Kagamhanan sa Kalibotan​—Kon sa Unsang Paagi Makab-ot Kini

SUKAD sa 1945 tulo ka dagkong internasyonal nga mga organisasyon ang naporma aron sa pagtipig sa kalinaw sa kalibotan: Ang HK (Hiniusang Kanasoran) sa 1945, ang NATO (North Atlantic Treaty Organization) sa 1949 ug ang Warsaw Pact (Warsaw Treaty Organization) sa 1955. Walay bisan usa kanila ang nakahimog dakong kalamposan sa pakigdait sa tibuok-yuta. Sa pagkatinuod, sukad sa 1945 nauyog ang kalibotan sa kapin sa 100 ka gubat, lakip sa 40 ka dagkong gubat, diin nakapatayg kapin sa 30 milyones ka tawo, ug karon nagsusapinday sa ngilit sa nukleyar nga pagsilaob.

Bisan pa sa pagkamatinud-anon sa mga tigpaluyo niini, nakitang walay kalamposan ang HK. Ang lain pang duha ka organisasyon nakaagig panag-away tali sa membrong mga nasod. Samtang ginapuntiriya sa mga membro sa NATO ug sa Warsaw Pact ang ilang makalilisang nga nukleyar nga mga missile sa usag usa, ug samtang ang ilang mga lungsoranon ginerbiyos nga nag-ampo nga dili unta kini ipasulpot, nagtigiay ang HK kon kinsa ang pasanginlan sa lumba sa armas. Kon imong gisaligan kining tawhanong mga institusyon nga maoy mopahiusa sa yuta diha sa kalinaw, nan wala kini sa lugar. Silang tanan adunay peligrosong depekto, ang uban niini mas makita kay sa uban.

Apan ingnon ta nga adunay usa ka magmamandong matarong ug maluloy-on, kinsa nakasabot sa prinsipyo sa biolohikal nga pag-inalagaray ug may katakos sa pagpahiusa sa kalibotan diha sa kalinaw. Dili ba makapatungha siya ug malamposong kagamhanan sa kalibotan? Oo! Apan asa man kita makakaplag ning maong matang nga magmamando?

Ang Umaabot nga Kagamhanan sa Kalibotan

Ang Maglalalang sa langit ug sa yuta, si Jehova nga Diyos, labing nasayod sa kalangkitan sa tanang butang, buhi ug walay kinabuhi. Kadto, sa pagkatinuod, “milungtad ug nangahimo sila” pinaagi sa iyang kabubot-on. (Pinadayag 4:11) Siya, sa dayag, dili apektado sa walay kapuslanang nasyonalismo; “atua sa langit ang iyang trono.”—Salmo 11:4.

Dugang pa, gipahayag ni Jehova ang iyang kabalaka bahin sa suliran sa kagamhanan sa kalibotan ug mipilig sinulayan, napamatud-an ug hingpit nga administrador ingong Hari. Kining Usa maoy labaw-tawhanon, apan nalangkit sa tanang katawhan—ang iyang Anak, si Jesu-Kristo. (Hebreohanon 5:7-10) Tingali kataw-an sa uban ang ideya bahin kang Kristo ingong Magmamando, ingong usa ka tinuod nga Hari. Ngano?

Buweno, gihunahuna sa kadaghanang mga tawo si Jesus ingong hiligugmaong masuso nga gilampinan ug naghigda sa pasungan o ingong makaluluoyng linalang nga gilansang sa krus. Niining duha ka kahimtang nakita siya nga walay mahimo. Apan kini bang duha ka kahimtang maoy tinuod nga hulagway kang Jesus karon?

Dili! Buhi kaayo si Jesu-Kristo ingong Prinsipe, ingong Anak sa Labing Makagagahom nga Hari, si Jehova nga Diyos. Gihatagan siya ni Jehova ug kagahom sa pagmando ug awtoridad. Ang karaang tagna sa Bibliya nag-ingon: “Ang kagamhanan igatungtong sa iyang abaga. Ug siya pagatawgong . . . Prinsipe sa Pakigdait.” (Isaias 9:6) Natuman kining tagnaa sa dinha, human sa iyang kamatayon diha sa estaka sa Kalbaryo, gibanhaw si Jesus sa langitnong kinabuhi. Sa ulahi, sa langit, naentrono siya ingong Hari sa Diyos.—Buhat 2:22-36; Pinadayag 19:16; 20:6.

Busa dili na kaamgid si Jesus sa walay mahimong masuso o matandog nga biktima. Siya maoy nagamandong Hari sa Diyos! Aduna nay kapin sa duha ug tunga ka milyong katawhan, nga nagpuyo sa upat ka suok sa kalibotan, nga kinabubot-ong nagpasakop sa iyang pagmando. Sila maoy buhing pamatuod nga tinuod gayod nga molampos kini. Sa dili madugay gamiton sa Diyos si Kristo sa pagpakanaog ug kalinaw sa tanang katawhan ug sa pagpahiusa sa katawhan ilalom sa iyang matarong nga pagmando.—Isaias 11:1-9.

Unsay Mahimo sa Usa ka Pagmando Alang sa Yuta

Ang pagmando sa kalibotan ni Jehova nga Diyos pinaagi sa iyang Anak, si Jesu-Kristo, malamposong makabuntog sa tanang mga kababagan. Ang matarong ug kasingkasing mga katawhan makaeksperyensiya ug tibuok-yuta nga kausaban pinaagi sa tinuod nga pagtinagdanay sa usag usa.

‘Tinuod bang mausab ang tawo?’ tingalig mangutana ang uban. Oo, makahimo ang tawo sa pag-usab ug tinuod nga makausab sa ilang mga pagtuo, kon adunay puwersadong motibo.

Handurawa ang usa ka kalibotan nga niini ang kahibalo sa teknolohiya gamiton sa pagpauswag sa tawhanong katilingban sa maayong paagi tungod kay kanang maong kahibalo sinubhan sa tinuod nga kabalaka sa uban ug sa tanang kalalangan!

Handurawa ang usa ka kalibotan nga niini wala nay kahadlokan pang gubat, wala na gayod. Hinunoa, ang tanang kahinguhaan sa tawo gamiton lamang sa malinawong kagamitan.

‘Hunong dinha!’ tingalig may mosinggit. ‘Karaan na kanang relihiyosong sugilanon.’ Kadto silang mobangon niini nga pagsupak, kami mangutana: Nagmalamposon ba ang pagmando sa tawo? Makatudlo ka bag maayong katarongan sa pagtuo nga makab-ot kini? Kon dili, nan nganong dili seryosong susihon ang Bibliya sa pagsuta kon unsay mahimo sa usa ka kagamhanan pinaagi sa Diyos alang sa yuta ug kon kini molampos ba?

Ang mosunod mao ang pipila ka kausaban nga gisaad sa pagmando sa Diyos nga ihatag sa yuta.

[Kahon/Letrato sa panid 8, 9]

Pagkaon Alang sa Tanan:

“Aduna unyay daghang trigo sa yuta; sa tumoy sa kabukiran adunay pagsugwak.”—Salmo 72:16.

Puloy-anan ug Trabaho Alang sa Tanan:

“Sila magatukod ug balay ug magapuyo niini . . . ug ang akong mga pinili magapahimulos pag-ayo sa buhat sa ilang mga kamot.”—Isaias 65:21, 22.

Bug-os nga Pagwala sa Armas:

“Nagapahunong siya sa gubat hangtod sa kinatumyan sa yuta. Gibali niya ang pana ug giputol-putol ang bangkaw; gisunog niya ang mga karro sa gubat.”—Salmo 46:9.

Pakigdait sa Tibuok-yuta:

“Sa iyang mga adlaw molambo ang mga matarong, ug ang kadagaya sa pakigdait hangtod nga ang bulan mahanaw na.”—Salmo 72:7.

Maayong Panglawas Alang sa Tanan:

“Ug wala na unyay pomuluyong moingon: ‘May sakit ako.’”—Isaias 33:24.

[Kahon sa panid 10]

Tingalig bation sa uban nga simple ra kaayo kining mga tubaga sa hilabihan ka dagkong mga problema—usa ka Mithianong damgo. Sa makausa pa, kami mangutana: Sa tinud-anayng pagkasulti, nagtuo ka bang masulbad sa tawo kining mga problemaha? Among gidapit kamo sa pagsusi pag-ayo sa Bibliya aron inyong masayran kon unsay napamatud-an sa kapin sa dos milyones ka tawo—nga molampos ang pagmando sa Diyos!