Gikan sa Among mga Magbabasa
Paggasto sa Kuwarta Daghang salamat alang sa artikulong “Mga Batan-on Nangutana . . . Sa Unsang Paagi Mapaigo Nako ang Akong Kuwarta?” (Disyembre 22, 1988) Hangtod karon kanunay akong nangitag paagi sa labing dali posible nga paggasto sa kuwarta. Ingon nga resulta, wala na akoy kuwarta inigkatapos sa matag bulan ug kinahanglan manghulam. Ang nakatabang kanako ug dako mao ang hunahuna nga ang responsable nga mga bata ug mga batan-on naghipos sa pipila sa ilang kuwarta. Karon mihukom ako sa paghipos sa gamay nga kantidad sa alkansiya ug sa pagbutang sa dakodakong kantidad sa banko.
T.B., Pederal nga Republika sa Alemanya
Dinagmalang mga Asawa Minyo na ako sulod sa 24 ka tuig ug hurot na ang akong pisikal ug mental nga pailob tungod sa kapintas sa akong bana. Sumala sa makita, ang bana ko maayong mamomoo ug daw respetado isip masinabtanon ug sulondan nga persona. Ang artikulo (Nobiyembre 22, 1988) makapadasig, ug naghunahuna ako nga kini nagpalihok sa magbabasa uban sa positibong panlantaw.
A.T., Hapon
Kami dangpanan sa domestiko nga kapintas sa amihanang Michigan ug nagtaganag pag-alagad sa kababayen-an ug kabataan. Ang pahayag ninyo nga ang pagdagmal sa asawa makaplagan latas sa tanang edukasyonal, sosyal, ug ekonomikanhong utlanan hustong pagkapasiugda. Kadaghanan sa katawhan naghunahuna kini wala ug dili mahitabo sa ilang panimalay, kasilinganan, o komunidad.
B. S., Tigpahiluna sa Programang Boluntaryo River House Shelter, Tinipong Bansa
Masturbasyon Salamat, salamat, salamat alang sa prangka kaayo apan may dignidad nga serye sa mga artikulo sa masturbasyon. (Septiyembre 8, 1987; Nobiyembre 8, 1987; Marso 8, 1988) Lakip sa makatabang nga mga sugyot nga nakabenepisyo ako mao ang pagbasa sa duha ka kapitulo sa Bibliya matag adlaw. Ang mga resulta katingalahan!
D. T., Tinipong Bansa
AIDS Nagtrabaho ako uban sa grupo nga nagtabang sa natakdan sa AIDS. Ang medikal nga impormasyon (Oktubre 8, 1988) gikutlo gikan sa iladong mga tinubdan ug gipresentar sa paagi nga masabtan. Apan ang inyong mga komento mahitungod sa moral sa kahimtang nakapanlimbawot kanako!
Bisan kon kamo nag-isip sa homoseksuwalidad nga disposisyon o sala, isip mga Kristohanon kinahanglan mahigugma kita sa atong mga silingan sama sa atong kaugalingon. Gihikap ni Jesus ang mga sanlahon ug wala motalikod sa mga mananapaw ug ubang mga makasasala. Kinahanglan siya ang atong panig-ingnan.
H. S. (inahan sa tulo), Pederal nga Republika sa Alemanya
Si Jesus may pagbati sa mga makasasala. Naggahin siya ug panahon sa pagsugid kanila sa maayong balita sa Gingharian sa Diyos, sa pagkaagi nga ang iyang mga kaaway ngani nagtawag kaniya ‘higala sa mga makasasala.’ (Lucas 5:30-32; 7:34) Giawhag usab niya ang iyang mga mamiminaw sa pagbiya sa ilang buhat nga sayop. (Mateo 5:27-30) Kami usab mibati ug kaluoy niadtong gihapak niining makalilisang sakit ug nagbati nga obligado sa pag-alisto sa among mga magbabasa dili lamang sa medikal nga sangpotanan sa AIDS kondili usab sa labi pang importante moral nga kalabotan niini. Matuod, ang AIDS daghan ug inosente nga mga biktima, apan ang mayoria, hangtod karon, niadtong may sakit natakboyan niini ingon nga resulta sa ilang kaugalingong kagawian o nianang sa ilang suod nga kaubanan. Bisan hain niining mga kasoha, kini kagawian nga gitunglo sa Diyos. (1 Corinto 6:9, 10; Buhat 15:29) Ang pag-ila niining kamatuoran nag-alagad, dili sa pagtunglo sa mga indibiduwal, kondili sa pagpasiugda sa kaayohan sa paghupot sa diyosnong mga sukdanan sa moralidad.—ED.