Ang Hunahuna sa Bibliya

Homoseksuwalidad—Unsa ang Katungdanan sa Klero?

ANG mga homoseksuwal nga tim-os matinguhaon sa pag-alagad sa Diyos nangalibog. Sumala sa giingon sa usa: “Kon komitido ka sa simbahan ug nahitabong nasayran nga ikaw usab bayot, unsay tinuod nimong mga kapilian?”

Aron hisayran kon unsay gikinahanglan sa pagpahimuot sa Diyos, daghang homoseksuwal makataronganong modangop sa ilang mga klerigo. Kining “mga lalaking nagsutana” nagahatag bag hustong direksiyon? Unsa ang ilang katungdanan sa homoseksuwal nga komunidad? Unsa ang ilang pangunang katungdanan ngadto sa tanang tawo?

Ang mga Pari Obligado nga Motuboy sa mga Sukdanan sa Diyos

Ang Bibliya nagapahayag niini nga yano sa dihang kini nagaingon mahitungod sa karaang mga saserdote nga sila “gitudlo alang sa mga tawo ibabaw sa mga butang may kalabotan sa Diyos.” (Hebreohanon 5:1) Sa dihang si Abraham sa kakaraanan nag-alagad sa iyang pamilya niining paagiha, iya silang gitabangan sa “pagbantay sa dalan ni Jehova.”—Genesis 18:19.

Sa samang paagi, ang mga saserdote sa karaang Israel midulag usa ka hinungdanong bahin sa pagtuboy sa mga sukdanan sa Diyos. Ang mga saserdote obligado sa pagtabang sa nasod “nga magpadayon ingong katawhan ni Jehova.” (2 Cronicas 23:16) Karong adlawa, sama sa kaniadto, ang mga hawas sa Diyos obligado sa pagtabang sa ilang panon nga ‘magpadayon ingong katawhan sa Diyos’ ug ‘pagbantay sa dalan sa Diyos.’

Sa pagbuhat niini, kinahanglang tudloan nila ang panon sa Pulong sa Diyos. (Malakias 2:7) Ang klero ba napamatud-ang ‘mga mensahero sa Diyos,’ nga mitabang sa katawhan sa ‘pagbantay sa dalan sa Diyos’? Sa katibuk-an wala. Ug kini dayag ilabina sa isyu sa homoseksuwalidad.

Depektosong mga Mensahero, Peligrosong Giya

Sa pagkaprangka, ang Bibliya nagatunglo sa homoseksuwalidad. Walay gidaghanon sa binabang paglipatlipat ang makawagtang sa mga kasulatan nga sama sa Levitico 18:22 ug Roma 1:26, 27. (Tan-awa ang kahon.) Apan nga midapig sa mga uso karon kontra sa Bibliya, ang usa ka Heswitang pari miingon bahin sa homoseksuwal nga mga relasyon: “Kana lamang ang posibleng solusyon alang sa daghang tawo aron magkinabuhi nga malipayon ug makahuloganon.” Sa pagsunod sa samang panghunahuna, usa ka Episcopal nga obispo nagtawag sa homoseksuwalidad nga “butang nga dili makontrolar sa [mga homoseksuwal].” Apan ang Bibliya nagaingon bahin sa pila ka kanhi mga homoseksuwal sa unang siglo: “Kamo ingon niana kaniadto. Apan kamo nahinloan na.”—1 Corinto 6:9-11.

Gipakamatarong sa pipila ang ilang pagsupak sa mga sukdanan sa Bibliya pinasukad sa gugma. Usa ka pari miingon: “Ang gugma, ilabina ang gugma sa tagagawas ug sa sinalikway, mao ang bililhong pagsulay sa atong espirituwal nga kinabuhi.” Dayon siya mihinapos, “Ang homoseksuwalidad dili gayod unta usa ka isyu alang kang Kristo. Ang isyu alang kaniya mao unta: Kining mga tawhana nagakinabuhi ba, bisan kon unsa man sila, sa tinuod nga mahigugmaong paagi?”

Apan dili saypon sa Bibliya ang gugma nga pagkasentimental. Ang diyosnong gugma gitimbangan sa hustisya ug nagaapil sa pagdumot sa pagkadaotan. Ang Bibliya kusganong nagatambag, “Oh kamong mga nahigugma kang Jehova, dumti ang daotan.” (Salmo 97:10) Ang tinuod nga gugma nagaapil usab sa disiplina, kay “ang gihigugma ni Jehova iyang ginadisiplina.” (Hebreohanon 12:6) Busa, ang mga ministro obligado nga “magpahimangno pinaagi sa pagtulon-an nga maayo ug magbadlong niadtong nagasupak.” (Tito 1:9) Ug hinumdomi kini: Sa dihang ang karaang saserdote matinumanong magtuman sa iyang mga katungdanan, “daghan ang mitalikod sa sayop.”—Malakias 2:5, 6.

Nagadaot sa mga Sukdanan sa Bibliya

Apan sa malangkobon, ang klero karong adlawa nahisamag matinugotong mga ginikanan: mahadlok nga molatos sa ilang mga anak tungod kay ‘kana dili mahigugmaon.’ Busa sa tinagpulo ka katuigan gidaot sa klero ang mga sukdanan sa Bibliya. Ang resulta? “Tungod kay ang silot batok sa usa ka buhat nga daotan wala ipatuman dihadiha, kana ang hinungdan ang kasingkasing sa mga anak sa mga tawo bug-os napunting niana aron sa pagbuhat ug daotan.” (Ecclesiastes 8:11) Pananglitan, bisan pag ang opisyal nga baroganan sa Iglesya Katolika maoy batok sa homoseksuwal nga mga relasyon, gipakita sa usa ka surbi nga 55 porsiento sa tanang U.S. nga mga Katoliko nagtuo nga ang usa nga nagahimo sa homoseksuwal nga mga relasyon mahimo gihapong maayong Katoliko.

Ang kaamgid nga butang nahitabo ngadto sa karaang mga Israelinhon sa dihang ang mga saserdote wala magtuboy sa mga sukdanan sa Diyos. Siya miingon mahitungod kanila: “Sila nagpahilayo kanako . . . Ug sila wala magaingon, ‘Hain si Jehova?’” Ug ngano? Kay “ang mga saserdote mismo wala magaingon, ‘Hain si Jehova?’ Ug ang mga nagadumala mismo sa kasugoan wala makaila kanako.” (Jeremias 2:5-8) Ang propetang si Sofonias miingon: “Ang dili-matarong wala makailag kaulaw” tungod kay “ang mga saserdote mismo nagpasipala kon unsay balaan; sila nagtuis sa kasugoan.”—Sofonias 3:1-5.

“Isalikway ang Pagkadili-diyosnon”

Ang mga homoseksuwal nga buot moalagad sa Diyos kinahanglang moalagad pinasukad sa iyang mga sukdanan—mga sukdanan nga tin-awng gipadayag diha sa Bibliya. Karong adlawa, sama ra sa unang siglo, adunay mga homoseksuwal nga natabangan sa ‘pagpatay sa ilang mga sangkap sa lawas kon bahin sa pakighilawas, kahugawan, ug gana sa sekso.’ (Colosas 3:5) Itugot nato, dili kini sayon alang sa pila ka homoseksuwal, apan nakatuon sila sa pagpatay sa ilang mahilayong mga pangibog sama rang daghang heteroseksuwal kinahanglang magpatay sa ilang daotang mga pangibog alang sa kaatbang nga sekso. Ang duha ka pundok natabangan usab pinaagi sa regular nga pakig-uban sa tinuod Kristohanong kongregasyon, nga makapaluyo nila sa ilang tumong nga ‘isalikway ang pagkadili-diyosnon ug kalibotanong mga pangibog ug magkinabuhi uban ang pagkamatarong ug diyosnong pagkamahinalaron.’—Tito 2:12.

Ang mga klerigo nga nagasambog sa mga sukdanan sa Bibliya ug nagakonsentir sa sala wala maghatag ug kaayohan sa mga homoseksuwal. Tingali ilang ‘gitikon ang mga igdulongog,’ apan sila wala magtuman sa ilang katungdanan nga “iwali ang pulong.” Kini mao ang ilang katungdanan ngadto sa mga homoseksuwal—ug sa tanang tawo.—2 Timoteo 4:1-5.

[Kahon sa panid 13]

“Dili ka maghigda tipon sa lalaki sama sa paghigda tipon sa babaye. Kini usa ka dulumtanang butang.”—Levitico 18:22

“Tungod niining maong hinungdan gitugyan sila sa Diyos sa makauulaw nga mga gana sa sekso, kay ang ilang kababayen-an nag-ilis sa kinaiyanhong kagamitan sa ilang kaugalingon ngadto sa usa nga supak sa kinaiya; ug sa mao usab nga paagi ang lalaki mibiya sa kinaiyanhong paggamit sa babaye ug nasunog sa pangibog sa usag usa, ang mga lalaki uban sa mga lalaki, nga nagabuhat sa makauulaw ug nagadawat sa bug-os nga balos, nga maoy angay sa ilang pagkadaotan.”—Roma 1:26, 27