Julho

Jesu a kombisile ngu kuhetiseka mapimiselo ni matipfelo a Tate wakwe ka totshe ti a nga womba kupata ni sidiwukiso si a nga si maha. (Joh. 14:9) Hi nga gonda txani ka sidiwukiso sa Jesu? Jesu ni Tate wakwe va hi randa ngutu. Mbimo yi a nga ti ha mafuni, Jesu a kombisile lirando la hombe ngu vathu ngu kumaha sidiwukiso kasi kuvhuna ava va nga ti xaniseka. Dikhambi dimwani, vavamna vambidi a va i nga ti mabhofu va kwangute va txi kombela txivhuno ka Jesu. (Mat. 20:30-34) Se Jesu “ngu kutelwa ngu wumbilu” a to va hanyisa. Dipswi da Txigriki di di nga hundulexelwa va txi “kutelwa ngu wumbilu” di txhamusela kupfela wusiwana ti txi khukhela mbiluni. Mpfela wusiwana wonewo awu i ku txikombiso txa lirando, wu susumetile Jesu ti to e dyisa ava va nga ti ni nzala ni kuhanyisa ava va nga ti ni tshekela. (Mat. 15:32; Marku 1:41) Hi nga tsaniseka ti to Jehovha i ku Txizimu txa “wumbilu wa hombe” ni Mwanana wakwe va hi randa ngutu ni ku va pandiseka ngako hi txi xaniseka. (Luka 1:78; 1 Pedro 5:7) Vona va ti emete ngu maso o bhilivila ku ta thavisa sotshe sikarato si vathu va mananako naso! w23.04 3 ¶4-5

Hi nga vayilela kulera mwendo ku engisela timhaka ti ti yelanako ni mapimiselo o biha a mafu awa a Sathani. Hi nga tata mialakanyo yathu ngu timhaka tatinene ngu kulera ni kugonda Bhiblia. Kuxalela mitshangano ni kupateka ka mthumo wo txhumayela ti nga hi vhuna kuvhikela mialakanyo yathu. Jehovha a thembisa ku kha na mbi tumelela ti to hi dukwa ngu si si ku txitimwi ka mtamo wathu. (1 Vak. 10:12, 13) Mmwani ni mmwani wathu ti lava e khongela ngutu kasi ku e simama a di thembekile ka Jehovha ka masiku yawa o gwita. Jehovha a lava ti to hi ‘tshakunuta mbilu yathu kwakwe’ ngu mkombelo. (Mas. 62:8) Dhumisa Jehovha ni ku m’bonga ngu totshe ti a ti mahako. Mkombele ti to e kuvhuna u va ni txibindi ka mthumo wo txhumayela. Mkombele to e kuvhuna u wonisana ni sikarato ni kuxula siduko asi ti nga mahako u txi wonisana naso. U nga tumeleli txilo mwendo m’thu e kulekisa kumaha mkombelo ka Jehovha mbimo yotshe. w23.05 7 ¶17-18

Ngu kutxani hi txi xalela mitshangano? Txo khata ngu ti to hi dhumisa Jehovha. (Mas. 26:12; 111:1) Hi tshumela hi xalela mitshangano kasi ku hi kuzetana ni vanathu ka timbimo to karata. (1 Vat. 5:11) Mbimo yi hi guletako diwoko kasi ku hi xamula hi na va hi txi hetisisa timhaka tiya ta timbidi . Kambe hi nga manana ni sikarato. Hi nga ti pfa hi txi thava kuxamula, mbimo yimwani hi nga tilava kuxamula ko tala kambe va si hi ningeti. Nji txani txi nga hi vhunako kuwonisana ni sikarato siya? Mpostoli Paulo a wombile ti to hi fanete kuveka mapimo ko “tsaniselana.” Ngako hi txi ziva ti to hambi xamulo yathu i di yo koma, kambe yi txi phofula ta likholo lathu ya kuzeta vanathu, ti nga hi vhuna ku hi si thavi kugula diwoko to hi xamula. Hambi i di ti to kha hi ningetwi makhambi o tala, kambe hi nga tsaka kuziva ti to vamwani va na mana mkhanjo wo xamula.—1 Pedro 3:8. w23.04 20 ¶1-3

Mkoma a ningete txiziviso. Vajudha ava va nga ti wukhumbini khe Bhabhilona kudingana 70 wa malembe va khulutwe ve tshumela mtini kwawe Israyeli. (Ezra 1:2-4) Phela i Jehovha a ndi no hetisisa atiya. Nguko Bhabhilona a si na kukhulula tikhumbi takwe. (Isaya 14:4, 17) Kambe Bhabhilona a xutwe ni ku mkoma wamphya a gete Vajudha ti to va ti fanete kuhuma. Votshe Vajudha, ngutu-ngutu ava i nga ti misungo ya timwaya va mahile txisungo txo huma Bhabhilona mwendo kuzumba. Txisungo txonetxo txi si hehuki. Ava va nga ti kute ngu tanga va woni to ti ndi na va karatela kuteka liendo lonelo. Aku Vajudha vo tala va nga ti veleketwe Bhabhilona, mtini kwawe i ti kona muleya, va si zivi wukhalo wumwani. Phela kwawe, ditiko da Israyeli i di marumbini ka vakokwani vawe. Vamwani Vajudha ti nga maha va ti ganyile Bhabhilona. Se ti ndi na va karatela kuleka mabhindu awe ni miti yawe yo zumbiseka kasi ku ve ya zumba ka ditiko adi va si di ziviko. w23.05 14 ¶1-2

Dipswi da Txizimu di hi kuzeta ku hi simama hi sakulela kutsanisela, wumbilu ni lirando. Luka 21:19 yi womba tiya: “Ngu kutimisela kwanu, mi na hanyisa mimoya yanu.” Vakolosa 3:12 yi womba tiya: “Ambalani moya wa . . . wumbilu.” 1 Vatesalonika 4:9, 10 yi womba tiya: “Anu mipune mi gondisilwe kurandana ngu Txizimu. . . . Ngu toneto mi hanyisako tona ni votshe vanathu.” Otshe mavhersikulo yawa ma bhaletwe votshe vagondiswa a va se va nga txi kombisa kutsanisela, wumbilu ni lirando. Kambe ti txi lava ve simama ve lavetela tinzila to kombisa tifanelo tiya. Nathu hi fanete kumaha ti ti fanako. Ti to u vhuneka, wona nzila yi Makristu o khata ma nga kombisa ngu yona tifanelo toneto. Ngu msana, wona to u nga va etetelisa kutxani vagondiswa vale kasi ku kombisa ti to u ti lulamisete kuta wonisana ni xanisa ya hombe. Mbimo yi xanisa ya hombe yi no khata, awe u nava u di gondile nzila yi u nga tsaniselako ngu yona ni ku u na ti emisela kusimama u tsanisela. w23.07 3 ¶4, 8

Ti si nga ni mhaka to hi vasawuleki mwendo hi “tinvuta timwani,” ti lava hi simama hi tsimbila ka “Nzila yo Sawuleka.” (Joh. 10:16) Kukhukhela 1919 E.C. timiliyoni ta vavamna, vavasikati kupata ni vanana va humile ka Bhabhilona wa Hombe, i ku mzinda wa wukhongeli wa makuhu ve khata kutsimbila ka nzila yo fanekisela. Jehovha a thavisile sotshe sitsha asi si nga txi vhalela Vajudha ka nzila yo huma Bhabhilona. (Isaya 57:14) Ku wombwa txani ngu “Nzila yo Sawuleka” ka masiku a ngweno? Kukhukhela ka malembe a kale kala ku ya hoka ka 1919, Jehovha a thumisile vavamna vo thembeka ava va nga txi mu randa kasiku ve vhuneta ko basisa nzila yo huma ka Bhabhilona wa Hombe. (Fananisa ni Isaya 40:3.) Vona va mahile mthumo wa wunene ngu kumaha ti to ti koteka ku votshe vathu va timbilu ta tinene ve huma ka wukhongeli wa makuhu ve khozela Jehovha kota vathu vakwe. w23.05 15-16 ¶8-9

Jehovha a lava hi mu thumela hi di tsakile ni ngu kuranda kwathu. (2 Vak. 9:7) Ina hi nga simama ni makungo athu a moya hambi hi txi tipfa hi si nga ni minavelo yo ma hokelela? Paulo a ti khene: “Ani na tsayisa mmidi wangu ni txi wu maha khumbi.” (1 Vak. 9:25-27) Paulo a ti kurumetile kumaha a ti i ngadi ta tinene hambi mbimo yi a nga txi ti pfa a si nga ni minavelo. Ina Jehovha a wu tsakete mthumo wa Paulo? Ina! Ni ku Jehovha a mu hakete ngu mizamo yakwe. (2 Tim. 4:7, 8) Ngu ha ku fanako, Jehovha wa tsaka ngako hi txi ti karatela kuhokelela makungo athu hambi hi txi ti pfa hi si nga ni minavelo yo maha toneto. Ene wa tsaka, nguko wa ti ziva to hi maha toneto ngu mhaka ya lirando li hi ku nalo ngu ngene, kambe i si nga ti to hi maha ngu ku ti tsakela. Kufana ni ku Jehovha a nga katekisa Paulo, ene a na katekisa mizamo yathu. (Mas. 126:5) Se mbimo yi hi wonako makatekwa a Jehovha, ti nga maha hi va ni mixuvo yo maha toneto. w23.05 29 ¶9-10

Mpostoli Paulo a fananisile ava va no mbi ta huluka ka ditshiku da Jehovha ni vathu ava va otelako. Kha va ti woni ati ti humelelako ni ku kha va ti pfisisi ti to mbimo ya pinda ngu txikuluveta. Nyamsi vathu vo tala va otete ngu didhawa da moya. (Var. 11:8) Vona kha va kholwi ti to hi hanya ka “masiku a magwito” ni ti to xanisa ya hombe yi na hoka i si nga kale. (2 Pedro 3:3, 4) Hambi keto, athu ha ti ziva ti to txialakanyiso txo zumba hi di rinzete nja lisima ni ku nja txikuluveta. (1 Vat. 5:6) Ngu kutxani hi di fanete ku va vathu vo thutha ni kutsana kasi ku hi si ti beteli ka timhaka ta politika ni mahanyelo a mafu yawa? Kota ku ditshiku da Jehovha di yako di tshuketela, mikuzetelo yo hi pateka ka timhaka tiya yi na ya yi engetela, kambe kha ha fanela kukarateka ngu ti to hi na angulisa kutxani. Moya wo sawuleka wa Jehovha wu nga hi vhuna ku va vo thutha ni kusimama hi di tsani kasi ku hi maha sisungo sa wutxhari.—Luka 12:11, 12. w23.06 10 ¶6-7

U alakanya txani mbimo yi u pfako ditina di di ku Samsoni? Ti nga maha u txi alakanya ngu wamwamna wa mitamo. Eto ditshuri. Kambe Samsoni mahile txisungo atxi ngu magwito txi nga m’tisela sikarato so tala. Hambiketo, Jehovha a vekile mapimo ka likholo la Samsoni, toneto ti mahile ti to Jehovha e bhala didungula da Samsoni mu ka Bhiblia kasi ku athu hi wuyelwa. Jehovha a thumisile Samsoni kasi kuhetisisa timhaka to xamatisa, ti to e vhuna Vaisrayeli i ku vathu va a nga va sawula. Ku di pindile malembe a mangi Samsoni a di fite, Jehovha a susumetile mpostoli Paulo ku e pata ditina da Samsoni ka mxaxamelo wa vathu va likholo la hombe ngutu. (Vaheb. 11:32-34) Txikombiso txa Samsoni txi nga hi kuzeta. Ene a txi themba Jehovha, hambi a di ka siemo so karata. w23.09 2 ¶1-2

Hi nga kulisa kutsanisela kwathu nguko maha mkombelo ka Jehovha mbimo yotshe, hi m’gela minavelo yathu. (1 Vat. 5:17) Ti nga maha konku u si wonisani ni sikarato so nemela ngutu. Hambi keto, ina wa simama u lava mkongomiso wa Jehovha mbimo yi u tipfako, u di godhote, u di jujekile mapimo mwendo u di karatekile? Ngako u txi kombela txivhuno ka Jehovha ka sikarato asi u wonisanako naso konku, ti na ta ku hehukela ku kombela txivhuno ngako u txi wonisana ni sikarato sa hombe mbimo yi yi tako. Se u na tsaniseka ti to Jehovha wa yi ziva mbimo yi a fanelako ku kuvhuna ngu yona ni ti a fanelako ku ti maha. (Mas. 27:1, 3) Hi na ta sikota kutsanisela xanisa ya hombe ngako hi txi tsanisela sikarato asi hi mananako naso nyamsi. (Var. 5:3) Ngu kutxani hi txi womba eto? Nguko vanathu vo tala va womba to mbimo yi va tsaniselako txiemo txo karata eto ti va vhuna ku ve ta tsanisela txiemo txi va nga wonisanako natxo masoni. Mbimo yi va tsaniselako sikarato ngu ku vhunwa ngu Jehovha, eto ta tsanisa likholo lawe la ti to Jehovha wa ti lava ku va vhuna, se likholo ni lona li va vhuna ku ve tsanisela sikarato si va nga wonisanako naso masoni.—Jak. 1:2-4. w23.07 3 ¶7-8

Ku ti veka hahatshi ka Jehovha ni wumbilu wakwe sa mu susumetela ku eva wo dinganisela. Ngu txikombiso, Jehovha a kombisile to wa ti veka hahatshi mbimo yi a nga txi lava ku lovisa vathu va va nga ti ni mahanyelo o biha khe Sodhoma. Ngu kuthumisa tingelozi, Jehovha a gete Loti wamwamna wo thembeka ti to e thavela kuya mimangoni. Kambe Loti a txi thava kuya konemo, se ene a to kombela ka Jehovha ti to ene ni mwaya wakwe va thavela kuya Zowari i ku didhoropa da didotho adi ni dona di ngadi fanete ku hoxotwa. Jehovha a di sinzisile Loti to a engisa ti a nga mgela, kambe hahanze keto ene a tumete txikombelo txa Loti ni ku kha lovisa didhoropa da Zowari. (Gen. 19:18-22) Ku di pindile malembe o tala Jehovha a kombisile wumbilu ka vathu va Ninivha, ene a rumete mprofeti Jona kasi ku ya gela vathu vale va nga ti ni mahanyelo o biha ti to va ndina loviswa kumweko ni didhoropa dawe, kambe mbimo yi va nga tisola Jehovha a va divalete ni ku kha lovisa didhoropa dile.—Jona 3:1, 10; 4:10, 11. w23.07 21 ¶5

Hi nga gonda txani ka txikombiso txa Jowasi? Jowasi a txi fana ni mndonga awu wu milako txitimwi ka wumwani. Mbimo yi mndonga awu a nga ti miti ka wona wu nga fa, i ku Joyadha, ene a lekile kuthumela Jehovha e engisela makuhu a vathangeli ava va nga si thavi Txizimu. Atiya ti kombisa ti to kha ha fanela kuthava Jehovha nguko Makristu kulothi mwendo siro sa mwaya sa mthava. Kasi ku hi simama hi di tsani ngu didhawa da moya, hi fanete ku tsanisa ku ti ningetela kwathu ni kuthava Jehovha ngu kugonda mbimo yotshe, ku alakanyisisa ngu ti hi ti gondako ni kumaha mkombelo. (Jer. 17:7, 8; Vakl. 2:6, 7) Jehovha kha hi kombeli to tala. Ati a ti lavako kwathu ta maneka ka Ekleziyaste 12:13, ayi yi ku: “Thava Txizimu, u xayisa milayo ya txona; nguko ayiya ngu yona fanelo ya votshe vathu.” Ngako hi txi thava Txizimu hi na ta sikota kuwonisana ni siduko ka mbimo yi yi tako ni kuzumba hi di thembekile. Txi walo atxi txi nga onhako wungana wathu ni Jehovha. w23.06 19 ¶17-19

Txitsanisekiso txa Txizimu ka vhersikulo 5, txi khata ngu kuwomba to: “Awule a nga ti maneka a di khalahatshile ha txikhaloni txa wukoma, a ti khene.” (Mtu. 21:5a) Atiya nda lisima ngutu, nguko adiya dimwedo da makhambi a di a nga womba-womba a pune ka dibhuku da Mtuletelo. Txitsanisekiso txiya hi txi mana ka Jehovha apune, i si nga ngu kuthumisa ngelozi mwendo Jesu Kristu awu a nga wuswa ka vakufa. Ditshuri diya di tiveka hakubasani to hi nga themba mapswi ya ma londiselako. Ngu kutxani? Nguko Jehovha “Txizimu a txi txi si wombiko makuho.” (Tit. 1:2) Ngu toneto, mapswi ya hi nga ma gonda ka Mtuletelo 21:5, 6 ma na hetiseka ngu ditshuri. Wona txhamuselo ya dipswi “Wonani.” (Mtu. 21:5) Dipswi di di ku “wonani” di nga hunduluxelwa ngu Txigriki, di thumisilwe ka kungi ka dibhuku da Mtuletelo. Ngu tihi ti ti londiselako? Jehovha a womba tiya: “Sotshe na si hundula si txi maha sa siphya.” Ditshuri ku Jehovha a womba-womba mayelano ni ku txitxa aku ku no maheka mbimo yi yi tako, kambe kwakwe a womba-womba nga txithembiso txiya se txi hetisekile.—Isaya 46:10. w23.11 3-4 ¶7-8

Mpostoli Pedro a simamile e lwisana ni ku tandeka kwakwe. Wona sikombiso so kari. Mbimo yi Jesu a nga txhamusela nzila yi a ndi no fa ngu yona kasi ku hetisisa wuprofeti wa mu ka Bhiblia, Pedro a mu kawukile. (Marku 8:31-33) Pedro ni valondeteli vamwani va ti zumba ngu ku phikizana ngu ti to i mani a ndi nova wa hombe. (Marku 9:33, 34) Ka wusiku wo gwita Jesu a sise kufa, Pedro a wite nzeve ya dijaha do kari. (Joh. 18:10) Ka wusiku wona wule Pedro a tetwe ngu dizowa e lamba mngana wakwe Jesu ngu makhambi mararu. (Marku 14:66-72) Msana keto Pedro a dite ngutu. Jesu kha m’tsukula Pedro. Msana kova Jesu a di wusilwe a ningile mkhanjo Pedro wo e kombisa lirando li a ngadi nalo ngu ngene. Jesu a rambile Pedro to ngu ku tiveka hahatshi e dyisa tinvuta takwe. (Joh. 21:15-17) Pedro a ti tiemisete kumaha toneto. Ene a ti tiho Jerusalema ngu ditshiku da pentekoste kumweko ni va va nga va vo khata kusawulwa ngu moya wo sawuleka. w23.09 22 ¶6-7

Mostoli Pedro a kuzetile madhota ku ‘me dyisa mtxhambi wa Txizimu.’ (1 Pedro 5:1-4) Ngaku u di didhota, ha ti ziva ti to wa randa vanathu ni ku wa ti lava ku va khatalela. Kambe mbimo yimwani u nga tipfa u di karate mwendo u si na mbimo yo khatalela txiavelo txonetxo. U nga maha txani? Gela Jehovha ti u ti pfisako tona. Pedro a bhate tiya: “Awu a thumako a na thumi madingano ni txiavelo txi a nga hiwa ngu Txizimu.” (1 Pedro 4:11) Makristu kuloni, ti nga maha me wonisana ni sikarato si ti nge kotekiko ku si lulamisa ka mafu yawa. Khumbula ti to Jesu Kristu awu “a lumbwako ngu ku pfaliswa” a nga va vhuna ka ti u tandako ku ti maha. Ene a nga timaha nyamsi ni ka mafu a maphya. Jehovha a kombela madhota ti to me randa ni ku khatalela vanawe ni kuva “txikombiso txa txinene ka mtxhambi.” w23.09 29-30 ¶13-14

Hi nga xengwe ngu mawonelo a vathu. Ngako hi txi pimisa ngu nzila yi vathu va va si thumisiko matshina a milayo ya Jehovha va pimisako ngu yona, ti nga maha hi leka kuthumisa matshina a milayo ya Jehovha. (1 Vak. 3:19) “Wutxhari wa ha mafuni” mbimo yotshe wu kuzetela minavelo ya nyama. Makristu mamwani a dibanza da Pergamo ni Tiyatira ma ti tekelete sihena so khozela sithombe ni kumaha wugango i ku ti ti nga ti tolovelekile ka madhoropa oneyo. Jesu a ningete sialakanyiso ka mabanza ale ngu ku va nga txi tumelela wugango. (Mtu. 2:14, 20) Nyamsi ha wonisana ni txikarato txo kuzetelwa ku hi etetela mawonelo o biha. Maxaka ni vamwani va nga hi gela ku ho ti maha va vanene ngutu ni ku hi fanete kuleka yimwani milayo ya Jehovha. Ngu txikombiso, va nga womba to kha ta biha ku hi maha ti hi ti navelako nguko matshina a milayo ya Jehovha mayelano ni mahanyelo ma pindetwe. Yimwani mbimo hi nga pimisa to mkongomiso wu Jehovha a hi ningako kha wu pfisiseki kwati. Ti lava hi ti wonela “ku ambi ndaka mhingano wa tile ti nga bhalwa” ngako hi txi dukwa.—1 Vak. 4:6. w23.07 16 ¶10-11

Mariya mame wa Jesu a txi wu lava mtamo. Ti lavile e mana txirumbo, kambe asi se kutxhadha. Ene a si na txiperiyensiya txo kulisa mwanana wakwe a pune, kambe ti txi lava e khatalela mwanana wu a ndi no va Mesiya. Se aku i ngadi mbiri a di na txhamuselisa kutxani Josefa a wu a ngadi tiemisete ku mteka? (Luka 1:26-33) Mariya a amukelisile kutxani mtamo? Ene a ti ni txivhuno txi tako ngu ka vamwani. Ngu txikombiso, a kombete ngelozi Gabriyeli ku yi m’gela to engeteleka mayelano ni ku hetisisa txiavelo txakwe. (Luka 1:34) Msana keto a tekile dipfumba a txiya “ka ditiko da situnga” ka Judha a txa pfuxela dixaka dakwe Izabeli. Izabeli a ndunduzete Mariya ni ku a huhutetwe ngu Jehovha ku e mgela wuprofeti wo tsanisa mayelano ni mwanana wu a ndi no veleka. (Luka 1:46-51) Mariya a woni to Jehovha “a thumile ta hombe ngu diwoko dakwe.” (Luka 1:46-51) Jehovha a thumisile Gabriel ni Izabeli kasi kutsanisa Mariya. w23.10 14-15 ¶10-12

Mtengo wo kari wa valondeteli va Kristu wu sawutwe ngu moya wo sawuleka, ni ku vona va tidila ngu wuxaka wo sawuleka ni Jehovha. Ava va 144.000 va na ta thuma kumweko ni Jesu Kristu nzumani. (Mtu. 14:1) Wukhalo wo sawuleka wa ditenda da sengeletano wu kombisa ti to va sawutwe kota vanana va Txizimu va moya va ti nga ti hamafuni. (Var. 8:15-17) Wukhalo wo sawuleka ngutu wa ditenda da sengeletano wu emela nzumani a ha Jehovha a zumbako kona. “M’jiyo” awu wu nga ti hambanisa wukhalo wo sawuleka ni wukhalo wo sawuleka ngutu wu emela mmidi wa Jesu wa nyama, awu wu nga txi m’vhalela ku e bela nzumani ku ya va mphaxeli wa hombe wa dithempele da moya. Se mbimo yi a nga ningela mmidi wakwe kota digandelo, Jesu a txo tula nzila yo votshe vasawuleki ve ya hanya nzumani. Ni vona va fanete kuleka mimidi yawe ya nyama kasi kumana hakelo yo ya hanya nzumani.—Vaheb. 10:19, 20; 1 Vak. 15:50. w23.10 28 ¶13

Gidhiyoni a xamute ngu nzila ya yinene mbimo yi a nga txi solwa-solwa ngu Vaefrayime. (Val. 8:1-3) Ene kha xamula a di henyile. A kombisile kutiveka hahatshi ngu ku va engisela kwati e tshumela e womba-womba navo ngu nzila ya wunene, eto ti mahile to dizunga di renga. Madhota aya ma ku ni wutxhari ma etetela txikombiso txa Gidhiyoni ngu ku engisela kha kwati ni kuxamula ngu nzila ya yinene ngako ma txi solwa-solwa. (Jak. 3:13) Ona ma maha ti to kuva ni kurula dibanzani. Mbimo yi Gidhiyoni a nga dhumiswa ngu ku va a di xute Vamidhiyani, ene a kongomisile wudhumo wotshe ka Jehovha. (Val. 8:22, 23) Vavamna ava va ku ni wutixamuleli va nga mu etetelisa kutxani Gidhiyoni? Vona va nga dhumisa Jehovha ngu totshe ati a nga ti hetisisa. (1 Vak. 4:6, 7) Ngu txikombiso, ngako didhota di txi ndunduzelwa ngu mhaka ya wusikoti wa dona wo gondisa, di nga kongomisa wotshe wudhumo ka txisima txo gondisa i ku Bhiblia mwendo ka trenamentu ayi hi yi manako ka sengeletano ya Jehovha. Mbimo yotshe madhota ma fanete kupimisa ngu ti to nzila ayi ma gondisako ngu yona ngu lava kudhumisa Jehovha mwendo ma lava kuwonwa ngu vathu i ku ku ti dhumisa vapune. w23.06 4 ¶7-8

Ngako hi si mani ti hi nga ti kombela hi nga ti maha siwotiso siraru. Txo khata ngu txiya: ‘Ina ati ni ti kombelako ngu ti i ku ta tinene kwangu?’ Makhambi o tala hi nga pimisa to ati hi ti kombelako ngu ti i ku ta tinene kwathu. Kambe ati hi ti kombelako ti nga maha ti si hi vhuni ngu mbimo yo lapha. Ngako hi txi maha mkombelo ngu txikarato txo kari, ti nga maha ku di ni nzila ya tshuku yo pinda yi hi nga txi yi alakanya mbimo yi hi nga txi maha mkombelo. Niku timwani ti hi ti kombelako ti nga maha ti si tsimbitisani ni kudhunda ka Jehovha. (1 Joh. 5:14) Wona txikombiso txa vaveleki va va kombelako Jehovha to mwanana wawe e simama ditshurini. Ti ti komba i di txikombelo txa txinene. Kambe Jehovha kha sinzisi ni wamweyo kwathu ku e mu thumela. Ene a lava ti to athu kumweko ni vanana vathu hi mthumela ngu ku ti dhundela. (Dhewut. 10:12, 13; 30:19, 20) Hahanze keto, vaveleki va di fanete kukombela Jehovha to e va vhuna ku ve sikota kugwesa mbilu ya mwanana wawe e susumeteleka kuranda Jehovha ni kuva mngana wakwe.—Mav. 22:6; Vaef. 6:4. w23.11 21 ¶5; 23 ¶12

Ngu kutxani kuthavelela vamwani i di nzila ya lisima yo kombisa ti to ha varanda? Ngu kuya ngu direferensiya da Bhiblia, dipswi di Paulo a nga di thumisa do “thavelelanani” di womba “kuva didhawa ka m’thu kasi ku m’thavelela mbimo si a wonisanako ni sikarato si si dukako likholo lakwe.” Ngu toneto, kuthavelela Makristu kulothi, i nzila yo vhuna awu a wonisanako ni sikarato to e simama a thumela Jehovha ngu kuthembeka. Yotshe mbimo yi hi dilako ni vanathu hi kombisa lirando lathu ngu vona. (2 Vak. 7:6, 7, 13) Kupfela wusiwana ni kuthavelela vamwani ta tsimbilelana. Ngu nzila muni? M’thu wo pfela wusiwana wa susumeteleka kuthavelela vamwani ni ku maha to kari kasiku va vhuna. Paulo a txhamusete to kupfela wusiwana, ka Jehovha ngu vathu ku mu susumetela ku e va thavelela. Paulo a dhana Jehovha kota: “Tate wa wumbilu, Txizimu txa kotshe kuthavelela.”—2 Vak. 1:3. w23.11 9-10 ¶8-10

Otshe ditshuri ngu ti to otshe malanda a Jesu Kristu ma nga emela kupinda ngu ka sixaniso. Wona txikombiso txa Paulo. Ene a gete tiya Makristu a Tesalonika: “Kha ditshuri, mbimo yi hi nga ti ni nanu, hi txi mi gela t i to hi fanete kuxaniswa, se toneto ti mahekile, nga ti mi ti zivisako tona.” (1 Vat. 3:4) Niku ka Vakorinto Paulo a bhate tiya: “Vanathu, kha hi ti lavi ku mi sisela kuxaniseka ku ku nga hi mana . . . Hi xanisilwe, ngu mpimo wa hombe ngutu kupinda mtamo wathu, ahawa hi nga ti si thembi ti to hi nga hanya.” (2 Vak. 1:8; 11:23-27) Nanathu nyamsi hi nga emela kuwonisana ni sikarato. (2 Tim. 3:12) Ti nga maha vathu va di ku ñote ngu nzila yo biha ngu ku hi kholwako ka Jesu. Mwendo ti nga maha u di ve ni sikarato mthumoni ngu kona ha ka wuthembeki wako. (Vaheb. 13: 18) Ni ku ti nga maha kambe u di wuketwe ngu wukoma ngu kona ha ko pateka ka mthumo wo txhumayela. Kambe ti si nga ni mhaka ni ti to ngu xaniswa ko zumbisa kutxani ku hi wonisanako nako, Paulo a wombile ti to hi nga tsaka. w23.12 10-11 ¶9-10

Jakobe a timisete sikarato so tala. Simiyoni ni Levhi vanana va Jakobe va tisile dikhombo ka mwaya wawe ni txiruko ka ditina da Jehovha. Kuengetela keto, Rakeli, msikati wo randeka wa Jakobe a fite a txi veleka mwanana wa wumbidi. Hambiku Jakobe a nga di kumbile ti lavile e rura eya Egipta ngu mhaka ya nzala ya hombe ayi yi nga ti ho ka mbimo yile. (Gen. 35:16-19; 37:28; 45:9-11, 28) Ka totshe tiya, Jakobe kha luza likholo lakwe ka Jehovha ni ngu sithembiso Sakwe. Kambe mbimo yotshe Jehovha a kombisile to ati mu seketela Jakobe. Ngu txikombiso, Jehovha a mu katekisile ngu didhawa da nyama. Pimisa nzila yi Jakobe a nga bonga ngu yona Jehovha mbimo yi a nga tshumela e manana ni mwanana wakwe Josefa awu a nga heta mbimo yo tala a txi pimisa to a fite! Wungana wo tsana wu Jakobe a nga ti nawo ni Jehovha wu mu vhuni ti to e humelela mbimo yi a nga ti wonisana ni sikarato. (Gen. 30:43; 32:9, 10; 46:28-30) Nathu hi nga humelela hi txi wonisana ni sikarato so mbi si rinzela ngako hi di ni wungana wo tsana ni Jehovha. w23.04 15 ¶6-7

Ka Masalmo 23 Dhavhidha a kombisile themba yakwe ya ti to Jehovha a txi m’randa ni ku m’xayisa. Ene a womba-wombile ngu wuxaka wa hafuhi wu a nga ti nawo ni Jehovha ni ku a m’dhani kota M’dyisi wakwe. Dhavhidha a txi ti pfa a di vhikelekile, e leka Jehovha e mkongomisa ni ku a txi mthemba ngutu. Dhavhidha a txi ti ziva ti to Jehovha a ndi na kombisa lirando lakwe kwakwe otshe masiku. Ngu kutxani Dhavhidha a nga ti ni themba yoneyo? Dhavhidha mbimo yotshe a ti pfite a txi xayiswa ngu Jehovha, ene a ti ni sotshe si a nga ti si lava. Txitimwi keto, Dhavhidha a txi ti ziva ti to Jehovha wa mtsakela ni ku i ti mngana wakwe. Ngu toneto, Dhavhidha a txi ti ziva ti to ti si khataliseki ati a ndi no wonisana nato Jehovha a ndi na m’khatalela. Themba yi Dhavhidha a nga ti nayo ngu lirando la Jehovha yi ti ni mtamo ngutu kupinda sotshe sikarato ni ku ngu toneto ti nga ti maha Dhavhidha e va ni litsako ni kueneliseka.—Mas. 16:11. w24.01 28-29 ¶12-13

Kukhukhela ka Yimbi ya Wumbidi ya Mafu, vathu va Jehovha ka matiko o hambana-hambana va sikota kumaha mthumo wo txhumayela va di ni mkhululeko nyana wo kari. Kuwomba ditshuri, mthumo wo txhumayela hamafuni kotshe wo ya wu txi engetela. Nyamsi, siro sa Mmidi wu wu Fumako sa simama si londisa mkongomiso wa Jesu. Sona si maha toneto kasi kutsaniseka ti to sisungo si va si mahako sa tsimbitisana ni ti Jesu a ti lavako. Hahanze keto, vawoneleli va sigava ni madhota va thumiswa kasi kuningela sialakanyiso soneso ka mabanza. Madhota a vasawuleki ma ka ‘dianza da txinene’ da Jesu. (Mtu. 2:1) Ti hakubasani ti to, otshe madhota kha ma pelela ni ku ma maha tiphazamo. Mosi ni Joxuwa mbimo yimwani va mahile tiphazamo, ni ku vapostoli ni vona va mahile. (Mit. 20:12; Jox. 9:14, 15; Var. 3:23) Hambi keto, athu ha tiwona ti to Jesu wa simama e kongomisa txithumi txo thembeka kumweko ni madhota, ni ku ene a na simama e maha toneto. Se hi ni sotshe sivangelo so hi themba wotshe mkongomiso awu Jesu a hi ningako ngu ku thumisa vavamna va va vo thembeka. w24.02 23-24 ¶13-14

Nathu hi nga dhumisa ditina da Jehovha ngu kuwomba-womba ngu ngene ngu txixonipho, lirando ni ngu kukombisa kubonga. Mbimo yi hi ku kutxhumayelani hi nga khumbula ti to txikongomelo txathu txa lisima ngu tshuketisa vathu ka Jehovha ni ku va vhuna ku ve mu wona kota Tate wa lirando. (Jak. 4:8) Kwathu i lungelo ya hombe ku komba vathu amu ka Bhiblia ti to Jehovha Njizimu txa lirando, txa wululami, txa wutxhari, mtamo, ni ku txona txi ni tifanelo timwani ta tinene. Yimwani nzila yo dhumisa ditina da Jehovha ni ku mtsakisa i mbimo yi hi mahako ti hi nga tikotako kasi ku mu etetela. Mbimo yi hi mahako toneto, vathu va nga ti tumbula ti to athu hi hambanile ni vamwani vathu. (Mat. 5:14-16) Mbimo yi hi hanyisanako na vo ditshiku ni ditshiku ti nga maha hi va ni mikhanjo yo hi txhamusela ti to ngu kutxani hi txi hambana ni vamwani vathu. Kota wuyelo vathu vamwani va timbilu ta tinene va nga tsakela kugonda mayelano ni Txizimu txathu. Mbimo yi hi dhumisako Jehovha ngu tinzila toneto ene wa tsaka ngutu.—1 Tim. 2:3, 4. w24.02 10 ¶7

Kasi ku u va Mkristu wo vitwa, ti nga lava ku u gondela wusikoti wo kari a wu wu nga kuvhunako. Wusikoti wonewo wu na kuvhuna ti to u khatalela wutixamuleli dibanzani, ni kumana mthumo a wu wu no kuvhuna ti to u ti xayisa ni ku xayisa silaveko sa mwaya wa wena, ni ku kuvhuna ti to u kota kuthumisana kwati ni vathu vamwani. Ngu txikombiso, gondela kulera ni kubhala kwati. Bhiblia yi womba ti to kugonda dipswi da Txizimu ditshiku ni ditshiku ni ku alakanyisisa ngu dona ti vhuna m’thu ku e va wu a nga tsaka ni ku humelela kwati ka totshe ati a ti mahako. (Mav. 1:3, 4) Kulera Bhiblia ditshiku ni ditshiku, ti na m’vhuna ku ziva kwati mapimiselo a Jehovha, ni ku gondela kuthumisa matshina a milayo ya Bhiblia. (Mav. 1:3, 4) Dibanza di lava vanathu a va i ku vagondisi va vanene kasi ku ve ningela mkongomiso ni sileletelo a si si nga seketelwa amu ka Bhiblia. Ngako u txi ziva kulera ni kubhala kwati, awe u na sikota kululamisela ma dhixkursu a manene, ni tixamulo a ti ti no tsanisa likholo la vanathu. Ni ku u na tshumela u sikota kubhala maanotasawu a lisima aya ma no kuvhuna ti to u tsanisa likholo lako ni kutsanisa vamwani. w23.12 26-27 ¶9-11

Ngako u txi thava, alakanyisisa ngu ti Jehovha a no ti maha mbimo yi yi tako. Mkombiso wo kari ka mtshangano wa m’ganga wa 2014 wu kombisile mwaya wo kari wu txi alakanyisisa ngu nzila yi wutomi wu no tava ngu yona ka Paradhise. Ni ku alakanyisisa ngu mapswi a maphya ma di ka 2 Timoti 3:1-5 ma txi kombetela Paradhise: “Kambe ziva tiya, ka mafu a maphya ku nava ni timbimo to tsakisa ati ti si khaliko ku nga vaho. Nguko vathu va na randana, va na randa tithomba ta moya, va nava vo dinganisela, vo ti veka hahatshi, vakhozeli va Txizimu, vaengisi va vaveleki, vo ziva kubonga, vo thembeka, ava va randako ngutu mwaya wawe, ava va ku ni kutsetselela, ava mbimo yotshe va no womba-womba kwati ngu vamwani, vo ziva ku ti ñola, vo lulama, vo dhunda wunene, vo dhunda Txizimu hahanze ko dhunda tithomba, vo dhunda wukhongeli ni kutumela mtamo wa wona; avava zumba hafuhi navo.” Ina awe wa bhula ni mwaya wako mwendo ni vanathu mayelano ni wutomi wu hi no ya va nawo ka mafu a maphya? w24.01 6 ¶13-14

Mbimo yimwani vamwani va godhola ve tiwotisa tiya: ‘Ina ani nokha ni wa lisima ka Jehovha?’ Malanda mamwani o thembeka a Jehovha a timbimo ta kale, mbimo yimwani ma ti pfite ngu nzila yoneyo. (1 Sam. 1:6-10; Jobe 29:2, 4; Mas. 51:11) Bhiblia yi tiveka hakubasani ti to vathu vo mbi pelela va nga sikota kumana kutsakelwa ngu Jehovha. Ngu nzila yihi? Ti lava hi kombisa ti to hi ni likholo ka Jesu Kristu ni ku tshumela hi bhabhatiswa. (Joh. 3:16) Ngu nzila yoneyo hi kombisa hakubasani ti to hi tisote ka sionho sathu ni ku hi thembisile Jehovha kumaha kudhunda kwakwe. (Mith. 2:38; 3:19) Jehovha wa tsaka ngutu ngaku hi txi maha toneto kasiku hi va vangana vakwe va hafuhi. Ngaku hi txi maha totshe ti hi nga tikotako kasi kuhetisisa txixambanyo txathu, Jehovha a na hi amukela ni ku hi teka kota vangana vakwe va hafuhi.—Mas. 25:14.w24.03 26 ¶1-2

Hi nga etetela txikombiso txa valondeteli va Jesu ngu kusimama hi txhumayela hambi vakoma va ditiko va txi hi tsimbisa. Nathu hi nga kombela txibindi ni wutxhari, hi txi tsaniseka ti to Jehovha a na hi vhuna to hi hetisisa mthumo wathu wo txhumayela. Kombela Jehovha to e ku vhuna u wonisana ni sikarato. Wungi wathu ha wonisana ni sikarato sa malwati, sa matipfelo, kuluzekelwa ngu wu hi m’dhundako, sikarato sa mwaya, kuxaniswa ni simwani. Ni ku sikarato simwani so fana ni mitungu ni tiyimbi si mahile ti to, ti karata ngutu kuwonisana ni sikarato si hi ku naso ngu kale. Gela Jehovha ta mbiluni kwako. M’gele ti u tipfisako tona ngu txiemo txonetxo nga ha u di no bhulela ngu kona mngana wako wa hombe. Tsaniseka ti to Jehovha “a na maha totshe.” (Mas. 37:3, 5) Kusimama hi khongela ti na hi vhuna ku “timisela kuxanisekani.” (Var. 12:12) Jehovha wa ti ziva ati vakhozeli vakwe va wonisanako nato “ene wa engisa kudila kwawe.”—Mas. 145:18, 19. w23.05 5-6 ¶12-15

Ngaku hi txi maha txisungo txa lisima hi fanete kupfisisa ti to ngu kuhi “kuranda ka Txizimu,” se hi maha txisungo txo tsimbitisana ni toneto. (Vaef. 5:17) Ngako hi txi mana matshina a milayo a Jehovha aya ma tsimbitisanako ni txiemo txathu, tifana ni ku hi di mani ati Jehovha a ti pimisako mayelano ni txisungo txonetxo. Se ngako hi txi thumisa matshina a milayo ya Jehovha hi na maha sisungo sa sinene. M’bihi i ku Sathani a lava hi heta mbimo hi di ñolekile ngu timhaka ta mafu yawa ha ko hi si mani mbimo yo thumela Jehovha. (1 Joh. 5:19) Mkristu a si ti tumbuli a nga khata kuthangetisa tithomba hahanze ko lava mkhanjo wo engetela mthumo wakwe ka Jehovha. Ngako toneto ti txi maheka ti ngava ti txi kombisa ti to a khatile kupimisa kufana ni vathu ava va si thumeliko Jehovha. Ti ha kubasani ti to kha ta biha kuva ni tithomba kambe kha ha fanela ku ti thangetisa ka wutomi wathu. w24.03 24 ¶16-17