Gikan sa Among mga Magbabasa

Pagsanta sa mga Aksidente

Ako nagasulat bahin sa inyong isyung nag-ulohang “Mga Aksidente—Masanta ba Sila?” (Disyembre 8, 1985 sa Cebuano) Sa among gas ug elektrik nga kompaniya seryoso kaayo namong giisip ang pagkaluwas. Among gipaningkamotan ang pagpasiugda sa gawas-sa-trabaho nga pagkaluwas ingon man diha-sa-trabaho nga pagkaluwas. Buot kong mangayog awtorisasyon sa pag-imprenta pag-usab diha sa among “Safety Bulletin,” sa bug-os o sa bahin, sa mga artikulong “Mga Aksidente—‘Nganong Ako Pa?’” ug “Mga Aksidente—Ilang Hinungdan ug Santa.”

E. A., Shift Supervisor, Iowa

Pagkamanaghigala Lamang

Buot kong ipahayag ang akong sinserong pasalamat tungod sa inyong tukma-sa-panahong paningkamot sa pag-umol sa hunahuna sa mga batan-on. Ang akong pagtagad nadani sa inyong artikulong “Mga Batan-on Nangutana . . . Mahimo Bang ang Ulitawo ug Dalaga ‘Managhigala Lamang’?” (Nobyembre 8, 1985 sa Cebuano) Kining ulohana diha sa akong hunahuna sa dugay nang panahon. Sa tabang sa inyong tukma-sa-panahong tambag, gihunong ko na kining batasana, ug nakatabang ako sa daghang higala sa pagbatog timbang nga opinyon niining isyuha. Mopadayon ako sa pagsuportar sa inyong magasin ug gamiton kini sa pagtabang sa tanan kong higala ug sa uban usab.

J. C. O., Nigeria

Bag-o ko pang nahuman pagbasa ang artikulong “Mga Batan-on Nangutana . . . Mahimo Bang ang Ulitawo ug Dalaga ‘Managhigala Lamang’?” Ang impormasyon maayo kaayo, ilabina alang sa mga batan-ong dili pa minyo. Kining artikuloha nagpahinumdom sa butang akong nakita dili lamang sa usa ka okasyon. Ang situwasyon maorag usa ka triyanggulo nga nalangkoban sa suod kaayong relasyon tali sa usa ka bana, usa ka asawa, ug sa suod nga higala sa asawa. Dili ba samang lagmit peligroso nga ang bana ug ang suod nga higala sa asawa kanunayng magkauban, bisan pag ang asawa anaa usab dinha, sama rang ang mga batan-ong dili minyo magtinguha sa platonikong relasyon?

K. B., New York

Tinuod, mahimong anaa ang kapeligrohan sa emosyonal nga pagkagubot kon anaay triyanggulo nga relasyon uban sa suod nga higala sa asawa o suod nga higala sa bana. Gawas pa, mahimong aduna usab ing susamang kapeligrohan dihang ang duha ka magtiayon kanunayng magkauban, kon kaha sa trabaho, sa sosyal nga mga okasyon, o sa mga bakasyon. Kon tungod sa bisan unsang hinungdan ang usa ka tawong minyo nagaugmad sa suod, kompidensiyal, ug mabinationg pakighigala sa usa ka tawo nga dili niya kapikas, kana makaaghat sa kadaotan ug dakong kasub-anan.—ED.

Dalagang Inahan

Bahin sa inyong artikulong “Mga Batan-on Nangutana . . . Dalagang Inahan—Mahimo Kahang Kini Mahitabo Kanako?” (Disyembre 22, 1985 sa Cebuano), akong isugyot nga inyo unta kadtong gitawag “Dili-Kasadong Ginikanan.” Angay unta ninyong dugang gipasiugda diha sa artikulo ang mga sayop nga mahimo sa lalaki ug babayeng mga tin-edyer. Sa akong hunahuna angay unta ninyong gibutang ang dugang pasiugda sa moral nga responsabilidad sa duruha ka kiliran ug nagpahayag ug dugang bahin sa suliran sa mga tinamdan sa lalaki bahin sa una-kaminyoong sekso, nga samang motultol sa pagkamabdos sa tin-edyer.

L. K. N., Inglaterra

Kami mouyong ang responsabilidad sa batan-ong mga lalaki ug mga resulta diha kanila sa moral nga paagi kinahanglan usab nga ipasiugda. Ang artikulong gilantugian gitumong ilabina ngadto sa dili-minyong mga batan-ong babaye, bisan pag ang kataposang tulo ka parapo gitumong ngadto sa mga batan-on sa duruha ka sekso. Aduna pa unyay ubang artikulo diha sa “Mga Batan-on Nangutana . . .” nga maghisgot sa nagkalainlaing bahin niining sulirana, nga maglakip sa tinong tambag alang usab sa mga batan-ong lalaki.—ED.