Ang Ilang Pagtuo Nagbalhin ug mga Bukid

UBAN sa maong pangunang-ulohan ang matag-adlaw nga mantalaan sa Buenos Aires nga Crónica, sa Disyembre 7, 1990, mitaho sa kombensiyon sa mga Saksi ni Jehova nga gihimo sa River Plate ug Vélez Sarsfield nga mga estadyum sa saker. Sa pagkatinuod, ang lig-on nga pagtuo maoy midasig sa duolan sa 6,000 ka langyawng delegado gikan sa kapig 20 ka nasod sa pagbiyahe abot gayod sa Argentina aron moduyog sa tinagpulo ka libo sa ilang mga igsoong taga-Argentina alang sa ilang “Putling Pinulongan” nga Kombensiyon. Ang maong katibuk-ang gidaghanon naglakip sa ubay-ubay lokal nga kongregasyon sa Koreanong mga Saksi. Ang langyawng mga delegado naggikan sa Britanya, Canada, Chile, Hapon, Espanya, Tinipong Bansa (apil ang Alaska), ug daghan pang ubang kanasoran. Unsay nagdasig nila? Ang ilang tinguha sa pagsuportar sa ikaduhang internasyonal nga kombensiyon nga gihimo sa Argentina.

Dedikasyon sa Bag-ong Bethel

Apan ang dagkong mga buhat sa pagtuo nahitabo na sa wala pa ang kombensiyon. Sa Oktubre ang bag-ong sangang buhatan sa Argentina sa Asociación de los Testigos de Jehová gidedikar sa miduawng mamumulong nga si Theodore Jaracz sa Nagamandong lawas sa mga Saksi ni Jehova. Ang bag-ong residensiya gitukod sa 259 ka internasyonal ug 690 taga-Argentina boluntaryong mga trabahante. Ang Bethel, o “Balay sa Diyos,” nga nahimutang sa bahin sa Buenos Aires nga ang kadalanan gilumbayan ug kakahoyan, may 129 ka kuwartong puy-anan ug usa ka kan-anang lawak alang sa 300. Kay adunay kapin sa 84,000 ka Saksi sa Argentina ug purohan sa dako pang pag-uswag, walay duhaduha nga kining bag-ong tinukod sa sangang-buhatan sa dili madugay maokupar.

“Mga Saksi ni Jehova Uban sa Putling Pinulongan”

Ang temang “Putling Pinulongan” sa internasyonal nga kombensiyon nakapaikag sa daghan, apil sa mga hawas sa media. Ang Crónica nagdala sa pangunang-ulohan sa ibabaw ug nagkutlo sa kabatbatan sa “putling pinulongan” sumala sa gipahayag sa usa ka mamumulong: “Ang tukmang pagsabot sa kamatuoran mahitungod sa Diyos ug sa iyang katuyoan alang sa yuta ug sa tawo, sumala sa nasulod sa Bibliya . . . Kon hikat-onan sa usa ang pagsultig putling pinulongan, nan ang iyang panghunahuna, iyang sinultihan, ug iyang kagawian masentro sa pag-ila sa Diyos ingong bugtong matuod nga Diyos.”

Ang Metropolitan Buenos Aires, usa ka haluag nga siyudad nga may kapin sa napulo ka milyong tawo, nahibalo pag-ayo sa kombensiyon diha sa iyang taliwala. Sa unom ka adlaw, ang regular 40-segundong sibya sa radyo ug TV, nga gimando sa balaod, libreng nagsibya sa okasyon. Ang programa sa Sabado nakadani sa prensa tungod sa pagbawtismo sa bag-ong mga Saksi. Nga makita sa mga tumatan-aw, 3 ka pool gitukod sa matag tumoy sa duha ka estadyum, apan bisan ang 12 ka pool wala paigo sa pagtapos sa bawtismo sa eksaktong oras alang sa programa sa hapon. Busa ang mga pool sa River Plate Stadium gibalhin aron dili makita. Sa River Plate, 1,363 ang nabawtismohan ug sa Vélez Sarsfield, 748, nga may katibuk-ang gidaghanon nga 2,111! Ang pangunang-ulohan sa Crónica mabasa: “Laing Kahibulongang Pagpahayag sa Pagtuo sa River ug sa Vélez​—Mga Saksi Nabawtismohan.” Ang tumatambong sa duha ka kombensiyon may katibuk-ang gidaghanon nga kapin ug 67,000.

Internasyonal nga Kinaiyahan

Samtang ang usa mitadlas sa buloknong mamiminaw, ang pisikal nga mga kalainan sa rasa ug kultura dayag. Dihay usa ka taga-Argentina nga igsoong babaye nga nagkalipay sa pag-inom sa iyang yerba maté, tsa nga suyopon pinaagig metal nga bombilla, o tubo, gikan sa usa ka espesyal nga kahoy nga kopa. Taliwala sa 800 gikan sa Espanya mao ang mga igsoong babaye nga nagsul-ob sa nindot nga mga biste sa maong nasod. Ang grupo nga 900 nga gikan sa Hapon naglakip sa pipila ka babayeng nagsul-ob sa tradisyonal nga mga kimono. Usa ka delegado nga taga-Mexico nagsul-ob ug itom nga amerkana ug sa nabatasang lapad-ug-ngilit Mexicanong kalo. Hinunoa, bisan pa nianang tanang panggawas nga kalainan, ang espirituwal nilang panaghiusa dayag sa tanan. Sa pagkatapos sa asembliya, daghan ang nagbayloayg mga handumanan​—mga badge sa kombensiyon, mga pluma, mga postcard​—bisan unsa nga magpahinumdom niadtong anindot nga okasyon.

Ang espiritu sa asembliya nahiabot pa sa mga tugpahanan. Kadto dayag ilabina sa Miami, Florida, U.S.A., diin daghang pundok nagkatagbo sa pag-agpas sa konektadong mga biyahe. Sa pagpanguli gikan sa Buenos Aires, ang usa ka dakong grupo gikan sa Tinipong Bansa nakahibalag sa usa ka grupo nga taga-Hapon, nga nagpaingon sa Mexico. Sa wala madugay, ang tanang Amerikanong magbibiyahe nasangit sa estorya sa ilang masadyaong Hapones nga mga kauban. Ang ubang mga tawo sa dapit nangahibulong ug naikag sa nagkahitabo. Kadto mao ang mga Saksi nga nag-ambitay sa espiritu sa ilang “putling pinulongan”!

Ang programa sa kombensiyon ug ang internasyonal nga panag-uban talagsaon kaayo nga sa pagkatapos sa kombensiyon sa Dominggo, walay usang buot mobiya sa mga estadyum. Ang lainlaing mga nasodnong pundok takulahaw nga misugod sa pag-awit ug mga awit sa Gingharian nga wala duyogig instrumento diha sa lainlain nilang mga pinulongan ug nagpakayab sa ilang mga panyo sa usag usa. Kadto nagpadayon sa halos usa ka oras una pa mamauli sa kataposan ang malipayong mga kombensiyonista. Sumala sa giingon sa usa ka taga-Argentina nga letratista sa prensa nga dili dali nga makadayeg: “Wala pa kini mahitabo sukad sa Argentina . . . talagsaong emosyon ug talagsaong kamabination!”

[Mga hulagway sa panid 15]

Kapig 67,000 mitambong sa duha ka “Putling Pinulongan” nga mga Kombensiyon sa mga Saksi ni Jehova sa Buenos Aires, Disyembre 6-9, 1990

[Mga hulagway sa panid 16]

Ang bag-ong mga tinukod sa sangang-buhatan sa Argentina andam nang moalagad sa kapig 84,000 ka Saksi