë tö nët inchōḵ elmat ang Yāvē nö hòṅ mikahtö elnang hī öi hòṅ sitih inlahen yěi teūngen tö ngam tövai maheukköre ip yamih ṙētak. Yip tarik tö hō-en ngam invëtöre tö ngam tökulō-ov kikānö, höng hòṅ hayunkenre cha-a nö hòṅ haṙamlōnre nö kēken nup tötlöök la-en. Höng haṙamngölōnre cha-a töngamuh, öt fēkö öp yamih ṙētak pöri. Öt akahalōn anga-aṅ tö ngam yamih ṙētak ò “nö el öp tö-aṙū Chūök Kupah.”—Inch. 9:13, 17, 18.

¹⁸ Vai pöri öp maheūkkö yip tarik hamò-en ngam invëtöre tö ngam “tökô-en mikah”! Ṙōlkangen nun minë tökuchik nya-aṅkūö yip tarik halēnlö ngam tökô-en mikah. Lökten cha-a nö haṙamlōn re nö kē-ě u ngaich röhta nö in Yāvē. (Isa. 65:13) Ngö ṙô ang Yāvē nö löktö in ök pròfět Isayā: “Haṙēmngenre hang ṙô chu, ngaich nyā-aṅvkūö tö tölöök, ngaich kumchikngenre i kanôlò.” (Isa. 55:1, 2) Ṙònghöichṙen in töngamuh öi harūnö, haköp nup tölöök ṙô Yāvē, ngaich kunyaha elmat tö nup sin-òkkūö ò. (Sal. 97:10) Havëten yip holre in inrē öi hang ṙô ngam “tökô-en mikah.” Sā ṙēngen ‘mahavëten yip aṅ lā tulöng chūök el panam öi ngö ṙô: “Öp töt akahaṙā, hökngen ò nö kānhötre nö ihih.’” Yip hamang ṙô ngam tökô-en mikah, rö-ö cha-a nöng yöölen töngamuh pön yöölen min inrē ip yamih ṙētak. Örheūheu min anga-aṅ nö “aṅ” hēk ‘lök im talöökö mikah hinëngö’ inrē.—Inch. 9:3, 4, 6.

19. Sā ṙô ngam Mumkahten 12:13, 14 asuh öp ngaich tö hòṅ inlahen hī? (Ngëichkö ngam pòks “Yanöölen Hī Yěi Pa-ekūö Tö Ngam Tēv.”)

¹⁹ Vë-evkūö Mumkahten 12:13, 14. Ta-a chěi töi iṙūöhen pa-ekūö tö ngam Tēv. Ngatī inlahen min öi laklö ngam ellōnre ing manā-aṅ sakāmö, köptī töm hanëtöre in nup töng sitih, ngaich hangönlö ngam innôlö re inrē öi in Yāvē. Yēḵ hī min öi pa-ekūö tö ngam Tēv, ngaich iṙūöhö ṙô min ayī-ö öi havëten yip tömaṙôngö tarik nö hang ngam “tökô-en mikah” ngaich kēḵ yanöölenre nö in e.