Gikan sa Among mga Magbabasa
Sugal Bisag ang inyong mga seryal nga artikulo bahin sa “Panugal—Mapuslanon Ba?” (Hunyo 8, 1992) dayag nga impormatibo ug tukma sa panahon, walay gihisgotan bahin sa pagpusta diha sa mga dula. Dili sama sa pagdulag mga baraha, loterya, slot machines, ug uban pa, ang pagpusta sa mga dula mahimong himoon sa bisan unsang panahon, adlaw o gabii. Dili na kinahanglan mobiya ka pa sa imong trabaho. Ako nagtuo nga kining matanga sa sugal mas kaylap kay sa matang nga gihisgotan sa inyong mga artikulo. Ang pagpusta sa mga dula nagausik dili lamang sa salapi kondili usab sa bililhong panahon nga imong magugol sa pamilya. Kining panahona gigamit sa pagsubay sa mga puntos ug sa resulta sa mga dula. Ang pagsugal diha sa mga dula maoy laing makasubong komentaryo niining sistemaha sa mga butang.
C. Y., Tinipong Bansa
Salamat sa inyong paghatag kanamog katin-awan bahin sa sugarol nga dili-makapugong. Napugos ako sa pag-antos sa kasakit nga gipadako sa usa ka sugarol nga dili-makapugong. Ang akong inahan maoy nag-inusarang ginikanan nga may lima ka anak. Siya tigbingo unom ka gabii sa usa ka semana, kada semana, ug nagpadayon sa pagdula niana hangtod niining adlawa. Ang sugal mao gayoy mauna. Kami mohangyo kaniya sa paggugol ug panahon uban kanamo, sa pagluto kanamog pagkaon, apan sa walay kapuslanan. Iyang gisakripisyo ang iyang mga anak alang sa bingo. Salamat sa pagtabang kanako sa paghatag dugang katin-awan kon nganong gibuhat niya kini.
R. E., Tinipong Bansa
Kurpiyo Buot kong pasalamatan kamo alang sa artikulong “Mga Batan-on Nangutana . . . Nganong ang Akong Kurpiyo Istrikto Kaayo?” (Mayo 22, 1992) Sa dili madugay ako mag 17 na, ug abi nakog walay katarongan ang paghatag sa akong inahan ug kurpiyo kanako nga alas 11:00 s.g. Mga pipila ka gabii nga gabii na akong mipauli tungod sa kawalay pagtagad, ug ang akong inahan nasuko kaayo! Akong giapresyar ang inyong pagpatin-aw kon nganong ang mga ginikanan dili mahimutang ug mabalaka, nahadlok alang sa among kaayohan kon kami dili makapauli sa hustong panahon. Tinuod nga hinakog kadto alang kanako nga nakapatunghag wala kinahanglanang kabalaka.
O. C., Tinipong Bansa
Crossword Puzzles Buot kong pasalamatan kamo sa pagpatik sa crossword puzzles diha sa Pagmata! Pangandoy lamang nako nga unta duna pay daghan niini. Ako nagtuon sa Bibliya uban sa mga Saksi ni Jehova, apan ang akong bana dili interesado. Siya dili tigbasa, ug lisod siyang dasigon sa pagbuhat niana. Apan nagustohan niya ang pagdula sa inyong crossword puzzles! Ngani, kami nagadula niana, nga maayo kaayo alang kanamo. Salamat kaninyo.
E. X. E., Brazil
Ang “Pagmata!” magpadayon sa panalagsang pagpatik sa crossword puzzles.—ED.
Pagkaulay Ang artikulong “Mga Batan-on Nangutana . . . Nganong Magpabiling Ulay?” (Abril 22, 1992) maoy usa ka dakong tabang kanako. Nabuong ang akong dungog sa wala pa ako magminyo. Bisag niadtong panahona kulang pa ako sa kahibalo sa mga kasugoan ni Jehova, nahasol kaayo niadto ang akong tanlag, ug ako nag-antos sa emosyon. Nakahilak ako sa gibasa ko ang artikulo. Makapahupay ang masayod nga ako nahinloan na sa mga mata sa Diyos. Pagkamaayo unta kon ang mga batan-on mobasa niining artikuloha ug mohukom nga magpabiling mga ulay! Pangandoy na lamay ako nga unta nakapabilin akong ulay!
M. S., Puerto Rico
Uniberso Pagkagamay ra gayod nato atubangan sa Diyos! Mao kanay inyong gipakita diha sa artikulong “Pagtuki sa mga Tinagoan sa Uniberso.” (Marso 22, 1992) Anam-anam nga gihikyad sa mga teleskopyo sa tawo ang walay-kinutobang uniberso. Ang ilang mga nadiskobrehan nagpamatuod kanato nga dunay usa nga mas dako ug mas maalamon kay kanato nga naglalang niining misteryosong uniberso ug sa mga balaod nga nagmando niana. Kita angay nga magpaubos sa pagdawat niini.
M. R. S., Brazil