Ang Kalibotan sa mga Bateriya

ANG bateriya maoy bateriya, husto ba? Sayop! Depende sa paggamit ug sa gikinahanglang gidak-on, adunay dakong kalainan sa kalibotan sa mga bateriya.

Sa panguna, ang bateriya maoy usa ka galamiton nga magbalhin sa kemikal nga enerhiya ngadto sa elektrikal nga enerhiya. Ang duha ka dagkong matang gitawag primarya ug segundaryo (o ipondo) nga mga bateriya. Ang kalainan mao nga ang naulahi ika-recharged, nga nagkahulogang ang kemikal nga reaksiyon nga mopatunghag koryente mabalit-ad, nga sa maong paagi mahibalik ang mga katakos sa bateriya sa paggamag koryente ug mapataas kaayo ang yugto sa kapuslanan niini. Tungod sa mas dakong gastos, ang pagpalit ug bateriyang ika-recharge praktikal lamang kon kini gamiton kanunay, sama sa diha sa radyo sa kada adlaw, nga lahi sa plaslayt nga gamiton lamang panagsa. Dugang pa, angay dili kalimtan sa usa kon unsay nalangkit sa pag-recharge.

Ang labing kasagarang primaryang mga bateriya sa balay nagaapil sa mosunod nga upat:

Regular: Ang labing karaan ug labing baratong matang. Kini mubo rag kinabuhi ug daling madaot sa sobrang kainit o kabugnaw. Kini dali usab mohungaw.

Heavy-duty: Sa linangkob giisip nga maarang-arang nga bersiyon sa regular nga bateriya. Busa kini mas mahal.

Alkaline: Mas mapuslanon sa sobrang mga temperatura, mas magdugay, dili daling mohungaw, ug labing mahal sa tulo ka matang.

Miniature (butones): Gamiton sa mga galamitong nagkinahanglag tinagdiyutayng koryente (hearing aids, mga orasan) Kini taas ug kinabuhi apan mahal.

Mga Pumapalit ug Bateriya, Magbantay sa Mosunod:

Pagpalit sa mga bateriya pinasukad lamang sa prisyo. Kon ang imong gikinahanglang enerhiya maoy kasarangan ngadto sa kusog ug dili mabalhinon, mapuslanon ang pagpalit sa mas mahal nga bateriya (alkaline), nga molungtad sa labi pang dugay. Alang sa mga butang panagsa rang gamiton (mga plaslayt, tagsang gamitong mga radyo), ang mas baratong bateriya igo na.

Pagpalit ug mga bateriya nga luya na tungod sa tagdugay nga pagpondo sa mga estante sa tindahan. Aron maseguro ang pagbatog bag-ong mga bateriya, pangitag tindahan nga kusog ang halin niana.

Ang pagpondo sa dili-gamitong mga bateriya sa dapit nga alimuot o basa. Ang mga bateriya molungtad ug labing maayo sa bugnaw, uga nga dapit, pananglitan, nga selyado sa plastic nga mga puyo sulod sa repriherador. Una kuhaon sa plastic, hinuon, ipagawas kana sa temperatura sa kuwarto, aron malikayan ang pagkataya sa mga terminal tungod sa kondensasyon.

Paghunahuna nga ang gahom sa tanang bateriya pareho. Ang standard o heavy-duty nga mga bateriya magpaandar nga maayo sa usa ka kasangkapan (madaladalang TV, video kamera, cassette player) kon bag-o, apan sanglit ang alkaline nga mga bateriya padayong naghupot sa mas pondo nga boltahe, ihatag niana ang maayong serbisyo hangtod gayod sa kataposan, inay kay inanay mohinay.

Pagsagol sa bag-o ug daan o pagsagol sa nagkalainlaing matang sa mga bateriya. Ang kombinasyon molungtad lamang sumala sa paglungtad sa pinakaluyang bateriya.

Pagkalimot sa pagkuha sa daan nang mga bateriya sa gilayon sa pagsanta sa paghungaw. Ang mga bateriya angay usab kuhaon dihang dili gamiton ang kasangkapan, o paandaron pinaagi sa koryente sa panimalay sa hataas nga panahon.

Pagbutang sa matang-butones nga mga bateriya sa imong baba o pagpadula niana sa mga bata. Kon matulon nga aksidente, ang pagkasunog sa kahiladman mahimong mosangpot sa seryosong kadaot o kamatayon pa.

Busa sa sunod panahong kinahanglang mopalit kag mga bateriya alang sa imong madaladala nga radyo, orasan, calculator, teyp recorder, o ubang kasangkapan, hinumdoming sa kalibotan sa mga bateriya, adunay dakong kalainan.