Ang Paggamag Magasin sa Japan Nahimong ‘In-Line’
MAGPRINTA, mag-impake, ug magpadalag 3.5 ka milyong kopya sa Bantayanang Torre ug Pagmata! kada bulan: Mao kana ang usa sa mga trabahong buhaton sa sanga sa Watch Tower Society sa Japan aron masangkapan ang mga panginahanglan sa buluhaton sa pagsangyaw sa Japan ug sa ubang mga nasod sa Halayong Sidlakan. Dayag nga ang pagkabatid ang sekreto.
Aron masangkapan kining maong panginahanglan, ang mga Saksi sa Japan nagdesinyo ug, sa dakong bahin, naghimog sistema sa paghatod o conveyor system nga makawala sa gastosog-panahon ug mahagong trabaho, sama sa pagkamada ug sa pagkamada pag-usab sa magasin diha sa nagkalainlaing yugto sa produksiyon.
Sa pagsugod, ang kasangkapan lamang nga mapalit mao ang rotary press, nga may nakataod nga sistema sa pagkamada, ug ang tuloy-sulab nga igtatabas nga nagatabas sa magasin sumala sa gidak-on. Mitrabaho ang mga Saksi ug nakamugnag sistema nga gisumpay ang duha ka makina ug ubang mga aparato nga gihimo sumala sa espisipikasyon, aron kini makaprinta, makakamada, makatabas, ug makaimpake sa magasin sa usa lang ka pagpadagan.
Pagpadagan sa Sistema
Ang pagtan-aw sa mga hulagway sa hustong pagkasunodsunod mohatag kanimog maayong ideya kon sa unsang paagi nagaobra ang ‘in-line’ nga sistema. Sa pagsugod, ang papel sa duha ka rolyo mosulod sa rotary press (hulagway A) sa gikusgong 25 ka tiil (8 m) sa matag segundo. Diha sa pikas tumoy sa prensa (B) mogawas ang padayong agos sa matahom upat ka kolor nga magasin, duolan sa usa ka libo ka kopya sa usa ka minuto. Ihatod sa roller conveyor ang mga magasin ngadto sa makinang tigkamada (C), nga mobahinbahin kanila sa kamada nga tag-50 ka magasin.
Dayon ang mga kamada sa mga magasin ihatod ngadto sa hydraulic pressing unit (D), nga ginaipit ang matag kamada sa gibug-atong 50 tonilada sulod sa duha ka segundo aron makagawas ang hangin sa tunga sa mga panid. Gikuha niining lakanga ang tanang trabahong nalangkit sa pagkuha sa mga magasin gikan sa mga conveyor, ug kamadahon sila sa mga tarima nga may pabug-at sa tibuok gabii, ug dayon kuhaon sila ug ipakaon sa igtatabas nga binangan sa tag-50, usa ka bangan sa usa ka higayon pinaagig kamot.
Tapos maipit, ang duha ka agos sa magasin magtipon ug dayon ipadala ngadto sa igtatabas (E), nga dinhi tabason ang magasin sumala sa gidak-on. Ang conveyor belt maoy mokuha sa magasin, karon maayo nang pagkaputol ug naipit na, ngadto sa gidesinyong istasyonan sa pag-impake (F), ug ibutang sila sa mga kahon, unya siradoan ug markahan sa kompiyoter, andam nga ikarga ngadto sa mga trak nga naghulat diha sa garahian sa mga trak.
Episyenteng Paggamit sa mga Kahinguhaan
Gikinahanglan ba gayod kining gisangkapag maayo nga makina? “Kon among atimanon kining gidaghanona sa trabaho sumala sa kahikayan niadto,” miingon si Yasuyuki, ang magtatan-aw sa tibuok nga kalihokan, “kinahanglang magdugang kami labing menos napulo ka trabahante. Kana kon may lugar kami sa pagpundo niadtong mga magasina samtang nagaprinta pa.” Pinaagi niining ‘in-line’ nga sistema, ang 11 ka operator nga nagtrabaho ingong tem makahimog 54,000 ka magasin sa usa ka oras. Sayon nga masabtan kon nganong ang mga Saksi sa sanga nalipay kaayo nga ang paggamag magasin sa Japan nahimong ‘in-line.’
[Mga Letrato sa panid 20, 21]
A. Rotary press
B. Mga magasin gikan sa press
C. Gikan sa conveyor ngadto sa stacker
D. Hydraulic pressing unit
E. Trimmer. Packing station