Gikan sa Among mga Magbabasa

Haiku Salamat sa inyong artikulo “Pag-asoy Niana sa 17 ka Silaba.” (Enero 8, 1989) Ako nuybe anyos, ug ang among buluhaton maoy bahin sa haiku [usa ka porma sa balak sa Hapones] sa tunghaan. Akong gidala ang artikulo, ug gibasa kini sa among magtutudlo sa klase ug gipasa kini. Nalingaw ang tanan niini, ug ilang gitan-aw usab ang tibuok nga Pagmata! Gipasalamatan ako sa magtutudlo sa pagdala niini.

R. K., Tinipong Bansa

Maikagon kaayo ako sa pagsulat ug mga awit ug mga balak. Karera sa musika unta ang akong kuhaon apan mihukom sa pagpahinungod sa akong kaugalingon sa Kristohanong ministeryo. Dili pa dugay natugaw ang akong hunahuna bahin sa karera nga nakuha unta nako sa pagkomposog-awit. Apan, nakabasa ako sa artikulo bahin sa haiku. Nakapaamgo kini kanako nga mahimong kalipayan ko gihapon ang pagsulat ug mga balak alang sa kalingawan!

D. M., Scotland

Kaguol Natandog kaayo ako sa mga artikulo bahin sa ‘Pag-atubang sa Kamatayon.’ (Agosto 8, 1987) Sa kataposan sa 1988, ang akong higala naaksidente sa trapiko ug namatay. Gibati ko ang dakong kasakit, ug kining mga artikuloha nakahatag kanakog dakong paglaom. Akong nakita nga dili nako angay iloom ang akong mga pagbati kondili ipagawas ang kaguol ug nga kita nga nagbangotan angay magtinabangay sa usag usa. Dili ba katingalahan sa dihang moabot ang adlaw nga kining matanga sa dakong kaguol mawala na?

H. O., Japan

Ang Bibliya nagsaad nga moabot ang maong adlaw sumala diha sa Pinadayag 21:3, 4, diin kini naghisgot sa panahon sa dihang ang “kamatayon mawala na, wala na usab unyay pagminatay, ni paghilak ni kasakit wala na.” Kining paglaoma dili bug-os makawala sa kasakit sa kaguol, apan kini makahupay niini sa usa ka paagi ug makahatag dakong paglipay sa mga nagbangotan.—ED.

Geodes Pagkaanindot nga artikulo! (Enero 22, 1989) Nagkoleksiyon akog mga mineral, nakakuha sa ideya gikan sa Pagmata! sa Disyembre 8, 1963. Ako karon dunay koleksiyon nga duolan sa 2,000 ka ispesimen. Apan, nasabot ko gikan sa artikulo nga ang mga geode moporma diha lamang sa sedementary rock. Husto ba kana?

P. K., Pederal nga Republika sa Alemanya

Oo. Sa pagkamatuod, ang “The New Encyclopædia Britannica” (ika-15ng edisyon, 1987) nagbatbat sa geode ingong “walay sulod nga mineral nga makita diha sa mga anapog ug sa ubang mga ‘shale’”—ang duha maoy mga porma sa sedimentary rock.—ED.

Buluhaton Usahay masina ako tungod kay ang akong mga igsoong babaye walay trabaho sa balay, apan ako nagtrabaho. Apan human nakabasa sa inyong “Mga Batan-on Nangutana . . .” nga artikulo bahin sa mga buluhaton (Enero 8, 1989), arang-arang na ang akong gibati. Ang usa sa mga parapo, kini nag-ingon: “Ang mahigugmaon nimong kooperasyon makahupay usab sa kalisdanan sa imong mga ginikanan.” Nahibalo ba kamo kon unsa? Sa hunahuna ko molimpiyo na ako sa awto karon! Ug kana ang kamatuoran.

J. W., Tinipong Bansa

“Mga Batan-on Nangutana . . .” Mitipas ako sa dalan nga ako gimatutuo, naghunahuna nga sobra ra ka istrikto ang akong inahan kon dili siya mosugot nga mogawas ako ug maglipaylipay sama sa ubang mga batan-on. Nakahimo sa butang nga gusto kong buhaton, midangat ako sa paghimo sa sala sa [seksuwal] nga imoralidad; kinahanglang pagakinabuhian ko ang akong tanlag ug mga pagbasol. Kon namati pa lamang unta ako sa akong inahan sa sinugdan pa ug misunod sa tambag sa mga artikulo sa “Mga Batan-on Nangutana . . .” wala unta ako niining mga problemaha karon. Buot ko lang ipasiugda ngadto sa ubang mga batan-on nga ang tambag sa mga artikulo sa pagkamatuod maoy alang sa ilang kaugalingong kaayohan ug mapuslanon ang pagsunod niini.

L. J., Inglaterra