Hikalimtan ba ang Ilang Handumanan?

SUKAD nakaduaw ka na ba sa usa ka karaang sam-ang, sama niining usa sa Tewkesbury, Inglaterra, ug nakamatikod sa nangalusno nga mga lapida uban sa mga ngalan nga halos napapas na sa abug? Daw nagpadayag nga ang mga patay sa tulo ka kaliwatan o kapin pa, sa mga apohan sa tuhod ug pabalik pa, hikalimtan na. Sa pagkamatuod, ang Bibliya nagpahayag: “Kay ang mga buhi nasayud nga sila mamatay; apan ang mga patay, sila wala mahibalo sa bisan unsa, ni sila may balus pa, tungod kay ang handumanan nila hikalimtan na.” Nagkahulogan ba kana nga bisan ang Diyos nalimot kanila?—Ecclesiastes 9:5.

Si Jesus nagpakita nga dili kini ang kaso sa dihang nag-ingon siya: “Ayaw kahibulong niini, tungod kay ang takna nagasingabot diin ang tanan niadtong sa handumanan nga mga lubnganan makadungog sa iyang tingog ug manggula, kadtong kinsa nagbuhat sa maayong mga butang sa pagkabanhaw sa kinabuhi, kadtong kinsa nagbuhat sa daotang mga butang sa pagkabanhaw sa paghukom.” Busa, ang mga patay mamalik sa pagkabanhaw sa oportunidad nga mabuhi sa walay kataposan sa nahinloan paraisong yuta.—Juan 5:28, 29; Pinadayag 21:3, 4.

Dayag na lamang, nga si Jehova nga Diyos, ang Tuboran sa dinamikong enerhiya, kinsa nakaila sa binilyon ka planeta, bituon, ug galaksiya sa ilang ngalan, walay problema sa paghinumdom sa personalidad ug sundanan sa kinabuhi sa binilyon ka tawo nga namatay latas sa kasaysayan sa katawhan. Busa, ang mga patay, bisan pa tingali hikalimtan sa ilang kaanakan, wala hikalimti sa Diyos.—Isaias 40:26.

Karaang sam-ang, Tewkesbury, Inglaterra